Paltiing 1 - Ya Baru nga Tulag

¹ Idi nga surat, ket nakailaunan dito nipaltiing ne̍ Je̍su Kristu. Ket nipakaemmu ne̍ Apu Diyus igina didi, tasun ipakaemmu na kadiya agsirsirbi igina diya mapasamac iya di mabayag. Ket e̍ Kristu, nibon na ya anghe̍l na nga mangipakaemmu kadidi iyaken nga Juan, nga isa nga agsirsirbi igina.

² Ket ipakaemmuc met idi nga surat ya kinapudnu maipanggep kadito amin nga naipasingen iyaken, ta isurat ku idi nin to damag nga gayat e̍ Apu Diyus, nga itu pe̍ ya nipakaemmu ne̍ Je̍su Kristu.

³ Ket nagasat ngarud ya mangibasa idi nga naisurat nga paltiing. Nagasat ngarud met diya dumngeg se̍ mangipangag kadiya naisurat idi nga surat, ata dandani yin ya timpu nga pannakatungpal didi.

Kablaaw kadito pitu nga bungguy diya mamati

⁴ Iyaken nga Juan ya agsurat dakayu nga pitu nga bungguy diya mamati iya prubinsiya nga Asiya. Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus, nga igina ya uwed ita, uwed itun, se̍ ya umbe̍t nad pekkem. Ket yan nga siaayat nga asi, se̍ talna, gayat met pe̍ iya agkapitu nga Ispiritu nga uwed iya sangu niya trunu nga pagturayan mettas ne̍ Apu Diyus,

⁵ se̍ gayat pe̍ e̍ Je̍su Kristu. E̍ Je̍su Kristu ya mapagtalkan nga mangipakaemmu iya pudnu, se̍ igina met ya kaonaan nga Anac nga napagungar nga katurayan, se̍ igina met pe̍ ya agiturayin kadiya ar-ari iya lubung ngi. Daydayawen tida kuma ngarud nge̍ Je̍su Kristu win, ta igina met ya mangay-ayat dactida, se̍ ya nangwayawaya dactida iya pannakabalin diya basbasul tida, gapu iya pannakaidaga niya beggi na mettas.

⁶ Pinagbalin nactida nga naturay nga bungguy, nga agsirsirbi iya Diyus se̍ Ama na. Madaydayaw se̍ agturay kuma ngarud nge̍ Je̍su Kristu ka agnanayun nga awan patingga na! Agten iyan kuma.

⁷ Lemlemtan nu yani, ta umbe̍t manin nge̍ Je̍sus nga male̍cbut ka ulep. Ket masingen nad met niya tunggal isa nga toley, agraman dito nangdoyoc igina. Ket berritan nad met diya toltoley nga uwed kadiya amin nga pagpagiliyan iya lubung ngi. Matungpal met nga tutu yan. Agten iyan ngarudin!

⁸ Ket e̍ Apu Diyus, nga Apu nga Mannakabalin ka amin, kinunen na, “Iyaken ya pangrugiyan se̍ ya panggibusan niya amin,” kunen na, ta igina met ya uwed ita, uwed itun, se̍ ya umbe̍t nad pekkem.

To pannakasingen nito Juan e̍ Je̍sus

⁹ Iyaken nga Juan nga kabsat nu ka pammati, ket gapu iya pannakaitipun tida e̍ Je̍sus, kabulun dac met iya panagsagaba gapu igina, se̍ iya pannakairaman kadiya iturayan na, se̍ iya panaganus nga sinanama gapu igina. Ket gapu iya panangikasabac iya kagi ne̍ Apu Diyus, se̍ gapu iya panangipakaemmu ne̍ Je̍sus, uwed dac itun iya puru nga maawagan ka Patmus.

¹⁰ Ket itun, algew niya Apu win, ket naiturayan nac gapu iya pannakabalin niya Ispiritu ne̍ Apu Diyus. Ket uwed nagicnac itun iya likud ku nga isa nga timec nga nabileg, nga arig met nga uni tangguyub.

¹¹ Ket kinunen na iyaken, “Isurat mu didi nga masingem, ket ipatulud mu ya nalukut nga nakaisuratan da kadiya pitu nga bungguy diya mamati kadiya ili nga E̍pe̍su, E̍smirna, Pe̍rgamu, Tiyatira, Sardis, Pilade̍lpiya se̍ ka Lawdisiya,” kunen na.

¹² Ket itun, limaw-ing ngac kun, ta singec kuma no nagan ngarud niya makitkitbar iyaken. Ket ya nasingec, pitu nga dilag nga naariman ka balituc.

¹³ Ket uwed met nakasikad iya nagtetengngaan dito dilag, nga isa nga arig nga anac nga nagpaitoley. Nakasutana met ka patingga iya dapan na ya kagayad na. Ket iya barukung na, uwed balituc nga banda na.

¹⁴ Ket iya ulu na, uwed met puraw nga ebbuc na, nga agten iya kapuraw niya kapes winno ye̍lu. Ket diya mata na, arig nga gumilgilab nga apuy.

¹⁵ Ket diya saka na, arig nga burinsi nga napasileng gapu ka pannakailasat na ka apuy. Ket ya timec na, arig nga uni niya dackel nga danum nga mananasanin.

¹⁶ Ket iya diwanan nga ima na, uwed met pitu nga bituwen nga ic-icman na. Ket uwed pe̍ rinumwar iya musung na nga isa nga natadem nga ispada nga agsumbangir ya tadem na. Ket ya rupa na, nadarang met, nga arig nga darang niya sinag iya matuun.

¹⁷ Ket ito nasingec to arig nga toley, nagdarongkeb bac mettin iya sangu na nga arig gac met nga natey yin. Ket ya napasamac itun, nipatey na met iyaken ya diwanan nga ima na, nga kunen na, “Madi ka mansing, a. Ta iyaken met ya kaonaan se̍ ya kaodiyan ka amin.

¹⁸ Iyaken ya sibibiyag nga pe̍yeng. Natey yac itun, ngem ita, singem, sibibiyag gac kun ka agnanayun. Ket iyaken ya nakaitalkan diya arig nga tulbec niya pannakabalin niya patey se̍ ya pagtuukan diya natey enna Hade̍s.

¹⁹ Dikad pe̍ isurat mu ngarud didi nga masingem mun. Isurat mu ngarud diya mapasamac ita nga timpu, se̍ diya mapasamac nad iya maadpangan.

²⁰ Ket no maipanggep kadito pitu nga bituwen nga nasingem iya diwanan nga imac, se̍ dito pitu nga balituc nga dilag, agten idi ya kaipapennan da: Diya pitu nga bituwen, igida diya kaiyarigan diya anghe̍le̍s nga agay-aywan kadito pitu nga bungguy diya mamati. Ket diya pitu nga balituc nga dilag, itu diya kaiyarigan dito pitu nga bungguy,” kunen na.