Paltiing 20 - Ya Baru nga Tulag

Ya pannakakawar ne̍ Satanas ka sangaribu nga dagun

¹ Ket itun, uwed nasingec nga isa nga anghe̍l nga agpaspasegged nga gayat ka langit. Ket ic-icman na ya isa nga kawar se̍ ya tulbec nito nakaun-uneg nga ebbut iya ginet.

² Ket tiniliw mettin nito anghe̍l to dragun, nga itu to sinan-malaga nga uwed itun pekkem, nga itu mettas ya diyablu winno Satanas. Ket niraked met nito anghe̍l, tasun madi makatalew ka unus sangaribu nga dagun.

³ Ket nidegsut nito anghe̍l ito nakaun-uneg nga ebbut, se̍ na tinulbekkan ya giset na. Ket minarkaan na ka nikapet na iyan nga giset, tasun madi makaruwar to dragun nga mangallilaw manin kadiya toltoley kadiya nasnasyun, agingga ka madi aggibus ya sangaribu nga dagun. Ngem kalpasan niya sangaribu nga dagun, masapul nga mawayawayaan manin to dragun ka di mabayag nga timpu.

⁴ Ket uwed da pe̍ nasingec itun nga truntrunu. Ket nagtugtugew kadito truntrunu diya nae̍cdan ka turay nga mangukum. Ket nasingec met pe̍ diya kararuwa dito napatpatey nga naputul diya ulu da, gapu iya panangipakaemmu da iya pudnu maipanggep e̍ Je̍sus se̍ iya kagi ne̍ Apu Diyus. Didi diya madi pe̍ nagdaydayaw itun ito nakan-ansing nga animal se̍ ito bultu na, se̍ madi da pe̍ pinamarkaan diya muging da winno ima da ito marka nito nakan-ansing nga animal. Ket didi nga toley, napagungar da mettin, se̍ da nakipagturay e̍ Kristu ka unus sangaribu nga dagun.

⁵ Ket itu yani ya mona nga panagungar diya natey. Ngem dito duduma nga natey, madi da pekkem nagungar agingga ka madi pekkem nalpas to sangaribu nga dagun.

⁶ Nagasat se̍ nadayaw ngarud iya imatang ne̍ Apu Diyus diya mairaman idi nga mona nga panagungar. Ta awan pannakabalin niya maikadduwa nga pannakatey igida, no di lugud agbalin da met nga agsirsirbi e̍ Apu Diyus se̍ e̍ Kristu, ket makipagturay da igina ka sangaribu nga dagun.

Ya pannakaipisuc ne̍ Satanas iya pagapuyan

⁷ Ket ito nalpas to sangaribu nga dagunin, nawayawayaan manin nge̍ Satanas ito nakaibaludan na.

⁸ Ket rinumwar ngarud nga nawe̍ nangallilawin kadito maawagan ka Gug se̍ Magug, nga itu diya nasnasyun iya amin nga lubung. Ket inurnung na da nga nisagana nga makigubatin. Ket ya bilang dito naurnung itun, ket agten iya kaadu niya lapuc iya pingit niya baybay.

⁹ Ket nawe̍ da ngarud nga sangkabungguy, ket manipud iya amin nga lubung, nanang-at da nga line̍cbut da ya kampu diya toltoley ne̍ Apu Diyus se̍ to ipatpateg na nga siyudad. Ngem dito toltoley nga nangle̍cbut ito siyudad, napukaw da mettin gapu ka apuy nga naggayat ka langit.

¹⁰ Ket to diyablu nga nangallilaw kadiya toltoley, naidegsut mettin nga naipisuc ito dackel nga pagapuyan nga uwed gumilgilab nga burbura nga asupre̍ na. Ket itu pe̍ to nakaipisukan nito nakan-ansing nga animal se̍ to busid nga mammadtu. Ket algew-gabi da met nga agtuctuuc antuni nin ka agnanayun nga awan patingga na.

Ya pannakaukum diya bekken nga toley ne̍ Apu Diyus

¹¹ Ket itun, uwed met nasingec nga isa nga dackel nga trunu nga puraw, se̍ nasingec pe̍ ya agturay nga nakatugew iyan nga trunu. Ket ya abac lawa se̍ ya ginet, nagpukaw da mettin iya imatang na, ket pulus nga madi da masingen nin.

¹² Ket nasingec itun diya natey, nga mabigbig se̍ nanumu, nga agsisikad iya sangu nito trunu. Ket uwed met liblibru nga mabicbicrad antuni nin. Ket nabicrad pe̍ yin ya sabali nga libru itun, nga itu to libru nga nakaisuratan diya nagnagan diya mae̍cdan ka biyag nga agnanayun. Ket nakedngan met itunin ya kasasaad dito nat-atey, maikanatad kadiya winangwangel da nga naisurat kadito liblibru.

¹³ Ngarud, naikeddeng ya pagbanagan niya tunggal isa maikanatad kadiya winangel da, ta napagungar met dito natey ka baybay, agten pe̍ kadito naitamen iya ginet, se̍ dito naibalud ito pagtuukan nga edyan diya natey enna Hade̍s. Ta naurnung da nga amin tasun maikeddeng ya pagbanagan dan.

¹⁴ Ket itun, ya patey se̍ to Hade̍s nga pagtuukan nga edyan diya natey, arig met nga naidegsut dan ito dackel nga pagapuyan. Ket idi nga pannakaipisuc da iya dackel nga pagapuyan, itu yan ya maawagan ka maikadduwa nga pannakatey.

¹⁵ Ngarud, to dackel nga pagapuyan, itu ya nakaipisukanin dito orey nagan na nga awan nagan da nga naisurat ito libru nga nakaisuratan diya nagnagan diya mae̍cdan ka biyag nga agnanayun.