Matyu 12 - Ya Baru nga Tulag

To panursuru ne̍ Je̍sus maipanggep iya Algew Ngilin

¹ Ito isa nga Algew Ngilin itun, manmanalan de̍ Je̍sus iya laplapug nga namulaan ka trigu. Ket dito adalan na, nabisin dan, itu nga nagkelkeltung da kadiya dawa diya trigu, se̍ da kinan.

² Ket ito nadlaw diya duduma kadito Parisiyu, kinunen da e̍ Je̍sus, “Singem! Wangwanglen met diya adalan mu ya maiparit iya Linteg tida iya Algew Ngilin,” kunen da.

³ Ket kinunen ne̍ Je̍sus igida, “Di nu pekkem aya nga nabasa iya Bibliya maipanggep ito winangel nito Ari Dabid ito nabisin, se̍ dito kabulun na?

⁴ Ta imuneg met to Dabid iya pagdaydayawan nga maawagan ka baley ne̍ Apu Diyus, nga nimet na to tinapay nga naidatun mettas e̍ Apu Diyus. Ket nangan da met ito tinapay, orey emmu nito Dabid nga sigun iya paglinteggan tida, maiparit igina se̍ kadito kabulun na ya mangan iyan nga tinapay. Ta diyan nas met agsirsirbi iya pagdaydayawan ya mapalubusan nga mangan iyan nga tinapay.

⁵ Ket se̍ no maipanggep pe̍ kadiya agsirsirbi iya Te̍mplu, di nu pekkem aya nga nabasa ya naisurat ito Linteg nito Muyse̍s, nga gapu mettas iya wangel da nga panangtungpal da iya rebbeng da iya Te̍mplu no Algew Ngilin, ket maariman da met ya maiparit iya Algew Ngilin, ngem bekken da met nga maibilang nga makabasul?

⁶ Ket ya kinapudnu na, uwed met nagparang itan nga nadaydayaw ngem iya Te̍mplu.

⁷ Ngem madi nu pekkem maawatan ya kaipapennan nito kinunen ne̍ Apu Diyus iya Bibliya nga, ‘Bekken nga ya panangidatun ka animal ya paggugustuc, no di lugud ya panangngaasi,’ kunen na. Ta no maawatan nu kuma ya kaipapennan niyan, madi kayu kuma mangpabasul kadiya awan basul da.

⁸ Ta kinapudnu na, ya Anac nga Naipatoley, igina met ya Apu niya Algew Ngilin,” kunen na.

To lalaki nga nacpe̍t ya ima na

⁹ Ket nanipud iyan nga edyan, nawe̍ nge̍ Je̍sus iya gigimungan diyan nga toley.

¹⁰ Ket enna gigimungan, uwed met isa nga lalaki nga nacpe̍t ya ima na. Ket uwed da met pe̍ antuni diya mayat nga mangidarum e̍ Je̍sus, ket nagsapsapul da ka ipabasul da kuma igina. Itu nga nagsaludsud da igina nga kinunen da, “Sigun iya Linteg tida, maipalubus kad ya mangpalaing no Algew Ngilin?” kunen da.

¹¹ Ket kinunen met ne̍ Je̍sus igida, “Kaspagarigan no uwed isa dakayu nga uwed karne̍ru na nga naipisuc iya isa nga ebbut iya Algew Ngilin, di na ngarud mawe̍ alaken nga aunen?

¹² Ket no ya toley, napatpateg met nga unay ngem iya karne̍ru. Dikad pe̍ maipalubus ngarud iya Linteg tida ya panagariman ka nabaru iya Algew Ngilin,” kunen na.

¹³ Ket kinunen na ito lalaki, “Ucnatem ya imam,” kunen na. Ket inucnat ngarud nito lalaki to ima na, ket nalaingan met nga tutu win, nga naipada ito isa nga ima nan.

¹⁴ Ket dito Parisiyu, rinumwar dan, nga nawe̍ da nagiinnumanan no kumaan kuma niya panangpukaw da e̍ Je̍sus.

E̍ Je̍sus ya napili nga eb-ebbonen ne̍ Apu Diyus

¹⁵ Ket ito naemmuwan ne̍ Je̍sus to panggep dito Parisiyu, pimanaw iyan nga lugar. Adu met diya toltoley nga nibulun igina. Ket amin diya agsakit igida, pinalaing na,

¹⁶ se̍ binilin na da nga madi da mangipakaemmu maipanggep igina.

¹⁷ Ket agten iyan ya winangel na itun, tasun matungpal to padtu nga naipaikagi ito mammadtu nga Isayas itun, nga kinunen na,

¹⁸ “Igina yani ya eb-ebbonec, nga pinilic. Igina ya patpatgec nga pakaay-ayuwac. Ibon ku nad ya Ispirituc nga mangbulun igina, ket ipakaemmu na kadiya bekken nga Hudyu ya nalinteg nga panagkeddeng ku.

¹⁹ Madi nad makisungsungbat winno agpekkaw, se̍ bekken nga diya kalkalsada ya pakagicnaan diya toltoley igina.

²⁰ Madi na nad kettuwen ya nabekkog nga tabagan winno ikapus nga ipac ya apuy niya pabilu nga uwed pekkem asuc na, agingga nga di na pekkem matungpal nga sibaballaigi ya nalinteg nga pangngeddeng ku.

²¹ Ket igina nad ya namnamaen diya bekken nga Hudyu.”

Maipanggep iya turay ne̍ Je̍sus kadiya sairu

²² Ket uwed itun isa nga lalaki nga nipen da iya edyan ne̍ Je̍sus. Kulap se̍ umel yani, gapu ta naluganan ka sairu. Ket pinalaing ngarud ne̍ Je̍sus to lalaki, ket nakasingen se̍ nakakagi mettin.

²³ Ket nasdaaw met amin dito toltoley, ket kinunen da iya panagtetebbar da, “Igina kid to naipadtu nga Kapututan nito Ari Dabid?” kunen da.

²⁴ Ngem ito nadamag dito Parisiyu to winangel ne̍ Je̍sus, kinunen da, “Ya panangpatalew na ka sairu, ket gapu was met iya turay nga e̍cde̍ ne̍ Be̍e̍lse̍bub nga pangulu diya sairu igina,” kunen da.

²⁵ Ket gapu ta emmu ne̍ Je̍sus to panpanunuten da, kinunen na ngarud igida, “No uwed pagariyan nga aggiginnura diya toltoley na, madi ngarud agpaut yan nga pagariyan. Agten met pe̍ diya umili iya isa nga ili, winno diya kamkameng niya sangabalayan, ta no madi da makapagtutunus, madi ngarud met agpaut ya urnus da.

²⁶ Ngarud, no agpipinnatalew de̍ Satanas, nabingabingay ya bungguy nan, ket madi ngarud agpaut ya panagturay nan.

²⁷ Ket iya agten iyan, no tutu ya kunen nu nga mangpatalew wac kadiya sairu gapu iya turay ne̍ Be̍e̍lse̍bub, akin-turay ngarud met ya usaren diya toley nu nga mangpatalew ka sairu? Igida mettas kuma ya mangipanecnec dakayun no gapu e̍ Be̍e̍lse̍bub winno e̍ Apu Diyus ya panangpatalew ku ka sairu.

²⁸ Ket no gapu iya Ispiritu ne̍ Apu Diyus ya panangpatalew ku ka sairu, itu mettin ya mangipanecnec dakayu nga nadatngan dakayu nga tutu win ya panangituray ne̍ Apu Diyus.

²⁹ “Ket agten idi pe̍: No uwed mayat nga umuneg iya baley niya isa nga nabileg nga toley, tasun takawen na kuma diya alikamen na, masapul nga punguwen na met nga mona yan nga nabileg nga toley, se̍ nad makatakew nga tutu ka gabay na nga alaken iyan nga baley.

³⁰ “Pudnu met nga ya madi makibulun iyaken, kumuntra met iyaken. Se̍ ya madi makitipun iyaken iya panangurnung ku, mangwara met.

³¹ Itu nga agten idi ya ibagac dakayu: Mabalin nga mapakawan ya orey nagan na nga basul winno maikagi nga dake̍c nga maikuntra ka sabali. Ngem ya panagkagi ka dake̍c nga maikuntra iya Ispiritu ne̍ Apu Diyus, madi nad met mapakawan.

³² Ket agten pe̍ ya orey nagan na nga agkagi ka maikuntra iya Anac nga Naipatoley, mabalin pekkem nga mapakawan. Ngem ya toley nga agkagi ka maikuntra iya Ispiritu Santu, pulus nga madi mapakawan, orey ita winno iya maadpangan nga timpu.”

To pangngarig maipanggep iya nabaru se̍ ya dake̍c nga kayu

³³ “Kaspagarigan no ya kayu nga mamisic, emmu tida nga no nabaru ya kayu, basta nabaru met pe̍ ya bisic na. Ket no dake̍c ya kayu, emmu tida nga dake̍c met pe̍ ya bisic na. Ta ya bisic niya kayu, itu mettas ya pakailasinan na.

³⁴ Ape̍? Dakayu, ket arig kayu was nga putputut diya nagita nga malaga! Ta madi kayu met maikagi diya nabaru, gapu ta dake̍c ya uwed iya panpanunut nu! Ngarud, ya uwed iya lemlemmet niya isa nga toley, itu mettas ya maikagi niya musung na.

³⁵ Ket ya nanacman nga toley, nabaru ya tumaud igina, gapu ta nabaru met ya uwed iya lemlemmet na. Ket ya dake̍c nga toley, dake̍c met ya tumaud igina, ta dake̍c ya uwed iya lemlemmet na.

³⁶ “Ket pudnu met nga no timpu nad niya panangukum, sungbatan nad mettas diya toley diya tunggal nikagi dan nga awan sirsirbi na.

³⁷ Ta diya ikagkagim ita, itu nad mettas yan ya mangipalawag nad no nakabasul ka winno bekken,” kunen na.

Dito nangipateg ngas kadiya nakaskasdaaw nga pagilasinan

³⁸ Ket uwed da itun manursuru iya Linteg Hudyu, se̍ dito Parisiyu, nga kinunen da e̍ Je̍sus, “Mistru, uwed kuma masingen mi nga pagilasinan nga arimanem,” kunen da.

³⁹ Ngem kinunen ne̍ Je̍sus igida, “Ay, diya toltoley ita nga timpu! Diya agsapsapul ka pagilasinan nga mangipanecnec, ket diyan nas dake̍c se̍ diya pimanaw e̍ Apu Diyus tasun makitipun da ka sabali yin. Ngem awan lugud maipasingen dakayu nga pagilasinan nu, malacsid ngas ito pagilasinan maipanggep ito mammadtu nga Hunas.

⁴⁰ Ta to Hunas, ket nagedyan iya bessug nito dackel nga lames ka unus tellu nga algew se̍ gabi. Ket agten met pe̍ iyan, nga ya Anac nga Naipatoley, agedyan nad iya uneg niya ginet ka tellu nga algew se̍ gabi.

⁴¹ “Ket iya panangukum nad ne̍ Apu Diyus, makisangu nad met dito taga-Nine̍be̍ itun, nga mairaman da kadiya toltoley nga sibibiyag ita nga timpu. Ket pabasulen dakayu met. Ta dito taga-Nine̍be̍, nagbabawi da lugud itun, ito nagicna da to nikasaba nito mammadtu nga Hunas. Ket itan, uwed met idi ya naturturay pekkem ngem ito Hunas, ngem madi nu met ipangag.

⁴² “Ket iya panangukum nad ne̍ Apu Diyus, makisangu nad pe̍ to Re̍yna nga nagturay itun enna abagatan, ket mairaman kadiya toltoley nga sibibiyag ita nga timpu. Ket pabasulen nakayu met pe̍ to Re̍yna. Ta igina, orey deyyu ya edyan na itun, inumbe̍t na met dinngeg ya kinasirib nito Ari Sulumun. Ket itan, uwed met idi ya naturturay pekkem ngem ito Ari Sulumun, ngem madi nu met denggen,” kunen na.

To pangngarig maipanggep iya toley nga sumoli ngas igina ya sairu nga naglugan mettas igina

⁴³ Ket kinunen manin ne̍ Je̍sus, “Diya toley ita nga timpu, agten pe̍ idi ya kasasaad da: No pimanaw win ya sairu nga naglugan iya isa nga toley, mawe̍ agpaspasyar iya matictikag nga away, nga agsapsapul ka pagimangan na.

⁴⁴ Ket no awan masmac na, kunen na ngarud, ‘Sumoli yac ngasin ito toley nga pinanawac,’ kunen nito sairu. Ket sumoli ngarud ito toley, ket masingen na nga naisagana manin to toley, nga arig nga baley nga awan aged-edyan iyan, ket nasagadan se̍ naurnusin.

⁴⁵ Itu nga mawe̍ to sairu nga mangibulun ka pitu nga kabulun na nga sairu nga dacdake̍c pekkem ngem igina, ket mawe̍ da ngarud met aglugan ito toley, nga igina ya pagedyanan dan. Ket iya agten iyan, agbanag nga dacdake̍c manin ya kasasaad niyan nga toley yin ngem ito nona nga kasasaad na. Ket agten nad ngarud pe̍ iyan ya kasasaad diya dake̍c nga toltoley ita nga timpu,” kunen na.

Diya maibilang nga kakabsat winno ina ne̍ Je̍sus

⁴⁶ Ket ito agkagkagi pekkem nge̍ Je̍sus kadito toltoley, inumbe̍t ya ina se̍ diya kakabsat na nga lalaki. Nagsisikad da iya ruwar nito baley, ket gabay da kanu ya makitbar igina.

⁴⁷ Ket uwed nangibaga e̍ Je̍sus nga kinunen na, “Uwed ya inam se̍ diya kakabsat mu. Agsisikad da iya ruwar, ket uwed kanu ibaga da ikew,” kunen na.]

⁴⁸ Ket e̍ Je̍sus, kinunen na met, “Nagan ngarud ya inac se̍ diya kakabsat ku?” kunen na.

⁴⁹ Ket se̍ na nituwec dito pasurut na, ket kinunen na manin, “Singen nu kad didi, ta uwed ngarud idi nin diya ibilang ku nga inac se̍ kakabsat ku!

⁵⁰ Ta orey nagan na nga agtungpal iya tarigagay niya Amac nga uwed ka langit, itu ya maibilang nga kabsat ku nga lalaki winno babey, winno ya inac,” kunen na.