Matyu 1 - Ya Baru nga Tulag

Ya kapuunan ne̍ Je̍sus

¹ Idi ya listaan diya nagnagan diya toley nga kapuunan ne̍ Je̍su Kristu. Ket e̍ Je̍su Kristu, nagtaud iya kapututan nito Ari Dabid. Ket to Dabid, nagtaud iya kapututan nito Abraham.

² To Abraham, igina ya ama nito Isaac; to Isaac, igina ya ama nito Hakub; to Hakub, igina ya ama nito Huda se̍ dito kakabsat na.

³ To Huda, igina ya ama de̍ Pare̍s se̍ Se̍ra nga anac nito Tamar nga ina da. To Pare̍s, igina ya ama nito E̍srum; ket to E̍srum, igina ya ama nito Aram.

⁴ To Aram, igina ya ama nito Aminadab; to Aminadab, igina ya ama nito Naasun; to Naasun, igina ya ama nito Salmun.

⁵ To Salmun, igina ya ama nito Buas, nga anac nito Rahab nga ina na. To Buas, igina ya ama nito Ube̍d, nga anac nito Rut nga ina na. To Ube̍d, igina ya ama nito He̍sse̍.

⁶ To He̍sse̍, igina ya ama nito Ari Dabid. To Ari Dabid, igina ya ama nito Sulumun, nga anac nito asawa nito Uriyas.

⁷ To Sulumun, igina ya ama nito Rubuam; to Rubuam, igina ya ama nito Abiyas; to Abiyas, igina ya ama nito Asa.

⁸ To Asa, igina ya ama nito Husapat; to Husapat, igina ya ama nito Huram; to Huram, igina ya ama nito Usiyas.

⁹ To Usiyas, igina ya ama nito Huwatam; to Huwatam, igina ya ama nito Akas; to Akas, igina ya ama nito E̍se̍kiyas.

¹⁰ To E̍se̍kiyas, igina ya ama nito Manase̍s; to Manase̍s, igina ya ama nito Amun; to Amun, igina ya ama nito Husiyas.

¹¹ To Husiyas, igina ya ama nito He̍kunyas se̍ dito kakabsat na, ito timpu nito pannakaiyalis da ka Babilunya.

¹² Ket kalpasan nito pannakaiyalis dito Israe̍lita ka Babilunya, agten idi nin: To He̍kunyas, igina ya ama nito Se̍yaltiye̍l; to Se̍yaltiye̍l, igina ya ama nito Surubabe̍l.

¹³ To Surubabe̍l, igina ya ama nito Abyud; to Abyud, igina ya ama nito E̍lyakim; to E̍lyakim, igina ya ama nito Asur.

¹⁴ To Asur, igina ya ama nito Saduc; to Saduc, igina ya ama nito Akim; to Akim, igina ya ama nito E̍lyud.

¹⁵ To E̍lyud, igina ya ama nito E̍lyasar; to E̍lyasar, igina ya ama nito Matan; to Matan, igina ya ama nito Hakub.

¹⁶ To Hakub, igina ya ama nito Huse̍, ket e̍ Huse̍, itu to asawa ne̍ Marya, nga ina mettas ne̍ Je̍sus. Ket e̍ Je̍sus, igina ya maawagan ka Kristu.

¹⁷ Ket iya agten iyan, manipud ito timpu nito Abraham agingga ito timpu nito Ari Dabid, uwed met sangapulu ket eppat nga kapututan nga nagkallabes. Ket agten met pe̍ manipud ito timpu nito Ari Dabid agingga ito timpu nito pannakaiyalis dito Israe̍lita ka Babilunya, uwed met pe̍ sangapulu ket eppat nga kapututan nga nagkallabes. Ket manipud ito pannakaiyalis da ka Babilunya agingga ito timpu niya Kristu, uwed met sangapulu ket eppat manin nga kapututan nga nagkallabes.

To pannakaiyanac ne̍ Je̍su Kristu

¹⁸ Ket agten idi ya kasasaad nito pannakaiyanac ne̍ Je̍su Kristu: E̍ Marya nga ina na, naitulag itunin nga maiyasawa e̍ Huse̍. Ket sacbay niya panagtipun da, naemmuwan nga uwed met bucsit nan, ket gapu met iya Ispiritu Santu ya bucsit na.

¹⁹ Ket e̍ Huse̍ nga asawa na, naemmuwan na nga nabucsit nge̍ Marya ngin. Ket gapu ta nalinteg nga toley nge̍ Huse̍, se̍ gapu ta di na gabay nga paalyewwen nge̍ Marya iya imatang diya toltoley, pinanggep na met nga sililimed kuma nga waswasen to tulag da.

²⁰ Ngem ito uwed iya lemlemmet na pekkem yan, uwed met isa nga anghe̍l niya Apu nga nagpasingen igina iya pasmeg na. Ket kinunen met nito anghe̍l, “Huse̍ nga kapututan ne̍ Ari Dabid, madi ka umikeb nga umawat e̍ Marya nga asawa mun, ta gapu mettas iya Ispiritu Santu ya bucsit na.

²¹ Ket mangiyanac nad ka lalaki. Ket ya ipanagan mu nad igina, ket Je̍sus, ta isalakan na nad diya toley na kadiya basbasul da,” kunen na.

²² Ket agten iyan ngarud ya napasamac itun, tasun matungpal to nipakagi niya Apu ito isa nga mammadtu nga kinunen na,

²³ “Agten idi: Aginaw nad ya balasang, ket mangiyanac ka lalaki, nga mapanaganan nad ka E̍mmanuwe̍l,” nga kayat na nga kagiyen, “E̍ Apu Diyus, uwed dactida.”

²⁴ Ket ito nalukag nge̍ Huse̍, tinungpal na ngarud to nibilin nito anghe̍l niya Apu igina. Inawat na ngarud nge̍ Marya nga asawa nan,

²⁵ ngem madi nakiadug igina agingga ka di na pekkem naiyanac ya bucsit na nga lalaki. Ket Je̍sus ngarud ya nipanagan ne̍ Huse̍ ito ke̍bit.