Lukas 9 - Ya Baru nga Tulag

To pannakaibon dito sangapulu ket duwa nga adalan

¹ Ket iya isa nga algew, pinagurnung ne̍ Je̍sus dito sangapulu ket duwa nga adalan na. Ket nitalec na igida ya pannakabalin se̍ turay nga mangpatalew ka orey nagan na nga sairu, se̍ mangagas kadiya sacsakit.

² Ket se̍ nibon na da nga mawe̍ mangikasaba maipanggep iya panangituray ne̍ Apu Diyus, se̍ mangpalaing kadiya agsakit.

³ Ket kinunen na igida, “Madi kayu agitarey ka orey nagan na: sacgukud man winno legpi, pekkel winno kuwarta, ket kustu ngas ya isa nga badu nu.

⁴ Ket no uwed mangsangaili dakayu, agdagus kayu iyan mettas nga baley agingga na nga pumanaw kayu iyan nga ili.

⁵ Ket no uwed ili nga madi dakayu rispitaren diya umili, panawan nu ngarud yan nga ili yin. Ket no pumanaw kayun, sapuken nu ya tapuc iya saka nu, tasun ipakaemmu nu igida nga awan bibiyang nu igidan,” kunen na.

⁶ Ket pimanaw ngarudin dito adalan. Nawe̍ da kadiya il-ili, nga nikaskasaba da ya Makaparagsac nga Damag, se̍ nangpalaing da kadiya agsacsakit kadiya amin nga lugar nga pinasyar da.

To panagsikur nito Ari He̍rude̍s

⁷ Ket to He̍rude̍s nga agturay ka Galilya, nadamag na amin didi nga napaspasamac maigapu e̍ Je̍sus. Ket nasikuran met, ata kagkagiyen diya duduma nga igina kanu to Juan nga Mammautisar nga nagungar kanun.

⁸ Ket kunen met diya duduma nga to mammadtu nga E̍lyas kanu yan, nga nagparang manin. Ket uwed da pe̍ agkunen nga nagungar kanu met ya isa kadito mammadtu itun.

⁹ Ket kinunen ne̍ He̍rude̍s, “Pinaputulac mettin to ulu nito Juan. Nagan ngarud yan nga toley nga madamdamag ku ita?” kunen na. Ket tutu met nga gabay na ya makitbar e̍ Je̍susin.

To panangpakan ne̍ Je̍sus ka nasuruc nga lima nga ribu nga toley

¹⁰ Ket ito simoli yin dito apustule̍s nga gayat ito nakaibonan da, nipadamag da ngarud e̍ Je̍sus dito winangwangel da. Ket kalpasan na, nibulun na da, nga ig-igida ya nawe̍ ka Be̍tsayda.

¹¹ Ket ito nadamag diya toltoley ya pennan na, nawe̍ da simurut e̍ Je̍sus. Ket nabaru to kablaaw ne̍ Je̍sus igida, ket sinuruwan na da maipanggep iya panangituray ne̍ Apu Diyus, se̍ pinalaing na pe̍ diya nagpaagas.

¹² Ket ito gumidamin, imadenni dito sangapulu ket duwa nga adalan e̍ Je̍sus, ket kinunen da igina, “Nabaru no papanawem mun diya toltoley, tasun mawe̍ da kuma agsapul ka pagdagusan da se̍ kanen da kadiya kabangibang nga purpuruc se̍ pacpakarsu, ta awan met babaley idi nga away,” kunen da.

¹³ Ngem kinunen met ne̍ Je̍sus igida, “Dakayu lugud a, ya mangpakan igida,” kunen na. Ket kinunen da igina, “Uwed das lima nga bukel nga tinapay se̍ duwa nga lames dakami. Ket kurang ngarud, malacsid no mawe̍ kami ngumina ka maipakan igida nga amin,” kunen da.

¹⁴ Ta ya bilang ngas dito lalaki antuni itun, ket aglima nga ribu. Ket kinunen ne̍ Je̍sus kadito adalan na, “Pagtugawen nu diya toltoley, nga urnungen nu da ka saglilima nga pulu kada bungguy,” kunen na.

¹⁵ Ket tinungpal ngarud dito adalan, nga pinagtugew da dito toltoley.

¹⁶ Ket nimet tin ne̍ Je̍sus dito lima nga tinapay se̍ duwa nga lames. Limangad ka langit ket nagkararag nga nagyaman e̍ Apu Diyus, se̍ na pinisepisey. Ket ne̍cde̍ na kadito adalan na, tasun iwaras da kadito toltoley.

¹⁷ Ket nangan da ngarud nga amin, ket nabsug da mettin. Kalpasan na, inurnung da dito nabuna nga napisepisey, ket napnu met gayam ya sangapulu ket duwa nga lacba.

To pannakaawat ne̍ Pe̍dru maipanggep iya Kristu

¹⁸ Ket ito name̍nsan, uwed nge̍ Je̍sus se̍ dito adalan na iya isa nga lugar nga awan matagtagitoley na, ket nagkarkararag nge̍ Je̍sus antuni ito ig-igidan. Ket kinunen na igida, “Nagan na ya pangipagarupan diya toley iyaken?” kunen na.

¹⁹ Ket simungbat da nga kinunen da, “E̍ Juan nga Mammautisar ka kanu. Ngem uwed met duduma nga agkunen nga to mammadtu nga E̍lyas ka kanu. Se̍ uwed da pe̍ agkunen nga nagungar kanu ya isa kadito mammadtu itun pekkem,” kunen da.

²⁰ Ket kinunen ne̍ Je̍sus igida, “Ngem no dakayu? Nagan ku met iya panagkunen nu?” kunen na. Ket e̍ Pe̍dru to simungbat, nga kinunen na, “Ikew met ya Kristu nga nibon ne̍ Apu Diyus!” kunen na.

²¹ Ngem siiinget nge̍ Je̍sus nga nangbilin igida nga madi da kanu ibagbaga yan ka orey nagan na.

To panangipakaemmu ne̍ Je̍sus iya ipapatey na, se̍ maipanggep kadiya mayat nga sumurut igina

²² Ket kinunen pe̍ ne̍ Je̍sus igida, “Kinapudnu na, ya Anac nga Naipatoley, masapul nga aglak-am nad ka adu nga rigat. Ket guraen nad pe̍ diya panglakayen, se̍ diya pangpangulu diya agsirsirbi iya Te̍mplu, se̍ diya manursuru iya Linteg. Masapul met pe̍ nga mapatey, ket mapaungar nad mettas iya maikatlu nga algew,” kunen na.

²³ Ket kinunen na pe̍ igida nga amin, “No uwed mayat nga sumurut iyaken, masapul nga ipalikud na diya mismu nga tarigagay na, ket se̍ masapul nga anusan na nga inalgew ya arig nga panangagtu na iya krus na nga pakailansaan na, ket sumurut ngarud iyaken nin.

²⁴ Ta ya toley nga mangipangpangruna kuma iya biyag na, mapukaw nad mettas igina ya kaipapennan niya biyag na. Ngem ya mangipalikud iya panangipateg na iya biyag na gapu iyaken, maisalakan na nad ya kaipapennan niya biyag na.

²⁵ Tutu met yan, ta awan ngarud paglaingan niya isa nga toley, orey no matagikuwa na kuma diya amin nga uwed iya lubung ngi, no maukum winno mapukaw nad met.

²⁶ Tutu met nga diya toley nga mangiyalyew iyaken se̍ kadiya isursuruc, ket iyalyew nad met pe̍ niya Anac nga Naipatoley, no umbe̍t nad nga sidadayaw gapu iya mismu nga dayaw na, se̍ gapu iya panangipadayaw igina niya Ama se̍ diya nadayaw nga anghe̍le̍s.

²⁷ Ngem tutu met pe̍ nga uwed duduma dakayu idi ita, nga madi nad pekkem matey agingga nga madi da aglak-am iya panangituray ne̍ Apu Diyus,” kunen na.

To pannakaipasingen niya dayag ne̍ Je̍sus

²⁸ Ket ito makalawasin nanipud ito nangagi ne̍ Je̍sus kaditun, nibulun ne̍ Je̍sus de̍ Pe̍dru, Juan se̍ e̍ Santiyagu, ket nanang-at da ka tageytey, tasun agkararag.

²⁹ Ket ito agkarkararag nge̍ Je̍susin, nagbaliw met to langa niya rupa na. Ket to luput na, nagbalin nga makapurar nga purawin.

³⁰ Pagamwan nas nga uwed pe̍ duwa nga lalaki nga makitkitbar e̍ Je̍susin, nga itu met to Muyse̍s se̍ to E̍lyas.

³¹ Ket nadayag met pe̍ to langa da. Ket nakitkitbar da e̍ Je̍sus maipanggep iya panangtungpal na iya ipapanaw na idi nga lubung nad no dumateng enna He̍rusale̍m.

³² Ngem de̍ Pe̍dru se̍ dito kabulun na, naiplec da met nga natudug. Ket ito nalukag dan, nasingen da met ya dayag ne̍ Je̍sus, se̍ nasingen da pe̍ dito duwa nga lalaki nga nakipagsikad igina.

³³ Ket ito pumanpanawin dito duwa nga lalaki iya edyan ne̍ Je̍sus, kinunen ne̍ Pe̍dru igina, “Mistru, nabaru ya kauwed tida idi. Mangariman kami kuma ka tellu nga pagliduman: ya isa para ikew, isa para e̍ Muyse̍s, se̍ isa para e̍ E̍lyas,” kunen na. Ngem kinagi na ngas yan ta madi na emmu ya tumutup nga kagiyen na.

³⁴ Ket ito madama pekkem nga agkagkagi nge̍ Pe̍dru, uwed met ulep nga nagparang nga nangbugus igida. Ket nansing ngarud dito adalan ito nasingen da nga nagpasegged to ulep nga nangbugus igidan.

³⁵ Ket uwed pe̍ timec nga timaud ito ulep, nga kinunen na, “Itu yani ya Anac ku nga pinilic. Ipangag nu ngarud ya kagi na!” kunen na.

³⁶ Ket ito simardeng ngin to timec, nasingen dito adalan nga is-isa met nge̍ Je̍susin. Ket madi nangipadamag dito adalan maipanggep iyan nga nasingen da, nga pulus nga awan pekkem nangibagaan da iyan itun nga timpu.

To ebbing nga nalugluganan ka sairu

³⁷ Ket iya kadamlag na, ito nanagus de̍ Je̍sus manipud ito tageytey, uwed adu nga toley nga simabet e̍ Je̍sus.

³⁸ Ket itun, uwed isa nga lalaki kadito toltoley, nga nagpekkaw nga kinunen na, “Mistru, pangngaasim, ta singem kay ya anac ku nga lalaki. Kackaisu met nga anac ku yani.

³⁹ Ket nalugluganan met ka sairu. Ket pasaray kellat nga pagekkisen, se̍ pagkessiwen nito sairu, ket aglaglagotab met pe̍ ya musung na. Ket madi na gabay ya pumanaw iya ebbing, agingga nga di na pasakiten ka adu.

⁴⁰ Nipakaasic met kadiya adalan mu nga pagtalawen da kuma ya sairu, ngem di da met nabalinan,” kunen na.

⁴¹ Ket kinunen ne̍ Je̍sus, “Ay, dakayu nga toley ita nga timpu! Ape̍ nga awan panamati nu, se̍ nakillu ya panpanunut nu? Masapul kad nga mabayag pekkem ya panagedyan ku dakayu se̍ ya panaganus ku dakayu?” Ket kinunen nan ito ama nito ebbing, “Ala, e̍lbe̍t mu iyaken ya anac mu,” kunen na.

⁴² Ket ito umad-adenni pekkem to ebbing ito edyan ne̍ Je̍sus, nitucbang mettin nito sairu, ket pinagkessiw na pe̍ yin. Ngem binilin ne̍ Je̍sus to sairu nga pumanawin. Ket pinalaing na ngarud to ebbing, se̍ na niyawat e̍ ama na.

⁴³ Ket nagseddaaw ngarud diya amin nga toltoley gapu iya dackel nga kinaturay ne̍ Apu Diyus. Ket itun, sapsaputen diya amin nga toltoley dito amin nga nakaskasdaaw nga inar-ariman ne̍ Je̍sus. Ket ito agsapsaput da pekkem, kinunen ne̍ Je̍sus kadito adalan na,

Ito nipakaemmu manin ne̍ Je̍sus ya ipapatey se̍ panagungar na

⁴⁴ “Panunuten nu kuma nga nalaing yani nga ibagac dakayu: Tutu met nga maiyawat nad ngarud ya Anac nga Naipatoley kadiya toley nga mangukum igina,” kunen na.

⁴⁵ Ngem madi da met naawatan ya kaipapennan nito kinagi na, ta nalimed igida. Itu nga madi da naawatan ya banag na, ket nansing da met nga agsaludsud igina maipanggep ito kinagi na.

Kangrunaan ya kanumuwan

⁴⁶ Ket ya napasamac itun, uwed panagdidinniskutir dito adalan, no nagan igida ya kangrunaan.

⁴⁷ Ket e̍ Je̍sus, gapu ta emmu na met ya uwed iya panpanunut da, namet ka isa nga ebbing, ket pinagsikad na iya abay na.

⁴⁸ Ket kinunen ne̍ Je̍sus kadito adalan na, “Ya mangrispitar idi nga ebbing gapu iyaken, iyaken met pe̍ ya rinispitar na. Ket ya mangrispitar iyaken, ya nangibon iyaken pe̍ yin ya rinispitar na. Ta ya kanumuwan dakayu nga amin, itu nga tutu ya kangrunaan iya imatang ne̍ Apu Diyus,” kunen na.

Madi kuma maparitan diya sabali nga sumurut

⁴⁹ Ket kinunen ne̍ Juan, “Mistru, uwed nasingen mi nga isa nga lalaki nga mangpatpatalew ka sairu gapu iya panangusar na iya nagan mu. Ket nilbec mi ngarud, ta bekken tida met nga kabulun,” kunen na.

⁵⁰ Ngem kinunen ne̍ Je̍sus igina, “Madi nu nga ilbec ya agten iyan nga toley. Ta ya toley nga madi kumuntra dakayu, ket kabulun nu met,” kunen na.

Awan rispitar dito iSamarya e̍ Je̍sus

⁵¹ Ket ito dandani yin ya timpu nito ipeppen ne̍ Je̍sus ka langit, nipasnec na ya panggep na nga mawe̍ ka He̍rusale̍m.

⁵² Ket uwed da nibon na nga mawe̍ mon-ona ngem igina iya dalan. Ket nawe̍ dito naibon iya isa nga ili ka Samarya, tasun isagana da diya masapsapul de̍ Je̍sus no dumagas da iyan.

⁵³ Ngem diya toley antuni, madi da kanu gabay ya umbe̍t nge̍ Je̍sus iyan nga ili da, ta emmu da nga panggep ne̍ Je̍sus ya agpa-He̍rusale̍m.

⁵⁴ Ket dito adalan na nga de̍ Santiyagu nge̍ Juan, ito naemmuwan da yan, kinunen da met e̍ Je̍sus, “Apu, no gabay mu, adngen mi met nga maudanan da kuma ka apuy nga gayat ka langit, tasun mapukaw da ngarudin,” kunen da.

⁵⁵ Ngem limaw-ing nge̍ Je̍sus igida se̍ na da nilbec.

⁵⁶ Ket nagpatuluy ngarud de̍ Je̍sus, nga nawe̍ da ka sabali nga ili yin.

Ya rebbeng diya pasurut ne̍ Je̍sus

⁵⁷ Ket ito manmanalan da iya dalan, uwed isa nga lalaki nga nagkunen e̍ Je̍sus nga, “Sumurut tac met ikew iya orey awac nga kapennam,” kunen na.

⁵⁸ Ket kinunen ne̍ Je̍sus igina, “Utubem man yani: No diya musang, uwed pagedyanan da nga re̍kab. Ket se̍ diya sibsibud, uwed pe̍ sucbut da. Ngem ya Anac nga Naipatoley, awan met nga gennung pagedyanan na tasun uwed kustu nga pagidaan na,” kunen na.

⁵⁹ Ket kinunen manin ne̍ Je̍sus iya sabali nga lalaki, “Suruten nac.” Ket kinunen nito lalaki, “Bo Apu, ngem palubusan nac kay pekkem nga mawe̍ mangsingen iya pannakaitamen ne̍ amac,” kunen na.

⁶⁰ Ngem kinunen ne̍ Je̍sus igina, “Biyang met diya maiyarig nga natey ya makaemmu kadiya minatey da. Ngem no ikew, mawe̍ ka lugud ikasaba ya panangituray ne̍ Apu Diyus,” kunen na met.

⁶¹ Ket uwed manin sabali nga nagkunen e̍ Je̍sus, “Sumurut tac ngarud ikew, Apu. Ngem mawe̍ yac pekkem agpakada kadiya kabbalay ku,” kunen na.

⁶² Ngem kinunen ne̍ Je̍sus igina, “Ya maiyarig iya agaradu nga law-ing nga law-ing iya likud na, bekken met nga maikari iya panangituray ne̍ Apu Diyus igina,” kunen na.