Markus 11 - Ya Baru nga Tulag

To nadayaw nga isusungad ne̍ Je̍sus ka He̍rusale̍m

¹ Ket ito umad-adenni de̍ Je̍sus enna He̍rusale̍min, nakadateng dan ka Be̍tpage̍ se̍ Be̍tanya, enna Tageytey Ulibu. Ket ito uwed da antuni nin, nangibon nge̍ Je̍sus ka duwa nga adalan na,

² nga kinunen na igida, “Mawe̍ kayu iyan nga masungad nga baryu. Ket apaman nga makasrec kayu iyan, sigida nga uwed maaskuran nu nga nakabaud nga urbun asnu, nga di pekkem sinacsakayan toley. Ukasan nu, ket e̍lbe̍t nu idi.

³ Ket no uwed agsaludsud no ape̍ nga wanglen nu yan, ibaga nu nga, ‘Masapul niya Apu, ket paisoli na nad mettas nga dagus,’ kunen nu,” kinunen ne̍ Je̍sus.

⁴ Ket nawe̍ da ngarudin, ket nadateng da met ya isa nga urbun asnu nga sibabaud iya pingit niya kalsada, iya batug niya gagayangan niya isa nga baley. Ket ito uk-ukasan da to nakabaud nga urbun,

⁵ uwed da met toley nga gasisikad antuni, nga kinunen da ngarud kadito adalan, “Ape̍ nga ukasan nu ya urbun?” kunen da.

⁶ Ket nisungbat met dito adalan igida to nisuru mettas ne̍ Je̍sus. Ket iya agten iyan, pinalubusan met dito toley dan.

⁷ Ket nipen da ngarud to urbun ito edyan ne̍ Je̍sus, ket niyap-ap da diya ke̍bal da iya eddeg nito urbun. Ket itu ya nagsakayan ne̍ Je̍susin.

⁸ Ket adu diya toley nga nagiyaplag met kadiya ke̍bal da iya dalanen na, nga panangipasingen da iya panagdayaw da igina. Ket uwed da pe̍ duduma nga nawe̍ nagputed ka naeeddon nga sangsanga diya kayu nga uwed kadiya laplapug, ket itu met to niyap-ap da ito dalan.

⁹ Ket dito toltoley nga sarsarunuwen se̍ sumarsarunu e̍ Je̍sus, nip-ipkaw da nga kinunen, “Madaydayaw ya Mangisalakan! Madaydayaw ya agparang gapu iya kinaturay niya Apu!

¹⁰ Madaydayaw ya umbe̍t nga panangituray niya ama tida nga Ari Dabid! Mapadayawan kuma pe̍ ya Mangisalakan enna kangatuwan nga edyan!” kunen da.

¹¹ Ket imuneg ngarud nge̍ Je̍sus iya siyudad nga He̍rusale̍m, se̍ nawe̍ iya Te̍mplu win. Ket enna Te̍mplu, siningsingen na ya amin nga uwed antuni. Ket kalpasan niyan, rinumwar nge̍ Je̍sus se̍ dito sangapulu ket duwa nga adalan na iya siyudad, nga nawe̍ da enna Be̍tanya, ta gidam mettin.

To panangilunud ne̍ Je̍sus ito kayu nga igus

¹² Ket iya kadamlag na, ito sumolsoli da nga gayat ka Be̍tanya, nabisinan nge̍ Je̍sus iya dalan.

¹³ Ket nasingen na iya deyyu ka e̍teng ya isa nga naeeddon nga kayu nga igus. Ket nawe̍ na inadenniyan to kayu, nga singen na no uwed bisic na. Ngem ito nakadateng iya edyan nito kayu, yan nas met eddon ya nasingen na, ta bekken pekkem nga panagbibisic diya igus.

¹⁴ Ket kinunen met ne̍ Je̍sus ito kayu, “Manipud ita, pulus nga awan maibisic mu nga kanen toley yin!” kunen na. Ket nagicna met pe̍ dito adalan na to kinagi na.

To panangpatalew ne̍ Je̍sus kadito aglaclaku ka Te̍mplu

¹⁵ Ito nakadateng da ka He̍rusale̍m, nawe̍ nge̍ Je̍sus enna Te̍mplu. Ket diya uwed iya emwag niya Te̍mplu nga aglaclaku se̍ diya agnginngina, pinagtalew met ne̍ Je̍sus da. Ket binalintukang na pe̍ diya lamlamisaan diya agisucsukat ka kuwarta, se̍ diya tugtugew diya aglaclaku ka kalapati.

¹⁶ Ket madi na met pe̍ pinalubusanin ya orey nagan na nga agagtu ka ilasat da kuma iya paraangan niya Te̍mplu.

¹⁷ Ket nisuru na ngarud dan, nga kinunen na igida, “Naisurat met iya Bibliya nga agten idi: ‘Ya baley ku, ket maawagan nad ka baley nga pagkararagan nga agpaay kadiya toltoley diya amin nga nasnasyun,’ kunen na met iya Bibliya. Ngem dakayu, pinagbalin nu lugudin nga paguurnungan diya tulisan!” kunen na.

¹⁸ Ket ito nadamag dito pangpangulu diya agsirsirbi iya Te̍mplu se̍ dito manursuru iya Linteg yan, pinanpanunut da ngarud no kumaan kuma niya panangpatey da e̍ Je̍sus. Ta nansing da igina gapu ta nagsedseddaawan met dito amin nga toltoley to nabaru nga panursuru na.

¹⁹ Ket ito gumicbet tin, pimanaw nge̍ Je̍sus se̍ dito adalan na iya siyudadin, sigun ito gangey na.

To kayu nga igus nga nacritin

²⁰ Ket iya agsapa manin, ito manmanalan de̍ Je̍sus manin ito dalan, nasingen da manin to kayu nga igus, ket nacrit mettin manipud mettas kadiya gamut na.

²¹ Ket e̍ Pe̍dru, nalagip na met to kinagi ne̍ Je̍sus ito kayu, itu nga kinunen na ngarud e̍ Je̍sus, “Mistru, singem kad! Nacrit mettin to kayu nga igus nga nilunud mun,” kunen na.

²² Ket iya agten iyan, kinunen ne̍ Je̍sus igida, “Masapul ngarud nga sipapati kayu e̍ Apu Diyus.

²³ Tutu met nga ya orey nagan na nga toley nga madi agduwaduwa iya lemlemmet na, no di lugud mamati nga matungpal nga tutu ya ibilin na, ket mabalin nga bilinen na met yani nga tageytey, nga kunen na, ‘Maiyalis ka nga maipisuc iya baybayin,’ kunen na kuma, ket maariman met nga tutu yan nga bilin na.

²⁴ Dikad pe̍ ibagac ngarud dakayu nga orey nagan na nga adngen nu iya kararag nu, basta patiyen nu kuma nga maalac nu, ket maipaay met nga tutu dakayu.

²⁵ Ket tunggal agsikad kayu nga agkararag e̍ Apu Diyus, no uwed pekkem iyung-ungit nu iya kapada nu, ket pakawanen nu kuma ngarudin, tasun ya Ama nu nga uwed ka langit, pakawanen nakayu pe̍ kadiya basbasul nu.

²⁶ [Ngem no madi kayu pakawanen diya kapada nu, madi pe̍ pakawanen niya Ama nu nga uwed ka langit diya basbasul nu,]” kunen na.

Maipanggep iya turay ne̍ Je̍sus

²⁷ Ket nakadateng manin de̍ Je̍sus ka He̍rusale̍m. Ket ito uwed nge̍ Je̍sus nga agpaspasyar ito emwag niya Te̍mplu, uwed met dito pangulu diya agsirsirbi iya Te̍mplu se̍ dito manursuru iya Linteg se̍ dito panglakayen diya Hudyu nga nawe̍ ito edyan na.

²⁸ Ket nagsaludsud da igina nga kinunen da, “Awac kad ya naggayatan niya turay mu nga agariman kadiya ar-arimanem? Nagan ya nange̍cde̍ ikew iyan nga turay tasun maariman mu diyan?” kunen da.

²⁹ Ket kinunen ne̍ Je̍sus igida, “Uwed pekkem mona nga isaludsud ku dakayu. Ket no masungbatan dac, ibagac met dakayu no awac ya naggayatan niya turay ku nga agariman kadiya ar-arimanec.

³⁰ Ket agten idi: To Juan nga Mammautisar, awac ngarud ya naggayatan nito turay na nga mamacbautisar itun? Gayat kad e̍ Apu Diyus, winno ka toley? Ibaga nu kay iyaken,” kunen na.

³¹ Ket igida, nagdidinniskutir da ngarudin, nga kinunen da, “Nagan ngarud ya isungbat tidan? Ta no kunen tida nga gayat e̍ Apu Diyus, kunen na nad dactida nga, ‘No agten iyan, ape̍ ngarud nga madi kayu namati ito Juan?’ kunen na met.

³² Ngem no kunen tida nga gayat ngas ka toley, ay-ay!” kunen da met, ata mansing da ngarud kadiya toltoley. Ta amin dito toltoley, mamati da nga tutu nga mammadtu ne̍ Apu Diyus to Juan.

³³ Ket iya agten iyan, nisungbat da e̍ Je̍sus nga kinunen dan, “Madi kami met emmu to naggayatan niya turay na,” kunen da. Ket kinunen ne̍ Je̍sus igida, “No agten iyan, madic met ngarud pe̍ ibaga dakayu no awac ya naggayatan niya turay ku nga agariman kadiya ar-arimanec,” kunen na.