Matyu 19 - Ya Baru nga Tulag

To panursuru ne̍ Je̍sus maipanggep iya panagadi

¹ Ito nalpas ne̍ Je̍sus nga nisuru diyan nga pangngarig, pimanaw enna Galilya, ket nawe̍ iya sakup niya prubinsiya nga Hudya iya demmang nito wangag Hordan.

² Nakad-adu diya toley nga nawe̍ nakibulun igina, ket pinalaing na diya agsakit igida antuni.

³ Ket uwed da met dito Parisiyu itun nga imadenni e̍ Je̍sus nga mangsintir igina, nga kinunen da, “Ibagam man: Sigun iya Linteg tida, mabalin kad nga iyadi niya lalaki ya asawa na gapu ka orey nagan na?” kunen da.

⁴ Ket kinunen met ne̍ Je̍sus, “Ape̍? Madi kayu kad nabasa to naisurat iya Bibliya, nga ito panangrugi niya amin, lalaki se̍ babey ya inariman niya Namarsuwa?

⁵ Ket kinunen na pe̍, ‘Itu nga panawan niya lalaki ya ama na se̍ ya ina na, ket makitipun iya asawa na. Ket diyan nga duwa, agbalin da nga arig nga is-isa ngin.’

⁶ Ket iya agten iyan, bekken da nga duwa ngin, no di arig da nga is-isa ngin. Dikad pe̍ ya pinagtipun ne̍ Apu Diyus, madi kuma ngarud nga pagsinaen niya toley,” kunen na.

⁷ Ket kinunen dito Parisiyu igina, “No agten iyan, ape̍ ngarud nga nibilin nito Muyse̍s nga no e̍cdan kanu niya lalaki ya asawa na ka kasuratan nga mangipanecnec iya panagadi da, mabalin na kanu met nga iyadi yin?” kunen da.

⁸ Ket kinunen ne̍ Je̍sus igida, “Gapu mettas iya panagsukir nu, nipalubus ngarud nito Muyse̍s ya panangiyadi nu iya asawa nu. Ngem bekken met nga agten iyan to sigud nga panggep ne̍ Apu Diyus ito panamarsuwa na iya toley itun.

⁹ Ket idi ngarud ya ibagac dakayu: Ya lalaki nga mangiyadi iya asawa na se̍ manin mangasawa ka sabali, ket maibilang nga makabasulin ka basul nga pannakitipun ka bekken na nga asawa, malacsid no gapu ka pannakikamalala niya asawa na to panangiyadi na,” kunen na.

¹⁰ Ket dito adalan na, kinunen da igina, “No agten iyan mettas lugud ya paglinteggan niya panagasawa, maymayat ngarud met no madi kuma mangasawa ya toley yin,” kunen da.

¹¹ Ket kinunen ne̍ Je̍sus, “Bekken met nga amin nga toley ya makabael iya banag nidi nga sursuru, no di ngas diya nae̍cdan ka pannakaawat idi.

¹² Nadumaduma diya gapu na nga madi mangasawa diya toley. Ta uwed diya madi makaasawa gapu ta naiyanac da nga uwed dipe̍re̍nsiya iya kinalalaki da. Ket uwed pe̍ diya madi makaasawa gapu iya pannakakapun da nga inariman toley igida. Ket uwed met pe̍ diya madi mangasawa gapu ta niparit da iya beggi da yan, tasun agpaay da kuma ngas kadiya banbanag maipanggep iya panangituray niya Nailangitan. “Ket ya makabael iya banag nidi nga sursuru, tungpalen na kuma ngarud,” kunen na.

To ayat ne̍ Je̍sus kadito ebbing

¹³ Ket uwed da itun ebbing nga naipen e̍ Je̍sus, tasun ipatey na kuma diya ima na igida, se̍ ikararagan na da. Ngem dito adalan ne̍ Je̍sus, nilbec da met dito nangipen.

¹⁴ Ngem kinunen ne̍ Je̍sus, “Palubusan nu lugud diya ebbing nga umbe̍t iyaken. Madi nu da nga paritan. Ta agten met kadidi nga ebbing diya aglak-am iya panangituray niya Nailangitan,” kunen na.

¹⁵ Ket nipatey na ngarud diya ima na kadito ebbing. Ket kalpasan na, pimanaw iyanin.

To lalaki nga nabacnang

¹⁶ Ket uwed met itun isa nga lalaki nga nawe̍ iya edyan ne̍ Je̍sus, ket kinunen na, “Mistru, ibagam kay iyaken ya masapul nga wanglec nga nalinteg, tasun magun-ud ku kuma ya biyag nga agnanayun,” kunen na.

¹⁷ Ket kinunen ne̍ Je̍sus igina, “Ape̍ nga iyaken ya pagsaludsudam maipanggep iya nalinteg? Is-isa ngas met ya nalinteg. Ngem no maipanggep iya pannakairaman mu kuma iya agnanayun nga biyag, tungpalem ngarud dito bilbilin ito Linteg,” kunen na met.

¹⁸ Ket kinunen ngarud nito lalaki, “Nagan da kad kadito bilbilin diya tungpalec kuma?” kunen na. Ket kinunen ne̍ Je̍sus, “Madi ka pumatey, madi ka makitipun ka bekken mu nga asawa, madi ka agtakew, madi ka mangpabasul nga sibubusid,

¹⁹ se̍ dayawem ya amam se̍ ya inam, se̍ ayatem ya padam nga toley, nga agten mettas iya panagayat mu iya beggim,” kunen na.

²⁰ Ket kinunen nito lalaki, “Tungtungpalec met amin diyan nga bilbilin. Nagan pekkem ya tungpalec kuma?” kunen na.

²¹ Ket kinunen ne̍ Je̍sus igina, “Tasun awan pagkurangam mun, mawe̍ ka ilaku diya sansanicwam, se̍ ka e̍cde̍ ya paglakuwam kadiya napanglaw. Ket iya agten iyan, uwed nad kinabacnang mu ka langitin. Ket kalpasan niya panange̍cde̍ mun, umbe̍t nac suruten nin,” kunen na.

²² Ngem ito nagicna nito lalaki yan, pimanaw lugudin nga silaladingit, ta bacnang met ngamin nga unay.

²³ Ket e̍ Je̍sus, kinunen nan kadito adalan na, “Tutu met nga narigat nga aglak-am nad diya uwed kinabacnang da iya panangituray niya Nailangitan.

²⁴ Pudnu met pe̍ nga nalaclaka lugud ya lumbut niya kame̍lyu iya ebbut niya dagum, ngem iya panaglak-am niya isa nga nabacnang iya panangituray ne̍ Apu Diyus,” kunen na.

²⁵ Ket dito adalan na, nasdaaw da nga unay ito nagicna da yan. Ket kinunen da, “No agten iyan, nagan ngarud diya mabalin nga maisalakanin?” kunen da.

²⁶ Ket e̍ Je̍sus, pineskan na da, ket kinunen na, “No ya toley, ket madi ngarud mabalin yan. Ngem no e̍ Apu Diyus, mabalin na ya orey nagan na,” kunen na.

²⁷ Ket e̍ Pe̍dru met ya nagkagi itunin, nga kinunen na, “Ket no dakami, pinanawan mi met diya amin, tasun sumurut kami ikew. Nagan nad ngarud ya gun-guna mi?” kunen na.

²⁸ Ket kinunen ne̍ Je̍sus igida, “Pudnu met yani nga ibagac dakayu: Dakayu nga sumurut iyaken ita, ket maipatugew kayu nad met nga situturay ka sangapulu ket duwa nga trunu. Agten iyan nad ngarud iya kabarbaru nga timpu, no agtugew win nga situturay ya Anac nga Naipatoley iya trunu na nga pakaidayawan na. Ket dakayu nad ya mangdisidir maipanggep kadiya kapututan dito sangapulu ket duwa nga anac nito Israe̍l.

²⁹ Ket tutu met nga amin nga nangpanaw ka baley na, kakabsat na nga lalaki man winno babey, ama na winno ina na, winno diya anac na, winno diya laplapug na, tasun agsirbi iyaken, basta maisupapac igina ya orey no mame̍nsangagasut nga agten kadiyan. Ket se̍ matawid na met pe̍ ya biyag nga agnanayun.

³⁰ Ngem tutu met pe̍ nga adu diya maibilang nga nadayaw ita, nga maibilang nad ngas met nga nababa ngin. Ket adu diya maibilang nga nababa ita, nga maibilang nad met nga nadayawin.”