Markus 13 - Ya Baru nga Tulag

To panangipakaemmu ne̍ Je̍sus iya pannakalasang niya Te̍mplu

¹ Ket ito rumwar de̍ Je̍sus enna Te̍mplu win, uwed isa kadito adalan na nga nagkunen igina, “Mistru, singem ngarud diya nakaskasdaaw nga batbatu nga naipatdec iya Te̍mplu wi, se̍ diya nakaskasdaaw pe̍ nga naibangun idi!” kunen na.

² Ket kinunen ne̍ Je̍sus igina, “Kinapudnu na, didi nga dadackel nga naipatdec nga masingem mun, awan nad met orey isa nga batu idi nga naisimpa nad iya sap-ew niya sabali nga batu. Ta malasang da nad met nga amin,” kunen na.

Diya rigrigat se̍ diya pannakairurumen

³ Ket ito nagtugtugew nge̍ Je̍sus enna Tageytey Ulibu, nga kamanumang niya Te̍mplu, awan diya kaaduwanin. Ket imadenni igina de̍ Pe̍dru, Santiyagu, Juan se̍ e̍ Andre̍s, nga kinunen da igina,

⁴ “Ibagam kay dakami no nungey nad nga madatngan yan nga timpu nga kinunem, se̍ no nagan nad ya pagilasinan nga dandani matungpalin,” kunen da.

⁵ Ket kinunen ne̍ Je̍sus igida, “Agannad kayu ngarud tasun awan kuma mangiyaw-awan dakayu maipanggep iyan nga timpu.

⁶ Adu nad diya agparang nga agkunen nga igida kanu ya iyaken, nga kunen da nad nga, ‘Iyaken nge̍ Kristu!’ kunen da nad met. Ket iya agten iyan, adu nad diya maiyaw-awan da.

⁷ Ket madi kayu kuma nad mariribukan, no magicna nu ya uni diya panaggubat, se̍ no madamag nu nad pe̍ iya sapsaput toley diya maipanggep ka gubgubat. Ta masapul ngarud met nga mapasamac diyan. Ngem bekken nad pekkem nga itu ya panungpalan.

⁸ Tutu met yan, ta aggiginnubat nad met diya pagpagiliyan, agten met pe̍ diya pagpagariyan. Uwed nad met pe̍ yegyeg kadiya nadumaduma nga lugar, se̍ uwed nad pe̍ panagbisin. Ngem diyan nad nga mapasamac, damu na pekkem mas, nga arig nga panangrugi ngas niya panagpakiskis niya aganac.

⁹ “Ngem agannad kayu lugud, ta maiyawat kayu nad kadiya kunse̍hus da. Ket mabaut kayu nad pe̍ iya uneg mettas diya gigimungan, se̍ maisangu kayu nad met kadiya agtuturay se̍ ar-ari gapu mettas iyaken. Ket itu nad ya gundaway nun nga mangipakaemmu maipanggep iyaken.

¹⁰ Ta pudnu met nga masapul nga maikasaba nga mona ya Makaparagsac nga Damag kadiya amin nga pagpagiliyan.

¹¹ Ket no tacmen dakayu nga idarum, madi kayu nad madanagan no nagan ya kagiyen nu kuma igida. Basta ikagi nu was ya maipakaemmu dakayu iyan mettas nga kanitu. Ta ya kinapudnu na, bekken nad nga agtaud dakayu diya ikagkagi nu, no di lugud agtaud iya Ispiritu Santu.

¹² “Ket diya toltoley, iyawat da nad nga ipapatey orey diya kakabsat da mettas. Ket agten met pe̍ ya wanglen nad diya ama kadiya anac da. Agten met pe̍ diya anac, sukiran da nad met diya naganac igida. Ket ipapatey da nad da.

¹³ Ket dakayu, guraen dakayu nad pe̍ diya amin nga toltoley, gapu mettas iyaken. Ngem maisalakan nad met ya makaitured kadiyan agingga iya panagpatingga da.”

Ya Nakar-aryec nga Mangpirdi

¹⁴ “Ket masingen nu nad to kunen da nga ‘Nakar-aryec nga Mangpirdi’, nga naisaad nad met iya bekken nga rumbeng nga pagsaadan na. (Ikew nga agbasbasa idi nga naisurat, masapul nga maawatam ya kaipapennan nidi.) Ket no masingen nu nad yanin, agtalew kuma ngarud diya aged-edyan idi prubinsiya nga Hudya, nga mawe̍ da kuma agsoroc kadiya tagtageytey yin.

¹⁵ Ket no uwed kuma nad toley iya sap-ew niya atep niya baley na, madi kuma umulugin nga mawe̍ umuneg iya baley na nga mangbulay pekkem ka orey nagan na.

¹⁶ Ket agten pe̍ ya uwed nad iya lapug na, madi kuma agawir nga mawe̍ agbulay ka orey ngas no ke̍bal na.

¹⁷ “Ket diya mabucsit se̍ diya agsagsagibi iyan nga timpu, kackaasi da nad ngarudin!

¹⁸ Ikararag nu ngarud nga madi kuma mapasamac yan nga panagrigat iya timpu kabasa.

¹⁹ Ta iyan nga timpu, uwed nad met panagrigat nga awan kapada na, orey manipud ito damu nito panamarsuwa ne̍ Apu Diyus iya lubung, agingga ita. Ket orey iya maadpangan nga timpu, awan mapasamac nga agten iyan nga napalaus nga rigat.

²⁰ Ket gapu iya nakaru nga panagrigat nad iyan nga timpu, pulus nga awan toley nga makalasat, no madi nga pae̍tngen ne̍ Apu Diyus ya kabayag na. Ngem nalaing lugud ta gapu iya panangipateg ne̍ Apu Diyus kadiya pinili na nga toley na, ket pae̍tngen na nad ngarud ya kabayag na.

²¹ “Ket iyan nga timpu, no uwed nad agkunen dakayu nga, ‘Singen nu, itu yani nin ya Kristu!’ winno kunen da nad nga, ‘Singen nu, uwed antuni nin!’ kunen da nad dakayu, ket madi kayu kuma patpatiyen.

²² Ta uwed da nad agparang nga sinan-Kristu se̍ sinan-mammadtu, ket agariman da nad ka pagilasinan se̍ nakaskasdaaw, tasun, no mabalin, gabay da nga iyaw-awan kuma diya pinili ne̍ Apu Diyus nga toley na.

²³ Dikad pe̍ annadan nu diya agten kadiyan. Ngarud, nipakaemmuc amin didi dakayun sacbay nga mapasamac da.”

Maipanggep iya umbe̍t manin niya Anac nga Naipatoley

²⁴ “Ngem kadiyan nga algew, kalpasan nad niyan nga panagrigat, gumicbet nad ya sinagin, se̍ awan nad pe̍ wada nga gayat iya bulanin.

²⁵ Ket diya bitbituwen, agterterkag da nad met manipud iya abac lawa. Ket diya pannakabalin nga uwed iya abac lawa, ket makusu da nad mettin.

²⁶ Ket iyan nad nga timpu win, masingen nad met diya toltoley ya Anac nga Naipatoley nga umbe̍tin, nga uwed nad kadiya ulep. Ket maipasingen nad ngarud diya nakaskasdaaw nga pannakabalin se̍ kinadayaw na.

²⁷ Ket manipud kadito ulep, ibon na nad diya anghe̍le̍s nga mawe̍ kadiya eppat nga pagtaudan niya belluut, tasun urnungen da nad diya pinili ne̍ Apu Diyus nga toley na. Ngarud, urnungen da nad da nga gayat kadiya amin nga parte̍ niya lubung.”

To adal maipanggep iya kayu nga igus

²⁸ “Maadal tida kuma ya pangngarig maipanggep iya gangey niya kayu nga igus. Ta no sumagicsic diya sangsanga na, se̍ agutec dan, ket emmu nun nga dandani yin ya timpu pudut.

²⁹ Ket agten met pe̍ iyan, no masingen nu nga mapaspasamac kin diyan nga nibagac dakayu, maemmuwan nun nga denni yin yan nga timpu, nga arig nga uwed sumungsungad iya ruwanganin.

³⁰ Pudnu met nga mapasamac nad amin diyan, sacbay niya panagpatingga diya toltoley nga sibibiyag ita nga timpu.

³¹ No ya abac lawa se̍ ya lubung ngi, uwed nad met panagpatingga da. Ngem diya kagic nga gennung, pulus met nga awan panagpatingga da.”

No nungey ya umbe̍t manin ne̍ Kristu

³² “Ngem no maipanggep iyan nga algew se̍ uras, awan met makaemmu maipanggep kadiyan, orey diya anghe̍le̍s ka langit, winno ya Anac. Ta yan nas Ama ya makaemmu iyan.

³³ Agannad kayu ngarud, ket sisasagana kayu kuma nga pe̍yeng, ta di kayu emmu no nungey nga agparang yan nga timpu.

³⁴ Ket maiyarig yani iya isa nga toley nga mawe̍ ka deyyu nga lugar. Ket sacbay nga agrubwat, bilinen na ngarud diya tagabu na, nga italec na igida ya tunggal pagrebngan da, se̍ bilinen na pe̍ ya agbantay iya gagayangan, nga sisasagana kuma kanu nga pe̍yeng.

³⁵ “Dikad pe̍ no dakayu, sisasagana kayu kuma pe̍ nga pe̍yeng, ta di kayu nga emmu no nungey ya iseseppuc niya akin-baley, ket mabalin nga iya gidam, winno iya tengnga gabi, winno iya panagtataraut diya kawitan iya parbangun, winno iya agsapa.

³⁶ Ta kaynun no kellat nga sumpuc kin, ket madateng nakayu nga agtudtudug.

³⁷ “Ket ibagac dakayu ya gabay ku met pe̍ nga ibaga kadiya amin nga toltoley, ket agten idi: Sisasagana kayu kuma!” kunen na.