Paltiing 15 - Ya Baru nga Tulag

Dito pitu nga anghe̍le̍s nga nange̍cde̍ ka panagrigat

¹ Ket itun, uwed nasingec nga sabali manin nga pagilasinan ka langit, nga dackel se̍ nakaskasdaaw. Ta uwed met pitu nga anghe̍le̍s, ket uwed igida ya kabaellan nga mange̍cde̍ ka pitu nga panagrigat. Ket itu didi diya modi nga panagrigat nga pangdusa ne̍ Apu Diyus, ta didi ya panggibusan niya panggep ne̍ Apu Diyus maipanggep iya unget na.

² Ket uwed nasingec nga arig nga baybay nga sarming ya sap-ew na, ket uwed pe̍ apuy na. Ket nasingec pe̍ dito nagballaigi nga nangabac ito nakan-ansing nga animal se̍ ito bultu na, se̍ ito nume̍ru nga kaibatugan niya nagan na. Ket dito nagballaigi, agsisikad dan iya pingit nito baybay nga sarming, ket nakaikem da met ka pagtukar nga arpa, nga ne̍cde̍ ne̍ Apu Diyus igida.

³ Ket nagkankanta da ito kanta nito Muyse̍s nga agsirsirbi e̍ Apu Diyus itun, se̍ kanta pe̍ niya Urbun Karne̍ru, nga kinunen da ito kanta da, “Apu Diyus, nga Apu nga Mannakabalin ka amin, madaydayaw se̍ nakaskasdaaw diya wangel mu! Ikew ya Ari diya nasnasyun. Nalinteg se̍ napudnu ya gangey mu!

⁴ Awan madi mansing iya kinaturay mu, Apu. Awan madi mangipakaemmu iya kinadayaw mu. Ta ik-ikew was ya nalinteg nga tutu. Sumuku nad met ikew diya amin nga nasnasyun, nga umbe̍t nad agdayaw diya toltoley ikew, ta naemmuwan ngarudin diya nalinteg nga wangwangel mu,” kunen da.

⁵ Kalpasan niyan, nasingec nga nalukatan mettin ya akin-uneg nga parte̍ niya te̍mplu ka langit, nga itu ya pagdaydayawan nga pakalaglagipan iya kauwed ne̍ Apu Diyus.

⁶ Ket rinumwar ito te̍mplu win dito pitu nga anghe̍le̍s nga uwed igida ya kabaellan nga mange̍cde̍ kadito pitu nga panagrigat. Nakakawwes da ka nadalus se̍ sumilsilap nga luput nga maawagan ka line̍n, ket uwed balituc nga banda nga naipute̍put iya barukung da.

⁷ Ket itun, isa kadito eppat nga sibibiyag nga parsuwa ya nange̍cde̍ kadito pitu nga anghe̍le̍s ka pitu nga balituc nga malukung. Napnu met dito malukung ka unget ne̍ Apu Diyus, nga igina ya sibibiyag ka agnanayun nga awan patingga na.

⁸ Ket to te̍mplu, napnu met ka asuc kin, nga itu to pakasingnan iya kinadayaw se̍ pannakabalin ne̍ Apu Diyus enna te̍mplu. Ket awan nakauneg ito te̍mplu agingga nga madi naggibusin dito pitu nga panagrigat nga ipaay dito pitu nga anghe̍le̍s.