Markus 14 - Ya Baru nga Tulag

To panangisikat da nga mangtekkem e̍ Je̍sus

¹ Ket itun, duwa nga algew ngasin sacbay niya Padaya Nitatalib, se̍ ya Padaya Tinapay nga Awan Pangpablad Na. Ket dito pangpangulu diya agsirsirbi iya Te̍mplu se̍ dito manursuru iya Linteg, pinanpanunut da nga nalaing no kumaan kuma niya nalimed nga panangtekkem da e̍ Je̍sus, se̍ panangpatey da igina.

² Ket kinunen da iya panagtetebbar da, “Ngem ipaspase̍ tida pekkem ngarud, tasun bekken kuma nga mairana iya padaya, ta kaynun no agoorot diya toltoley,” kunen da.

Ito pannakabucbuc ne̍ Je̍sus ka bangbanglu

³ Ket itun, uwed nge̍ Je̍sus ka Be̍tanya ito baley ne̍ Simon, nga itu to nakutel itun. Ket ito madama da nga mangmangan, uwed isa nga babey nga inumbe̍t iyan, nga nangidal-ag met ka isa nga butilya nga bangbanglu nga para labu. Naggayat ka mula nga nardu yan nga bangbanglu, ket tutu nga awan lauc na, itu nga nangina nga unay. Ket pinetwe̍ng na ya ulu nito butilya tasun malukatan, se̍ na met nibucbuc to mayan na iya ulu ne̍ Je̍sus.

⁴ Ket uwed duduma nga toley iyan nga nalucsew win, nga kinunen da, “Ape̍ nga sinayang na ya bangbanglu?

⁵ Ta mabalin met nga nailaku ka rinibu nga pisus se̍ maikaasi kuma kadiya napanglaw,” kunen da. Ket inungtan da ngarud to babey.

⁶ Ngem kinunen ne̍ Je̍sus, “Bay-an nu yan! Ape̍ nga riribuken nu? Nabaru met ya nipaay na iyaken.

⁷ Ta no diya napanglaw, kanayun nga uwed da dakayu, ket orey nungey ya gabay nu, mabalin nu da nga tulungan. Ngem iyaken, bekken met nga agnanayun ya kauwed ku dakayu.

⁸ Ket ya babey nga idi, winangel na met ya patingga niya kabaellan na. Ta binucbukan na ya beggic, ket itu met ya panangisagana na iyaken iya pannakaitamen ku.

⁹ Ket pudnu met nga orey awac iya lubung ya pakaikasabaan niya Makaparagsac nga Damag, maistorya met pe̍ yani nga winangel nidi nga babey, nga itu nad ya pakalaglagipan igina,” kunen na.

To pannakitulag ne̍ Hudas nga mangiyawat e̍ Je̍sus

¹⁰ Ket e̍ Hudas Iskariyute̍, nga isa kadito sangapulu ket duwa nga adalan, nawe̍ itun kadito pangpangulu diya agsirsirbi iya Te̍mplu, tasun makitulag nga iyawat na nge̍ Je̍sus igida.

¹¹ Ket naragsakan da ngarud ito nagicna da to nibaga ne̍ Hudas, ket kinariyan da nga e̍cdan da kanu ka kuwarta. Ket nagsicsiim ngarud nge̍ Hudasin ka mayat nga gundaway na nga mangiyawat e̍ Je̍sus igida.

To nodi nga pananggidam ne̍ Apu Je̍sus sacbay niya pannakatey na

¹² Ket ito nona nga algew niya Padaya Tinapay nga Awan Pangpablad Na, nga itu pe̍ ya algew niya panagparti da ka urbun karne̍ru para iya Padaya Nitatalib, nagsaludsud dito adalan ne̍ Je̍sus igina, nga kinunen da, “Awac ya gabay mu nga pangisaganaan mi iya panggidam mu iya Padaya Nitatalib?” kunen da.

¹³ Ket iya agten iyan, nangibon ngarud nge̍ Je̍sus ka duwa nga adalan na, nga kinunen na igida, “Mawe̍ kayu enna siyudad. Ket uwed makasabet dakayu nga isa nga lalaki nga nakaagtu ka amusu nga nisacdu na. Ket suruten nu nad yan nga toley.

¹⁴ Ket no makadateng kayu iya baley nga pennan na, kunen nu iya akin-baley nga, ‘Ipasaludsud ne̍ Mistru nga kunen na, “Awac ya kuwartu nga panganac se̍ diya adalan ku no deddan iya pananggidam mi nga panangilagip mi iya Nitatalib?”’ kunen nu.

¹⁵ Ket uwed nad ipasingen na dakayu, nga isa nga akin-ngatu nga kuwartu nga dackel. Ket uwed iyanin amin nga masapul tida, se̍ naisagana pe̍ yin. Ket itu yan ya pangisaganaan nu iya panggidam tida,” kunen na.

¹⁶ Ket nagrubwat ngarud dito duwa nga adalanin, nga nawe̍ da iya siyudad. Ket nadateng da diya amin nga nibaga ne̍ Je̍sus igida, ket nisagana da ngarud ya panggidam da nga panangilagip da ito Nitatalib.

¹⁷ Ket ito gumabi yin, inumbe̍t antuni nge̍ Je̍sus se̍ dito sangapulu ket duwa nga adalan na.

¹⁸ Ket ito madama da nga manganin, kinunen ne̍ Je̍sus, “Ibagac ngarud ya kinapudnu dakayu, nga uwed met isa dakayu nga mangiyawat nad iyaken kadiya kumuntra iyaken. Ngarud, isa mettas dakayu nga kasangsanguc ita nga mangmangan ya mangiyawat iyaken,” kunen na.

¹⁹ Ket dito adalan na, linumdaang da ngarudin, ket nagsasarunu da nga nangsaludsud e̍ Je̍sus nga kinunen da, “Bekken nga iyaken ya kunem, ey?” kunen da.

²⁰ Ket kinunen ne̍ Je̍sus igida, “Isa met dakayu nga sangapulu ket duwa ya kunec, isa mettas dakayu nga makipagsewsew iyaken ka tinapay na iya malukung nga idi.

²¹ Tutu met nga maiyawat nad ya Anac nga Naipatoley, ta aglak-am ngarud ka pannakatey, sigun ito sigud nga naisurat maipanggep igina. Ngem kackaasi nad lugud yan nga toley nga mangiyawat iya Anac nga Naipatoley! Nabarbaru met ya kasasaad niyan nga toley no madi kuma ngas naitaudin,” kunen na.

To inariman ne̍ Je̍sus nga pakalaglagipan igina

²² Ket ito mangmangan da pekkem, namet nge̍ Je̍sus ka tinapay, ket nagyaman e̍ Apu Diyus ka kararag. Pinisepisey na to tinapay, se̍ na ne̍cde̍ igida nga kinunen na, “Alac nu yani. Idi ya beggic,” kunen na.

²³ Kalpasan na, namet pe̍ nge̍ Je̍sus ka paginuman. Nagkararag manin nga nagyaman e̍ Apu Diyus, se̍ na ne̍cde̍ igida. Ket iminum da nga aminin.

²⁴ Ket kinunen na igida, “Idi ya dagac nga mangpalagda iya tulag ne̍ Apu Diyus, nga maiyayus nga agpaay kadiya adu nga toltoley.

²⁵ Ket pudnu ngarud met nga madic nad uminum ka basi ubasin manipud ita agingga iyan nga algew nad nga uminum mac ka kabarbaru nga basi ubas iya pagiturayan ne̍ Apu Diyus,” kunen na.

²⁶ Ket nagkanta da nga nagdayaw e̍ Apu Diyus, se̍ da pimanaw iya siyudadin, nga nawe̍ da enna Tageytey Ulibu.

To panangipakaemmu ne̍ Je̍sus iya panangilibac ne̍ Pe̍dru

²⁷ Ket kinunen ne̍ Je̍sus kadiya adalan na, “Emmuc nga pumanaw kayu nad nga amin iyaken, ta naisurat iya Bibliya nga kunen na, ‘Patayec nad ya agay-aywan ka karne̍ru, ket diya karne̍ru, mawarawara da nad mettin,’ kunen na iya Bibliya.

²⁸ Agten iyan ngarud nga tutu ya mapasamac, ngem kalpasan nad niya panagungar ku, mon-ona ngac nad nga mawe̍ enna Galilya ngem dakayu,” kunen na.

²⁹ Ket e̍ Pe̍dru, kinunen na ngarud igina, “Orey no pumanaw da nga amin, madi naka met panawan nga gennung!” kunen na.

³⁰ Ket kinunen ne̍ Je̍sus igina, “Kinapudnu na, ita mettas nga gabi, sacbay niya maikadduwa nga panagtataraut diya kawitan no parbangun, name̍tlu nac nad met nga nilibac kin,” kunen na.

³¹ Ngem nipapilit latta ne̍ Pe̍dru nga kinunen na, “Orey no mapatey yac nga mairaman ikew, pulus nga di naka met ilibac!” kunen na. Ket amin dito pada na nga adalan, itu met pe̍ ya kinagkagi da.

To panagkararag ne̍ Je̍sus enna Ge̍tse̍mani

³² Ket nawe̍ de̍ Je̍sus iya isa nga lugar nga managan ka Ge̍tse̍mani. Ket itun, kinunen ne̍ Je̍sus kadito adalan na, “Agtugew kayu was idi, ta mawe̍ yac agkararag,” kunen na.

³³ Ket nibulun na de̍ Pe̍dru, Santiyagu, se̍ e̍ Juan. Ket e̍ Je̍sus, nariribuc met ya nakem nan, se̍ napalaus pe̍ yin ya sakit niya nakem na.

³⁴ Ket kinunen na igida, “Nadagsen nga unay ya ricnac kun, arig nga makatkatayen nac gapu iya ladingit kun. Mabati kayu kuma idi, ket agsulap kayu nga sisasagana kayu pe̍,” kunen na.

³⁵ Ket imadeyyu nge̍ Je̍sus ka e̍teng igida, se̍ nagdarongkeb iya ginet nga nagkarkararagin. Nikararag na nga no mabalin, maliclikan na kuma ya umbe̍t nga panagrigat na.

³⁶ Ket kinunen na iya kararag na, “Ama! Amac! Mabalinam ya amin. Ipac mu kuma yani nga panagsagaba nga lak-amec, nga rigat nga arig nga inumec. Ngem bekken kuma ngarud nga ya tarigagay ku ya matungpal, no di lugud ya tarigagay mu,” kunen na.

³⁷ Ket simoli nge̍ Je̍sus ito edyan dito tellu nga nibati na, ket nadateng na da nga agtudtudug mettin. Ket kinunen na ngarud e̍ Pe̍dru, “Simon, ape̍ nga mat-atudug ka? Di ka aya makapagsulap, ka orey ngas is-isa nga uras?

³⁸ Agsulap kayu ngarudin nga agkarkararag, tasun madi kayu kuma nga masulisug. Ta orey sipapasnec ya panpanunut niya toley, ket sikakapsut pekkem ya kabaellan niya beggi na,” kunen na.

³⁹ Ket nawe̍ manin nagkararag nge̍ Je̍sus, nga inulit na to agten mettas nga banag nito kararag na e̍ Apu Diyus.

⁴⁰ Ket ito simoli manin ito edyan dito tellu nga adalan na, ket nadateng na da nga agtudtudug manin, ta agdocdocyep da nga unayin. Ket di da lugud emmu win ya maikagi da iginan, ata nasukalan na da met manin.

⁴¹ Ket ito kapame̍tlu nan nga simoli nge̍ Je̍sus ito edyan da, kinunen na ngarud igida, “Agtudtudug se̍ agim-imang kayu pekkem? Kustun! Nadatngan mettin ya timpuc kun, ket maiyawatin ya Anac nga Naipatoley kadiya managbasul.

⁴² Ala, bumangun kayun, ta mawe̍ tidan. Singen nu kadin! Sumungsungadin ya mangiyawat iyaken,” kunen na.

To pannakatkem ne̍ Je̍sus

⁴³ Ket ito agkagkagi pekkem nge̍ Je̍sus, pag-isu mettin nga inumbe̍t to Hudas, nga isa ngarud kadito sangapulu ket duwa nga adalan. Ket kabulun na ya adu nga toley nga nagtagiispada se̍ nagtagipang-ur. Diyan nga toley, ebbon met dito pangpangulu diya agsirsirbi iya Te̍mplu, se̍ dito manursuru iya Linteg, se̍ dito panglakayen diya Hudyu.

⁴⁴ Ket to mangiyawat e̍ Je̍sus, uwed met pagilasinan nga nisuru nan kadito toley nga naibulun igina, ta kinunen na itun, “Ya agkac, igina nad yanin. Ket tacmen nu nad ngarudin, se̍ ipanaw nu nga asintaran nu nga nalaing,” kunen na itun.

⁴⁵ Ket ito nakadateng da iya edyan ne̍ Je̍susin, nagtarus ngarud to Hudas nga imadenni e̍ Je̍sus, ket kinunen na, “Mistru!” kunen na met, se̍ na inagkan nge̍ Je̍sus.

⁴⁶ Ket tinkem da ngarud nga tinngel nge̍ Je̍susin.

⁴⁷ Ket ya isa kadito kabulun ne̍ Je̍sus, nga agsisikad pe̍ antuni, inasut na mettin ya ispada na, ket kinteb na met ya tagabu nito kangatuwan nga agsirsirbi iya Te̍mplu. Ket nape̍ngas met ya isa nga tinga nito tagabu win.

⁴⁸ Ket kinunen ngarud ne̍ Je̍sus kadito nangtekkem igina, “Ape̍ kad nga agtagiispada se̍ agtagipang-ur kayu nga inumbe̍t mangtekkem iyaken, nga arig nga isa ngac nga tulisan?

⁴⁹ Inalgew nga uwed dac met iya imatang nu nga mangisursuru enna Te̍mplu, ngem madi dac met nga tinkem. Ngem orey a, ta mapasamac mettas ya agten idi tasun matungpal ya naisurat iya Bibliya,” kunen na.

⁵⁰ Ket dito adalan ne̍ Je̍sus, nagtalew da met nga amin, nga binaybay-an da nge̍ Je̍susin.

⁵¹ Ket uwed met isa nga bagbagu nga simursurut e̍ Je̍sus itun, ket nakake̍bal ngas met yan ka line̍n nga ules. Ket tinkem da pe̍ yani nga bagbagu.

⁵² Ngem ito nigapus da, naipac to ules nga nagke̍bal na, ket nagtalew ngarud nga siuuba ngin.

To pannakaisangu ne̍ Je̍sus kadito pangpangulu diya Hudyu

⁵³ Ket nipen da nge̍ Je̍sus iya baley nito kangatuwan nga agsirsirbi iya Te̍mplu. Ket naguurnung pe̍ antuni amin dito pangpangulu diya agsirsirbi iya Te̍mplu, se̍ dito panglakayen diya Hudyu, se̍ dito manursuru iya Linteg.

⁵⁴ Ket e̍ Pe̍dru, tinumtumneb met igina nga imuneg iya emwag mettas niya baley nito kangatuwan nga agsirsirbi iya Te̍mplu. Ket nakitugew nge̍ Pe̍dru kadiya guwardiya antuni, nga nakiin-inudu iya apuy da.

⁵⁵ Ket dito pangpangulu diya agsirsirbi iya Te̍mplu se̍ amin dito duduma nga kunse̍hale̍s, nagsapsapul da ka makapanecnec ka basul ne̍ Je̍sus, tasun uwed kuma rasun da nga mangpatey. Ngem awan met nasmac da nga mabalin.

⁵⁶ Ta orey adu met dito nagkagi ka busid nga maikuntra igina, ket bekken met nga nagtutunus diya panangpabasul da igina.

⁵⁷ Ket uwed duduma igida itun, nga nagsikad nga nagkagi ka busid maipanggep e̍ Je̍sus, nga kinunen da,

⁵⁸ “Nagicna mi nga kinunen na nga agten idi: ‘Lasangec nad ya Te̍mplu nga pinatdec toley, ket ka unus tellu nga algew, bangunec ya sabali, nga bekken nga inariman toley,’ kunen na met,” kunen da.

⁵⁹ Ngem orey pe̍ agten iyan to kunen da, bekken latta nga agtutunus dito panangpabasul da.

⁶⁰ Ket to kangatuwan nga agsirsirbi iya Te̍mplu, nagsikad met iya sangu da nga amin, ket nagsaludsud e̍ Je̍sus nga kinunen na, “Nagan ya maisungbat mu? Nagan ngarud ya makunem maipanggep kadiya nipabpabasul didi nga toley ikew?” kunen na.

⁶¹ Ngem pulus nga madi negkim nge̍ Je̍sus, nga awan nisungbat na. Ket nagsaludsud ngarud manin to kangatuwan nga agsirsirbi iya Te̍mplu nga kinunen na igina, “Kumaan na? Tutu kad aya nga ikew ya Kristu nga Anac mettas niya Kadayawan?” kunen na.

⁶² Ket kinunen ne̍ Je̍sus, “Bo, iyaken met. Ket masingen nu nad ngarud ya Anac nga Naipatoley nga nakatugew iya madiwanan niya Mannakabalin. Se̍ masingen nu nad pe̍ nga umbe̍t manipud iyan, nga maibulun igina diya ulep nga gayat ka langit,” kunen na met.

⁶³ Ket iya agten iyan, to kangatuwan nga agsirsirbi iya Te̍mplu, siuunget mettin nga pinigis na ya mismu nga luput na, nga kinunen na, “Ke̍h! Awan pakasapulan tida ka sabali nga sacsi yin.

⁶⁴ Ta nagicna nu mettin ya kagi na mettas nga maikuntra e̍ Apu Diyus! Nagan ngarud ya pangngeddeng nun?” kunen na. Ket amin da, nagpapada da ngarud nga nangukum igina, nga nikeddeng da nga rumbeng kanu nga mapatey.

⁶⁵ Ket diya duduma igida, linutaban da met nge̍ Je̍susin. Ket inamitngan da pe̍ yin, se̍ da nga dinandantug met nga kinagkagi da, “Padtuwam man no nagan ya nangdantug ikew!” kunen da met. Ket agten met pe̍ dito guwardiya ito inalac da, ket tinungtungpa da met pe̍.

To panangilibac ne̍ Pe̍dru e̍ Je̍sus

⁶⁶ Ket e̍ Pe̍dru, uwed pekkem iya segged itun, ito emwag nito baley. Ket uwed pe̍ nawe̍ iyan nga isa nga babey nga katulung nito kangatuwan nga agsirsirbi iya Te̍mplu.

⁶⁷ Ket ito nasingen na nge̍ Pe̍dru nga agin-inudu iyan, binetbettaan na met, se̍ na kinunen, “Nih, ikew met pe̍ ya isa kadito nakibulubulun e̍ Je̍sus nga iNasare̍t,” kunen na.

⁶⁸ Ngem naglibac met nge̍ Pe̍dru nga kinunen na, “Siyac, madic met em-emmu yan. Awan emmuc iyan nga ibagbagam,” kunen na met, ket nawe̍ ito edyan niya ruwanganin. [Ket itun, uwed met nagtaraut nga kawitanin.]

⁶⁹ Ket nasingen manin nito katulung nga babey nge̍ Pe̍dru, ket kinagi na met manin kadito uwed antuni, “Itu yani ya isa kadito kabulun na!” kunen na.

⁷⁰ Ngem naglibac manin nge̍ Pe̍dru. Ket ito di mabayag, kinagi manin dito uwed antuni e̍ Pe̍dru nga kinunen da, “Siguradu met nga kabulun daka dituni, ta iGalilya ka met pe̍,” kunen da.

⁷¹ Ngem nagsapata met nge̍ Pe̍dru win, se̍ kinunen na nga sipapasnec, “Pudnu met nga madi yac em-emmu yan nga toley nga ibagbaga nu!” kunen na met.

⁷² Ket pag-isu met nga uwed maikadduwa nga nagtaraut nga kawitanin. Ket nalagip ngarudin ne̍ Pe̍dru to nibaga ne̍ Je̍sus igina itun nga, “Sacbay niya maikadduwa nga panagtataraut diya kawitan, ket name̍tlu nac nad met nga nilibac kin.” Ket ito nalagip ne̍ Pe̍dru yanin, nagberberrit met nga tutu win.