Paltiing 10 - Ya Baru nga Tulag

To tekkut nga nalukut nga pagbasaan

¹ Ket itun, uwed nasingec manin nga sabali nga anghe̍l nga naturay. Ket nagpaspasegged nga gayat ka langit. Nabugus met yan nga anghe̍l ka ulep, se̍ uwed pe̍ bunglun iya nguduwen niya ulu na. Nadarang met ya rupa na nga arig nga sinag, ket diya saka na, arig met nga deddu nga gilab apuy.

² Ket uwed sibibicrad nga tekkut nga pagbasaan iya ima na. Ket ginudlan niya diwanan nga saka na ya baybay, ket ya ginet to ginudlan niya katigid nga saka na.

³ Ket nagpekkaw ka nabileg to anghe̍l, nga arig nga panaguni niya liyun. Ket ito pinumkawin, nageddug met nga arig nga nagsusublat diya pitu nga sel-it.

⁴ Ket kalpasan nito panageddug dan, tage̍c agisurat kuma ngin ito nikagi da. Ngem pag-isu mettas nga uwed pe̍ nagicnac nga timec nga gayat ka langit, nga kinunen na iyaken, “Madi ka isurat to kinagi dito pitu nga sel-it, ata ilimed mu ngasin,” kunen na.

⁵ Ket itun, to anghe̍l nga agsisikad nga nakagudel iya baybay se̍ iya ginet, nitayag na ya diwanan nga ima na nga nagsapata.

⁶ Ket pagsapata na ya kinaturay ne̍ Apu Diyus nga sibibiyag ka agnanayun nga awan patingga na, nga igina met ya namarsuwa iya langit, iya ginet, se̍ iya baybay, agraman diya amin nga uwed kadidi. Ket kinunen ngarud nito anghe̍l ito sapata na, “Nadatngan mettin ya kustu nga timpu win, ket awan ngarud makaigapusin!

⁷ Ket ita, no pauniyen niya maikapitu nga anghe̍l ya tangguyub nan, matungpal ngarudin to sigud nga panggep ne̍ Apu Diyus, nga di pekkem naawatan diya toltoley itun. Ngarud, matungpal nad nga tutu win, sigun ito nipakaemmu ne̍ Apu Diyus kadito nangasaba nga agsirsirbi igina,” kunen na.

⁸ Ket itun, kinatbar nac manin to timec nga nagicnac nga gayat ka langit, ket kinunen na, “Mawe̍ ka alaken ya sibibicrad nga pagbasaan nga uwed iya ima niyan nga anghe̍l nga agsisikad iya baybay se̍ iya ginet,” kunen na.

⁹ Dikad pe̍ imadenni yac ngarud ito anghe̍l, ket inadeng ku igina to pagbasaan. Ket kinunen na iyaken, “Ne̍, alakem a, ta kanem mun. Nape̍t nad met nga mangpasakit iya bessug mu, ngem no uwed pekkem iya musung mu, naimas nga arig nga digu yukan,” kunen na.

¹⁰ Ket nimet ku ngarud to tekkut nga pagbasaan ito ima nito anghe̍l, se̍c kinan ngarudin. Ket pudnu ta naimas nga arig nga digu yukan iya musung ku. Ngem ito natlen kun, nape̍t met nga nangpasakit iya bessug kun.

¹¹ Ket nabilin nac manin, nga agten idi: “Masapul nga ipakaemmum manin ya damag ne̍ Apu Diyus maipanggep kadiya adu nga pagpagiliyan, nasnasyun, pagkakagi, se̍ maipanggep kadiya ar-ari,” kunen da.