Markus 1 - Ya Baru nga Tulag

To panangasaba ne̍ Juan nga Mammautisar

¹ Agten idi to pangrugiyan niya Makaparagsac nga Damag maipanggep e̍ Je̍su Kristu nga Anac ne̍ Apu Diyus.

² Uwed to kagi ne̍ Apu Diyus nga nisurat nito mammadtu nga Isayas itun, nga kinunen na, “Agten idi: Bilinec nad ya ibon ku nga mangipakaemmu, nga mawe̍ nga mon-ona ngem ikew, ket isagana na ya dalan mu.”

³ “Enna away, uwed mangip-ipkaw nga kunen na, ‘Isagana nu ya dalan niya Apu! Palinteggen nu ngarud ya dalanen na!’” kunen na.

⁴ Ket iya agten iyan, uwed ngarud nangaskasaba se̍ namacbautisar enna away itun, nga itu nge̍ Juan. Nikasaba na nga masapul nga agbabawi diya toltoley, nga agbautisar da, tasun maawat da ya pannakapakawan diya basbasul da.

⁵ Ket itun, adu ngarud diya nawe̍ naggigicna igina, nga gayat da kadiya amin nga il-ili iya prubinsiya nga Hudya se̍ iya siyudad nga He̍rusale̍m. Nagipakaemmu da met nga situtulnug kadiya basbasul da, ket binautisaran ne̍ Juan da enna wangag Hordan.

⁶ Ket ya luput nito Juan, naariman met ka dutdut kame̍lyu, ket lalat ngas ya barikes na. Sisibew se̍ digu yukan ya pagbibiyag na itun.

⁷ Ket nangasaba to Juan nga kinunen na, “Uwed sumarunu nad iyaken nga dacdackel ya pannakabalin na ngem iyaken. Ket di yac pe̍ nga maikari nga orey no agdokot ngas nga mangukas kadiya listun diya palloka na.

⁸ Iyaken, danum ya pamautisar ku dakayu. Ngem igina, ya Ispiritu Santu met ya pamautisar na nad dakayu,” kunen na.

To pannakabautisar ne̍ Je̍sus

⁹ Ket itun nga timpu, inumbe̍t nge̍ Je̍sus antuni nga gayat enna Nasare̍t, nga isa nga ili ka prubinsiya nga Galilya. Ket binautisaran met ne̍ Juan enna wangag Hordan.

¹⁰ Ket ito gumacgacdang nge̍ Je̍susin, nasingen na nga arig nga napigis met nga nalukatan ya langitin. Ket nasingen na pe̍ ya Ispiritu ne̍ Apu Diyus nga agpaspasegged met igina nga agten iya kalapati.

¹¹ Ket uwed pe̍ timec nga nagicna antuni nga nagtaud ka langit, nga kinunen na, “Ikew ya Anac ku nga dungdungnguwec. Ikew ya pakaay-ayuwac,” kunen na.

To panangsulisug ne̍ Satanas e̍ Je̍sus

¹² Ket itun, sigida met nga nipanaw niya Ispiritu ne̍ Apu Diyus nge̍ Je̍sus manipud ito wangag, nga niturung na ka away.

¹³ Ket nagedyan nge̍ Je̍sus ka away ka unus eppat nga pulu nga algew, nga nalak-aman na met antuni ya panangsulisug ne̍ Satanas. Adu met pe̍ diya nauyung nga atap nga animal antuni. Ket itun, inistimar met diya anghe̍le̍s nge̍ Je̍sus antuni.

To panangirugi ne̍ Je̍sus enna Galilya iya gagara na

¹⁴ Ket ya napasamac itun, naibalud to Juan. Kalpasan nito pannakaibalud na, nawe̍ nge̍ Je̍sus iya prubinsiya nga Galilya ngin, nga nangikaskasaba iya Makaparagsac nga Damag nga gabay ne̍ Apu Diyus nga ipakaemmu.

¹⁵ Ket kinunen ngarud ne̍ Je̍sus, “Nadatnganin ya kustu nga timpu, ket dandani mettin ya panangituray ne̍ Apu Diyus. Agbabawi kayu ngarudin, ket mamati kayun iya Makaparagsac nga Damag!” kunen na.

To panangpasurut ne̍ Je̍sus kadito eppat nga mangngalap

¹⁶ Ket ito manmanalan nge̍ Je̍sus iya pingit nito baybay ka Galilya, uwed nasingen na nga duwa nga mangngalap, nga agnagan ka Simon se̍ Andre̍s, nga agkabsat. Madama da nga agtabtabukul itun.

¹⁷ Ket kinunen ne̍ Je̍sus igida, “Suruten dac lugudin, ta pagbalinen nakayu nga arig nga mangngalap ka toley nga gennung,” kunen na.

¹⁸ Ket sigida met nga pinanawan da dito iket da, ket simurut da ngarud iginan.

¹⁹ Ket nituluy ne̍ Je̍sus ya nanalan ka e̍teng, ket nasingen na diya anac ne̍ Se̍be̍dyu, nga agnagan ka Santiyagu se̍ Juan. Didi nga agkabsat, uwed da iya bangka da nga agay-ayuma kadiya iket da.

²⁰ Ket apaman nga nasingen ne̍ Je̍sus dito agkabsat, inayab na dan. Ket pinanawan da ngarud nge̍ Se̍be̍dyu nga ama da iya bangka ngin, agraman diya mangmangged igida, ket simurut da ngarud e̍ Je̍susin.

To lalaki nga naluganan ka sairu

²¹ Ket nawe̍ de̍ Je̍sus iya ili nga Kape̍rnaum. Ito nadatngan ya Algew Ngilinin, nawe̍ ngarud imuneg iya gigimungan diya Hudyu antuni, ket nangisuru kadiya toltoley.

²² Ket nasdaaw diya naggigicna igina, ta naturay met ya panangisuru na, nga bekken nga agten iya panangisuru diya manursuru iya Linteg.

²³ Ket ito madama nge̍ Je̍sus nga mangisursuru, pagamwan nas nga uwed ito gigimungan ya isa nga lalaki nga naluganan ka sairu.

²⁴ Ket nipkaw na nga kinunen, “Je̍sus nga iNasare̍t! Nagan ngarud ya biyang mu dakami? Numbe̍t nakami kad pirdiyen? Em-emmu naka met! Ikew ya Nalinteg nga Ebbon ne̍ Apu Diyus!” kunen na.

²⁵ Ngem pinagulimec met ne̍ Je̍sus to sairu nga naglugan, nga kinunen na nga siiinget, “Madi ka mamagas! Agtalew ka iyan nga toley yin!” kunen na.

²⁶ Ket to sairu, pinageddan na mettin to lalaki nga naglugluganan na, se̍ kinumre̍s ka nabileg, ket nagtalew ngarud ito lalaki yin.

²⁷ Ket diya amin nga nakasingen iyan, nasdaaw da ngarud, itu nga kinunen da iya panagtetebbar da, “Kumaan ngata ya agten idi? Sabali met ya panursuru na. Nabileg pe̍ ya turay na, ta orey diya sairu, bilinen na da met, ket agtungpal da nga tutu igina!” kunen da.

²⁸ Ket dagus ngarud nga nagdindinamag nge̍ Je̍sus kadiya amin nga ed-edyan nga masakupan niya prubinsiya nga Galilya.

To panangpalaing ne̍ Je̍sus ito katugangan ne̍ Simon, se̍ kadiya duduma pekkem

²⁹ Ket pimanaw nge̍ Je̍susin ito gigimungan, ket nawe̍ iya baley de̍ Simon nge̍ Andre̍s. Ket nibulun pe̍ igina de̍ Santiyagu nge̍ Juan.

³⁰ Ket ya babey nga katugangan ne̍ Simon, nakaida itun, ta madagang met. Ket apaman nga sinumpuc nge̍ Je̍sus, nibaga da igina maipanggep ito babey nga agsakit.

³¹ Ket e̍ Je̍sus, nawe̍ ngarud iya edyan na. Nicman na ya ima nito babey, ket tinulungan na nga bimangunin. Ket awan mettin to dagang na, ket nagistimar pe̍ ka para igidan.

³² Ket ito nisurneb ya sinagin iyan mettas nga algew, ne̍lbe̍t diya toltoley iya edyan ne̍ Je̍sus diya amin nga agsasakit se̍ diya naluganan ka sairu.

³³ Ket iya agten iyan, naguurnung itun diya amin nga agkakailiyan iya sangu nito baley nga edyan ne̍ Je̍sus.

³⁴ Adu ngarud diya pinalaing ne̍ Je̍sus itun nga agsagsagaba ka nadumaduma nga sakit, se̍ adu pe̍ diya sairu nga pinagtalew na ka toley. Ket madi na pinalubusan nga agkagi dito sairu, ta emmu da met no nagan na nge̍ Je̍sus.

To panangasaba ne̍ Je̍sus enna Galilya

³⁵ Ket iya parbangun pekkem ito kadamlag na, bimangun nge̍ Je̍sus, se̍ pimanaw ito ili nga nawe̍ ka lugar nga awan matagtagitoley na. Ket nagkararag antuni nin.

³⁶ Ket e̍ Simon se̍ diya kabulun na, nawe̍ da ngarud sinapulin.

³⁷ Ket ito nasmac da nge̍ Je̍sus, kinunen da igina, “Sapsapulen daka diya toltoley yin,” kunen da.

³⁸ Ket kinunen ne̍ Je̍sus igida, “Mawe̍ tida kuma kadiya kabangibang nga il-ili yin, tasun mangasaba ngac pe̍ kadiyan, ta itu met ya numbe̍tac,” kunen na.

³⁹ Ket nawe̍ ngarud pinasyar ne̍ Je̍sus diya amin nga parte̍ niya prubinsiya nga Galilya, ket nangaskasaba kadiya gigimungan da, se̍ nangpatpatalew kadiya sairu kadiya toley nga linuganan da.

To panangpalaing ne̍ Je̍sus ito nakutel

⁴⁰ Ket itun, uwed isa nga lalaki nga nakutel, nga nawe̍ iya edyan ne̍ Je̍sus nga nagpacpakaasi igina. Nagparintumeng ngarud nga kinunen na e̍ Je̍sus, “Emmuc nga mapalaing nac met, no gabay mu,” kunen na.

⁴¹ Ket naasiyan ngarud nge̍ Je̍sus, ket inicman na to lalaki, se̍ na kinunen, “Gabay ku met. Malaingan ka ngarudin,” kunen na.

⁴² Ket sigida met nga naipac to kutel nan, ket nalainganin.

⁴³ Ket pinapanaw ne̍ Je̍susin, nga nona nga binilin na nga siiinget to lalaki,

⁴⁴ nga kinunen na, “Madi ka ibagbaga ya maipanggep idi iya orey nagan na. Mawe̍ ka ipasingen ya beggim iya agsirsirbi iya Te̍mplu, se̍ mangipaay ka kadiya datun nga maikanatad iya bilin nito Muyse̍s, tasun maipanecnec kadiya toltoley ya pannakapalaing mu,” kunen na.

⁴⁵ Ngem ito nakapanawin to lalaki, nawe̍ na lugud niawaawag to napasamac iginan. Ngarud, gapu ito panangipadamag na, madi met nakasrec nga silalatac nge̍ Je̍susin kadiya orey nagan na nga il-ili, no di lugud nagedyan nas iya awayin. Ket diya toltoley, nawe̍ da nga pe̍yeng iya edyan na, nga naggayat da kadiya amin nga luglugar antuni.