Matyu 26 - Ya Baru nga Tulag

To panangisikat da nga mangtekkem e̍ Je̍sus

¹ Ket ito nalpas ne̍ Je̍sus ya nangisuru iya amin diyan, kinunen na kadito adalan na,

² “Emmu nu nga duwa nga algew ngasin sacbay niya Padaya Nitatalib. Ket ya Anac nga Naipatoley, maiyawat nad mettin nga mailansa ka krus,” kunen na.

³ Ket itun mettas, dito pangpangulu diya agsirsirbi iya Te̍mplu, se̍ dito panglakayen diya Hudyu, naguurnung da ngarud ito palasiyu ne̍ Kaipas, nga itu to kangatuwan nga agsirsirbi iya Te̍mplu.

⁴ Ket nagiinnumanan met dito naguurnungin no kumaan kuma niya nalimed nga panangtekkem da e̍ Je̍sus, se̍ ya panangpatey da igina.

⁵ Ket kinunen da iya panagtetebbar da, “Ngem ipaspase̍ tida pekkem ngarud, tasun bekken kuma nga mairana iya padaya, ta kaynun no agoorot diya toltoley,” kunen da.

Ito pannakabucbuc ne̍ Je̍sus ka bangbanglu

⁶ Ket itun, uwed nge̍ Je̍sus ka Be̍tanya ito baley ne̍ Simon, nga itu to nakutel itun.

⁷ Ket ito makisangsangu nge̍ Je̍sus nga mangan antuni, uwed isa nga babey nga inumbe̍t ito edyan na. Nangidal-ag met to babey ka isa nga butilya nga bangbanglu nga para labu, nga nangina nga unay. Ket to babey, nawe̍ na met nibucbuc ya mayan nito butilya iya ulu ne̍ Je̍sus.

⁸ Ket ito nasingen dito adalan to winangel nito babey, nakalucsew dan, nga kinunen da, “Ape̍ nga sinayang na?

⁹ Ta mabalin nga adu ya pakalakuwan niyan nga bangbanglu no mailaku, se̍ maikaasi kuma kadiya napanglaw,” kunen da.

¹⁰ Ket e̍ Je̍sus, emmu na to kinunen da, ket kinunen na lugud igida, “Ape̍ nga riribuken nu yani nga babey? Nabaru met ya nipaay na iyaken.

¹¹ Ta ya kinapudnu na, ket kanayun nga uwed da dakayu diya napanglaw. Ngem no iyaken, bekken met nga agnanayun ya kauwed ku dakayu.

¹² Ket idi nga panangibucbuc na ka bangbanglu iya beggic, itu met ya panangisagana na iyaken iya pannakaitamen ku.

¹³ Ket pudnu met nga orey awac iya lubung ya pakaikasabaan nidi nga Makaparagsac nga Damag, maistorya met pe̍ yani nga winangel nidi nga babey, nga itu nad ya pakalaglagipan igina,” kunen na.

To pannakitulag nito Hudas nga mangiyawat e̍ Je̍sus

¹⁴ Ket itun, to isa kadito sangapulu ket duwa nga adalan nga agnagan ka Hudas Iskariyute̍, nawe̍ met kadito pangpangulu diya agsirsirbi iya Te̍mplu.

¹⁵ Ket kinunen na, “Nagan kad ya maigun-guna nu iyaken no iyawat ku nge̍ Je̍sus dakayu?” kunen na. Ket tellu nga pulu nga diplata nga kuwarta to ne̍cde̍ da igina.

¹⁶ Ket manipud itunin, nagsicsiim ngarud nge̍ Hudas ka mayat nga gundaway na nga mangiyawat e̍ Je̍sus igida.

To nodi nga pananggidam ne̍ Apu Je̍sus sacbay niya pannakatey na

¹⁷ Ket ito nona nga algew niya Padaya Tinapay nga Awan Pangpablad Na, nawe̍ nagsaludsud dito adalan e̍ Je̍sus, nga kinunen da, “Awac ya gabay mu nga pangisaganaan mi iya panggidam mu iya Padaya Nitatalib?” kunen da.

¹⁸ Ket kinunen ne̍ Je̍sus, “Mawe̍ kayu iya edyan nito toley nga nibagac enna siyudad, ket kunen nu igina nga, ‘Kunen ne̍ Mistru, “Dandani yin ya timpuc. Ket iya baley mu ya panganac se̍ diya adalan ku no deddan iya pananggidam mi nga panangilagip mi iya Nitatalib,”’ kunen nu,” kunen na.

¹⁹ Ket tinungpal ngarud dito adalan to nibilin ne̍ Je̍sus. Ket iya agten iyan, nisagana da ya panggidam da nga panangilagip da ito Nitatalib.

²⁰ Ket ito gumabi yin, nakisangu nga nangan nge̍ Je̍sus kadito sangapulu ket duwa nga adalan na.

²¹ Ket ito madama da nga mangmanganin, kinunen ne̍ Je̍sus, “Ibagac ngarud ya kinapudnu na dakayu, nga uwed met isa dakayu nga mangiyawat nad iyaken,” kunen na.

²² Ket dito adalan, linumdaang da ngarud nga unayin. Ket nagsasarunu da nga nangsaludsud igina nga kinunen da, “Apu, bekken nga iyaken ya kunem, ey?” kunen da.

²³ Ket nisungbat ne̍ Je̍sus nga, “Ya isa nga nakipagsewsew iyaken ka tinapay na iya malukung ngi, itu ya mangiyawat iyaken kadiya kumuntra iyaken.

²⁴ Tutu met nga aglak-am ya Anac nga Naipatoley ka pannakatey, sigun ito sigud nga naisurat maipanggep igina. Ngem kackaasi nad lugud yan nga toley nga mangiyawat iya Anac nga Naipatoley! Nabarbaru met ya kasasaad niyan nga toley no madi kuma ngas naitaudin,” kunen na.

²⁵ Ket e̍ Hudas, nga itu to nakitulag nga mangiyawat e̍ Je̍sus, kinunen na met, “Mistru, bekken nga iyaken ya kunem, ey?” kunen na. Ket e̍ Je̍sus, kinunen na ngarud igina, “Itu ya kinunem,” kunen na.

To inariman ne̍ Je̍sus nga pakalaglagipan igina

²⁶ Ket ito mangmangan da pekkem, namet nge̍ Je̍sus ka tinapay, ket nagyaman e̍ Apu Diyus ka kararag. Pinisepisey na to tinapay, se̍ na ne̍cde̍ kadito adalan, nga kinunen na, “Alac nu yani, se̍ kanen nu. Idi ya beggic,” kunen na.

²⁷ Ket kalpasan na, namet pe̍ nge̍ Je̍sus ka paginuman. Nagkararag manin nga nagyaman e̍ Apu Diyus, se̍ na ne̍cde̍ igida, nga kinunen na, “Uminum kayu kuma nga amin idi.

²⁸ Ta idi ya dagac, nga itu ya mangpalagda iya tulag ne̍ Apu Diyus. Maiyayus ya dagac nga agpaay kadiya adu nga toltoley, tasun mapakawan diya basbasul da.

²⁹ “Ket pudnu met nga madic uminum nad iya basi ubasin, manipud ita agingga iyan nga algew nad nga makipaginum mac dakayu ka kabarbaru nga basi ubas iya pagiturayan niya Amac,” kunen na.

³⁰ Ket nagkanta da nga nagdayaw e̍ Apu Diyus, se̍ da pimanaw iya siyudadin, nga nawe̍ da enna Tageytey Ulibu.

To panangipakaemmu ne̍ Je̍sus iya panangilibac ne̍ Pe̍dru

³¹ Ket itun, kinunen ne̍ Je̍sus igida, “Ita mettas nga gabi, pumanaw kayu nga amin iyaken, gapu iya mapasamac iyaken. Ta naisurat iya Bibliya nga kunen na, ‘Patayec nad ya agay-aywan ka karne̍ru. Ket diya karne̍ru iya bungguy na, mawarawara da nad mettin,’ kunen na iya Bibliya.

³² Agten iyan nga tutu ya mapasamac, ngem kalpasan nad niya panagungar ku, mon-ona ngac nad nga mawe̍ enna Galilya ngem dakayu,” kunen na.

³³ Ket e̍ Pe̍dru, kinunen na ngarud e̍ Je̍sus, “Orey no pumanaw da nga amin gapu iya mapasamac ikew, pulus nga madi naka met nga panawan nga gennung!” kunen na.

³⁴ Ket kinunen ne̍ Je̍sus igina, “Kinapudnu na, ita mettas nga gabi, sacbay niya panagtataraut diya kawitan no parbangun, name̍tlu nac nad met nga nilibac kin,” kunen na.

³⁵ Ket kinunen ngarud ne̍ Pe̍dru igina, “Orey no mapatey yac nga mairaman ikew, pulus nga di naka met ilibac!” kunen na. Ket amin dito pada na nga adalan, itu met pe̍ ya kinagi da.

To panagkararag ne̍ Je̍sus enna Ge̍tse̍mani

³⁶ Ket itun, nagbubulun de̍ Je̍sus dito adalan na nga nawe̍ da iya isa nga lugar nga managan ka Ge̍tse̍mani. Ket kinunen na kadito adalan na, “Agtugew kayu was idi, ta mawe̍ yac agkararag antuni,” kunen na.

³⁷ Ket nibulun na nge̍ Pe̍dru se̍ dito duwa nga anac ne̍ Se̍be̍dyu. Ket e̍ Je̍sus, linumdaang mettin, se̍ nariribuc pe̍ yin ya nakem na.

³⁸ Ket itun, kinunen na kadito tellu, “Nadagsen nga unay ya ricnac kun, nga arig nga makatkatayen nac gapu iya ladingit kun. Mabati kayu kuma idi, ket makipagsulap kayu kuma pe̍ iyaken,” kunen na.

³⁹ Ket imadeyyu nge̍ Je̍sus ka e̍teng igida, se̍ nagdarongkeb iya ginet nga nagkarkararagin, nga kinunen na, “Amac! No mabalin nas kuma, mailisi kuma iyaken yani nga panagsagaba nga lak-amec, nga rigat nga arig nga inumec. Ngem bekken kuma ngarud nga ya tarigagay ku ya matungpal, no di lugud ya tarigagay mu,” kunen na.

⁴⁰ Ket simoli nge̍ Je̍sus ito edyan dito tellu nga adalan na, ket nadateng na da nga agtudtudug mettin. Ket kinunen na ngarud e̍ Pe̍dru, “Ape̍? Di kayu aya makabael nga makipagsulap iyaken, ka orey ngas is-isa nga uras?

⁴¹ Agsulap kayu ngarudin nga agkarkararag, tasun madi kayu kuma nga masulisug. Ta orey sipapasnec ya panpanunut niya toley, ket sikakapsut pekkem ya kabaellan niya beggi na,” kunen na.

⁴² Ket nawe̍ manin nge̍ Je̍sus nga nagkararag, ket kinunen na ito maikadduwa nga kararag na, “Amac, no madi mabalin nga mailisi iyaken yani nga rigat nga arig nga inumec, no di yac pekkem lak-amen ita, ket basta matungpal kuma ngas ya tarigagay mun,” kunen na.

⁴³ Ket ito simoli manin nge̍ Je̍sus ito edyan dito tellu nga adalan na, ket nadateng na da nga agtudtudug manin, ta agdocdocyep da met latta.

⁴⁴ Ket nibati na da manin, nga nawe̍ nagkararag iya kapame̍tlu nan. Ket inulit na manin to agten mettas nga banag nito kararag na e̍ Apu Diyus.

⁴⁵ Kalpasan na, simoli manin ito edyan dito adalan, ket kinunen na igida, “Agtudtudug se̍ agim-imang kayu pekkem? Singen nu! Dandani ya timpuc kun, ket maiyawatin ya Anac nga Naipatoley kadiya managbasul.

⁴⁶ Ala, bumangun kayun, ta mawe̍ tidan. Singen nu kadin! Sumungsungadin ya mangiyawat iyaken,” kunen na.

To pannakatkem ne̍ Je̍sus

⁴⁷ Ket ito agkagkagi pekkem nge̍ Je̍sus, inumbe̍t to Hudas nga isa ngarud kadito sangapulu ket duwa nga adalan. Ket kabulun na ya adu nga toley nga nagtagiispada se̍ nagtagipang-ur. Diyan nga toley, ebbon met dito pangpangulu diya agsirsirbi iya Te̍mplu, se̍ dito panglakayen diya Hudyu.

⁴⁸ Ket to mangiyawat e̍ Je̍sus, uwed met pagilasinan nga nisuru nan kadito naibulun igina, ta kinunen na itun, “Ya agkac nad, igina yanin. Ket tacmen nu nad ngarudin,” kinunen na itun.

⁴⁹ Ket iya agten iyan, nagtarus ngarud to Hudas nga imadenni e̍ Je̍sus, ket kinunen na, “Kumusta, Mistru!” kunen na met, se̍ na inagkan nge̍ Je̍sus.

⁵⁰ Ket kinunen lugud ne̍ Je̍sus igina, “Gayyem, tungpalem ngasin ya panggep mun,” kunen na. Ket itun, dimarup ngarudin dito kabulun nito Hudas, ket tinkem da nge̍ Je̍sus, nga tinngel da.

⁵¹ Ket ya napasamac itun, ya isa kadito kabulun ne̍ Je̍sus, inasut na mettin ya ispada na, ket kinteb na met ya tagabu nito kangatuwan nga agsirsirbi iya Te̍mplu. Ket nape̍ngas met ya isa nga tinga nito tagabu win.

⁵² Ket kinunen ngarud ne̍ Je̍sus iginan, “Bay-am mun! Ibainam mas ya ispada mun! Ta diya agusar ka ispada, ket ispada mettas pe̍ ya pakatayan da.

⁵³ Nagan na lugudin? Di ngarud aya mabalin ku ya agadeng e̍ Amac ka tulung na, ket sigida nga mangibon ka orey nasuruc nga sangapulu ket duwa nga dackel nga bungguy diya anghe̍le̍s nga tumulung iyaken?

⁵⁴ Ngem no agten iyan ya wanglec, madi ngarud matungpal to padtu nga naisurat iya Bibliya, nga masapul kanu nga mapasamac nga agten idi,” kunen na.

⁵⁵ Ket itun, kinunen ne̍ Je̍sus kadito toley nga naguurnung antuni, “Ape̍ kad nga agtagiispada se̍ agtagipang-ur kayu nga inumbe̍t mangtekkem iyaken, nga arig nga isa ngac nga tulisan? Inalgew nga uwed dac met nga agtugtugew nga mangisursuru enna Te̍mplu, ngem madi dac met nga tinkem.

⁵⁶ “Ngem masapul met nga mapasamac amin didi nin, tasun matungpal kuma dito nisurat dito mammadtu iya Bibliya,” kunen na. Ket itun, nagtalew met dito amin nga adalan, nga binaybay-an da nge̍ Je̍susin.

To pannakaisangu ne̍ Je̍sus kadito pangpangulu diya Hudyu

⁵⁷ Ket dito nangtekkem e̍ Je̍sus, nipen da nge̍ Je̍sus enna baley ne̍ Kaipas, nga itu to kangatuwan nga agsirsirbi iya Te̍mplu. Ket naguurnung pe̍ antuni nin dito manursuru iya Linteg se̍ dito panglakayen diya Hudyu.

⁵⁸ Ket e̍ Pe̍dru, tinumtumneb kade̍ Je̍sus nga nawe̍ iya emwag niya baley nito kangatuwan nga agsirsirbi iya Te̍mplu. Ket imuneg ngarud nge̍ Pe̍dru nga nawe̍ nakitugew win kadiya guwardiya nga uwed antuni, ta panggep na nga maemmuwan no nagan nad ya mapasamac.

⁵⁹ Ket dito pangpangulu diya agsirsirbi iya Te̍mplu, se̍ amin dito duduma nga kunse̍hale̍s, nagsapsapul da ka busid nga mangipanecnec kuma ka basul ne̍ Je̍sus, tasun uwed kuma rasun da nga mangpatey igina.

⁶⁰ Ngem awan met nasmac da nga mabalin, orey adu met dito toley nga nakisangu igida nga nagibaga ka busid maipanggep igina. Ket to napasamac, ket uwed met duwa pekkem nga nawe̍ nakisangu igida.

⁶¹ Ket kinunen didi nga, “Kinunen met nidi nga toley nga agten idi: ‘Mabalin ku nga lasangen ya Te̍mplu ne̍ Apu Diyus, ket mabalin ku nga bangunen manin ka unus tellu nga algew,’ kunen na met,” kunen da.

⁶² Ket to kangatuwan nga agsirsirbi iya Te̍mplu, nagsikad met, ket kinunen na e̍ Je̍sus, “Nagan ya maisungbat mu? Nagan ngarud ya makunem maipanggep kadiya nipabpabasul didi nga toley ikew?” kunen na.

⁶³ Ngem madi neg-egkim nge̍ Je̍sus. Ket kinunen ngarud manin nito kangatuwan nga agsirsirbi iya Te̍mplu, “Ibagam nga sisasapata iya turay niya sibibiyag nga Diyus, no tutu nga ikew ya Kristu, nga naipadtu nga Anac ne̍ Apu Diyus,” kunen na.

⁶⁴ Ket kinunen ne̍ Je̍sus igina, “Nakagi mun. Ket bekken nas nga iyan, ta pudnu met pe̍ nga manipud ita nga timpu, masingen nu ngarud ya Anac nga Naipatoley nga nakatugew iya madiwanan niya Mannakabalin. Se̍ masingen nu pe̍ nga umbe̍t nad manipud iyan, nga nakasakey kadiya ulep nga gayat ka langit,” kunen na met.

⁶⁵ Ket iya agten iyan itun, siuunget mettin to kangatuwan nga agsirsirbi iya Te̍mplu nga pinigis na to mismu nga kawwes na, nga kinunen na, “Ke̍h! Nagkagi mettin ka maikuntra e̍ Apu Diyus! Awan pakasapulan tidan ka sabali nga sacsi yin, ta nagicna nu mettin ya kagi na mettas nga maikuntra e̍ Apu Diyus.

⁶⁶ Nagan ngarud ya makunen nun?” kunen na. Ket kinunen da ngarud, “Rumbeng nga mapatey!” kunen da met.

⁶⁷ Ket linutaban da itun ya rupa ne̍ Je̍sus, se̍ dinanugdanug da pe̍. Ket tinungpa met diya duduma igida,

⁶⁸ nga kinunen da, “Ikew nga Kristu! Padtuwam man dakami no nagan dakami ya nangtungpa ikew!” kunen da met.

To panangilibac ne̍ Pe̍dru e̍ Je̍sus

⁶⁹ Ket e̍ Pe̍dru itun, uwed pekkem iya ruwar, nga agtugtugew ito emwag. Ket uwed met isa nga nawe̍ ito edyan na nga babey nga katulung. Ket kinunen nito babey, “Nih! Ikew met pe̍ ya isa kadito nakibulubulun e̍ Je̍sus nga iGalilya!” kunen na.

⁷⁰ Ngem naglibac met nge̍ Pe̍dru ito imatang dito amin nga toley iyan, nga kinunen na, “Awan met emmuc iyan nga ibagbagam!” kunen na met.

⁷¹ Ket nawe̍ nge̍ Pe̍dru ito ruwanganin. Ket uwed manin antuni ya isa nga babey nga nakasingen igina, ket kinagi na ngarud kadito uwed antuni nga kinunen na, “Itu yani ya isa kadito nakibulubulun e̍ Je̍sus nga iNasare̍t!” kunen na.

⁷² Ngem naglibac manin nge̍ Pe̍dru, nga nagsapata mettin nga kinunen na, “Madic met em-emmu yan nga toley!” kunen na.

⁷³ Ket ito di mabayag, inadenniyan dito toley nga uwed antuni nge̍ Pe̍dru. Ket kinunen da igina, “Siguradu met nga kabulun daka pe̍, ta ya ayug niya panagkagim met ya pakailasinan,” kunen da.

⁷⁴ Ket e̍ Pe̍dru, nagsapata met manin itun, se̍ kinunen na nga sipapasnec, “Ahah! Pudnu met nga madi yac em-emmu yan nga toley!” kunen na met. Ket pag-isu met nga uwed nagtaraut nga kawitanin.

⁷⁵ Ket nalagip ngarudin ne̍ Pe̍dru to nibaga ne̍ Je̍sus igina itun nga, “Sacbay niya panagtataraut diya kawitan, ket name̍tlu nac nad met nga nilibac kin.” Ket rinumwar ngarud nge̍ Pe̍dru iyan, ket nagberrit ka napalausin.