Paltiing 18 - Ya Baru nga Tulag

To pannakaabac nito siyudad nga Babilunya

¹ Kalpasan niyan, uwed manin nasingec nga sabali nga anghe̍l nga nagpaspasegged nga gayat ka langit. Naturay met nga unay, ket dinarangan met niya dayag na ya lubung.

² Ket pinumkaw to anghe̍l ka nabileg nga timec, nga kinunen na, “Napirdi ya Babilunya ngin! Napirdi to agdindinamag nga siyudadin! Nagbalin nga pagedyanan sairu win, se̍ paguurnungan diya amin nga kita dake̍c nga ispiritu win, se̍ paguurnungan met pe̍ diya amin nga kita sibud nga agkakadake̍c se̍ nakar-aryec kin.

³ Ta nakitipun diya amin nga nasnasyun iya kinadake̍c niyan nga siyudad, nga arig nga ininum da ya naingel nga kinamannakikamalala na. Ta arig nga nakikamalala igina diya ar-ari iya lubung. Ket diya aglaclaku nga uwed iya lubung, bimacnang da mettin gapu iya panagganansiya da iya adu nga di natimbeng nga tarigagay na,” kunen na.

⁴ Ket itun, nagicnac manin ya sabali nga timec nga gayat ka langit, nga kinunen na, “Dakayu nga toley ku, umadeyyu kayu ngarud iyan nga babey yin, tasun madi kayu makiraman kadiya basbasul na, se̍ tasun madi kayu mairaman kadiya pakarigatan na!

⁵ Ta arig nga nagtutuun met nga dumateng ka langitin ya kaadu diya basul na. Ket laglagipen ngarud ne̍ Apu Diyus ya kinadake̍c nan.

⁶ Ngarud, maibales kuma ito babey yin ya agten mettas iyan nga kita nga rigat nga inariman na kadiya toltoley. Agdubli kuma ngarud ya rigat na nga pakadusaan na, nga arig nga agdubli ya dake̍c nga maipainum igina, nga agten mettas ito kinadake̍c nga nipainum na kadiya toltoley.

⁷ Ket sigun ito nakaru nga panagpaspasindayaw se̍ kinanam-ay nito babey itun, maitutup kuma met pe̍ yin ya nakaru nga rigat se̍ ladingit nga maipalak-am igina itan. Ta kunen na kem pe̍ yasin iya lemlemmet na, ‘Uwed dac nga nakatugew nga isa nga re̍yna! Bekken nac nga agten iya balu, ta pulus nga madic aglak-am ka ladingit, orey nungey!’ kunen na met.

⁸ Itu nga agkukumpas nga dumateng nga dagus igina diya panagrigat na ka unus isa ngas nga algew, ta dumateng nad igina diya sakit nga makapatey, ladingit se̍ bisin. Ket mapooran nad met pe̍ yin. Ta mannakabalin met nge̍ Apu Diyus, nga igina ya Apu nga mangukum igina,” kunen na.

⁹ Ket dito ar-ari nga nakitiptipun ito arig nga babey ito pannakikamkamalala na se̍ ito nakaru nga kinanam-ay na, berritan da nad ya kasasaad na, se̍ sangsangitan da met pe̍, no masingen da ya asuc niya pannakapoor na.

¹⁰ Buybuyaen da ngas nad iya deyyu, gapu ta mansing da nga mairaman iya pannakatuuc na. Ket kunen da nad nga, “Ay-aay! Kackaasi ka ngas met, ikew nga agdindinamag nga siyudad nga Babilunya! Ta iya unus isa ngas nga uras, dagus nga nagbanag ka met ka panagtuctuuc mun!” kunen da nad met.

¹¹ Ket diya aglaclaku nga uwed iya lubung, berritan se̍ sangsangitan da nad met pe̍ to arig nga babey, ta awan ngumina ngin kadiya laclaku da.

¹² Awan ngarud ngumina ngin kadiya balituc, kuwarta, agkakangina nga batu, se̍ pe̍rlas da, se̍ kadiya agkakangina nga luput, nga agten iya luput nga line̍n, winno ya nakulur ka biyule̍ta, se̍ agten iya luput nga sida, winno iya nakulur ka nadgang. Awan ngarud ngumina ngin kadiya nadumaduma nga agkakabangug nga kayu, se̍ amin nga kita alikamen nga naariman ka essong e̍le̍pante̍, se̍ diya naariman ka agkakangina nga kayu, burinsi, landuc se̍ napaw-is nga batu nga maawagan ka marmul.

¹³ Se̍ awan pe̍ yin ngumina kadiya nabangug nga agten kadiya pagrikadu, se̍ diya pagsapsapu nga para iya beggi winno iya ebbuc, se̍ diya maicset nga kayu winno pagsapsapu nga nabanglu. Awan pe̍ ngumina ngin kadiya basi se̍ lana, are̍na se̍ trigu, agten pe̍ kadiya baka se̍ karne̍ru, kabayu se̍ pagluganan, se̍ orey pe̍ diya toley nga ilaku da nga tagabu.

¹⁴ Ket kunen nad dito aglaclaku maipanggep ito arig nga babey nga, “Awanin dito banbanag nga nakaay-ayu ikew itun! Ket napukaw mettin ya amin nga kinanam-ay se̍ kinapaw-is mun, ket pulus nga madi da maipasoli yin!” kunen da.

¹⁵ Ket dito aglaclaku nga naggan-ganansiya iyan nga siyudad, madi da nad umadenni iya siyudadin, gapu ta mansing da nga mairaman iya pakatuukan na. Ket agberrit se̍ agsangsangit da nad met,

¹⁶ nga kunen da, “Ay-aay! Kackaasi ngas mettin to agdindinamag nga siyudad! Ta itun, arig nga nakakawwes ka agkakangina nga luput, nga agten kadiya line̍n, diya biyule̍ta, se̍ diya nadgang. Se̍ arig pe̍ itun nga nakaalahas ka balituc, agkakangina nga batu se̍ pe̍rlas!

¹⁷ Ngem ita, napukaw met amin didi nga kinabacnang nan, ket dagus met nga napasamac yani ka unus isa ngas nga uras!” kunen da. Ket amin diya agmanmane̍hu kadiya bapbapur iya baybay, se̍ diya pe̍yeng nga agluglugan ka bapur, se̍ diya mangmangged kadiya bapur, se̍ diya duduma pe̍ nga iya baybay ya pamettan da ka pagbiyag da, nagedyan da met iya deyyu nga nagbuybuya.

¹⁸ Ket ito nasingen da ya asuc nito mapocpooran nga siyudad, nip-ipkaw da nga kinunen da, “Awan met kapada niya kinalatac niyan nga siyudad!” kunen da.

¹⁹ Ket gapu iya napalaus nga ladingit da, inaburan da met diya ulu da ka dapag, se̍ pinumkaw da nga agberberrit, nga kinunen da, “Ay-aay! Kackaasi ngas mettin to agdindinamag nga siyudad! Itu to siyudad nga bimacnangan diya amin nga uwed bapur na, gapu mettas iya nakaru nga kinabacnang nga uwed iyan nga siyudad. Ngem ita, napukaw ngas met nga dagus ka unus isa ngas nga uras!” kunen da.

²⁰ Aganggem kayu ngarudin, dakayu nga taga-langit! Ngarud, aganggem kayu pe̍ yin, dakayu nga toley ne̍ Apu Diyus, agraman dakayu nga apustule̍s se̍ mammadtu! Aganggem kayu ngarud gapu iya napasamac iyan nga siyudad. Ta ya panangukum ne̍ Apu Diyus ito siyudad, itu met ya panangibales nan ito panangparigat nito siyudad dakayu!

²¹ Ket itun, uwed isa nga naturay nga anghe̍l, nga namet ka batu nga agten iya dackel nga gililan. Ket nidem-ur mettin nito anghe̍l iya baybay, nga kinunen na, “Kellat nad met ya pannakapukaw nito agdindinamag nga siyudad nga Babilunya, nga agten mettas idi nga panangidem-ur ku. Ket madi nad masingen nin orey nungey.

²² Ket madi nad magicna ngin iyan nga siyudad ya panagtukar ka nakuwe̍rdasan, winno ya panagkanta, winno ya panagpauni ka palpaldeng winno tangguyub. Awan nad pe̍ maaskuran nga agwangwangel ka orey nagan na nga wangel iyan nga siyudadin, se̍ awan nad met pe̍ magicna nga uni niya gilinganin.

²³ Awan agdarang nga dilagin iyan nga siyudad, se̍ awan magicna nga naragsac nga timec diya nubyu se̍ nubya nga agpakalunin. Agten iyan nad ngarud, ta nabigbig met itun dito agtagtagilaku iyan nga siyudad, ngem gapu iya panagsalamangka nga uwed iyan nga siyudad, naallilaw met diya amin nga nasnasyun iya lubung,” kunen na.

²⁴ Ket bekken nas nga iyan, ta to siyudad nga Babilunya, itu met ya nakatayan dito mammadtu se̍ toley ne̍ Apu Diyus, se̍ dito amin nga napatpatey iya lubung.