Markus 9 - Ya Baru nga Tulag

¹ Ket kinunen na pe̍ igida, “Pudnu met nga uwed duduma dakayu idi ita, nga madi nad pekkem matey agingga nga madi da aglak-am iya panangituray ne̍ Apu Diyus no madatngan nad nga situturay,” kunen na.

To pannakaipasingen niya dayag ne̍ Je̍sus

² Ket kalpasan niya ennem nga algew, nibulun ne̍ Je̍sus de̍ Pe̍dru, Santiyagu, se̍ e̍ Juan, ket ig-igida ngas ya nanang-at iya isa nga nangatu nga tageytey. Ket antuni, nabaliwan met to langa ne̍ Je̍sus iya imatang da.

³ Ket nagbalin nga makapurarin to luput na, nga pudnu met to kinapuraw nan, nga awan met kabaellan niya toley idi nga lubung nga mangpapuraw ka agten itun.

⁴ Ket uwed da met pe̍ nasingen dan, nga itu to E̍lyas se̍ to Muyse̍s, nga makitkitbar da e̍ Je̍susin.

⁵ Ket e̍ Pe̍dru, kinunen na met e̍ Je̍sus, “Mistru, nabaru ya kauwed tida idi. Mangariman kami kuma ka tellu nga pagliduman: ya isa para ikew, isa para e̍ Muyse̍s, se̍ isa para e̍ E̍lyas,” kunen na met.

⁶ Agten iyan met to kinagi ne̍ Pe̍dru, gapu ta di na met emmu ya tumutup nga kagkagiyen nan, ta napalaus ngamin to ansing da dito adalan nga pada nan.

⁷ Ket uwed met ulep itun nga nangbugus igida. Ket uwed met pe̍ nagicna da nga timec nga gayat ito ulep, nga kinunen na, “Itu yani ya Anac ku nga dungdungnguwec. Ipangag nu ngarud ya kagi na!” kunen na.

⁸ Ket naglanglanga ngarud dito adalan, ngem pagamwan da ngas, nga awan met nasingen dan nga kabulun da iyanin, malacsid ngas e̍ Je̍susin.

⁹ Ket ito agdagdagus de̍ Je̍sus ito tageytey yin, nibilin na kadito tellu nga adalan na, nga awan pekkem pangibagbagaan da ito nasingen da, agingga nga di nad pekkem agungar ya Anac nga Naipatoley.

¹⁰ Ket iya agten iyan, awan nga tutu nangibagaan da iyan. Ket ig-igida ngas nga tellu, pagdidinniskutiran da lugud no nagan ya kaipapennan nito panagungar nga kinunen ne̍ Je̍sus.

¹¹ Ket se̍ da ngarud nagsaludsud igina nga kinunen da, “Ape̍ nga kunen diya manursuru iya Linteg nga to E̍lyas, masapul kanu nga umbe̍t nga mon-ona ngem iya Kristu?” kunen da.

¹² Ket kinunen ne̍ Je̍sus igida, “Tutu met nga umbe̍t nga mon-ona nge̍ E̍lyas, tasun pasoliyen na diya amin nga banbanag kadito sigud nga urnus da. Ngem orey agten iyan, naisurat met iya Bibliya nga ya Anac nga Naipatoley, aglak-am ka adu nga rigat, se̍ mauyaw pe̍.

¹³ Ket agten idi ya kinapudnu na: Inumbe̍t ngarudin to E̍lyas, ket winangel da ngarud igina ya orey nagan na nga ginabgabay da, nga maikanatad mettas ito naipadtu nga naisurat maipanggep igina iya Bibliya,” kunen na.

To ebbing nga nalugluganan ka sairu

¹⁴ Ket ito nakadateng nge̍ Je̍sus se̍ dito tellu nga adalan ito edyan dito nabati nga adalan, nasingen da nga nakad-adu met diya toley enna edyan da. Ket uwed da met manursuru iya Linteg nga makidisdiskutir kadito adalan.

¹⁵ Ket apaman nga nasingen dito toltoley nge̍ Je̍sus nga sumungsungad, ket nasdaaw da met nga aminin. Ket nagtatagtag da nga nawe̍ kimablaaw igina.

¹⁶ Ket kinunen ne̍ Je̍sus igida, “Nagan ngarud ya pagdidiskutiran nu?” kunen na.

¹⁷ Ket simungbat ya isa kadito toltoley, nga kinunen na, “Mistru, ne̍lbe̍t ku ya anac ku nga lalaki ikew, ta nalugluganan met ka sairu, nga itu ya mangpaumel igina.

¹⁸ Ket no kumpet ya sairu igina, itucbang na met ya ebbingin. Ket aglagotab met ya musung niya ebbing, se̍ agngarngaretnget, se̍ sumicder met ya beggi nan. Inadeng ku met kadiya adalan mu nga pagtalawen da kuma ya sairu, ngem madi da met nabalinan,” kunen na.

¹⁹ Ket kinunen met ne̍ Je̍sus igida, “Ay, dakayu nga toley ita nga timpu! Ape̍ nga awan panamati nu? Masapul kad nga agedyan nac pekkem dakayu ka mabayag? Masapul kad nga mabayag pekkem ya panaganus ku dakayu? Ala, e̍lbe̍t nu ngarud iyaken ya ebbing!” kunen na.

²⁰ Ket niyadenni da ngarud to ebbing igina. Ket apaman nga nasingen nito sairu nge̍ Je̍sus, pinagkessiw na met to ebbingin. Natuwang ngarud to ebbing iya ginet, nga agbukabukalig nga aglaglagotabin.

²¹ Ket sinaludsud ne̍ Je̍sus ito ama nito ebbing nga kinunen na, “Nungey nga nangrugi yani nga pakarigatan na?” kunen na. Ket kinunen nito ama, “Uwed met yani nin nanipud ito katekkut na pekkem.

²² Ket ya sairu nga idi, pe̍yeng na nga isungpa ya anac ku wi iya apuy winno ilisem na iya danum, ta gabay na nga pukawen. Ngem no uwed kabaellam, kaasiyan nakami kay, ta tulungan nakami kuma,” kunen na.

²³ Ket kinunen ngarud ne̍ Je̍sus igina, “Ape̍ nga kunem nga, ‘No uwed kabaellam’? Ta ya kinapudnu na, awan met di mabalinan para iya toley nga mamati,” kunen na.

²⁴ Ket to ama nito ebbing, dagus ngarud nga nagkagi yin, nga kinunen na ka nabileg, “Mamati yac met! Tulungan nac kay iya pagkurangan niya panamatic,” kunen na.

²⁵ Ket e̍ Je̍sus, ito nasingen na nga agdidinnurun nga umadenni diya toltoley yin, binilin na mettin to sairu nga pumanawin, nga kinunen na, “Ala! Ikew nga sairu nga mangpaumel se̍ mangpatuleng, bilinen naka nga agtalew kan iyan nga ebbing! Ket madi ka nga pulus sumoli iginan!” kunen na.

²⁶ Ket nagkerre̍s met to sairu win, se̍ na pinagkeskessiw to ebbing ka nakar-aryec, se̍ pimanaw ngarudin. Ket to ebbing, agten met iya isa nga bangkayin. Itu nga adu diya nagkunen nga, “Natey mettin!”

²⁷ Ngem e̍ Je̍sus, inicman na met ya ima nito ebbing se̍ na binangun, ket nagsikad met to ebbingin.

²⁸ Ket kalpasan niyan, ito nakauneg nge̍ Je̍sus iya isa nga baley yin, uwed saludsud dito adalan na igina, ito ig-igida ngasin, nga kinunen da, “Ape̍ ngata nga madi mi nabalin nga pinagtalew to sairu?” kunen da.

²⁹ Ket kinunen na igida, “Ya agten iyan nga lumugan ka toley, ket madi met mapagtalew, malacsid no gapu iya panagkararag,” kunen na.

Ito nipakaemmu manin ne̍ Je̍sus ya ipapatey se̍ panagungar na

³⁰ Ket pimanaw de̍ Je̍sus iyanin, se̍ lumaslasat da iya prubinsiya nga Galilya ngin. Gabay ne̍ Je̍sus no awan kuma makaemmu iya kauwed na iyan,

³¹ ta madama nga mangisursuru kadiya adalan na. Ket kinunen na igida, “Ya Anac nga Naipatoley, maiyawat nad ngarud kadiya toley, ket patayen da met. Ket orey matey, agungar nad mettas kalpasan niya tellu nga algew,” kunen na.

³² Ngem madi naawatan dito adalan tun nga kinagi na, ket nansing da met nga nagsaludsud iginan.

Kangrunaan ya kanumuwan

³³ Ket dimateng de̍ Je̍sus itun ka ili nga Kape̍rnaum. Ket ito uwed da iya uneg niya baley yin, sinaludsud ne̍ Je̍sus kadito adalan na nga kinunen na, “Nagan to nagdidiskutiran nu ito dalan?” kunen na.

³⁴ Ngem madi da negkim, ta to nagdidiskutiran da ito dalan, ket no nagan igida ya kangrunaan.

³⁵ Ket e̍ Je̍sus, nagtugew win, nga pinaadenni na dito sangapulu ket duwa nga adalan, se̍ na kinunen igida, “Ya mayat nga agbalin kuma nga kadayawan, ket masapul nga agbalin nga kanumuwan, se̍ ya agsirsirbi kadiya amin,” kunen na.

³⁶ Ket se̍ namet nge̍ Je̍sus ka isa nga ebbing, ket pinagsikad na iya sangu da. Ket kine̍bey na met to ebbing, nga kinunen na igida,

³⁷ “Ya mangrispitar iya isa kadiya agten idi nga ebbing gapu iyaken, iyaken met ya rinispitar na. Ket ya mangrispitar iyaken, bekken nas nga iyaken ya rinispitar na, no di pe̍ ya nangibon iyaken,” kunen na.

Madi kuma maparitan diya sabali nga sumurut

³⁸ Ket itun, kinunen ne̍ Juan e̍ Je̍sus, “Mistru, uwed nasingen mi nga isa nga lalaki nga mangpatpatalew ka sairu gapu iya panangusar na iya nagan mu. Ket nilbec mi ngarud, ta bekken tida met nga kabulun,” kunen na.

³⁹ Ngem kinunen ne̍ Je̍sus, “Madi nu nga ilbec ya agten iyan nga toley. Ta ya agariman ka nakaskasdaaw gapu iya panangusar na iya nagan ku, ket madi ngarud nalaka nga agkagi ka dake̍c nga maikuntra iyaken.

⁴⁰ Ta ya madi kumuntra dactida, ket kabulun tida met.

⁴¹ Ta tutu met nga siguradu nga magun-gunaan nad ya orey nagan na nga toley nga agwangel ka nabaru nga maipaay iyaken, orey no yan nas mangpainum da dakayu ka isa nga tasa nga danum, no painumen dakayu gapu ta emmu da nga pasurut nakayu ya Kristu,” kunen na.

Maipanggep kadiya toley nga makaigapu ka panagbasul

⁴² Ket kinunen ne̍ Je̍sus manin, “Ya orey nagan na nga makaigapu ka panagbasul niya isa nga agten kadidi nga tekkut nga ebbing nga agtalec iyaken, nabarbaru met para iyan nga pakaigapuwan niya panagbasul, no pagbanagan na kuma ya mabe̍sinan ya tengnged na ka dackel nga takiyew, se̍ maitemsit ka baybayin.

⁴³ “Ket iya agten iyan, no ya isa nga imam ya pakaigapuwan niya panagbasul mu, putdem mas ngarudin! Ta nabarbaru lugud no pukul ka nga makalak-am iya agnanayun nga biyag ngem ya uwed duwa nga imam, ngem mawe̍ ka ngas met ka impiye̍rnu, nga itu ya pagapuyan nga madi makusep.

⁴⁴ [Itu pe̍ ya edyan diya eg-egges nga madi matey nga mangmangan kadiya uwed antuni. Ket itu met pe̍ ya edyan niya apuy nga madi matey].

⁴⁵ “Ket agten pe̍ no ya isa nga sakam ya pakaigapuwan niya panagbasul mu, putdem masin! Ta nabarbaru lugud no piley ka nga makalak-am iya agnanayun nga biyag ngem ya uwed duwa nga sakam, ngem maipisuc ka ngas met ka impiye̍rnu.

⁴⁶ [Itu ya edyan diya eg-egges nga madi matey nga mangmangan kadiya uwed antuni. Ket itu met pe̍ ya edyan niya apuy nga madi matey].

⁴⁷ “Ket agten pe̍ no ya isa nga matam ya pakaigapuwan niya panagbasul mu, kotkotem kuma ngasin! Ta nabarbaru lugud no bulding ka nga makalak-am nad iya panangituray ne̍ Apu Diyus ngem ya uwed duwa nga matam, ngem maipisuc ka ngas met ka impiye̍rnu.

⁴⁸ Itu ya edyan diya eg-egges nga madi matey nga mangmangan kadiya uwed antuni. Ket itu met pe̍ ya edyan niya apuy nga madi matey.

⁴⁹ “Ta ya tunggal isa nga toley, ket uwed met maiyarig ka pakawarsiyan da ka apuy, nga arig nga maasinan da.

⁵⁰ Ket ya asin, emmu tida nga napateg ngarud. Ngem no naipac ya silem nan, kumaan ngarud niya panangpasilem nu manin iyan nga asin? Ket dakayu, maiyarig kayu kuma iya uwed silem na. Ket iya agten iyan, agtutunus kayu met,” kunen na.