Paltiing 17 - Ya Baru nga Tulag

To dake̍c nga babey se̍ to nadgang nga ayam

¹ Ket itun, imadenni iyaken nin ya isa kadito pitu nga anghe̍le̍s nga uwed igida itun dito pitu nga malukung. Ket kinunen na iyaken, “Umbe̍t ka, ta ipasingec ikew ya mapasamac nad iya pannakaukum nito agdindinamag nga sinan-huste̍s, nga igina ya agtugtugew nga situturay kadiya adu nga wangwangag.

² Arig met nga nakikamalala igina diya ar-ari iya lubung, ket arig pe̍ nga ne̍nglew win diya toltoley iya lubung, gapu iya ingel niya pannakikamalala na,” kunen na.

³ Ket pinaipen nac ngarudin to anghe̍l iya away gapu iya pannakabalin niya Ispiritu ne̍ Apu Diyus. Ket nasingec met antuni ya isa nga babey nga nakasakey ka isa nga animal nga nadgang. Ket ya beggi nito nadgang nga animal, nasanap ka naisurat nga agkakadake̍c nga nagnagan nga makainsultu e̍ Apu Diyus. Uwed met pitu nga ulu nito animal, se̍ uwed pe̍ sangapulu nga sacgud na.

⁴ Ket to babey, nakakawwes ka kulur biyule̍ta se̍ nadgang, ket adu met diya kawwes na nga alahas nga balituc, se̍ agkakangina nga batu se̍ pe̍rlas. Nakaikem met ka tasa nga balituc nga napnu ka agkakaalas se̍ agkakarugit nga banbanag, nga itu ya pagbanagan niya kinamannakikamalala na.

⁵ Ket iya muging na, uwed naisurat nga nagan nga uwed nauneg nga kaipapennan na. Agten idi ya kunen na: “Babilunya nga siyudad nga agdindinamag, nga itu ya ina diya huhuste̍s se̍ ya pagtaudan diya amin nga naalas nga banbanag iya lubung,” kunen na.

⁶ Ket nasingec nga ne̍nglew met to babey, ta ine̍nglew na ya beggi na ito daga dito napatey nga toltoley ne̍ Apu Diyus, nga itu dito napatey gapu iya panangipakaemmu da iya pudnu maipanggep e̍ Je̍sus. Ket napalaus ngarud ya seddaaw ku ito nasingec to babey.

⁷ Ket kinunen nito anghe̍l iyaken, “Ape̍ nga nasdaaw ka iya nasingem? Ibagac ngarud ikew ya kaipapennan nito babey se̍ to nagsakayan na nga animal nga uwed pitu nga ulu na se̍ sangapulu nga sacgud na.

⁸ Ket to animal nga nasingem, itu to nagturturay itun, ngem awan mettin ita. Agparang nad mettas manin, ta rumwar nad met ito nakaun-uneg nga ebbut iya ginet. Ngem agbanag lugud das nad ka pakatayan na. Ket nad no aggundaway manin to animal iya lubung, masdaaw ngarud diya bekken nga naisurat ya nagan da iya libru nga nakaisuratan dito nagnagan diya mae̍cdan ka agnanayun nga biyag, manipud ito di pekkem nga naparsuwa ya lubung. Masdaaw da nad ngarud no masingen da to nadgang nga animal nga agparang manin, ta igina met to nagturturay itun, ngem napukaw met itan, ket agparang nad met manin.

⁹ “Ya mayat nga makaawat maipanggep idi nga banag, masapul nga agpanunut nga nalaing. Ket agten idi ya kaipapennan na: Dito pitu nga ulu nito nadgang nga animal, maiyarig da met ka pitu nga tageytey, nga itu diya pagtugtugawan nito babey.

¹⁰ Ket uwed pe̍ pitu nga ari nga itu diya kaiyarigan dito pitu nga ulu nito animal. Ket naabac kin diya lima kadidi nga ari. Ket ya isa, agturturay pekkem mas ita. Ket ya isa, agturay nad mettas, ngem naikeddeng ngin nga bekken nad nga mabayag ya panagari na.

¹¹ Ket to animal nga kunec nga nagturturay itun ngem awanin ita, igina met ya maikawalu nga ari, nga kabulun dito pitu. Ket agbanag nad mettas ka pakapukawan na.

¹² “Ket uwed pe̍ sangapulu nga duduma nga ari. Ket dito nasingem nga sangapulu nga sacgud nito nadgang nga animal, ket kaiyarigan da didi nga sangapulu nga ari nga madi pekkem nae̍cdan ka turay nga agari. Ngem mae̍cdan da nad ka gundaway nga makipagturay ito animal ka unus ngas isa nga uras.

¹³ Is-isa nad ya panggep didi nga sangapulu nga ari, ket ipaay da nad ya pannakabalin se̍ turay da ito animal.

¹⁴ Mawe̍ da nad met gubaten ya Urbun Karne̍ru, ngem abaken nad met niya Urbun Karne̍ru da, ta igina ngarud ya Apu diya amin nga ap-apu, se̍ ya Ari diya amin nga ar-ari. Ket diya kabulun na, igida diya naawis se̍ napili se̍ napudnu nga pasurut na,” kunen nito anghe̍l.

¹⁵ Ket kinunen manin nito anghe̍l iyaken, “Dito nasingem nga wangwangag nga pagtugawan nito agturay nga sinan-huste̍s, itu diya kaiyarigan diya pagpagiliyan, toltoley, nasnasyun se̍ pagkakagi toley.

¹⁶ Ket dito nasingem nga sangapulu nga sacgud se̍ to nadgang nga animal, ket kaiyarigan da diya manggura nad ito sinan-huste̍s. Ket arig nga alac da nad met ya kinabacnang na, se̍ ipac da dito napaw-is nga kawwes na. Ket patayen da met, nga kanen da nad ya sebbit na, se̍ da pooran nad ya nabuna nga bangkay na.

¹⁷ Agten nad iyan ngarud ya wanglen da, ta panggep met ne̍ Apu Diyus nga tignayen nad ya panpanunut da, tasun ipatungpal da nad ya panggep na mettas. Ta agkaykaysa da nad nga mange̍cde̍ iya turay da ito animal. Ket iya agten iyan, to animal met ya mangiturayin agingga iya pannakatungpal dito pinaipadtu ne̍ Apu Diyus maipanggep iya maadpangan.

¹⁸ Ket to nasingem nga babey, itu to agdindinamag nga siyudad nga mangituray kadiya ar-ari iya lubung,” kunen nito anghe̍l.