Paltiing 13 - Ya Baru nga Tulag

Dito duwa nga nauyung nga animal

¹ Ket itun, uwed nasingec nga isa nga nakan-ansing nga animal nga lumlumpuwas iya baybay. Pitu met diya ulu na, ket uwed sangapulu nga sacgud na, nga nakurunaan ya tunggal sacgud. Ket iya tunggal ulu na, uwed naisurat nga nagan nga makainsultu e̍ Apu Diyus.

² Arig nga liyupardu met ya beggi nito animal nga nasingec. Ket diya sacsaka na, arig nga saka niya usu. Ket ya musung na, arig nga musung niya liyun. Ket to nakan-ansing nga animal, itu ya nangitalkan nito dragun iya pannakabalin na, se̍ ya kinaari na, se̍ ya dackel nga kinaturay na.

³ Ket ya isa nga ulu nito nakan-ansing nga animal, natalingu met. Ket arig nga ipatey na yani nga talingu na, ngem nalaingan mettas. Itu nga nasdaaw diya amin nga toltoley iya lubung, ket simursurut da ito nakan-ansing nga animal.

⁴ Ket dinaydayaw diya amin nga toltoley to dragun, gapu ta igina ya nange̍cde̍ iya kinaturay na ito nakan-ansing nga animal. Se̍ dinaydayaw da pe̍ to nakan-ansing nga animal, nga kinunen da, “Awan kapada nidi nga animal! Awan makaabac igina!” kunen da.

⁵ Ket napalubusan to nakan-ansing nga animal nga agsalsalawasaw se̍ agkagi ka maikuntra e̍ Apu Diyus. Unus eppat nga pulu ket duwa nga bulan, napalubusan nga agturay to animal.

⁶ Rinugiyan na nga ininsultu nge̍ Apu Diyus, ta dake̍c to nikagkagi na maipanggep iya nagan se̍ pagedyanan ne̍ Apu Diyus, se̍ maipanggep kadiya amin nga makipagedyan igina ka langit.

⁷ Ket napalubusan met pe̍ to animal nga manggubat se̍ mangabac kadiya toley ne̍ Apu Diyus. Se̍ nae̍cdan pe̍ ka kalinteggan nga mangituray kadiya amin nga kapututan, pagiliyan, pagkakagi se̍ nasyun.

⁸ Ket agdaydayaw met igina diya kaaduwan nga toley iya lubung, nga itu diya amin nga bekken nga naisurat ya nagan da iya libru niya Urbun Karne̍ru nga napatey. Ket idi nga libru, itu ya nakaisuratan diya nagnagan nga naisurat ito di pekkem naparsuwa ya lubung, nga igida diya nae̍cdan ka biyag nga agnanayun.

⁹ Ket diya amin nga uwed pannakaawat na, tandaanan da kuma ngarud yani:

¹⁰ Diya makadateng iya pannakaipanaw da gapu kadiya manggura igida, ket tutu met nga maipanaw da ngas met. Se̍ diya makadateng met iya pannakatey da gapu kadiya mangispada igida, ket tutu met nga matey da ngas ka ispada. Itu nga masapul nga bumileg diya toltoley ne̍ Apu Diyus iya panaganus se̍ panamati da.

¹¹ Ket itun, uwed manin nasingec nga sabali nga animal nga nakan-ansing, ket rinumwar met iya ginet tin. Duwa ya sacgud na nga arig ngas nga sacgud niya isa nga urbun karne̍ru. Ngem ya panagkagi na, arig met nga agkagkagi nga dragun.

¹² Ket kabulun met nito nona nga nakan-ansing nga animal, ket uwed pe̍ igina ya amin nga kinaturay nito nona nga animal. Ket pinilit na diya amin nga aged-edyan iya lubung nga agdayaw ito nona nga nakan-ansing nga animal, nga igina to nalainganin to talingu na nga ipatey na kuma.

¹³ Ket nangipaspasingen to maikadduwa nga nakan-ansing nga animal ka nakaskasdaaw nga unay, ta uwed apuy nga pinagdessag na iya ginet nga gayat iya abac lawa. Ket nasingen ngarud diya toltoley.

¹⁴ Ket to maikadduwa nga animal, napalubusan nga agipasingen ka nakaskasdaaw iya imatang nito nona nga animal. Ket gapu kadidi nga nawangel nito maikadduwa nga animal, naallilaw na diya toltoley nga naged-edyan iya lubung. Ta binilin na da nga mangariman da ka bultu nga kalanglanga nito nona nga nakan-ansing nga animal, nga itu to natalingu ka ispada itun, ngem nabiyag latta.

¹⁵ Ket to maikadduwa nga animal, napalubusan met nga mangbiyag ito bultu nga kalanglanga nito nona nga animal, tasun makakagi to bultu win, se̍ mabalin na pe̍ ya mangpatey kadiya madi agdayaw igina.

¹⁶ Ket to maikadduwa nga animal, pinilit na diya toltoley, nga mamarkaan da iya diwanan nga ima da, winno iya muging da. Pinilit na ngarud diya amin nga toltoley, diya nanumu man winno diya mabigbig, se̍ orey diya nabacnang winno diya napanglaw, se̍ diya siwayawaya man winno diya tagabu.

¹⁷ Ket madi makapaglaku winno makapagngina ya orey nagan na nga toley, no madi naimarka igina ya nagan nito nona nga nakan-ansing nga animal, winno ya nume̍ru nga kaibatugan niya nagan na.

¹⁸ Ya mayat nga makaawat kuma iya banag nidi nga ibagac, ket masapul nga panunuten na nga nalaing. Ngarud, diya amin nga uwed pannakaawat na, pattapattaen da kuma ya kaipapennan nito nume̍ru nito animal, ta kaibatugan met niya isa nga toley. Ket idi ya nume̍ru na: ennem nga gasut ket ennem nga pulu ket ennem.