Markus 7 - Ya Baru nga Tulag

Diya ug-ugali dito Parisiyu

¹ Ket iya name̍nsan, uwed da naggayat ka He̍rusale̍m nga Parisiyu se̍ manursuru iya Linteg, ket nawe̍ da nakipagurnung ito edyan ne̍ Je̍sus.

² Ket nadlaw da nga dito duduma kadito adalan ne̍ Je̍sus, mangmangan da nga bekken nga nadalus diya ima da, nga kayat na nga kagiyen, madi da nagbeggu sigun iya naipaugali igida.

³ Ta diya Parisiyu se̍ diya amin nga duduma nga Hudyu, ket tungtungpalen da ngarud to alagaden dito am-ama da, nga madi da mangan no madi da pekkem natungpal to alagaden da maipanggep iya panagbeggu.

⁴ Se̍ ugali da pe̍ nga no naggayat da iya tindaan, madi da pe̍ mangan, no madi da pekkem tungpalen ya panagdalus sigun iya alagaden da. Ket adu pekkem pe̍ diya duduma nga tungtungpalen da nga ug-ugali da, nga agten iya panagugas kadiya paginuman, papayan ka mainum, se̍ pagutuwan nga burinsi.

⁵ Dikad pe̍ nagsaludsud e̍ Je̍sus dito Parisiyu se̍ dito manursuru iya Linteg, nga kinunen da, “Ape̍ nga madi arimanen diya adalan mu diya maikanatad kadiya ug-ugali nga nipatawid dito am-ama tida? Ta mangan nas met diya adalan mu nga di da kustu nga nagbeggu,” kunen da.

⁶ Ket kinunen ne̍ Je̍sus igida, “Pudnu met to padtu nito Isayas itun maipanggep dakayu nga aginlilinteg, ta nisurat na nga kinunen ne̍ Apu Diyus, ‘Didi nga toltoley, daydayawen dac met kadiya balbalikas da, ngem bekken met nga iyaken ya tutu nga ipatpateg da.

⁷ Awan mettas mamaay na ya panagdayaw da iyaken, ta ya isursuru da nga tungtungpalen toley, diyan nas al-alagaden nga tumaud ngas ka toley,’ kunen na met itun.

⁸ “Maipanggep ngarud dakayu yan. Ta dakayu, adeyyuwan nu ngarud diya bilbilin ne̍ Apu Diyus, ket diya ug-ugali toley ya ipatpateg nu nga gennungin.”

⁹ Ket nituluy ne̍ Je̍sus to kinagi na igida nga kinunen na, “Nasirib kayu lugud met iya panangliclic nu iya bilin ne̍ Apu Diyus, tasun diya ug-ugali nu nga gennung diya matungpal nu!

¹⁰ Ta nisurat met nito Muyse̍s nga, ‘Dayawem ya amam se̍ ya inam,’ se̍ kinunen na pe̍ nga, ‘Ya agkagi ka dake̍c maikuntra iya ama na winno ina na, ket masapul nga mapatey,’ kunen na.

¹¹ Ngem dakayu, isuru nu met nga gennung nga no uwed mabalin nga itulung niya isa nga toley kadiya naganac igina, madi kanu mapilit nga mange̍cde̍ igida, no kunen na ngas met igida nga, ‘Kurban yani.’ (Kayat na nga kagiyen, ‘Maipaay e̍ Apu Diyus yani.’)

¹² Dikad pe̍ kunen nu nga mapalubusan yan nga toley yin nga madi na tulungan diya naganac iginan.

¹³ Ket iya agten iyan, pagbalinen nu met nga awan sirbi niya kagi ne̍ Apu Diyusin, gapu mettas iya panangtungpal nu iya ugali nu. Ket itu met pe̍ yin ya panursuru nga nipatawid nu kadiya duduma. Se̍ adu ngarud pekkem diya duduma nga agten iyan nga wangwanglen nu,” kunen na.

Diya mangrugit iya nakem toley

¹⁴ Ket pinaadenni manin ne̍ Je̍sus dito adu nga toltoley itun, ket kinunen na igida, “Dumngeg kayu kuma iyaken, dakayu nga amin, se̍ utuben nu nga nalaing yani:

¹⁵ Bekken met nga diya ipauneg niya toley iya bessug na ya arig nga makaparugit igina, ta bekken nga diya agtaud iya ruwar niya beggi ya mangrugit iya nakem niya toley, no di lugud diya agtaud iya nakem na.

¹⁶ [Ala, dakayu nga uwed pannakaawat na, tandaanan nu kuma ngarud yanin!]” kunen na.

¹⁷ Ket ito pinanawan ne̍ Je̍sus dito toltoley yin, nga nawe̍ imuneg iya isa nga baley, sinaludsud dito adalan na igina ya kaipapennan nitun nga pangngarig.

¹⁸ Ket kinunen ne̍ Je̍sus igida, “Agten kayu kad pe̍ igida nga madi pekkem nga makaawat? Madi nu met pe̍ aya maawatan nga diya agtaud iya ruwar niya beggi niya toley, nga ipauneg na iya bessug na, bekken nga didi diya makaparugit iya nakem niya toley?

¹⁹ Ta ya kanen toley, madi ngarud maigamer iya panpanunut na, no di ngas mawe̍ iya bessug, ket mairuwar nad mettas nga maipay iya kasilya,” kunen na. Ket iya agten iyan, nipakaemmu met ne̍ Je̍susin nga awan makan nga madi maibilang nga nadalus iya imatang ne̍ Apu Diyus.

²⁰ Ket kinunen manin ne̍ Je̍sus, “Ngarud, ya tutu nga mangrugit iya nakem niya toley, itu ya agtaud mettas iya nakem na.

²¹ Ta ya uneg niya toley nga paggayatan diya tarigagay na mettas, itu ya pagtaudan diya dake̍c nga panpanunut, se̍ ya pannakikamalala, panagtakew, pumatey,

²² se̍ ya pannakitipun ka bekken na nga asawa, se̍ ya panagagum, panaglucluku, panagsikap, se̍ ya agariman ka naalas, se̍ ya panagiwan, panamadpadake̍c, panagpasindayaw, se̍ ya nadarusudus nga panagbiyag.

²³ Ngarud, amin didi nga dake̍c, ket agtaud da mettas iya nakem niya toley. Ket didi diya mangrugit iya nakem nan,” kunen na.

To panamati nito babey nga iSirya

²⁴ Ket pimanaw nge̍ Je̍sus antuni, nga nawe̍ iya sakup diya siyudad nga Tiru se̍ Sidun. Ket nakidagus iya isa nga baley antuni. Gabay na met no awan kuma makaemmu iya edyan na. Ngem naemmuwan met diya toltoley.

²⁵ Ket iya agten iyan, uwed met isa nga babey antuni nga uwed anac na nga babey nga naluganan ka sairu. Ket iyan nga babey, ito nadamag na ya maipanggep e̍ Je̍sus, sigida ngarud nga nawe̍ iya edyan ne̍ Je̍sus. Ket nagparintumeng to babey iya sangu na nga nagpacpakaasi igina.

²⁶ Ket to babey, bekken nga Hudyu, no di lugud naiyanac enna Pe̍nisiya, nga isa nga ili enna Sirya. Ket nipacpakaasi na ngarud e̍ Je̍sus nga pagtalawen na kuma ya sairu nga naglugan ito anac na.

²⁷ Ket nagpangngarig nge̍ Je̍sus nga kinunen na igina, “Mapakan kuma nga mona pekkem diya anac. Ta bekken met nga rumbeng nga maalac ya kanen diya anac, tasun maipadtu nga mipakan kadiya asu,” kunen na.

²⁸ Ket kinunen met nito babey, “Bo a, Apu. Ngem orey diya asu nga uwed iya sidung niya lamisaan, makakan da met kadiya mucmuc nga miterkag diya ebbing,” kunen na.

²⁹ Ket kinunen ngarud ne̍ Je̍sus igina, “Gapu iyan nga nabaru nga nisubad mu, mabalin mu ya agawir nga sitatalna ngin, ta nagtalew win to sairu iya anac mun,” kunen na.

³⁰ Nagawir ngarud to babey, ket naspukan na to anac na nga agid-ida nga sitatalna ngin ito ida na. Ta nagtalew nga tutu to sairu win.

To panangpalaing ne̍ Je̍sus ka lalaki nga tuleng

³¹ Ket ito pimanaw nge̍ Je̍sus iya sakup niya siyudad nga Tiru, nanalan iya ginet nga sakup niya siyudad nga Sidun, se̍ na bineltac to ginet nga sakup niya pagiliyan nga De̍kapulis, nga simoli enna baybay ka Galilya ngin.

³² Ket uwed da toley antuni nga nangipen ito edyan ne̍ Je̍sus ka isa nga lalaki nga tuleng se̍ agen-en nga agkagi. Ket nagpacpakaasi da ngarud e̍ Je̍sus nga ipatey na kuma ya ima na ito lalaki.

³³ Ket e̍ Je̍sus, niyadeyyu na ngarud to lalaki kadiya toltoley. Ket ito dudduwa dan, nilpet ne̍ Je̍sus diya kurimeng na kadiya tinga nito lalaki. Ket se̍ naglutab nga nike̍dus na ito dila nito lalaki.

³⁴ Ket limangad ka langit nge̍ Je̍sus nga imanges ka nabileg, ket kinagi na ito lalaki, “Epata,” nga kayat na nga kagiyen, “Malukatan ngarudin.”

³⁵ Ket nalaing mettin to panagdengngeg nito lalaki, se̍ nalaingan pe̍ yin to agen-en na, ket nabatad met to panagkagkagi nan.

³⁶ Ket nibilin ne̍ Je̍sus kadito toltoley nga awan pangibagaan da iyan nga winangel na. Ngem di da met nikasu. Ket orey no kumaan nito kapasnec ne̍ Je̍sus nga nangibilin igida, ket nakarkaru lugud to kinapasnec da nga nangipadamag.

³⁷ Ket napalaus ngarud nga unay to seddaaw dito toltoley, nga kinunen da iya panagtetebbar da, “Mayat lugud diya amin nga wangwanglen na! Orey diya tuleng, mapagicna na met, ket mapagkagi na met pe̍ diya umel!” kunen da.