Matyu 17 - Ya Baru nga Tulag

To pannakaipasingen niya dayag ne̍ Je̍sus

¹ Ket kalpasan niya ennem nga algew, nibulun ne̍ Je̍sus de̍ Pe̍dru, Santiyagu se̍ e̍ Juan nga kabsat ne̍ Santiyagu, ket ig-igida ngas ya nanang-at iya isa nga nangatu nga tageytey.

² Ket antuni, nabaliwan met to langa ne̍ Je̍sus iya imatang da. Dimarang met ya rupa na nga arig nga sinag. Ket to luput na, nagbalin nga puraw nga unayin, nga arig nga darang niya sinag.

³ Pagamwan nas nga nasingen da pe̍ to Muyse̍s se̍ to E̍lyas nga makitkitbar e̍ Je̍susin.

⁴ Ket e̍ Pe̍dru, kinunen na met e̍ Je̍sus, “Apu, nabaru ya kauwed tida idi! Ket no gabay mu, mangariman nac ka tellu nga pagliduman idi: ya isa para ikew, isa para e̍ Muyse̍s, se̍ isa para e̍ E̍lyas,” kunen na.

⁵ Ket ito madama pekkem nga agkagkagi nge̍ Pe̍dru, uwed met gayam nadarang nga ulep nga nangbugus igida. Ket uwed met pe̍ nagicna da nga timec nga gayat ito ulep, nga kinunen na, “Itu yani ya Anac ku nga dungdungnguwec. Igina ya pakaay-ayuwac. Ipangag nu ngarud ya kagi na!” kunen na.

⁶ Ket ito nagicna dito adalan na yan, napalaus ngarud ya ansing dan, ket nagdarongkeb da iya ginet tin.

⁷ Ket e̍ Je̍sus, nawe̍ na da sine̍cde̍ng, nga kinunen na, “Gumnukat kayun. Madi kayu kuma mansing,” kunen na.

⁸ Ket ito limang-ug da, awan sabali nga nasingen dan, malacsid ngas e̍ Je̍susin.

⁹ Ket ito agdagdagus de̍ Je̍susin ito tageytey, binilin na dito tellu nga adalan na, nga kinunen na, “Awan kuma pekkem pangibagbagaan nu ito nasingen nu, agingga nga agungar ya Anac nga Naipatoley,” kunen na.

¹⁰ Ket sinaludsud dito tellu nga adalan igina, “No agten iyan, ape̍ nga kunen diya manursuru iya Linteg nga to E̍lyas, masapul kanu nga umbe̍t nga mon-ona ngem iya Kristu?” kunen da.

¹¹ Ket kinunen ne̍ Je̍sus, “Tutu met nga umbe̍t nga mon-ona nge̍ E̍lyas, tasun pasoliyen na diya amin nga banbanag kadito sigud nga urnus da.

¹² Ngem agten idi ya kinapudnu na: Inumbe̍t ngarudin to E̍lyas, ngem madi nalasin diya toley, no di lugud winangwangel da igina ya orey nagan na nga ginabgabay da. Ket gapu pe̍ igida, agten nad met pe̍ iyan ya pakarigatan niya Anac nga Naipatoley,” kunen na.

¹³ Ket iya agten iyan, naawatan ngarudin dito tellu nga adalan nga to Juan nga Mammautisar met ya pakaiyarigan nito E̍lyas, nga itu ya kayat nga kagiyen ne̍ Je̍sus igida.

To ebbing nga nalugluganan ka sairu

¹⁴ Ket ito nakadateng de̍ Je̍sus ito edyan diya toltoley, uwed met isa nga lalaki nga nawe̍ nagparintumeng iya sangu ne̍ Je̍sus.

¹⁵ Ket kinunen na, “Apu, kaasiyam kay ya anac ku nga lalaki, ta agkeskessiw met, ket maparparigatan nga unay. Ta pe̍yeng nga matuwang iya apuy winno iya danum.

¹⁶ Nipen ku kadiya adalan mu, ngem madi da met nabalinan nga palaingen,” kunen na.

¹⁷ Ket kinunen met ne̍ Je̍sus, “Ay, dakayu nga toley ita nga timpu! Ape̍ nga awan met panamati nu se̍ ape̍ nga nakillu met ya panpanunut nu? Masapul kad nga agedyan nac pekkem dakayu ka mabayag? Masapul kad nga mabayag pekkem ya panaganus ku dakayu? Ala! E̍lbe̍t nu ngarud iyaken ya ebbing,” kunen na.

¹⁸ Ket binilin ngarud ne̍ Je̍sus to sairu nga pumanawin, ket nagtalew mettin ito ebbing. Ket nalainganin iyan mettas nga kanitu.

¹⁹ Ket kalpasan niyan, dito adalan ne̍ Je̍sus, nawe̍ da nagsaludsud igina, ito ig-igida ngasin, nga kinunen da, “Ape̍ ngata nga madi mi nabalinan nga pinagtalew to sairu?” kunen da.

²⁰ Ket kinunen na igida, “Gapu ta nakapsut ngas ya panamati nu. Pudnu met nga no uwed e̍teng ngas nga panamati nu, nga orey maiyarig ngas iya katekkut niya bukel niya kayu nga mustasa, mabalin nu met nga bilinen yani nga tageytey nga kunen nu, ‘Agalis ka manipud idi nga mawe̍ ka ituni,’ kunen nu kuma, ket agalis met. Ket iya agten iyan, awan met pulus nga madi nu mabalinan.

²¹ [Ngem no iya agten iyan nga lumugan ka toley, madi met mapagtalew, malacsid no gapu iya panagkararag se̍ iya panaganus nu nga madi mangan,]” kunen na.

Ito nipakaemmu manin ne̍ Je̍sus ya ipapatey se̍ panagungar na

²² Ket ito nagpaspasyar de̍ Je̍sus se̍ dito adalan na enna prubinsiya nga Galilya, kinunen ne̍ Je̍sus igida, “Ya Anac nga Naipatoley, ket maiyawat nad ngarud kadiya toley,

²³ ket patayen da met. Ket nad iya maikatlu nga algew, mapagungar,” kunen na. Ket linumdaang ngarud nga unayin dito adalan.

Maipanggep iya buis nga maipaay iya Te̍mplu

²⁴ Ket ito nakadateng de̍ Je̍sus se̍ dito pasurut na ka ili nga Kape̍rnaum, nawe̍ nagsaludsud e̍ Pe̍dru diya agsingsingir iya buis nga maipaay iya Te̍mplu, nga kinunen da, “Madi kad agbaybayad to Mistrum iya buis nga maipaay iya Te̍mplu?” kunen da.

²⁵ “Kapuutin!” nisungbat ne̍ Pe̍dru. Ket ito nakauneg nge̍ Pe̍dru iya baley yin, e̍ Je̍sus met ya nona nga nagkagi, nga kinunen na e̍ Pe̍dru, “No ikew, Simon, nagan ya kunem? Diya ar-ari nga agturay idi nga lubung, nagan kad kuma diya ipapilit da nga agsidula se̍ agbayad ka buis igina? Diya anac da mettas winno diya duduma?” kunen na.

²⁶ Ket kinunen ngarud ne̍ Pe̍dru, “Diya duduma, a,” kunen na. Ket e̍ Je̍sus, kinunen na, “Tutu met. Dikad pe̍, diya anac, madi da ngarud masapul nga agbayad.

²⁷ Ngem tasun madi tida da kuma mapasakitan, ket agten idi ya wanglem: Mawe̍ ka mamantac enna baybayin. Ket ya mona nga lames nga maalac mu, pakowabem ya musung na. Ket no mapakowab mun, uwed met masmac mu nga pirac. Ket itu win ya e̍cde̍m kadito agsingsingir, nga pagbayad mu ka buis ta nga duwa,” kunen na.