Markus 3 - Ya Baru nga Tulag

To lalaki nga nacpe̍t ya ima na

¹ Ito name̍nsan manin, nawe̍ nge̍ Je̍sus nga nakigimung iya gigimungan diya Hudyu. Ket uwed isa nga lalaki antuni nga nacpe̍t ya isa nga ima na.

² Ket uwed da pe̍ toley antuni nga agsicsiim no palaingen ne̍ Je̍sus to lalaki iya Algew Ngilin, ta gabay da nga idarum nge̍ Je̍sus.

³ Ket e̍ Je̍sus, kinunen na met ito lalaki nga nacpe̍t ya ima na nga, “Umbe̍t ka idi sangu mi,” kunen na.

⁴ Ket kinunen na kadito agsicsiim, “Nagan kad ya maipalubus iya Linteg tida nga wanglen tida kuma iya Algew Ngilin? Ya panagwangel ka nabaru, winno ka dake̍c? Ya panangisalakan ka biyag, winno ya pumatey?” kunen na. Ngem madi da met negkim.

⁵ Ket limanga ngarud nge̍ Je̍sus nga simingsingen igida nga silulucsew win. Ket orey uwed lucsew na, nangisakit met pe̍ igida gapu ta agmulinas da met. Ket kinunen na ngarud ito lalaki yin, “Ucnatem ya imam,” kunen na. Ket inucnat na ngarud to ima na, ket nalaingan mettin.

⁶ Ket dito Parisiyu, rinumwar dan, nga nagtarus da met nga nawe̍ kadito toley nito Ari He̍rude̍s, tasun makiuman da no kumaan kuma niya panangpukaw da e̍ Je̍sus.

Dito adu nga toltoley nga sinursuruwan ne̍ Je̍sus

⁷ Ket e̍ Je̍sus se̍ dito adalan na, pimanaw da nga nawe̍ ito baybay ka Galilya ngin. Ket adu met diya toltoley nga nibulubulun igida. Adu da nga gayat iyan mettas nga prubinsiya nga Galilya, se̍ uwed da pe̍ gayat iya prubinsiya nga Hudya,

⁸ se̍ iya siyudad nga He̍rusale̍m, se̍ iya pagiliyan nga Idume̍ya, se̍ kadiya il-ili iya demmang niya wangag Hordan, se̍ diya lugar iya le̍but diya siyudad nga Tiru se̍ Sidun. Adu da ngarud nga nawe̍ iya edyan ne̍ Je̍sus, gapu ta nadamag da met dito adu nga inar-ariman na.

⁹ Ket gapu iya kaadu niya toley, binilin ne̍ Je̍sus diya adalan na nga mangisagana da ka bangka, tasun madi kuma mailet.

¹⁰ Ta adu ngamin diya pinalaing nan, itu nga agdidinnurun mettin diya uwed sarut na nga umadenni igina, tasun mase̍cde̍ng da kuma.

¹¹ Ket diya sairu nga lumuglugan ka toley iyan, no masingen da nge̍ Je̍sus, pagparintumengngen da met da iya sangu na, se̍ kunen da nga ipkaw, “Ikew ya Anac ne̍ Apu Diyus!” kunen da.

¹² Ngem nainget ya panangbilin ne̍ Je̍sus kadito sairu nga madi da mangipakaemmu maipanggep igina.

To panangpili ne̍ Je̍sus kadito sangapulu ket duwa nga apustule̍s

¹³ Kalpasan niyan, nanang-at nge̍ Je̍sus ka tageytey. Ket antuni, inayab na diya ginabay na nga piliyen, ket nawe̍ da ngarud nakibulun igina.

¹⁴ Ket sangapulu ket duwa nga toley dito dinutukan na nga maibulbulun igina. Itu diyan dito inawagan ne̍ Je̍sus ka apustule̍s, nga itu diya naibon nga mawe̍ mangasaba,

¹⁵ ket se̍ nae̍cdan da pe̍ ka turay nga mangpatalew ka sairu.

¹⁶ Ket itu didi dito sangapulu ket duwa nga apustule̍s nga pinili na: E̍ Simon nga pinanaganan na pe̍ ka Pe̍dru,

¹⁷ se̍ e̍ Santiyagu nga anac ne̍ Se̍be̍dyu, se̍ e̍ Juan nga kabsat ne̍ Santiyagu, nga itu dito agkabsat nga pinanaganan ne̍ Je̍sus ka Buwane̍rge̍s, nga kayat na nga kagiyen “Anac Eddug.”

¹⁸ Se̍ pinili na pe̍ de̍ Andre̍s, Pe̍lipe̍, Bartulume̍, Matyu, Tumas, se̍ e̍ Santiyagu nga anac ne̍ Alpiyu, e̍ Tadyu, se̍ e̍ Simon nga maawagan ka Pasnec,

¹⁹ se̍ to Hudas Iskariyute̍, nga itu to nangiyawat iya Apu.

Maipanggep iya turay ne̍ Je̍sus kadiya sairu

²⁰ Ket ito nagawir nge̍ Je̍susin, adu manin diya toley nga naguurnung iya edyan na. Itu nga e̍ Je̍sus se̍ diya adalan na, madi da met masangu orey yas manganin.

²¹ Ket ito nadamag diya kabagiyan na yan, nawe̍ da ngarud iya edyan ne̍ Je̍sus, tasun alaken da kuma, ta kinagkagi met diya toltoley nga agel-ellut kanun.

²² Ket ito edyan ne̍ Je̍sus, uwed da pe̍ manursuru iya Linteg, nga naggayat ka He̍rusale̍m. Ket didi nga manursuru, kinunen da maipanggep e̍ Je̍sus, “Linuganan met ne̍ Be̍e̍lse̍bub! Dikad pe̍ ya panangpatalew na ka sairu, ket gapu was met iya turay nga e̍cde̍ niya pangulu diya sairu igina,” kunen da.

²³ Ket e̍ Je̍sus, pinaadenni na dito manursuru, ket nagpangngarig igida nga kinunen na, “No e̍ Satanas, gabay na aya nga pagtalawen diya kabulun na mettas?

²⁴ Bekken met! Ta agten idi: No aggiginnura diya toley iya isa nga pagariyan, madi ngarud agpaut yan nga pagariyan.

²⁵ Agten met pe̍ diya kamkameng niya sangabalayan, ta no madi da makapagtutunus, madi ngarud met agpaut ya urnus da.

²⁶ Ket iya agten iyan, no aggiginnura de̍ Satanas, nga mabingabingay ya bungguy nan, ket madi ngarud agpaut ya panagturay nan, no di lugud agpatingga ngin.

²⁷ “Ngem agten idi ya kinapudnu na: No uwed mayat nga umuneg iya baley niya isa nga nabileg nga toley, tasun takawen na kuma diya alikamen na, masapul nga punguwen na met nga mona yan nga nabileg nga toley, se̍ nad makatakew nga tutu ka gabay na nga alaken iyan nga baley.

²⁸ “Maemmuwan nu kuma ngarud nga mabalin nga mapakawan amin nga basul diya toley, agraman pe̍ ya orey nagan na nga ikagi da nga dake̍c nga maikuntra ka sabali.

²⁹ Ngem ya orey nagan na nga agkagi ka dake̍c nga maikuntra iya Ispiritu Santu, pulus nga madi mapakawan. Ta yan nga basul na, maibilang nga basul nga madi mapakawan orey ka agnanayun,” kunen na.

³⁰ Ket agten iyan ngarud to kinunen ne̍ Je̍sus, ta uwed ngamin duduma antuni nga agkunen nga, “Uwed sairu na,” kunen da.

Diya maibilang nga kakabsat winno ina ne̍ Je̍sus

³¹ Ket itun, inumbe̍t ya ina se̍ diya kakabsat ne̍ Je̍sus nga lalaki. Nagsisikad da iya ruwar nito baley, ket pinaayaban da ngarud nge̍ Je̍sus.

³² Ket ito edyan ne̍ Je̍sus iya uneg, adu met diya toley nga nakatugew iya le̍cbut na. Ket kinunen da igina, “Uwed ya inam se̍ diya kakabsat mu iya ruwar. Palbe̍ten da ka,” kunen da.

³³ Ket e̍ Je̍sus, kinunen na met, “Nagan ngarud ya inac se̍ diya kakabsat ku?” kunen na.

³⁴ Ket se̍ na ngarud linanga dito agtugtugew iya le̍cbut na, ket kinunen na manin, “Singen nu kad didi, ta uwed ngarud idi nin diya ibilang ku nga inac se̍ diya kakabsat ku.

³⁵ Ta orey nagan na nga mangtungpal iya tarigagay ne̍ Apu Diyus, itu ya maibilang nga kabsat ku nga lalaki winno babey, winno ya inac,” kunen na.