Paltiing 19 - Ya Baru nga Tulag

¹ Kalpasan niyan, uwed nagicnac nga nabileg nga uni nga arig nga panagkagi diya adu nga toley ka langit, nga kinunen da, “Madaydayaw nge̍ Apu Diyus! Igina ya Diyus tida nga pagtaudan niya pannakaisalakan, dayaw se̍ pannakabalin!

² Ta nalinteg se̍ rumbeng diya panangeddeng na, ket inukum nan to agdindinamag nga huste̍s nga nangpadake̍c kadiya toltoley iya lubung gapu iya kinamannakikamalala na. Nibales ngarud ne̍ Apu Diyusin to panangpatey nito huste̍s kadiya agsirsirbi iya Apu,” kunen da.

³ Ket kinunen da manin, “Madaydayaw nge̍ Apu Diyus! Ta yan nas asuc ya agpangudu win ka agnanayun nga awan patingga na manipud ito mapocpooran nga siyudad!” kunen da.

⁴ Ket dito duwa nga pulu ket eppat nga panglakayen se̍ dito eppat nga sibibiyag nga parsuwa, naglakeb da nga nagdaydayawin e̍ Apu Diyus nga agtugtugew ito trunu, nga kinunen da, “Agten iyan kuma ngarud, ta madaydayaw kuma ngarud nge̍ Apu Diyus!” kunen da.

Ya ragsac iya pakalun niya Urbun Karne̍ru

⁵ Ket itun, uwed nagicnac nga isa nga timec nga gayat ito trunu, nga kinunen na, “Dayawen nu ngarud ya Diyus tida, dakayu nga amin nga agsirsirbi igina! Ngarud, dakayu nga amin nga mangipatpateg igina, mabigbig man, winno nanumu, dayawen nu ngarud ya Diyus tida!” kunen na.

⁶ Ket itun, nagicnac ya arig nga timtimec diya adu nga toley, nga arig nga uni niya dackel nga danum nga mananasan, se̍ ya nabileg nga eddug. Ket kinunen da, “Madaydayaw nge̍ Apu Diyus! Ta nadatnganin ya panagari niya Apu nga Diyus tida nga Mannakabalin ka amin!

⁷ Aganggem se̍ agragsac tida kuma, nga dayawen tida kuma ya kinapateg na. Ta nadatngan mettin ya panagpakalun niya Urbun Karne̍ru! Ket ya nubya na, nisagana nan ya beggi na.

⁸ Ket nae̍cdan ka ikawwes na nga nadalus se̍ puraw nga luput nga line̍n,” kunen da. Ket ya luput nga line̍n, itu ya pakaiyarigan niya kinalinteg diya toley ne̍ Apu Diyus.

⁹ Ket kinunen manin nito anghe̍l iyaken, “Isurat mu pe̍ yani: Nagasat ngarud diya maawis nga makipangan iya pakalun niya Urbun Karne̍ru,” kunen na. Se̍ kinunen manin nito anghe̍l iyaken, “Didi met diya napudnu nga kagi ne̍ Apu Diyus,” kunen na.

¹⁰ Itu nga nagdarongkeb bac ngarud ito sangu nito anghe̍l, tasun agdaydayaw wac kuma igina. Ngem kinunen na iyaken, “Bay-am yan! Ta kapada nac ngas nga agsirsirbi e̍ Apu Diyus. Kapada nac ngarud se̍ dito kakabsat mu nga mangipatpateg iya pudnu nga nipakaemmu ne̍ Je̍sus. E̍ Apu Diyus ngas met ya rumbeng nga pagdaydayawam!” kunen na. Ta ya pudnu nga nipakaemmu ne̍ Je̍sus, itu mettas ya banag niya ipacpakaemmu diya mangikaskasaba maipanggep igina.

Ya nakasakey iya puraw nga kabayu

¹¹ Ket itun, arig nga naglukat ya langitin, ket uwed met nasingec nga isa nga puraw nga kabayu. Ket ya nakasakey ito kabayu, maaw-awagan ka Mapagtalkan, se̍ managan pe̍ ka Napudnu. Nalinteg met diya pangpanggep na iya panangukum se̍ pannakigubat na.

¹² Ket arig nga gumilgilab nga apuy diya mata nito nakasakey, ket adu diya balangat iya ulu na. Ket uwed met nagan nga naisurat igina, ngem igina ngas ya makaemmu iya kaipapennan na.

¹³ Ket nakake̍bal ka ke̍bal nga biig nga mansa ka daga. Ket “Kagi ne̍ Apu Diyus” ya pangaw-awag da igina.

¹⁴ Ket simurut igina diya buybuyut nga gayat ka langit, nga sikakawwes da ka nadalus nga luput nga puraw nga line̍n. Ket nakasakey da met pe̍ ka puraw nga kabayu.

¹⁵ Ket to maawagan ka Kagi ne̍ Apu Diyus, uwed met natadem nga ispada nga rumwar iya musung na, nga itu met ya pangabac na kadiya nasnasyun. Ket iturayan na da nad ngarud ka nabaked nga turay nga agten iya kinabaked niya sacgukud nga landuc. Ta ipasingen na igida ya bileg niya unget ne̍ Apu Diyus nga Mannakabalin ka amin, nga arig nga pe̍se̍ten na da nad ka dackel nga pagpespessan.

¹⁶ Ket ito ke̍bal na se̍ iya ugpu na, uwed naisurat nga nagan nga agten idi: “Ari diya amin nga ar-ari se̍ Apu diya amin nga ap-apu.”

¹⁷ Ket itun, uwed nasingec nga isa nga anghe̍l nga agsisikad met iya sinag. Pinkawan na diya amin nga sibsibud nga agkaykayab iya abac lawa, nga kinunen na ka nabileg, “Umbe̍t kayun! Aguurnung kayun iya dackel nga pannangan nga nisagana ne̍ Apu Diyus.

¹⁸ Ta umbe̍t kayu mangan iya sebbit dito ar-ari se̍ dito kumande̍r dito suldadu se̍ dito mabigbig nga toley. Ket uwed pe̍ kanen nu nga sebbit dito kabayu se̍ dito nagsakey igida, se̍ ya sebbit diya duduma nga toltoley, tagabu se̍ siwayawaya, mabigbig se̍ nanumu,” kunen na.

¹⁹ Ket nasingec met itun to nakan-ansing nga animal, se̍ dito ar-ari iya lubung, agraman dito buybuyut da nga suldadu. Ket nagtitipun da mettin nga manggubat iya nakasakey ito puraw nga kabayu, agraman ya buyut na.

²⁰ Ngem natiliw met to nakan-ansing nga animal, se̍ natiliw met pe̍ to busid nga mammadtu. Igina to nangar-ariman ka nakaskasdaaw itun gapu iya pammalubus nga nipaay nito nakan-ansing nga animal. Nipaay na ya pammalubus na, tasun allilawen na dito toley itun nga namarkaan ito marka nito nakan-ansing nga animal, nga igida pe̍ dito nagdaydayaw ito bultu na. Ket natiliw ngarud to nakan-ansing nga animal se̍ to busid nga mammadtu, ket naidegsut da mettin nga sibibiyag ito dackel nga pagapuyan nga gumatgateng gapu ka burbura nga asupre̍.

²¹ Ket dito duduma nga kabulun da, napatey da met iya ispada nito nakasakey ka kabayu, nga itu to ispada nga rinumwar iya musung na. Ket nagbedde̍t met dito sibsibud nga nangan ito sebbit dito natey yin.