Paltiing 2 - Ya Baru nga Tulag

To surat para iya bungguy mamati ka E̍pe̍su

¹ Ket kinunen manin nito arig nga toley iyaken, “Idi ya isurat mu iya anghe̍l nga agay-aywan iya bungguy mamati ka E̍pe̍su: “Itu yan ya damag nga gayat iya mangik-ikem kadiya pitu nga bituwen iya diwanan nga ima na, se̍ agpaspasyar iya edyan diya pitu nga dilag nga balituc:

² Emmuc diya wangwangel mu, se̍ ya panagbannug se̍ panaganus mu. Emmuc pe̍ nga madi ka ipamoya diya toltoley nga dake̍c ya ugali da. Ket dito busid nga apustule̍s nga nagkunen nga apustule̍s da kanu, ket inemmum da, ket naemmuwam nga busid da met.

³ Ket emmuc met pe̍ nga naanus ka, ta itured mu ya agrigat gapu iya panagsirsirbim iyaken, ket di ka pe̍ nakumsa.

⁴ “Ngem uwed met pe̍ madic gabay ikew, ta bekken nac kun nga ay-ayaten nga agten ito damu.

⁵ Dikad pe̍ bilinen naka ngarud nga laglagipem to kasasaad mu ito sacbay nidi nga pannakairradum. Agbabawi ka ngarudin. Ket dito nabaru nga winangwangel mu ito damu, itu manin ya wanglem kuma itan. Ta no madi ka agbabawi se̍ madi ka pasoliyen ditun nga nabaru, umbe̍t ku was nad ipac ya dilag mu iya nakaipayan na.

⁶ “Ngem uwed pe̍ nabaru nga makagic maipanggep ikew, ta kaguram pe̍ ya dake̍c nga wangwanglen diya pasurut nito Nikulas, nga agten met iya pananggurac iya wangwanglen da.

⁷ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, e̍cdac da nad ka kalinteggan da nga mangan ka bisic niya kayu nga pagbiyagan nga uwed iya minuyungan ne̍ Apu Diyus.’”

To surat para iya bungguy mamati ka E̍smirna

⁸ “Ket idi ya isurat mu iya anghe̍l nga agay-aywan iya bungguy mamati ka E̍smirna: “Itu yan ya kunen niya kaonaan se̍ kaodiyan ya kinauwed na, nga igina to natey se̍ nagungar mettas:

⁹ Emmuc diya pakaparigatam se̍ ya kinapanglaw mu. Ngem ya kinapudnu na, ket nabacnang ka met! Ket emmuc pe̍ diya pakapadpadake̍kam kadito agkunkunen nga Hudyu da kanu, ngem ya kinapudnu na, bekken da nga pudnu nga Hudyu, no di lugud kamkameng da met iya bungguy ne̍ Satanas.

¹⁰ Ket madi ka latta madanagan iya orey nagan na nga pakaparigatan nga dumateng ikew. Tutu met nga sigiren naka ya diyablu iya di mabayag, ta paibalud na diya duduma dakayu. Agpaut nad ka unus sangapulu nga algew ya pakaparigatam. Ngem puminget ka lugud iya panamatim, orey pe̍ no agingga ka patey, ket balangatan nakayu ka biyag nga agnanayun.

¹¹ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, madi da nad madusa ka maikadduwa nga ipapatey.’”

To surat para iya bungguy mamati ka Pe̍rgamu

¹² “Ket idi ya isurat mu iya anghe̍l nga agay-aywan iya bungguy mamati ka Pe̍rgamu: “Itu yan ya kunen niya uwed natadem nga ispada na nga agsumbangir ya tadem na:

¹³ Emmuc nga narigat ya kasasaad mu iyan, ta pagturayan met ne̍ Satanas ya ilim. Ngem orey agten iyan, napasnec ka latta iya panamatim iyaken, se̍ di ka pe̍ binaybay-an ya panamatim iyaken, orey ito nakatey nito Antipas. Napudnu nga nangipakaemmu to Antipas maipanggep iyaken, ket napatey met iyan nga edyan nu, nga pagedyanan met ne̍ Satanas.

¹⁴ “Ngem uwed met pe̍ madic gabay ikew, ta uwed da duduma dakayu iyan nga agtungpal iya panursuru nito Balaam. Ket to Balaam, igina met to nangisursuru ito Ari Balac itun iya panangsulisug na kadito Israe̍lita, tasun mangan da kadiya makan nga naidatun kadiya didiyusen, se̍ tasun makikamalala da.

¹⁵ Se̍ uwed da pe̍ duduma dakayu nga agtungpal iya panursuru dito pasurut nito Nikulas.

¹⁶ Itu nga masapul nga agbabawi ka lugudin kadiyan, ta no madi ka babawiyen, dagus sac mettas nga umbe̍t iya edyan mu iya di mabayag, ket igubat ku met kadituni ya ispada nga uwed iya musung ku.

¹⁷ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati, nga agten idi: ‘Diya maibilang nga mangabac, e̍cdac da nad ka pagbiyag nga madi masingen, nga maawagan ka mana. Se̍ e̍cdac da nad pe̍ ka puraw nga batu nga nakaisuratan niya isa nga kabarbaru nga nagan, ket awan pulus nga makaemmu iyan nga naisurat nga nagan, no di yas ya umawat.’”

To surat para iya bungguy mamati ka Tiyatira

¹⁸ “Ket idi ya isurat mu iya anghe̍l nga agay-aywan iya bungguy mamati ka Tiyatira: “Itu yan ya kunen niya Anac ne̍ Apu Diyus, nga igina ya arig nga apuy nga gumilgilab diya mata na, ket diya saka na, arig nga napasileng nga burinsi:

¹⁹ Emmuc met diya wangwangel mu, agten iya panagayat mu, se̍ ya nabileg nga panamatim, se̍ ya panagtulung mu se̍ panaganus mu. Ket emmuc met nga ad-adu pekkem diya nabaru nga wangwanglem ita ngem ito damu.

²⁰ “Ngem uwed met pe̍ madic gabay ikew, ta ipampamoyam to babey nga Diye̍se̍be̍l, nga isa nga mammadtu kanu ne̍ Apu Diyus. Ngem bekken met nga tutu nga mammadtu ne̍ Apu Diyus, ata gapu iya dake̍c nga isursuru na, iyaw-awan na met diya agsirsirbi iyaken. Isursuru na da ka pannakikamalala, se̍ pannakisangu nga mangan kadiya makan nga naidatun kadiya didiyusen.

²¹ Ket ne̍cdac met ka gundaway na nga agbabawi, ngem madi na met gabay nga babawiyen ya pannakikamkamalala na.

²² Itu nga paidale̍t ku mettin yan nga babey, gapu mettas iya ar-arimanen na iya pagidaan na. Ket dackel met pe̍ ya sagabaen diya bekken na nga asawa nga makitipun igina. Arimanec ngarud yani, no madi da babawiyen ya pannakitipun da igina.

²³ Ket diya pasurut na, nga maiyarig ka an-anac na, dusaec da nad met pe̍ nga patayen. Ket iya agten iyan, maemmuwan diya amin nga bungbungguy diya mamati nga iyaken met ya mangsukimat iya lemlemmet se̍ tartarigagay diya toley. Ket supapakac ngarud ya tunggal isa dakayu, sigun iya winangel nu.

²⁴ “Ngem diya duduma dakayu nga iTiyatira, emmuc nga madi kayu sumursurut iyan nga ugali nga dake̍c, se̍ madi kayu pe̍ pinadas to nauneg kanu nga panursuru maipanggep e̍ Satanas. Kunec dakayu nga awan met masapul ku nga ibilin dakayu maipanggep kadiyanin.

²⁵ Yan nas ituluy nu nga sipapasnec dito nabaru nga wangwanglen nu, agingga nga umbe̍t tac iyan.

²⁶ “Ket diya amin nga maibilang nga mangabac, nga mangituluy iya panangtungpal da iya tarigagay ku agingga iya panagpatingga niya biyag da, igida nad diya pange̍cde̍yac ka turay tasun iturayan da diya pagpagiliyan.

²⁷ Ket arig nga sacgukud nga landuc ya kinabaked nad niya panangituray da kadiya pagpagiliyan, ta mapirdi nad ya bileg dito pagpagiliyan, nga maiyarig mettas iya pannakarumec niya banga. Ta diya mangabac, mae̍cdan da nad ka turay nga agten mettas iya turay nga ne̍cde̍ niya Amac iyaken.

²⁸ Ket igida nad met pe̍ ya pangisagutac iya arig nga bituwen nga aggundaway iya parbangun.

²⁹ “Ket diya amin nga uwed pannakaawat na, tandaanan da kuma ngarud ya ipakaemmu niya Ispiritu kadiya bungguy diya mamati.”