Lukas 1 - Ya Baru nga Tulag

¹ Patgec nga Apu Tiyupilu, adu win diya nagisurat nga nangurnus ka istorya maipanggep kadito napasamac iya edyan mi.

² Nisurat da sigun mettas kadito naipadamag dactida, nga nibaga dito nakasingen kaditun nanipud ito damu, nga igida pe̍ diya nangikaskasaba iya kagi ne̍ Apu Diyus.

³ Ket ita, Apu Tiyupilu, nabaru kunec no isurat ku pe̍ didi nga banbanag ikew, ta inadal ku nga nalaing manipud ito pannakairugi da. Itu nga isurat ku ikew ka naurnus,

⁴ tasun maemmuwam nga nalaing ya kinapudnu maipanggep kadito amin nga naisuru win ikew.

To pannakaipakaemmu nito pannakaiyanac nito Juan nga Mammautisar

⁵ Ito panagari nito He̍rude̍s iya pagiliyan nga Hudya, uwed isa nga agsirsirbi iya Te̍mplu nga agnagan ka Sakaryas, nga isa iya bungguy ne̍ Abiyas. E̍lisabe̍t ya nagan niya asawa na, nga kapututan pe̍ nito Arun.

⁶ Ket de̍ Sakaryas nge̍ E̍lisabe̍t, nalinteg met ya panagbiyag da iya imatang ne̍ Apu Diyus. Awan ngarud nagkurangan da iya panagtungpal da kadiya sursuru se̍ bilbilin ne̍ Apu Diyus.

⁷ Ngem awan anac da, ta lupes met nge̍ E̍lisabe̍t, ket lakay se̍ bacbaket da pe̍ yin.

⁸ Ket ito isa nga algew, agsirsirbi nge̍ Sakaryas e̍ Apu Diyus iya Te̍mplu, ta nadatngan ya batang niya bungguy na nga agsirbi iya Te̍mplu win.

⁹ Ket ugali diya agsirsirbi ya agpipinnabunut no nagan igida ya umuneg iya Te̍mplu niya Apu tasun mangpoor ka nabangug nga pagdatun. Ket napagasatan met nge̍ Sakaryas.

¹⁰ Ket ito madama na nga pocpooran ya nabangug nga pagdatun iya uneg niya Te̍mplu, agkarkararag met diya adu nga toltoley iya ruwar.

¹¹ Ket itun, uwed met isa nga anghe̍l niya Apu nga nagpasingen e̍ Sakaryas. Nagsikad yan nga anghe̍l iya madiwanan niya pakapocpooran niya nabangug.

¹² Ket e̍ Sakaryas, nasikuran ito nasingen na, ket mansing ngarud pe̍ yin.

¹³ Ngem kinunen nito anghe̍l igina, “Madi ka mansing, Sakaryas. Nipangag ne̍ Apu Diyus ya kararag mun. Itu nga aganac nad ngarud ya asawam nga E̍lisabe̍t ka anac nu nga lalaki. Ket panaganam nad ka Juan.

¹⁴ Anggem se̍ ragsac ya uwed nad ikew win, ket adu nad pe̍ diya duduma nga agragsac no maiyanac nad yan nga anac nu.

¹⁵ Ta yan nga anac nu, napateg nad iya imatang niya Apu. Ket masapul nga madi nad uminum ka basi winno orey nagan na nga makapae̍nglew. Ket manipud iya pannakaiyanac na, maturayan nad iya Ispiritu Santu.

¹⁶ Adu nad kadiya Israe̍lita ya pasoliyen na iya panamati da iya Apu nga Diyus da.

¹⁷ “Ket mon-ona nad nga maibon ya anac nu ngem iya Apu, ket maidalan nad iya pannakabalin niya Ispiritu ne̍ Apu Diyus, nga agten ito pannakabalin nga uwed ito mammadtu nga E̍lyas itun. Pagtutunusen nad niya anac nu diya am-ama se̍ diya an-anac. Palinteggen na nad diya nasukir ya panpanunut da, ka panunut nga nalinteg. Ket iya agten iyan, paisagana nad niya anac nu diya toltoley, tasun uwed da nga nakasagana iya umbe̍tan niya Apu,” kunen nito anghe̍l.

¹⁸ Ket kinunen ne̍ Sakaryas ito anghe̍l, “Kumaan ngarud niya pannakaemmuc nga matungpal nga tutu yan? Ta lakay yac kun, se̍ bacbaket met pe̍ yin ya asawac,” kunen na.

¹⁹ Ket kinunen nito anghe̍l, “Iyaken nge̍ Gabriye̍l nga agsirsirbi iya imatang ne̍ Apu Diyus. Naibon nac met tasun makitbar rac ikew, nga ibagac ikew yani nga damag nga makaparagsac.

²⁰ Ngem ita, gapu ta di ka met namati ito nibagac ikew, maumel ka met, nga madi ka makakagi yin, agingga nga di pekkem mapasamac yan nga nibagac. Ket matungpal nad ngarud met no timpu na,” kunen na.

²¹ Ket dito toltoley iya ruwar niya Te̍mplu nga ag-agton e̍ Sakaryas, nasdaawan da mettin gapu ta nabayag nga unay iya uneg nito pagdayawanin.

²² Ket ito rinumwarin, madi met makakagi igidan, ket itu ya nakaemmuwan da nga uwed nagpasingen igina iya uneg niya Te̍mplu. Ket sininyasan na da ngas, ta naumel met nga tutu win.

²³ Ito nalpasin ya timpu nga panagsirbi ne̍ Sakaryas iya Te̍mplu, nagawirin.

²⁴ Ket iya di nabayag, nanginaw ngarudin nge̍ E̍lisabe̍t nga asawa na. Ket lima nga bulan nga madi nagpaspasingen nge̍ E̍lisabe̍tin.

²⁵ Ket kinunen ne̍ E̍lisabe̍t, “Ya Apu met ya nangtulung iyaken. Ta nipac na met itan ya pakaiyal-alyewwac kadiya toley,” kunen na.

To pannakaipakaemmu nito pannakaiyanac ne̍ Je̍sus

²⁶ Ket ito maikanem nga bulan niya bucsit ne̍ E̍lisabe̍t, nibon manin ne̍ Apu Diyus to anghe̍l nga Gabriye̍l, nga mawe̍ enna Nasare̍t nga isa nga ili ka prubinsiya nga Galilya.

²⁷ Naibon nge̍ Gabriye̍l iya isa nga di pekkem nase̍cde̍ng nga balasang, nga naitulag nga maiyasawa. Huse̍ ya nagan nito lalaki nga nakaitulagan na, ket kapututan nito Ari Dabid. Ya nagan nito balasang, ket Marya.

²⁸ Ket to anghe̍l, inumbe̍t iya edyan ne̍ Marya, nga kinunen na igina, “Agragsac ka ngarud, ta magustuwan naka nga unay ya Apu, ket uwed met ya Apu ikew,” kunen na.

²⁹ Ket nasicsikuran met nga unay nge̍ Marya iya kablaaw nito anghe̍l, ket pinanpanunut na ngarudin no nagan ngata ya kaipapennan na.

³⁰ Ket kinunen nito anghe̍l igina, “Madi ka mansing, Marya, ta magustuwan naka nge̍ Apu Diyus.

³¹ Ket manginaw ka nad, ket isa nga lalaki nad no maiyanac mu, ket panaganam nad ka Je̍sus.

³² Maipatpateg nad ngarud, ket maawagan nad ka Anac niya Kangatuwan. Pagbalinen nad ne̍ Apu Diyus nga agari nga agten mettas ito panagari nito Ari Dabid nga am-ama na.

³³ Ket agituray nad met kadiya kapututan nito Hakub ka agnanayun, ket ya panagari na, awan met patingga na,” kunen na.

³⁴ Ket e̍ Marya, kinunen na ito anghe̍l, “Kumaan na nga mapasamac yan? Ta awan met pekkem pannakitipun ku ka lalaki,” kunen na.

³⁵ Ket kinunen nito anghe̍l igina, “Umbe̍t met ikew ya Ispiritu Santu, ket uwed nad met ikew ya pannakabalin niya Kangatuwan. Itu nga ya iyanac mu nad nga awan basul na, ket maawagan ka Anac ne̍ Apu Diyus.

³⁶ “Ket malagip mu pe̍ nge̍ kabagiyam nga E̍lisabe̍t nga kunen da itun nga lupes. Ket ita, mabucsit mettin, orey no bacbaket nga unayin, ket lalaki met ya bucsit na. Ennem nga bulan niya bucsit nan.

³⁷ Ta awan met madi kabaellan ne̍ Apu Diyus nga wanglen,” kunen na.

³⁸ Ket kinunen ne̍ Marya ngin, “Nakasagana ngac nga agsirbi iya Apu. Matungpal kuma ngarud iyaken nin sigun ito kinagim,” kunen na. Ket pinanawanin nito anghe̍l.

To panangsacwar ne̍ Marya e̍ E̍lisabe̍t

³⁹ Ket ito di nabayag, nagbulay nge̍ Marya, ket dagus nga nawe̍ iya isa nga ili kadiya tagtageytey enna prubinsiya nga Hudya.

⁴⁰ Nawe̍ iya baley de̍ Sakaryas. Ket ito linumnec kin, kinablaawan na nge̍ E̍lisabe̍t.

⁴¹ Ket ito nagicna ne̍ E̍lisabe̍t to kablaaw ne̍ Marya, kimiwa mettin ya ke̍bit iya bessug na. Ket e̍ E̍lisabe̍t, naidalanin iya Ispiritu Santu,

⁴² ket nipkaw na ka nabileg nga kinunen na, “Dacdackel met ya dayaw nga nipaay ne̍ Apu Diyus ikew ngem kadiya amin nga duduma nga babey, se̍ dackel ngarud pe̍ ya dayaw niya iyanac mu nad mettas!

⁴³ Madi yac met maikari nga umbe̍t mu sacwaran, ikew nga ina niya Apuc!

⁴⁴ Tutu met, ta apaman nga nagicnac to kablaaw mu, ket kimiwa mettin ya ke̍bit iya bessug ku wi gapu iya ragsac na.

⁴⁵ Nagasat ka ngarud pe̍, ta pinatim met nga matungpal nga tutu to naibaga ikew nga gayat iya Apu,” kunen na.

To panagdayaw ne̍ Marya e̍ Apu Diyus

⁴⁶ Ket idi met to kinunen ne̍ Marya ngin: “Tumaud met iya nakem ku ya panagdayaw kun iya Apu.

⁴⁷ Se̍ orey ya kararuwac, patauden na met ya panagragsac ku iya Diyus ku nga Mangisalakan iyaken.

⁴⁸ Ta nibilang nac nga napateg, iyaken nga nanumu nga agsirsirbi igina. Ket tutu met nga manipud ita, awagan dac diya amin nga toley ka nagasat,

⁴⁹ gapu kadiya nakaskasdaaw nga inariman ne̍ Apu Diyus nga Mannakabalin iyaken. Ket madaydayaw ngarud met ya napudnu nga turay na.

⁵⁰ Kadiya agsasarunu nga timpu, pe̍yeng met nga kaasiyan na diya agdayaw igina.

⁵¹ Nipasingen na met ya pannakabalin niya turay na, ta niwarawara na diya toley nga agtangsit gapu kadiya ranranta da.

⁵² Nipababa pe̍ ne̍ Apu Diyus ya saad diya agtuturay. Ket no diya toley nga napakumbaba nga gennung, itu didi diya nipangatu na ya kasasaad da.

⁵³ Diya nakurkurangan itun, napnec dan gapu kadiya nabaru nga nipaay na igida. Ngem diya babacnang nga gennung, pinagawir na da nga awan naipaay igida.

^54-55 Ket tinungpal na ngarudin to kari na kadito am-ama tida, ta kinaasiyan nactida nga Israe̍lita nga eb-ebbonen na. Ngarud, nalagip na nga tulungan to Abraham itun, se̍ diya amin nga kapututan na ka awan patingga na,” kunen ne̍ Marya nga sidadayaw.

⁵⁶ Ket itun, agtellu nga bulan nga nakipagedyan nge̍ Marya kade̍ E̍lisabe̍t, se̍ nagawir.

To pannakaiyanac nito Juan nga Mammautisar

⁵⁷ Ket itun, nadatngan ya panaganac ne̍ E̍lisabe̍tin. Ket isa nga lalaki met ya niyanac na.

⁵⁸ Nakipagragsac igina diya karruba na se̍ diya kakabagiyan na ito nadamag da yan nga nakaskasdaaw nga nikaasi ne̍ Apu Diyus igina.

⁵⁹ Ket ito walu nga algew win nito ke̍bit, inumbe̍t diyan tasun makibulun da ito pannakakugit nito ebbing, sigun iya ugali da nga Hudyu. Ket gabay da nga panaganan kuma ka Sakaryas, ta itu met ya nagan niya ama na.

⁶⁰ Ngem kinunen ne̍ E̍lisabe̍t nga ina na, “Bekken! Juan ya mainagan igina,” kunen na.

⁶¹ Ket kinunen da met e̍ E̍lisabe̍t, “Ngem awan met kabagiyam nga agten iyan ya nagan na,” kunen da.

⁶² Ket sininyasan da nge̍ Sakaryas nga ama nito ke̍bit, tasun emmuwen da no nagan na ya gabay na kuma nga ipanagan ito ke̍bit.

⁶³ Ket nagadeng nge̍ Sakaryas ka pagsuratan, ket agten idi to nisurat na: “Juan ya nagan na.” Ket iya agten iyan, nasdaaw da nga aminin.

⁶⁴ Ket iyan mettas nga kanitu, nalaingan met to kinaumel ne̍ Sakaryasin. Ket makakagi ngarudin, nga nidaydayaw na ngarud nge̍ Apu Diyusin.

⁶⁵ Nasdaaw ngarud diya amin nga karruba da, ket nagwaras met ya damag maipanggep ka amin didi kadiya amin nga luglugar kadiya tagtageytey ka Hudya.

⁶⁶ Ket diya amin nga nakadamag kadidi, sinalimetmettan da ngarud didi, nga kinunen da iya panagtetebbar da, “Nagan nad ngata ya pagbalinan niyan nga ebbing?” kunen da. Ta nabatad ngamin nga uwed igina ya pannakabalin niya Apu.

To padtu nito Sakaryas

⁶⁷ Ket e̍ Sakaryas nga ama ne̍ Juan, naidalan iya Ispiritu Santu itun, ket nagipadtu nga kinunen na,

⁶⁸ “Madaydayaw kuma ngarud ya Apu nga Diyus diya iIsrae̍l, ta sinacwaran nactida nga toley na, nga inumbe̍t nactida sinubbut.

⁶⁹ Ne̍cdan nactida ka nabileg nga Mangisalakan dactida, nga nagtaud iya kapututan nito Ari Dabid nga eb-ebbonen ne̍ Apu Diyus itun.

⁷⁰ Itu to nipaipadtu ne̍ Apu Diyus itun pekkem kadito mammadtu nga pinili na,

⁷¹ nga kinunen da, nga nikari kanu ne̍ Apu Diyus nga isalakan nactida kadiya mangkuntra dactida, se̍ isalakan nactida pe̍ iya kabaellan diya amin nga manggura dactida.

⁷² Tinungpal na yan tasun kaasiyan nactida kuma, sigun ito nikari na kadito am-ama tida, se̍ tasun tungpalen na ngarudin to nadayaw nga kari na igida.

⁷³ Itu yan to kari na nga nisapata na ito Abraham nga ama tida.

⁷⁴ Nikari na ngarud nga isalakan nactida kadiya mangkuntra dactida, tasun mabalin tida ya agsirbi igina nga awan kuma ansing tida,

⁷⁵ se̍ tasun napudnu se̍ nalinteg iya imatang na ya panagsirsirbi tida bayat niya panagbiyag tida pekkem.

⁷⁶ Ket ikew, anac ku, maawagan ka nad ka mammadtu nga agpaay iya Kangatuwan. Ta mon-ona ka nad ngem iya Apu, tasun isaganam diya toltoley iya umbe̍t na,

⁷⁷ se̍ tasun ipakaemmum kadiya toley ne̍ Apu Diyus ya maipanggep iya panangisalakan na igida. Itu mettin ya pannakapakawan diya basbasul da,

⁷⁸ gapu mettas iya siaanus nga panangngaasi ne̍ Apu Diyus. Ket itu nga umbe̍t nad ngarud dactida ya mangisalakan nga aggayat ka langit, nga arig nga malawaan tidan,

⁷⁹ tasun mawadaan tidan, dactida nga arig nga agtugtugew iya gicbet, nga sidadanag iya umbe̍t nga pakatayan tida. Ket yan nga wada, itu win ya mangiturung dactida iya pagtalnaan tida,” kunen nito Sakaryas.

⁸⁰ Ket to ebbing nga Juan, dimackel se̍ numacnakem pe̍ yin itun. Ket nawe̍ met to Juan nga nagedyan ka away, agingga iya panangirugi na iya gagara na nga silalatac kadiya iIsrae̍l.