Paltiing 3 - Ya Baru nga Tulag

To surat para iya bungguy mamati ka Sardis

¹ Ket kinunen manin nito arig nga toley iyaken, “Idi ya isurat mu iya anghe̍l nga agay-aywan iya bungguy mamati ka Sardis: “Itu yan ya kunen niya natalec kadiya pitu nga ispiritu niya agkapitu nga Ispiritu ne̍ Apu Diyus, se̍ ya natalec pe̍ kadiya pitu nga bitbituwen: Emmuc met diya wangwangel mu. Se̍ emmuc pe̍ nga agdindinamag nga paiturayan ka kanu iya biyag nga e̍cde̍ ne̍ Apu Diyus. Ngem ya kinapudnu na, naibilang ka nga natey yin!

² Itu nga masapul lugud nga agnakem kan, ket pabilgem ya e̍teng pekkem nga nabaru nga uwed ikew, ta kaynun no mapukaw gapu iya kinakapsut na. Ta emmuc nga bekken nga kustu iya imatang niya Diyus ku diya wangwanglem.

³ Itu nga laglagipem kuma ngarudin dito naad-adal mu, se̍ dito nagicgicnam. Tungpalem mun, ta agbabawi ka kuma ngarudin kadito basbasul mu. Ngem no madi ka agnakem, umbe̍t naka met dusaen nin, ket arig nga umbe̍t niya isa nga mannanakew ya umbe̍t ku ikew, ta madi ka maem-emmuwan no nungey.

⁴ “Ngem uwed duduma dakayu enna Sardis, nga nadalus da pekkem, ta di da pinarugitan ya kawwes da. Ket igida diya makibulun nad iyaken nga sikakawwes da ka puraw, ta maikari da met nga makibulun iyaken.

⁵ Agten nad idi nga puraw ya kawwes diya amin nga maibilang nga mangabac. Ket pulus nga madic nad udasen ya nagan da nga naisurat iya libru nga pakaisuratan diya nagnagan diya mae̍cdan ka biyag nga agnanayun. Ket ipakaemmuc nad nga siaannamung iya imatang niya Amac se̍ kadiya anghe̍le̍s na, nga didi nga sikakawwes ka puraw, ket kuwac.

⁶ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati.”

To surat para iya bungguy mamati ka Pilade̍lpiya

⁷ “Ket idi ya isurat mu iya anghe̍l nga agay-aywan iya bungguy mamati ka Pilade̍lpiya: “Itu yan ya kunen niya awan basul na se̍ napudnu iya imatang ne̍ Apu Diyus. Igina pe̍ ya agiturayin iya pagiturayan nito Ari Dabid, nga arig nga igina ya mangik-ikem iya tulbec niyan nga pagariyan. Ket no ilukat na ya giset na, ket pulus nga awan makaigiset tin. Ket no igiset na, awan met makailukatin. Agten idi ya kunen na:

⁸ Emmuc met diya wangwangel mu. Itu nga e̍cde̍c ya gundaway mu nga maiyarig iya silulukat nga gagayangan nga awan makaigiset. Emmuc met nga orey e̍teng ngas ya kabaellam, managtungpal ka latta iya kagic, se̍ madi nac met nilibac.

⁹ “Denggem yani nga wanglec para ikew: No maipanggep kadito kamkameng niya bungguy ne̍ Satanas nga agbusid nga agkunen nga Hudyu da kanu orey no bekken, ket ipasanguc da ikew, se̍ pagdayawec da ikew, ket isuruc nad igidan ya panangipateg ku ikew.

¹⁰ Ket no maipanggep ikew, gapu ta nipangag mu to nibagbagac ikew nga aganus ka kuma, ket isalakan naka nad met iya timpu niya panagrigrigat nga umbe̍t nad iya amin nga lubung tasun masigir diya toltoley iya lubung.

¹¹ Ket iyaken, dagus sac mettin nga umbe̍t iya di mabayag. Itu nga alwadam ngarud nga nalaing diya nabaru nga uwed ikew, tasun awan makaagaw iya balangat mu nga pakaidayawam.

¹² “Ket diya maibilang nga mangabac, isaad ku nad nga maiyarig iya isa kadiya adigi niya te̍mplu niya Diyus ku. Ket diya agten iyan, madi da nad rumwarin, ket isurat ku nad igida ya nagan niya Diyus ku, se̍ ya nagan niya siyudad niya Diyus ku, nga itu ya kabarbaru nga He̍rusale̍m nga dumsag nad nga gayat ka langit, ta aggayat iya Diyus ku. Ket isurat ku nad pe̍ igida ya kabarbaru nga nagan ku.

¹³ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati.”

To surat para iya bungguy mamati ka Lawdisiya

¹⁴ “Ket idi ya isurat mu iya anghe̍l nga agay-aywan iya bungguy mamati ka Lawdisiya: “Itu yan ya kunen niya maawagan ka Ame̍n, nga igina ya mapagtalkan se̍ napudnu nga mangipakaemmu iya pudnu, ket igina pe̍ ya pagtaudan niya amin nga pinarsuwa ne̍ Apu Diyus:

¹⁵ Ket emmuc met diya wangwangel mu. Bekken ka nga naawanan ka panamati, nga arig ngas nga nalam-ec nga kanen. Se̍ bekken ka pe̍ nga nagaget iya panamatim, nga arig nga napudut nga naimas nga kanen. Ya nabarbaru met iyaken, ket no nalam-ec ka, ket nalam-ec ka kuma nga tutu. Winno no napudut ka, ket napudut ka kuma nga tutu.

¹⁶ Ngem gapu ta napudut ka ngas ka e̍teng, ket gabay naka ngas nga iyola!

¹⁷ “Ta kunem nga nabacnang kan se̍ nanam-ayin ya panagbiyag mu, ket awan kunem nga masapul mun. Ngem madi ka met madlaw nga no iya imatang ku, dake̍c se̍ kackaasi ya kasasaad mu, se̍ ibilang naka nga napanglaw, nakulap se̍ isa nga awan met luput na.

¹⁸ Itu nga ipatigmaan ku ikew, nga iyaken kuma ya pagnginaam mun ka balituc nga nadalusan gapu iya pannakailasat na ka apuy, tasun bumacnang ka nga tutu. Se̍ ngumina ka kuma pe̍ iyaken ka puraw nga luput nga pagkawwes mu, tasun madi masingen ya nakal-alyew nga kinalamulamum. Ket ngumina ka kuma pe̍ iyaken ka agas mata nga iyagas mu iya matam, tasun makasingen ka.

¹⁹ Ket maemmuwam kuma nga balakadac se̍ palinteggec met diya ay-ayatec. Dikad pe̍ agpasnec ka kuma ngarud, ket ibabawi mun diya basbasul mu.

²⁰ Denggem yani: Uwed dac kun iya ruwar niya gagayangan nga tumogtogtogin. Ket no uwed makagicna iya timec ku, se̍ no ilukatan nac, ket umuneg gac ngarud iya baley na, se̍ agsangu kami nga manganin.

²¹ “Ket diya maibilang nga mangabac, e̍cdac da nad ka kalinteggan da nga makipagtugew iyaken iya trunuc, nga pagturayac. Ta iyaken pe̍ ya nangabac itun, ket ita, uwed dac kun nga makipagtugew nga makipagturay iya Amac iya trunu na.

²² “Ket diya amin nga uwed pannakaawat na, tandaanan da kuma ngarud yan nga ipakaemmu niya Ispiritu kadiya bungguy diya mamati,” kunen na iyaken.