Markus 4 - Ya Baru nga Tulag

To pangngarig maipanggep iya agmulmula

¹ Ito name̍nsan manin, uwed nge̍ Je̍sus iya pingit niya baybay ka Galilya, nga mangisursuru manin. Ket gapu ta adu nga unay diya toltoley nga naguurnung ito edyan ne̍ Je̍sus, nawe̍ ngarud nagtugew iya isa nga bangka nga uwed iya danum. Ket dito toltoley, nagedyan da iya gacdang ito pingit niya baybay.

² Ket adu ngarud dito nisuru ne̍ Je̍sus igida gapu kadiya pangpangngarig na itun. Ket agten idi to nisuru na igida, nga kinunen na,

³ “Denggen nu yani: Uwed toley nga nawe̍ nagmula.

⁴ Ket ito agiwarwaris ka eggic kin, uwed da bukel nga nagdessag iya dalan, ket nawe̍ met kinan diya sibudin.

⁵ Uwed da met pe̍ bukel nga nagdessag iya edyan pinas nga e̍teng ya ginet iya sap-ew na. Ket dagus da nga timubu, gapu ta bekken nga nauneg ya ginet na.

⁶ Ket ito siminagin, naleyley da ngarud. Ket nacrit da mettin, ta madi nakauneg nga unay diya gamut da.

⁷ Uwed da pe̍ duduma nga bukel nga nagdessag iya karuutan nga uwed rasi na. Ket ito dimackel dito ruut, liniyungan da met dito mula, ket madi ngarud nakabisic dito mula.

⁸ Ket uwed da met duduma nga bukel nga nagdessag iya napaw-is nga ginet. Ket didi nga bukel, ito timubu se̍ dimackel dan, namisic da ka adu. Uwed da imadu ka tellu nga pulu, uwed da pe̍ imadu ka ennem nga pulu, se̍ uwed da met pe̍ imadu ka sangagasut,” kunen na.

⁹ Ket kinunen manin ne̍ Je̍sus igida, “Dakayu nga uwed pannakaawat na, tandaanan nu kuma ngarud yan,” kunen na.

Maipanggep kadito pangngarig ne̍ Je̍sus

¹⁰ Ket ito awanin dito kaaduwan, nawe̍ nagsaludsud e̍ Je̍sus diya duduma nga pasurut na, agraman dito sangapulu ket duwa. Sinaludsud da no nagan ya banag dito pangngarig.

¹¹ Ket kinunen ne̍ Je̍sus igida, “No dakayu, napalubusan kayun nga makaawat kadiya nauneg nga adal nga di pekkem naipakaemmu kadiya duduma maipanggep iya panangituray ne̍ Apu Diyus. Ngem diya bekken na nga kameng, biig nga pangngarig ngas ya maisuru igida.

¹² Agten ngarud iyan, tasun ‘Orey masingen da nga tutu, madi da met malasin. Ket orey magicna da nga tutu, madi da met maawatan. Ta no bekken nga agten iyan, kaynun no agbabawi dan, ket mapakawan da met,’” kunen na.

Ya kaipapennan nito pangngarig maipanggep iya agmulmula

¹³ Ket kinunen ne̍ Je̍sus igida, “Madi kayu kad maawatan to pangngarig ku? No madi kayu maawatan yan nga pangngarig, kumaan ngarud nga maawatan nu diya duduma nga pangpangngarig ku?

¹⁴ “Agten idi ya banag na: To panagiwaris nito nagmula ka eggic, itu ya panangipadamag iya kagi ne̍ Apu Diyus.

¹⁵ Ket to dalan nga nagdessagan diya duduma nga bukel nga naiwaris, itu ya kaiyarigan diya toley nga makagicna ka kagi ne̍ Apu Diyus nga naisuru igida. Ngem no magicna dan, dagus da nga male̍panan. Ta arig nga mawe̍ nge̍ Satanas nga mangipac iya kagi nga nagicna da.

¹⁶ “Ket agten met pe̍ iyan diya duduma nga toley, nga igida ya maiyarig ito nagdessagan diya bukel nga naiwaris iya e̍teng nga ginet iya sap-ew niya pinas. Ket apaman nga magicna da ya kagi ne̍ Apu Diyus, dagus da ngarud nga awaten nga siaanggem.

¹⁷ Ngem gapu ta arig da nga mula nga awan nauneg nga gamut na, bekken da met nga napaut. Ta no uwed rigat winno pannakairurumen da gapu iya panamati da iya kagi ne̍ Apu Diyus, ket dagus da nga maiyaw-awanin.

¹⁸ “Ket uwed da pe̍ duduma nga toley nga maiyarig da ito karuutan nga uwed rasi na, nga nagdessagan dito duduma nga bukel nga naiwaris. Ket igida diya makagicna iya kagi ne̍ Apu Diyus,

¹⁹ ngem awan met pagbanagan niya kagi ne̍ Apu Diyus igida. Ta maabac ya pannakabalin na igida, gapu kadiya pakasikuran da iya biyag nga idi, se̍ iya panagtarigagay da ka kinabacnang, se̍ iya panagtarigagay da met kadiya duduma pe̍ nga banbanag.

²⁰ “Ket diya duduma nga toley, maiyarig da met iya napaw-is nga ginet nga nagdessagan diya duduma nga bukel nga naiwaris. Ta denggen da ngarud ya kagi ne̍ Apu Diyus, se̍ salimetmettan da. Ket arig da nga ginet nga maapitan ka mula nga mamisic ka tellu nga pulu, winno ennem nga pulu, se̍ uwed da met pe̍ mamisic ka sangagasut,” kunen na.

To pangngarig maipanggep iya dilag

²¹ Ket kinunen manin ne̍ Je̍sus igida, “No ya nasibtan nga dilag, ket madi tida met tacban ka salupan winno ipay iya sidung niya pagidaan, no di lugud ipay tida iya kustu nga pakaipayan na.

²² Ket itu met ya pakaiyarigan niya amin nga nailinged nga banag ita, ta nailinged tasun maipalawag nad mettas. Se̍ amin nga nailimed ita, ket nailimed tasun maiparangarang nad mettas.

²³ Ngarud, dakayu nga uwed pannakaawat na, tandaanan nu ngarud yan.”

²⁴ Ket kinunen na pe̍ igida, “Panunuten nu nga nalaing diya magicna nu, nga arig nga rukuden nu didi. Ta mae̍cdan kayu nad ngarud ka pannakaawat sigun iya arig nga pagrukud nu ita. Ngarud, nakarkaru pekkem met ya mae̍cde̍ nad dakayu.

²⁵ Ta ya toley nga uwed pannakaawat nan, madgaan nad pekkem. Ket ya awan pannakaawat na, maipac nad met igina orey diya pagpagarupen na nga maawatan na,” kunen na.

To pangngarig maipanggep iya panagtubu niya bukel

²⁶ Ket kinunen manin ne̍ Je̍sus, “No maipanggep iya panangituray ne̍ Apu Diyus, ket maiyarig met iya toley nga agiwaris ka bukel iya ginet.

²⁷ Ket iyan nga toley, itultuluy na ya ugali na nga matudug kada gabi, se̍ bumangun kada agsapa. Ket dito bukel nga naimula, tumubtubu da met se̍ dumacdackel da, ngem madi met maawatan nito nagmula no kumaan niya agten iyan.

²⁸ Yan mettas ginet ya mangpatubu, se̍ mangpadawa, se̍ mangpagangu.

²⁹ Ket no nagangu nad diya dawa ngin, sigida ngarud met nga mawe̍ gapasen nito nagmula ngin, ta nadatngan met ya panaggani yin.”

To pangngarig maipanggep iya tekkut nga bukel

³⁰ Ket kinunen manin ne̍ Je̍sus, “No nagan ya mabalin tida nga pangiyarigan iya panangituray ne̍ Apu Diyus, winno nagan na kuma ya pangngarig nga mayat nga pangilawlawag tida idi, ket agten idi:

³¹ Ya panangituray ne̍ Apu Diyus, maiyarig iya isa nga bukel niya kayu nga mustasa nga nimula toley, nga itu ya katekkutan nga bukel idi nga lubung.

³² Ket orey no itu ya katekkutan nga bukel, no naimula se̍ tumubu win, ket dumackel met ya kayu na, agingga ka kadackellan met kadiya amin nga maimulmula nga para rikadu. Ket agsanga met pe̍ ka dadackel nga mabalin nga pagliduman, se̍ mabalin nga pagsucbutan diya sibud.”

Ya gapu dito pangngarig ne̍ Je̍sus

³³ Ket adu diya agten kadiyan nga pangpangngarig nga inusar ne̍ Je̍sus iya panangikasaba na iya kagi ne̍ Apu Diyus, sigun iya kabaellan diya toltoley nga maawatan.

³⁴ Ngarud, awan nisuru na igida itun no di ngas naipangngarig. Ngem kada no awan diya kaaduwanin, nibanag na met diya amin nga nisursuru na kadiya mismu nga adalan nan.

To panangpatalna ne̍ Je̍sus iya belluut

³⁵ Ket ito gumidamin iyan mettas nga algew, kinunen ne̍ Je̍sus kadiya adalan na, “Tidan! Dumelmang tidan,” kunen na.

³⁶ Ket pinanawan da ngarud diya toltoley, nga limugan da ito bangka nga sigud nga pagtugtugawan ne̍ Je̍sus, ket idelmang da nge̍ Je̍susin. Ket uwed da met pe̍ sabali nga bangka nga nagsakayan diya duduma nga toley, nga nibulun pe̍ igida.

³⁷ Ket ya napasamac itun, nagbelluut met ka nabileg gin, ket uwed met dadackel nga palung nga nangsabsabuwag ito bangka da, ket adu mettin ya danum nga nawe̍ iya uneg nan.

³⁸ Ngem e̍ Je̍sus, uwed met iya kutit nito bangka nga agtudtudug nga nakapungan. Ket linukag ngarud dito adalan, nga kinunen da igina, “Mistru! Awan kad anyaman na ikew no matey tidan?” kunen da.

³⁹ Ket bimangun nge̍ Je̍sus, se̍ na met binilin to belluut nga agtalna, ket kinunen na pe̍ iya danum, “Agsardeng kan! Agtalna kan!” kunen na. Ket nagsardeng ngarud to belluut, ket natalna met nga tutu ya aminin.

⁴⁰ Ket kinunen ne̍ Je̍sus kadiya adalan na, “Ape̍ mansing kayu? Awan kad pekkem panamati nu?” kunen na.

⁴¹ Ket napalaus ngarud ya seddaaw dito adalan, ket kinunen da iya panagtetebbar da, “Nagan kid ya katoltoley nidi? Ta orey ya belluut se̍ diya palung, ket agtungpal da met igina!” kunen da.