Paltiing 12 - Ya Baru nga Tulag

To babey se̍ to dragun

¹ Ket itun, uwed nasingen iya abac lawa nga nakaskasdaaw nga pagilasinan. Itu ya isa nga babey, nga arig met nga naikawwes ya sinag iginan. Ket ya bulan met ya pagsikadan na. Ket ya ulu na, nabalangatan ka kuruna nga uwed sangapulu ket duwa nga bituwen na.

² Uwed met bucsit na, ket nagkerkerre̍s gapu iya panagrigat na nga agpakiskisin.

³ Ket itun, uwed sabali manin nga nakaskasdaaw nga pagilasinan nga nasingen iya abac lawa, ta uwed met dackel nga sinan-buwaya nga maawagan ka dragun. Nadgang ya kulur nito dragun. Pitu met ya ulu na, se̍ sangapulu ya sacgud na, ket uwed kuruna niya tunggal isa kadito pitu nga ulu na.

⁴ Ket to ipus na, inapras na met ya pagkatlu diya bitbituwen iya abac lawa, ket naidegsut da iya ginet tin. Ket to dragun, nagsisikadin ito sangu nito babey nga dandani aganac kin, ta gabay na nga kanen kuma ya ke̍bit nito babey, no maiyanac kin.

⁵ Ket to babey, isa nga lalaki met ya niyanac na. Ket yan nga ke̍bit nga lalaki, igina ya mangituray nad iya amin nga nasnasyun ka nabaked nga turay nga agten iya kinabaked niya sacgukud nga landuc. Ket itun, naitalew mettin to ke̍bit nga naipen iya edyan ne̍ Apu Diyus iya trunu na.

⁶ Ket to babey, nagtalew met pe̍ yin nga nawe̍ iya isa nga edyan iya away, nga itu ya nisagana ne̍ Apu Diyus nga pakaistimaran na ka unus isa nga ribu ket duwa nga gasut ket ennem nga pulu nga algew.

⁷ Ket itun, uwed gubat ka langitin, ta e̍ Anghe̍l Mige̍l se̍ diya kabulun na nga anghe̍le̍s, ginubat da to dragun se̍ dito anghe̍le̍s na. Ket nakigubat met to dragun se̍ dito anghe̍l na igida.

⁸ Ket naabac met to dragun se̍ dito anghe̍le̍s na, itu nga madi da napalubusan nga agedyan ka langitin.

⁹ Ket to dackel nga dragun, naidegsut ngarud manipud ka langitin. Ngarud, igina yan to sinan-malaga itun pekkem, se̍ ya maawagan ka diyablu nga itu nge̍ Satanas. Igina met ya mangal-allilaw kadiya toltoley iya amin nga lubung. Naidegsut ngarud iya ginet tin, ket naidegsut pe̍ yin dito anghe̍le̍s na.

¹⁰ Ket nagicnac itun ya isa nga nabileg nga timec enna langit, nga kinunen na, “Nadatnganin ya panangipasingen ne̍ Apu Diyus iya panangisalakan na, se̍ ya pannakabalin na, se̍ ya panagari na. Se̍ naipasingen pe̍ yin ya turay nito nisaad na nga Kristu. Ta naidegsutin to pe̍yeng nga nangpabpabasul kadiya kakabsat tida, nga igina met to nangpabasul igida nga algew-gabi iya sangu niya Diyus tida.

¹¹ Ket ita, inabac mettin dito kakabsat tida, gapu ito pannakaidaga niya Urbun Karne̍ru, se̍ gapu ito pannakaibaga niya banag niya pammati da. Ket madi da met nibilang nga napatpateg ya biyag da ngem iya pammati da, orey naemmuwan da nga mapatey da gapu mettas iya pammati da.

¹² Dikad pe̍ anggem kuma ngas ya uwed ka langitin, se̍ uwed kuma ngarud pe̍ yin pakaragsakan diya aged-edyan ka langit! Ngem no ya ginet se̍ baybay iya lubung, kackaasi da nga gennung, ta itu ya nagdessagan nito diyablu win. Ket napalaus ya unget nan, ta emmu na nga e̍teng ngin ya gundaway nan,” kunen met nito timec.

¹³ Ket ito nadlaw nito dragun nga naidegsut iya ginet tin, nawe̍ na met riniwidan to babey nga nangiyanac ito ebbing nga lalaki.

¹⁴ Ngem to babey, nae̍cdan met ka duwa nga payac nga agten iya payac niya isa nga dackel nga bugkew, tasun makakayab nga mawe̍ enna away. Itu ya pakaistimaran na ka unus tellu ket kagudduwa nga dagun. Ket iya agten iyan, naliclikan na ngarud ya unget nito dragun, nga itu to naawagan pe̍ ka malaga.

¹⁵ Dikad pe̍ to sinan-malaga, niparuwar na iya musung na ya adu nga danum nga agten iya ayus niya wangag, se̍ na nipasarunu ito babey to dackel nga ayus danum, tasun malayus kuma nga maiyoloy to babey yin.

¹⁶ Ngem ya ginet, nisalakan na met to babey, ta nagngar ka dackel ya ginet, ket nagulpi nga inumtep to danum nga agten iya ayus niya wangag nga pinaruwar nito dragun ito musung na.

¹⁷ Ket nakaunget ngarudin to dragun ito babey. Itu nga nawe̍ na ginubat diya duduma pekkem nga an-anac nito babey, nga igida diya agtungtungpal kadiya bilbilin ne̍ Apu Diyus se̍ mangipatpateg iya pudnu nga nipakaemmu ne̍ Je̍sus.

¹⁸ Ket to dragunin, uwed pekkem iya pingit niya baybay, nga nagsisikad iya kapanagan.