Paltiing 11 - Ya Baru nga Tulag

Dito duwa nga mangipadamag

¹ Ket itun, nae̍cdan nac ka rurukud nga agten iya sacgukud, ket idi ya naibilin iyaken: “Mawe̍ ka rukuden ya te̍mplu ne̍ Apu Diyus se̍ ya pagdatunan. Ket bilangem met pe̍ diya agdaydayaw iyan.

² Ngem ya emwag niya te̍mplu, madi ka rukuden. Bay-am ngarud ya emwag na a, ta naipaay kadiya bekken nga Hudyu. Ket daldalapusen nad met diya bekken nga Hudyu ya He̍rusale̍m ka unus eppat nga pulu ket duwa nga bulan, nga itu mettas ya siyudad nga ipatpateg ne̍ Apu Diyus.

³ Ket ibon ku nad diya duwa nga mangipakaemmu iya pudnu. Nakakawwes nad didi nga eb-ebbonec ka nakersang nga luput. Ket tulungac da tasun makaipadamag da iya kagi ne̍ Apu Diyus ka unus isa nga ribu ket duwa nga gasut ket ennem nga pulu nga algew,” kunen nan.

⁴ Ket didi nga duwa nga maibon, igida nad diya pakaiyarigan dito duwa nga kayu nga ulibu, se̍ dito duwa nga dilag. Ket agsisikad da iya sangu niya Apu, nga igina ya mangituray kadiya amin nga uwed iya lubung.

⁵ Ket no uwed mangpadas nga mangpasakit kadidi nga duwa, uwed met apuy nga rumwar iya musung da nga duwa, ket patayen na diya manggura igida. Agten iyan ngarud ya wagas nga pannakapatey niya orey nagan na nga mangpadas nga mangpasakit igida.

⁶ Ket uwed pannakabalin didi nga duwa nga mangtengngel iya udan, tasun madi agudan bayat niya panangipadamag da iya kagi ne̍ Apu Diyus. Se̍ uwed pe̍ pannakabalin da nga mangpagbalin ka daga ya danum. Se̍ uwed pe̍ pannakabalin da nga mangipasagaba kadiya toltoley iya lubung iya orey nagan na nga rigat, se̍ iya orey nungey nga gabay da.

⁷ Ket kalpasan nad niya panangipadamag dito duwa nga mangipakaemmu iya pudnu, uwed met nakan-ansing nga sinan-animal nga rumwarin ito nakaun-uneg nga ebbut iya ginet, tasun mawe̍ makidangadang igida. Ket abaken na da nad met nga patayen.

⁸ Ket maiwalang ngas nad met diya bangkay dito duwa iya kalsada ito dackel nga siyudad, nga itu met to siyudad nga nakailansaan nito Apu da ka krus. Ket iyan nga siyudad, maawagan ka Suduma se̍ E̍hiptu, gapu ta maiyarig pe̍ kaditun.

⁹ Ket iya unus nad tellu ket kagudduwa nga algew, mabuybuya ngas diya bangkay da, ta buybuyaen nad met diya toltoley nga agtaud iya amin nga pagiliyan, kapututan, pagkakagi se̍ nasyun. Ket madi da nad ipalubus nga maitamen dito duwa.

¹⁰ Ket pakaragsakan nad mettin diya toltoley nga uwed iya lubung ya pannakatey dito duwa. Agraragsac nad ngarud diya toltoley, se̍ agsisinnagut da nad pe̍ gapu ta natey yin dito duwa nga mangipadamag. Ta gapu kadito duwa, adu ya pakarigatan diya toltoley nga uwed iya lubung iyan nga timpu.

¹¹ Ngem nasingec kun nga kalpasan niya tellu ket kagudduwa nga algew, nae̍cdan dito duwa ka anges nga gayat e̍ Apu Diyus. Nabiyag da manin, ket bimangun da mettin nga nagsikad. Napalaus ngarud ya ansing dito nakasingen igida.

¹² Ket itun, nagicna dito duwa ya nabileg nga timec nga gayat ka langit, nga kinunen na igida, “Umbe̍t kayu idi ngudu!” kunen na. Ket naibulun met dito duwa ka ulep pin, ket naipangudu da ngarud nga nawe̍ ka langitin. Ket dito gumurgura igida, binuybuya da ngarudin.

¹³ Ket iyan mettas nga kanitu, nangyegyeg met ka nabileg gin. Ket napirdi mettin ya apagkapullu nito siyudad, ket uwed met pitu nga ribu nga toley nga natey gapu ito yegyeg. Ket diya nakalasat, napalaus ngarud ya ansing dan, itu nga nagdaydayaw dan e̍ Apu Diyus nga uwed ka langit.

¹⁴ Ket itu yan to maikadduwa nga panagrigat diya toltoley. Ket dagus met nga sumarunu win ya maikatlu nga panagrigat da iya di mabayag.

To pannakapauni nito maikapitu nga tangguyub

¹⁵ Ket itun, pinauni nito maikapitu nga anghe̍l to tangguyub nan. Ket enna langit, uwed met nagicna ngin nga nabileg nga timtimec, nga kinunen da, “Ya lubung nga isa nga pagturayan, ket naitipun mettin iya pagturayan niya Apu tida, nga itu pe̍ ya pagturayan niya Kristu nga nibon na. Ket iya agten iyan, ya Apu tida met ya agturayin ka agnanayun nga awan patingga na!” kunen da.

¹⁶ Ket itun, dito duwa nga pulu ket eppat nga panglakayen nga agtugtugew kadito trunu da iya sangu ne̍ Apu Diyus, naglakeb da manin. Ket nagdaydayaw da e̍ Apu Diyus,

¹⁷ nga kinunen da, “Apu Diyus, nga Apu nga Mannakabalin ka amin, ikew ya uwed ita se̍ uwed pe̍ itun. Agyaman kami ikew, ta nipasingem mun ya nakaskasdaaw nga pannakabalin mu, ket agturay ka ngarudin!

¹⁸ Nakaunget diya bekken nga mamati, ngem nipasingem lattan ya unget mu igida. Ta nadatnganin ya timpu niya pannakaukum diya natey yin, se̍ ya timpu niya pananggun-gunam kadito nangasaba nga nagsirsirbi ikew itun, se̍ kadiya amin nga toley mu, nga itu diya amin nga pasurut niya kinaturay mu, orey diya mabigbig man, winno nanumu. Ngarud, timpu mettin niya pannakapirdi dito nangpirdi kadiya uwed iya lubung,” kunen da.

¹⁹ Ket itun, nalukatanin to te̍mplu ne̍ Apu Diyus ka langit, ket masingen nin iya uneg nito te̍mplu na to lakasa nga pakalaglagipan ito tulag nga nikari na. Ket nagselsel-it met itun, se̍ uwed pe̍ duduma nga nabileg nga un-uni. Ket naged-eddug, se̍ nangyegyeg met pe̍ itun, ket naglalagu ka adu pe̍ yin.