Markus 15 - Ya Baru nga Tulag

To pannakaisangu ne̍ Je̍sus e̍ Pilatu

¹ Ito umagsapa ngin, nagiinnumanan dito pangpangulu diya agsirsirbi iya Te̍mplu, se̍ dito panglakayen diya Hudyu, se̍ dito manursuru iya Linteg, se̍ amin dito duduma nga kunse̍hale̍s. Ket kalpasan nito panagtutulag dan, pinungu da ngarud nge̍ Je̍susin, se̍ da nipen iya edyan ne̍ Gube̍rnadur Pilatu win, ket niyawat da iginan.

² Ket e̍ Pilatu, sinaludsud na ngarud e̍ Je̍sus nga kinunen na, “Tutu kad nga ikew ya Ari diya Hudyu?” kunen na. Ket kinunen ne̍ Je̍sus igina, “Nakagi mun,” kunen na.

³ Ket dito pangpangulu diya agsirsirbi iya Te̍mplu, adu diya nipabpabasul da e̍ Je̍susin.

⁴ Ket e̍ Pilatu, nagsaludsud manin igina nga kinunen na, “Awan kad maisungbat mu igida? Magicnam met diya adu nga ipabpabasul da ikew!” kunen na.

⁵ Ngem awan met latta nisungbat ne̍ Je̍sus, ket nasdaaw ngarud nge̍ Pilatu win.

To pannakaukum ne̍ Je̍sus

⁶ Ket sigun iya gangey ne̍ Pilatu, tunggal timpu niya Padaya Nitatalib, mangiruwar ka isa nga balud nga ibaga diya toltoley.

⁷ Ket uwed isa nga balud itun nga agnagan ka Barabas. Naisangabalud met yani kadito kabulun na nga pimatey ito timpu riribuc itun.

⁸ Ket diya toltoley, nawe̍ da itun iya edyan ne̍ Pilatu, ket inadeng da nga mangiruwar kuma ka isa nga balud para igida, sigun iya dinagun nga gangey na.

⁹ Ket kinunen ne̍ Pilatu igida, “Gabay nu kad nga idi nga Ari diya Hudyu ya iruwar ku para dakayu?” kunen ne̍ Pilatu.

¹⁰ Agten iyan to saludsud ne̍ Pilatu kadito toltoley, ta emmu na nga gapu ngas met iya apal dito pangpangulu diya agsirsirbi iya Te̍mplu, to nangiyawatan da e̍ Je̍sus igina.

¹¹ Ngem dito pangpangulu diya agsirsirbi iya Te̍mplu, sinugsugan da mettin dito toltoley, tasun e̍ Barabas nga gennung ya adngen da nga iruwar ne̍ Pilatu.

¹² Itu nga kinunen manin ne̍ Pilatu igida, “No agten iyan, nagan ngarud ya gabay nu nga pamaay ku idi nga toley nga awagan nu nga Ari diya Hudyu?” kunen na.

¹³ Ket nip-ipkaw da nga kinunen da, “Pailansam ka krus!” kunen da.

¹⁴ Ket kinunen manin ne̍ Pilatu igida, “Ape̍ kadi? Nagan ngarud ya basul na?” kunen na. Ngem nakarkaru lugud to panangip-ipkaw da nga kinunen da, “Pailansam ka krus!” kunen da met latta.

¹⁵ Dikad pe̍ gapu ta gabay ne̍ Pilatu nga pagustuwan dito toltoley, pinairuwar na ngarud to Barabas igida. Ket e̍ Je̍sus, pinasaplit ne̍ Pilatu ka latiku, se̍ na niyawat kadiya mangilansa ka krus.

To pananguy-uyaw dito suldadu e̍ Je̍sus

¹⁶ Ket inalac ngarud diya suldadu nge̍ Je̍sus, nga niyuneg da iya emwag niya palasiyu, nga itu ya baley niya Gube̍rnadur, se̍ da pinalbe̍t amin dito kabulun da nga suldadu antuni.

¹⁷ Ket siuuyaw da nga nangke̍bal e̍ Je̍sus ka biyule̍ta nga luput. Ket nangkawikew da met ka lanut nga agrasrasi, nga inariman da ka sinan-balangat, se̍ da nisimpa iya ulu ne̍ Je̍sus.

¹⁸ Ket nagindadayaw da met nga nangkablaaw e̍ Je̍susin, nga kinagkagi da nga siuuyaw igina nga, “Wahey! Madaydayaw ka kuma nga ari diya Hudyu!” kunen da.

¹⁹ Ket binacbaut da pe̍ ya ulu na ka tabagan, se̍ linutlutaban da met pe̍. Ket nagdokot da nga nagindadayaw met igina.

²⁰ Ket ito nalpas dan nga inuy-uyaw, nipac da to biyule̍ta nga luputin, ket nikawwes da manin igina to sigud nga luput na. Kalpasan na, niruwar da tasun ipen da nga ilansa ka krusin.

To pannakailansa ne̍ Je̍sus ito krus

²¹ Ket uwed met nasabet da iya dalan, nga isa nga iSire̍ne̍ nga agnagan ka Simon, nga igina ya ama de̍ Ale̍handru nge̍ Rupu. Sumungsungad yani nga toley iya siyudadin, nga naggayat iya away. Ket nipaagtu ngarud dito suldadu nga nipapilit ito Simon to krus ne̍ Je̍sus.

²² Ket nipen da nge̍ Je̍sus iya lugar nga maawagan ka Gulguta, nga kayat na nga kagiyen, “Edyan Bangabanga.”

²³ Ket antuni, painuman da kuma nge̍ Je̍sus ka basi ubas nga nalaukan ka nape̍t nga agas nga mirra, ngem madi na met ininum.

²⁴ Ket itun, nilansa dito suldadu iya krusin. Ket kalpasan nito panangilansa da, nagbibingayan da met diya luput na, nga nagbibinnunut da no nagan ya mabagi niya tunggal isa igida.

²⁵ Ket alas nuwe̍be̍ iya agsapa ngin ito panangilansa da.

²⁶ Ket uwed pe̍ pakaemmu nga naisurat antuni, nga itu ya pakaemmuwan ito naipabasul igina. Agten idi to naisurat: “Ya Ari diya Hudyu.”

²⁷ Ket uwed da pe̍ duwa nga tulisan nga naikumpas e̍ Je̍sus, nga nailansa pe̍ kadiya krus da. Ya isa, uwed iya madiwanan ne̍ Je̍sus, ket ya isa, uwed iya makatigid na.

²⁸ [Ket iya agten iyan, natungpalin to naisurat iya Bibliya nga kunen na, “Naibilang nga kabulun diya managdacdake̍c.”]

²⁹ Ket diya toley nga timaltalib iyan, nagwingwingiwing da met nga siuuyaw, nga kinunen da e̍ Je̍sus, “Asey! Se̍pe̍ ikew met to nangibaga nga lasangem ya Te̍mplu se̍ ka mettas bangunen manin ka unus tellu nga algew!

³⁰ No agten iyan ya pannakabalin mu, isalakam man ngarud ya beggi mun, ta umulug ka ngarud iyan nga krusin!” kunen da.

³¹ Ket agten met pe̍ dito pangpangulu diya agsirsirbi iya Te̍mplu se̍ dito manursuru iya Linteg, ta nakipaglaclais da pe̍ iya maipanggep e̍ Je̍sus, nga kinunen da, “Naisalakan na kanu diya duduma, ngem di na met maisalakan ya beggi nan.

³² Umulug kuma ngarudin iya krus na yan nga Kristu nga Ari kanu ka Israe̍l. Ta no masingen tida nga makaulugin, ket mamati tida iginan,” kunen da. Ket inuyaw met pe̍ dito kabulun na nga nailansa pe̍ ka krus.

To pannakatey ne̍ Je̍sus

³³ Ket ito matuun itunin, gimicbet mettin ya amin nga lubung antuni nin, ket nagpaut to gicbet agingga ka alas tre̍s iya gidam.

³⁴ Ket ito alas tre̍sin, pinumkaw met nge̍ Je̍sus nga kinunen na ka nabileg, “Eloy, E̍loy, lama sabactani?” nga kayat na nga kagiyen, “Diyus ku, Diyus ku, ape̍ nga binaybay-an nac?”

³⁵ Ket diya duduma kadito gasisikad antuni nga nakagicna ito kinagi ne̍ Je̍sus, kinunen da, “Nih! Denggen nu! Pecpekkawan na mettin to mammadtu nga E̍lyas,” kunen da.

³⁶ Ket ya isa igida, nanagtag itun nga nawe̍ namet ka kapes. Nipaagsep na ka suka, se̍ na nisuge̍nge̍t ka tabagan, tasun ipasepsep na kuma e̍ Je̍sus, nga kinunen na, “Iton tida! Singen tida no umbe̍t lugud iyulug nito E̍lyas iya krus na,” kunen na.

³⁷ Ngem e̍ Je̍sus, nagkerre̍s ka nabileg gin, ket awan anges nan.

³⁸ Ket enna Te̍mplu, napigis mettin itun to kurtina nga nanglinged iya uneg na, nga nagudduwa mettin manipud iya ngatu, nga nanglacpus iya gayad na.

³⁹ Ket iya sangu nito krus nga nakailansaan ne̍ Je̍sus, uwed nga gasisikad ya kapitan dito suldadu, nga nakasalupac igina. Ket ito nasingen na ya pannakatey ne̍ Je̍sus, kinunen na, “Pudnu met nga Anac ne̍ Apu Diyus yani nga toley!” kunen na.

⁴⁰ Ket uwed da pe̍ babey iya nabay-at ka e̍teng ito krus, ket nabuya da met to napasamac. Uwed kadiyan nge̍ Marya nga iMagdala, se̍ e̍ Marya nga ina de̍ Huse̍ nge̍ Santiyagu nga inaudi, se̍ e̍ Salume̍.

⁴¹ Diyan nga babey, simursurut da e̍ Je̍sus itun nga nagsirsirbi igina ito kauwed na pekkem enna Galilya. Ket adu pe̍ diya duduma nga babey iyan, nga igida pe̍ diya nakibulun e̍ Je̍sus ito nagpa-He̍rusale̍m itun.

To pannakaitamen ne̍ Je̍sus

⁴² Ket iyan nga algew, Biye̍rne̍s nga Algew Panagisagana, nga itu ya algew sacbay niya Algew Ngilin. Ket gumidam met itunin.

⁴³ Ket itun, uwed isa nga toley nga nagtured nga nawe̍ ito edyan ne̍ Gube̍rnadur Pilatu. Nawe̍ ngarud nagadeng ka pammalubus ne̍ Pilatu nga alac na ya bangkay ne̍ Je̍sus, ta gumidam mettin. Ket yan nga toley, ket e̍ Huse̍ nga taga-Arimatiya, nga isa nga mabigbig nga kunse̍hal diya Hudyu. Ket igina pe̍ ya isa nga mangpadpadaan nga sinanama iya umbe̍t nga panangituray ne̍ Apu Diyus.

⁴⁴ Ket nasdaaw ngarud nge̍ Pilatu ito nadamag na nga natey nge̍ Je̍susin. Itu nga pinalbe̍t ne̍ Pilatu to kapitan diya suldadu, ket sinaludsud na no pudnu nga natey yin.

⁴⁵ Ket gapu ito pammanecnec nito kapitan iya pannakatey na, nipalubus ne̍ Pilatu nga alaken ne̍ Huse̍ to bangkayin.

⁴⁶ Ket nawe̍ ngarud ngimina nge̍ Huse̍ ka luput nga maawagan ka line̍n. Ket ito naidsag na to bangkayin, kinubit na ito luput nga line̍n, se̍ na nipisuc iya isa nga tamen nga nailiyang ka batu. Ket kalpasan na, nangbukalig ka dackel nga batu nga nanggiset na ito tamen.

⁴⁷ Ket nasingen met ne̍ Marya nga iMagdala se̍ e̍ Marya nga ina de̍ Huse̍, itu nga naemmuwan da to nakaitamennan ne̍ Je̍sus.