Paltiing 16 - Ya Baru nga Tulag

Dito pitu nga malukung nga napnu ka unget

¹ Ket itun, uwed nagicnac nga nabileg nga timec nga gayat ito te̍mplu. Ket kinunen na kadito pitu nga anghe̍le̍s, “Mawe̍ kayu ibuyat iya lubung ya unget ne̍ Apu Diyus nga uwed kadito pitu nga malukung,” kunen na.

² Ket nawe̍ ngarud nibuyat nito mona nga anghe̍l ya mayan nito malukung na iya lubung. Ket dito toley nga namarkaan ito marka nito nakan-ansing nga animal se̍ nagdaydayaw ito bultu na, uwed met timubtubu igida nga nakar-aryec se̍ naut-ut nga talingu, nga agten iya busali.

³ Ket itun, to maikadduwa nga anghe̍l, nibuyat na met pe̍ ya mayan nito malukung na iya baybay. Ket ya danum iya baybay, nagbalin met nga arig nga sagu niya natey nga toley, ket natey mettin diya amin nga naged-edyan iya baybay.

⁴ Ket nibuyat mettin nito maikatlu nga anghe̍l ya mayan nito malukung na kadiya wangwangag se̍ ub-ubbug, ket nagbalin pe̍ nga daga diya danum dan.

⁵ Ket nagicnac ya kagi nito anghe̍l nga agay-aywan iya danum, nga kinunen na, “Ikew met ya Nalinteg, se̍ ya uwed ita, se̍ ya uwed pe̍ itun. Ket rumbeng ngarud met didi nga panangeddeng mu.

⁶ Ta didi nga dusaem mun, igida met diya nangpatey kadito nangasaba maipanggep ikew, se̍ dito duduma nga toley mu. Ket ita, patey mettin ya ipaay mu igidan, ket rumbeng ngarud met yani nga pagbanagan dan!” kunen na.

⁷ Ket uwed met nagicnac nga kagi itun nga gayat ito pagdatunan ka langit, nga kinunen na, “Apu Diyus nga Apu nga Mannakabalin ka amin, tutu met nga napudnu se̍ nalinteg ngarud diya panangeddeng mu!”

⁸ Ket itun, nibuyat mettin nito maikapat nga anghe̍l ya mayan nito malukung na iya sinag. Ket ya sinag, nae̍cdan ka kabaellan nga mangkesset kadiya toltoley yin.

⁹ Nacset ngarud diya toltoley yin ka nakaru nga pudut. Ngem nagkagkagiyan latta diya toltoley nge̍ Apu Diyus ka dake̍c, orey igina met ya akin-turay kadiyan nga panagrigat da. Agten iyan ngarud, se̍ madi da latta binabawi to kinadake̍c da. Ket iya agten iyan, madi da nagdayaw e̍ Apu Diyus.

¹⁰ Ket to maikalima nga anghe̍l, nibuyat na pe̍ itun ya mayan nito malukung na iya trunu nga pagtugawan nito nakan-ansing nga animal iya lubung. Ket gimicbet mettin to amin nga pagariyan nito animal. Ket gapu iya nakaru nga rigat diya toltoley itun, nagngaryet da nga kinagat da diya dila da,

¹¹ se̍ nagkagkagiyan da met ka dake̍c nge̍ Apu Diyus nga uwed ka langit, gapu kadito naut-ut nga talingu da. Ngem madi da latta nagbabawi kadito dake̍c nga wangwangel da.

¹² Ket itun, nibuyat pe̍ yin nito maikanem nga anghe̍l ya mayan nito malukung na ito dackel nga wangag nga E̍yuprate̍s. Ket namagaan met to wangagin, tasun uwed dalanen diya ar-ari nga gayat iya daya nga mawe̍ makigubat.

¹³ Ket uwed nasingec itun nga tellu nga mangpadake̍c nga sairu nga arig da nga tukac. Ket rinumwar met didi kadito musung nito dragun, se̍ to nakan-ansing nga animal se̍ to busid nga mammadtu.

¹⁴ Sairu met nga tutu didi nga tellu nga sinan-tukac nga agpaay e̍ Satanas. Emmu da met ya agariman ka nakaskasdaaw. Igida diya mawe̍ kadiya edyan diya ar-ari iya amin nga lubung, tasun urnungen da nga paisagana dito ar-ari nga mawe̍ nad makigubat e̍ Apu Diyus no madatnganin ya agdindinamag nga timpu ne̍ Apu Diyus nga Mannakabalin ka amin.

¹⁵ Ket laglagipen tida kuma ya kunen niya Apu: “Umbe̍t tac nad ngarud nga arig nga umbe̍t niya isa nga mannanakew! Nagasat nad met diya sisasagana, nga arig nga toley nga sipupuyat, se̍ naisagana pe̍ ya lupluput na, tasun madi nad aguuba. Ta no aguuba, malyew nad ngarud iya imatang diya toltoley,” kunen na.

¹⁶ Ket itun, inurnung ngarud dito tellu nga sairu diya ar-ari ka lugar nga maaw-awagan ka Armahe̍dun iya pagkakagi nga He̍briyu.

¹⁷ Ket to maikapitu nga anghe̍l, nibuyat na ngarud met pe̍ yin ya mayan nito malukung na iya abac lawa. Ket uwed mettin nabileg nga timec nga gayat ito trunu enna te̍mplu ka langit, nga kinunen na, “Itu ya pakatungpalan nan!” kunen na.

¹⁸ Ket nagselsel-it met itun, se̍ uwed da pe̍ nabileg nga un-uni se̍ eddug. Ket nangyegyeg met pe̍ itun ka nabileg nga unay, nga awan pekkem pumada iya kabileg niyan nga yegyeg, orey manipud ito pannakaparsuwa niya toley iya lubung, ta itu met ya kabilgan nga yegyeg.

¹⁹ Ket napakatlu mettin to siyudad nga agdindinamag, se̍ napirdi met pe̍ yin diya siyudad kadiya duduma nga pagpagiliyan. Ngarud, dito toltoley enna agdindinamag nga siyudad nga Babilunya, madi da met nakalisi iya pannusa ne̍ Apu Diyus, ta pinilit na da nga makipaglak-am iya unget na.

²⁰ Ket napukaw met itun diya amin nga purpuru iya baybay, se̍ awan pulus madi nadugey nga tagtageytey yin.

²¹ Ket naglalagu met pe̍ itun ka dadackel nga lalagu, ket naterkagan ngarud met diya toley yin. Aglima nga pulu nga kilu met ya kadammet niya tunggal isa nga lalagu. Ket gapu ta napalaus nga unay yan nga panagrigat da gapu ito panaglalagu na, nagkagkagi met diya toley ka dake̍c maipanggep e̍ Apu Diyusin, ta nakaru nga tutu to pannakaparigat da.