Paltiing 21 - Ya Baru nga Tulag

Ya kabarbaru nga lubung

¹ Ket itun, uwed nasingec nga kabarbaru nga lubung, agraman ya abac lawa se̍ ginet, ata nalabes sin to nona nga abac lawa, se̍ to nona nga ginet pe̍ yin. Ket awan met baybayin.

² Ket nasingec itun ya He̍rusale̍m nga siyudad nga ipatpateg ne̍ Apu Diyus, nga itu ya kabarbaru nga He̍rusale̍m. Ket agpaspasegged mettin yan nga siyudad manipud ka langit, nga gayat e̍ Apu Diyus. Ket naisagana nga napaw-isin to siyudad, nga arig met nga isa nga nubya nga nakakawwes ka napaw-is tasun maisabet iya nubyu na iya pakalun da.

³ Ket nagicnac itun ya isa nga nabileg nga timec nga gayat ito trunu ka langit, nga kinunen na, “Kad yan! Uwed kadiya toltoley yin ya pagedyanan ne̍ Apu Diyus, ket makipagedyan met nge̍ Apu Diyus igidan. Ket iya agten iyan, igida nad ngarud diya toley ne̍ Apu Diyus. Ket e̍ Apu Diyus, makibulun mettas igida, ket igina ya Diyus da.

⁴ Ket liwliwaen na da nad nga punasen na diya amin nga luwa da. Awan nad matey yin, winno agladingitin. Awan nad pe̍ agberritin winno agrigatin, gapu ta nakabas mettin dito daan nga banbanag,” kunen na.

⁵ Ket to nakatugew ito trunu, kinunen na, “Singem! Pabaruwec kun ya amin nga banbanag!” kunen na. Ket kinunen na pe̍, “Isurat mu ya nibagac, ta pudnu se̍ siguradu nga matungpal diyan nga kagi,” kunen na.

⁶ Ket kinunen na manin iyaken, “Natungpal ngarud diyan nga kagi yin! Iyaken met ya pangrugiyan se̍ ya panggibusan niya amin, ya pagtaudan se̍ ya pagtungpalan niya amin. Ket diya mewwew, painumec da iya danum niya ubbug nga mange̍cde̍ ka biyag, nga awan bayad na.

⁷ Itu yan ya tawid nga maipaay kadiya mangabac. Ket iya agten iyan, iyaken nad ya Diyus da, ket igida diya anac ku.

⁸ Ngem dake̍c nad nga gennung ya pagbanagan diya mangiyalyew iyaken, se̍ diya madi mamati iyaken, se̍ diya narugit ya nakem da, se̍ diya pumapatey, se̍ diya makikamalala, se̍ diya makibiyang kadiya sacsairu winno iya panaggamut, se̍ diya agdaydayaw kadiya didiyusen, se̍ diya amin nga managbusid. Ta ya pagbanagan didi, ket maipisuc da nad ngarud ito dackel nga edyan niya gumilgilab nga apuy se̍ burbura nga asupre̍, nga itu ya maikadduwa nga pannakatey,” kunen na.

Ya kabarbaru nga He̍rusale̍m

⁹ Ket uwed met imadenni iyaken itun nga isa kadito pitu nga anghe̍le̍s nga uwed igida dito pitu nga malukung nga napnu kadito pitu nga modi nga panagrigat itun. Ket to anghe̍l, kinunen na met iyaken, “Umbe̍t ka, ta ipasingec ikew ya Nubya nga asawaen niya Urbun Karne̍ru,” kunen na.

¹⁰ Ket gapu iya pannakabalin niya Ispiritu ne̍ Apu Diyus, nipen nac ngarud to anghe̍l iya isa nga dackel se̍ nangudu nga tageytey. Ket nipasingen na iyaken ya He̍rusale̍m, nga itu ya siyudad nga ipatpateg ne̍ Apu Diyus. Ket agpaspasegged met to siyudadin manipud ka langit, nga gayat e̍ Apu Diyus.

¹¹ Agdardarang met to siyudad gapu iya kauwed niya dayag ne̍ Apu Diyus. Sumilsilap ngarud nga arig nga napateg nga unay nga batu, nga agten iya napaw-is nga batu nga haspe̍, no masarang kuma nga agten iya kristal.

¹² Ket uwed napuskul se̍ nangudu nga bakud iya agle̍cbut nito siyudad. Ket uwed sangapulu ket duwa nga ruwangan nito bakud, se̍ uwed pe̍ sangapulu ket duwa nga anghe̍le̍s nga agbanbantay kadito ruwangan, nga sagge̍sa ya tunggal ruwangan. Ket naisurat kadito ruwangan diya nagnagan dito sangapulu ket duwa nga anac nito Israe̍l.

¹³ Uwed tellu nga ruwangan iya dumna iya daya, uwed tellu iya amyanan, tellu iya abagatan, se̍ tellu iya ellod.

¹⁴ Ket to bakud nito siyudad, naisimpa ka sangapulu ket duwa nga batu nga itu ya nakaisaadan na. Ket naisurat kadidi diya sangapulu ket duwa nga nagnagan diya sangapulu ket duwa nga apustule̍s niya Urbun Karne̍ru.

¹⁵ Ket to anghe̍l nga nakitkitbar iyaken, uwed rurukud na nga balituc, nga itu ya pagrukud na ito siyudad, se̍ kadito ruwangan na se̍ ito bakud na.

¹⁶ Kuwadradu met ya tabas nito siyudad, ta agpapada ya kadeddu dito awanan se̍ suba na. Ket rinukud ngarud nito anghe̍l to siyudad ito pagrukud nan, ket duwa nga ribu ket eppat nga gasut nga kilume̍trus met to kadeddu na. Ket agten met ya kalesdac se̍ kangudu nito siyudad, ta agpapada pe̍ ya rukud da.

¹⁷ Ket rinukud na pe̍ to kapuskul nito bakud nito siyudad, ket ennem nga pulu nga mitrus, no ya rukud tida nga toley, ta itu pe̍ to inusar nito anghe̍l.

¹⁸ Ket naariman ka napaw-is nga batu nga haspe̍ to bakud. Ket to siyudad, naariman met ka balituc nga awan pulus lauc na, nga agten mettas iya sarming nga masarang.

¹⁹ Ket dito batu nga nakaisaadan nito bakud nito siyudad, nabandusan kadiya agkakangina nga batu. Haspe̍ ya naibandus ito mona nga batu nga nakaisaadan nito bakud, ket sapiru ya uwed ito maikadduwa, kalse̍dunya ito maikatlu, e̍sme̍ralda ito maikapat,

²⁰ sardunika ito maikalima, karne̍lya ito maikanem, krisulitu ito maikapitu, be̍rilu ito maikawalu, tupasiyu ito maikasiyam, krisuprasiyu ito maikasangapulu, hasintu ito maikasangapulu ket isa, ket amatista ya uwed ito maikasangapulu ket duwa nga nakaisaadan nito bakud.

²¹ Ket pe̍rlas met dito sangapulu ket duwa nga ruwangan nito siyudad, nga naariman ya tunggal ruwangan ka is-isa nga pe̍rlas. Ket ya kalsada nito siyudad, naariman met ka balituc nga awan pulus lauc na, ket masarang met nga agten iya sarming.

²² Ket nadlaw ku nga awan met te̍mplu ito siyudad, ta e̍ Apu Diyus, nga Apu nga Mannakabalin ka amin, se̍ ya Urbun Karne̍ru, igida mettin ya pagdaydayawan antuni.

²³ Se̍ madi met masapul ya sinag winno ya bulan nga mangwada ito siyudad, ta ya dayag mettas ne̍ Apu Diyus ya mangwadwada antuni nin. Ket ya Urbun Karne̍ru, igina met ya pagdilag niyan nga siyudad.

²⁴ Ket diya toltoley kadiya nasnasyun iya lubung, mawadaan da nad iya wada niyan nga siyudad. Ket diya ar-ari iya lubung, mawe̍ da nad ipaay ya kinaturay da ito siyudad.

²⁵ Ket silulukat nga pe̍yeng diya ruwangan niyan nga siyudad, ta awan met gabi antuni nin.

²⁶ Ket diya toltoley, mawe̍ da nad ngarud ipaay ya kinaturay se̍ kinadayaw diya nasnasyun da iyan nga siyudad.

²⁷ Ngem awan pulus makauneg nad antuni nga orey nagan na nga bekken nga naibilang nga nadalus iya imatang ne̍ Apu Diyus. Se̍ madi nad pe̍ makauneg antuni diya agwangwangel ka nakal-alyew, winno diya agbusbusid. Ta diya makitipun nad iyan nga siyudad, diyan nas naisurat ya nagan da ito libru niya Urbun Karne̍ru, nga itu ya nakaisuratan diya nagnagan diya mae̍cdan ka biyag nga agnanayun.