Markus 8 - Ya Baru nga Tulag

To panangpakan ne̍ Je̍sus ka nasuruc nga eppat nga ribu nga toley

¹ Iya name̍nsan itun, uwed manin adu nga toley nga naguurnung, ket awan pe̍ yin kanen da. Itu nga pinaadenni ne̍ Je̍sus dito adalan na, ket kinunen na igida,

² “Maasiyan nac kadidi nga toltoley, ta tellu nga algew dan nga nakibulubulun iyaken nin, ket awan met kanen dan.

³ Ket no pagawirec da nga sibibisin, agkapsut da ngarud iya dalan, ta deyyu met ya naggayatan diya duduma,” kunen na.

⁴ Ket kinunen met dito adalan na igina, “Kumaan ngarud ya panangpakan kadidi nga toltoley? Awan met tinapay idi, ta away met!” kunen da.

⁵ Ket inemmu ne̍ Je̍sus igida nga kinunen na, “Piga diya tinapay nga uwed dakayu?” kunen na. Ket kinunen da, “Uwed pitu nga bukel,” kunen da.

⁶ Ket iya agten iyan, nibilin ne̍ Je̍sus kadito toltoley nga agtutugew dan. Ket inalac na dito pitu nga tinapay, ket kalpasan niya panagyaman na e̍ Apu Diyus, pinisepisey na, se̍ na ne̍cde̍ kadito adalan na, tasun iwaras da. Ket niwaras da ngarud to tinapay kadito toltoley.

⁷ Uwed met pe̍ e̍teng nga lames da. Ket nibilin na nga maiwaras pe̍ diyan kadito toltoley, kalpasan niya panangikararag na.

⁸ Ket nangan ngarud dito toltoley, ket nabsug da met. Ket inurnung dito adalan dito nabuna nga napisepisey, ket napnu met ya pitu nga lacba.

⁹ Ket ya bilang dito toltoley nga napakan itun, ket ageppat nga ribu met. Ket kalpasan na, pinagawir ngarud ne̍ Je̍sus dan.

¹⁰ Ket igina, sigida nga naglugan ito bangka, nga nibulun kadito adalan na nga nawe̍ da enna sakup niya Dalmanuta ngin.

To panagadeng dito Parisiyu ka nakaskasdaaw

¹¹ Ket uwed da itun Parisiyu nga nawe̍ iya edyan ne̍ Je̍sus, ket nakidiskutir da igina. Gabay da no mangariman kuma nge̍ Je̍sus ka pagilasinan gapu ka pannakabalin nga gayat e̍ Apu Diyus. Agten iyan to inadeng da, ta gabay da nga sintiren.

¹² Ket e̍ Je̍sus, imanges met ka nabileg gapu iya leddaang na, ket kinunen na, “Ape̍ nga gabay diya toltoley ita nga timpu ya makasingen ka pagilasinan? Ya kinapudnu na, awan lugud maipasingen nga pagilasinan kadiya toltoley ita,” kunen na.

¹³ Ket pinanawan na da mettin, nga nawe̍ naglugan manin ito bangka, ket nagturung de̍ Je̍sus nga nawe̍ iya demmang nito baybayin.

To maiyarig ka dake̍c nga pangpablad

¹⁴ Ket dito adalan ne̍ Je̍sus, nale̍panan da met ya nagbalun ka tinapay, ket uwed das isa nga bukel nga tinapay iya bangka da.

¹⁵ Ket itun, nagbilin nge̍ Je̍sus igida, nga kinunen na, “Annadan nu ngarud ya pangpablad nga uwed kadiya Parisiyu se̍ e̍ Ari He̍rude̍s!” kunen na.

¹⁶ Ket dito adalan, nagtetebbaran da ngarud to kinagi ne̍ Je̍sus maipanggep iya pangpablad, nga kinunen da, “Ay, awan ngamin balun tida nga tinapay,” kunen da.

¹⁷ Ket gapu ta emmu ne̍ Je̍sus to kinagkagi da, kinunen na ngarud igida, “Ape̍ nga iyan ya pagtetebbaran nu, nga awan naitarey nu nga tinapay? Awan kad pekkem kustu nga pannakalasin winno pannakaawat nu? Ape̍, nagpatingga ya malagip nun?

¹⁸ Madi kayu aya makasingen, orey uwed mata nu? Se̍ madi kayu aya makagicna, orey uwed tinga nu? Ape̍ kad nga madi kayu malagip to inariman ku?

¹⁹ Ta ito pinisepisey ku to lima nga bukel nga tinapay nga naipakan kadito lima nga ribu nga toltoley, piga ngarud dito lacba nga napnu nu kadito nabuna nga napisepisey nga inurnung nu itun?” kunen na. Ket nisungbat da ngarud igina nga kinunen da, “Sangapulu ket duwa met,” kunen da.

²⁰ Ket kinunen manin ne̍ Je̍sus, “Se̍ ito pinisepisey ku manin dito pitu nga bukel nga tinapay nga naipakan kadito eppat nga ribu nga toltoley, piga ngarud met dito lacba nga napnu nu kadito nabuna nga napisepisey nga inurnung nu itun?” kunen na. Ket “Pitu met,” kunen da.

²¹ Ket kinunen ne̍ Je̍sus igida, “Ket madi kayu kad pekkem nga maawatan?” kunen na.

To panangpalaing ne̍ Je̍sus ito kulap ka Be̍tsayda

²² Ket nakadateng de̍ Je̍sus ka Be̍tsayda itun. Ket uwed da toley antuni nga nangipen iya edyan ne̍ Je̍sus ka isa nga lalaki nga kulap. Nipacpakaasi da ngarud nga icman kuma ne̍ Je̍sus.

²³ Ket gine̍pe̍d ngarud ne̍ Je̍sus to kulap, nga niruwar na ito puruc. Linutaban met ne̍ Je̍sus diya mata nito kulap, se̍ na da inpup, se̍ na kinunen, “Uwed masingem mun?” kunen na.

²⁴ Ket to kulap, naglanga, se̍ kinunen na, “Bo. Uwed masingec nga toley yin. Ngem arig da nga kayu nga manmanalan,” kunen na.

²⁵ Ket inpup manin ne̍ Je̍sus diya mata nito kulap. Ket ito nimulagat nga nalaing nito lalaki dito mata na, imunay met to kulap nan, ket nawada ngin ya panagsingen nan.

²⁶ Ket pinagawir ne̍ Je̍sus to lalaki yin, nga kinunen na, “Madi ka dumagdagas iya puruc kin,” kunen na.

To pannakaawat ne̍ Pe̍dru maipanggep iya Kristu

²⁷ Ket pimanaw nge̍ Je̍sus se̍ diya adalan na iyan, nga mawe̍ da kadiya puruc enna Se̍sarya Pilipus. Ket ito manmanalan da, nagsaludsud nge̍ Je̍sus igida nga kinunen na, “Nagan na ya pangipagarupan diya toley iyaken?” kunen na.

²⁸ Ket kinunen da igina, “E̍ Juan nga Mammautisar ka kanu. Ket uwed da met duduma nga agkunen nga to mammadtu nga E̍lyas ka kanu. Se̍ uwed da pe̍ agkunen nga isa ka kanu kadito mammadtu itun pekkem,” kunen da.

²⁹ Ket nagsaludsud manin nge̍ Je̍sus igida nga kinunen na, “Ngem no dakayu? Nagan ku met iya panagkunen nu?” kunen na. Ket e̍ Pe̍dru to simungbat, nga kinunen na, “Ikew met ya Kristu!” kunen na.

³⁰ Ket nibilin met ne̍ Je̍sus igida nga awan pangibagbagaan da maipanggep igina.

To panangipakaemmu ne̍ Je̍sus iya ipapatey na, se̍ maipanggep kadiya mayat nga sumurut igina

³¹ Ket nisursuru met ne̍ Je̍sus itun kadito adalan na ya maipanggep iya Anac nga Naipatoley, nga masapul nga aglak-am ka adu nga rigat. Masapul nga guraen nad pe̍ diya panglakayen diya Hudyu, se̍ diya pangulu diya agsirsirbi iya Te̍mplu, se̍ diya manursuru iya Linteg. Masapul nga mapatey nad met pe̍, ket agungar mettas kalpasan niya tellu nga algew.

³² Ket nitarus met ne̍ Je̍sus nga kinagi igida maipanggep iyan nga banag. Itu nga niyadeyyu ka e̍teng ne̍ Pe̍dru nge̍ Je̍sus, nga deldellawen na nge̍ Je̍susin.

³³ Ngem e̍ Je̍sus, limaw-ing mettin, ket siningen na dito duduma nga adalan na. Ket nilbec na met pe̍ yin nge̍ Pe̍dru, nga kinunen na, “Umadeyyu ka iyaken, Satanas! Ta bekken met nga ya panpanunut ne̍ Apu Diyus yan nga uwed ikew, no di lugud ya panpanunut ngas toley,” kunen na.

³⁴ Ket itun, pinaadenni met ne̍ Je̍susin diya toltoley se̍ dito adalan na. Ket kinunen na igida, “No uwed mayat nga sumurut iyaken, masapul nga ipalikud na diya mismu nga tarigagay na, ket se̍ masapul nga anusan na ya arig nga panangagtu na iya krus na nga pakailansaan na, ket sumurut ngarud iyaken nin.

³⁵ Ta ya toley nga mangipangpangruna kuma iya biyag na, mapukaw nad mettas igina ya kaipapennan niya biyag na. Ngem ya mangipalikud iya panangipateg na iya biyag na gapu iyaken se̍ gapu iya Makaparagsac nga Damag, maisalakan na nad ya kaipapennan niya biyag na.

³⁶ Tutu met yan, ta awan ngarud paglaingan niya isa nga toley, orey no matagikuwa na kuma diya amin nga uwed iya lubung ngi, ngem mapukaw nad met ya biyag na.

³⁷ Ta pulus nga awan mabalin nga e̍cde̍ niya toley nga katukad niya biyag na.

³⁸ “Sumurut kayu ngarud iyaken ita nga timpu nga adu diya managbasul se̍ diya pimanaw e̍ Apu Diyus tasun makitipun da ka sabali yin. Ta diya toley ita nga timpu nga mangiyalyew iyaken se̍ kadiya isursuruc, ket iyalyew nad met pe̍ niya Anac nga Naipatoley, no umbe̍t nad nga sidadayaw gapu iya panangipadayaw niya Ama na igina. Ket maibulun nad pe̍ igina diya nadayaw nga anghe̍le̍s,” kunen na.