Paltiing 22 - Ya Baru nga Tulag

Ya danum nga mange̍cde̍ ka biyag

¹ Ket itun, uwed manin nipasingen nito anghe̍l iyaken, nga wangag nga uwed danum na nga mange̍cde̍ ka agnanayun nga biyag. Ket nakalitlitaw to danum na, nga agten met iya kristal nga masarang. Ket to ayus na, timaud ito trunu nga pagtugawan ne̍ Apu Diyus se̍ ya Urbun Karne̍ru.

² Ket agayus met iya tengnga nito kalsada ito siyudad. Ket iya agsidulmang nito wangag, uwed kayu nga pagbiyagan. Uwed met panamisic niyan nga kayu nga mame̍nsangapulu ket duwa iya unus isa nga dagun, ta binulan met nga mamisic. Ket diya eddon na, agsirbi ka pangpakaradkad kadiya toltoley diya nasnasyun.

³ Ket awan nad pulus mailunud iya imatang ne̍ Apu Diyus antuni nin. Ket to trunu nga pagtugawan ne̍ Apu Diyus se̍ ya Urbun Karne̍ru, itu nga gennung ya uwed nad iyan nga siyudad. Ket diya agsirsirbi e̍ Apu Diyus, agdaydayaw da nad igina antuni.

⁴ Masingen da nad ya rupa na mettas, ket maisurat nad ya nagan na iya muging da.

⁵ Awan ngarud gabi antuni nin, itu nga madi da nad masapul ya darang niya dilag winno ya sinagin. Ta e̍ Apu Diyus mettas ya mangwada nad igidan. Ket agbiyag da nad nga arig nga ari yin nga agturay ka agnanayun nga awan patingga na.

Ya umbe̍tan manin ne̍ Apu Je̍sus iya lubung

⁶ Ket kinunen manin nito anghe̍l iyaken, “Pudnu se̍ siguradu nga matungpal didi nga kagi. Ket ya Apu, nga Diyus nga mange̍cde̍ iya panpanunut diya mammadtu gapu iya Ispiritu na, igina mettas ya nangibon iya anghe̍l na ngi nin. Nibon nac ngarud tasun ipakaemmuc kadiya agsirsirbi igina diya masapul nga mapasamac iya di mabayag,” kunen na.

⁷ “Dumngeg kayu!” kinunen ne̍ Apu Je̍sus. “Dagus sac ngarud nga umbe̍t iya di mabayagin! Itu nga pakaragsakan ngarud diya agtungpal kadiya paltiing nga nisurat mu iyan nga libru!” kunen na.

⁸ Ket iyaken nga Juan ya nakagicna se̍ nakasingen kadidi nga naisurat idi nga libru. Ket ito nagicnac se̍ nasingec didi, naglakeb bac ito sangu nito anghe̍l nga nangipasingen kadidi iyaken, ta agdaydayaw wac kuma igina.

⁹ Ngem kinunen na iyaken, “Bay-am yan! Ta isa ngac ngas met nga agsirsirbi e̍ Apu Diyus, nga agten mettas ikew se̍ dito kakabsat mu nga mammadtu se̍ diya amin nga agtungpal kadiya nisurat mu iyan nga libru. E̍ Apu Diyus ngas met ya pagdayawam!” kunen na.

¹⁰ Ket kinunen na pe̍ iyaken, “Madi ka ilimed diya paltiing nga nisurat mu iyan nga libru, ta dandani yin ya pannakapasamac da.

¹¹ Ket agten idi diya ibilin kun: Diya dake̍c nga toley, basta dake̍c latta ya wangwanglen da. Ket diya bekken nga nadalus nga toley, basta diya bekken nga nadalus nga banbanag ya wangwanglen da. Ngem diya nalinteg nga toley, diya nalinteg latta ya wangwanglen da. Ket diya nadalus nga toley, diya nadalus ngas nga banbanag ya wangwanglen da,” kunen nito anghe̍l.

¹² Agten idi ya kunen ne̍ Apu Je̍sus: “Ngarud, dagus sac met nga umbe̍t iya di mabayagin. Ket e̍lbe̍t ku nad ya supapac nga ipaay kun iya tunggal isa, maikanatad kadiya winangel da.

¹³ Iyaken ya pangrugiyan se̍ ya panggibusan niya amin, ya kaonaan se̍ ya kaodiyan, ya pagtaudan se̍ ya pagtungpalan niya amin,” kunen na.

¹⁴ Nagasat ngarud diya mangpadalus iya sutana da, tasun mae̍cdan da ka kalinteggan nga mangan iya bisic nito kayu nga pagbiyagan enna siyudad, se̍ tasun mapalubusan da nga lumnec kadito ruwangan nito bakud nga umuneg ito siyudad.

¹⁵ Ngem diya malaskig nga gennung ito siyudad, itu diya bekken nga nadalus nga maiyarig ngas ka asu, se̍ diya makibiyang kadiya sacsairu winno iya panaggamut, se̍ diya makikamalala, se̍ diya pumapatey, se̍ diya agdaydayaw kadiya didiyusen se̍ diya mangipalubus ka busid winno diya managbusid pe̍.

¹⁶ “Iyaken nge̍ Je̍sus. Ket iyaken ya nangibon iya anghe̍l ku ikew, tasun ipakaemmu na diya kinapudnu maipanggep kadidi nga banbanag para kadiya bungbungguy diya mamati. Iyaken ya nagtaud iya kapututan nito Ari Dabid, se̍ iyaken pe̍ ya maawagan ka bituwen nga aggundaway iya parbangun,” kunen ne̍ Apu Je̍sus.

¹⁷ Ket, “Umbe̍t ka kuma ngin!” kunen met niya Ispiritu ne̍ Apu Diyus se̍ ya Nubya. Ket diya makagicna idi nga ayab, kunen da kuma pe̍, “Umbe̍t ka kuma ngin!” Ket diya mewwew, umadenni da kuma ngarud nga makiinum, ta mapalubusan mettin diya mayat nga makiinum ito danum nga mange̍cde̍ ka biyag, ket awan pe̍ bayad na.

Ya panggibusan

¹⁸ Iyaken mettas ya mangipatigmaan nga siiinget kadiya amin nga makadamag kadiya paltiing nga naisurat idi nga libru, nga no uwed mangakum iya naisurat iya libru nga idi, ket iraman nad met ne̍ Apu Diyus kadiya panagrigat nga naisurat idi nga libru.

¹⁹ Ket no uwed mangkessay ka orey nagan na nga naisurat idi nga libru maipanggep kadiya paltiing na, ket ipac nad ne̍ Apu Diyus ya kalinteggan na nga mangan iya bisic niya kayu nga pagbiyagan, se̍ ya kalinteggan na nga mairaman ka He̍rusale̍m nga siyudad nga ipatpateg ne̍ Apu Diyus, nga itu diyan to kayu se̍ siyudad nga naisalaysay idi nga libru.

²⁰ Ket ya nangipakaemmu iya kinapudnu maipanggep kadidi nga banbanag, kunen na, “Tutu met nga dagus sac nga umbe̍t iya di mabayagin!” kunen na met. Ket idi ya kunec: Agten iyan kuma ngarudin, ta umbe̍t ka kuma ngin, Apu Je̍sus!

²¹ Sapay kuma ta uwed ya siaayat nga asi ne̍ Apu Je̍sus kadiya amin nga toley ne̍ Apu Diyus. Agten iyan kuma ngarudin.