Kulusas 4 - Ya Baru nga Tulag

¹ Ket dakayu nga amu diya tagabu, ipaay nu was ya nalinteg se̍ rumbeng kadiya tagabu nu. Ta laglagipen nu kuma nga uwed met pe̍ Apu nu, nga uwed ka langit.

Dito duduma nga pamagbaga ne̍ Pablu kadito iKulusas

² Ket no maipanggep iya panagkararag, puminget kayu kuma nga sipapasnec se̍ siiiyaman nga pe̍yeng.

³ Ket ikarkararagan dakami kay pe̍, tasun e̍cdan nakami nge̍ Apu Diyus ka gundaway iya panangipakaemmu mi iya kagi na. Ta maikasaba mi kuma ya panggep na maipanggep e̍ Kristu, nga madi pekkem naipakaemmu itun. Ket itu pe̍ yan ya gapu na nga uwed dac nga sibabaludin.

⁴ Ikarkararag nu kuma ngarud nga mailawlawag ku kuma nga nalaing yani nga ikasabac, sigun iya rebbeng niya saad ku.

⁵ Ket no maipanggep iya panagbiyag nu iya imatang diya madi pekkem mamati, ket nasirib kayu kuma, nga usaren nu ngarud ka nabaru diya amin nga gundaway nu igida.

⁶ No makitbar kayu igida, naalumamay kuma nga pe̍yeng ya panagkagi nu, nga arig nga sida nga naasinan, tasun makapaawis kuma igida. Ta no agten iyan, sisasagana kayu ngarud ka kustu nga isungbat nu kadiya orey nagan na nga agsaludsud dakayu.

To pakumusta de̍ Pablu

⁷ Ket e̍ Tikiku ya mangipadamag nad dakayu iya amin maipanggep iya kasasaad ku wi. Igina ya isa nga patpatgec nga kabsat, se̍ managtulung ka toley, se̍ kabulun ku nga agsirsirbi iya Apu.

⁸ Itu nga ibon ku ngarud iyan nga edyan nu, tasun maemmuwan nu kuma ya kasasaad mi, se̍ tasun pabilgen na ya panpanunut nu.

⁹ Ket kabulun na pe̍ nga mawe̍ iyan nge̍ Une̍simu, nga isa met pe̍ nga managtungpal, se̍ patpatgen tida nga kabsat, se̍ kailiyan nu mettas. Ket igida nad diya mangipadamag dakayu kadiya amin nga mapaspasamac idi.

¹⁰ Ket makikumusta pe̍ kanu dakayu nge̍ Aristarku nga padac nga balud idi, se̍ e̍ Markus nga kapinsan nito Be̍rnabe̍. Ket no dumateng nge̍ Markus iyan, laglagipen nu nga barbaruwen ya kablaaw nu igina, maikanatad mettas ito nibagac dakayu itun nga wanglen nu kuma no makadateng iya edyan nu.

¹¹ Ket kumusta nu kanu pe̍, kunen ne̍ Je̍sus, nga managan pe̍ ka Hustu. Ket malacsid kadidi nga tellu, awan duduma kadito padac nga Hudyu nga mamati nga makibulubulun iyaken idi nin iya panangipakaemmuc maipanggep iya panangituray ne̍ Apu Diyus. Ket didi nga tellu, pakaragsakac da ngarud met.

¹² Ket e̍ E̍papras met pe̍, nga isa mettas dakayu, nga isa nga agsirsirbi e̍ Kristu Je̍sus, ket makikumusta kanu pe̍ dakayu. Ket pe̍yeng nga sipapasnec nga mangikarkararag dakayu e̍ Apu Diyus. Ta gabay na met no nabaked kuma ya panamati nu, se̍ awan nga pulus duwaduwa nu maipanggep iya orey nagan na nga tarigagayan ne̍ Apu Diyus dakayu.

¹³ Ket iyaken mettas ya makapanecnec iya panaggaget na nga maipaay dakayu, se̍ para kadiya toley enna Lawdisiya, se̍ ka Hiye̍rapulis.

¹⁴ Ket pakumustaan nakayu pe̍ nge̍ Lukas nga patpatgen tida nga duktur, se̍ e̍ De̍mas.

¹⁵ Ipakumusta dac kay pe̍ kadiya kakabsat enna Lawdisiya, se̍ e̍ Nimpas pe̍, se̍ diya mamati nga aggigimung iya baley na.

¹⁶ Ket no nabasa nu yani nga suratin, ipakagtu nu kay pe̍ kadiya mamati enna Lawdisiya, ta paibasa nu kay pe̍ igida. Ket no dakayu, paalac nu kuma pe̍ to isa nga surat ku nga nipakagtuc igida ka Lawdisiya, tasun maibasa pe̍ dakayu.

¹⁷ Ket no e̍ Arkipu, idi kuma ya ibaga nu igina: “Tungpalem kuma ngarud ya rebbeng nga naitalec ikew maigapu iya panagsirbim iya Apu,” kunen nu.

¹⁸ Ket iyaken mettas nga Pablu ya nangisurat idi nga nod-odi, nga itu ya pakumustac dakayu. Ikararagan dac kay iya pannakaibalud ku wi. Ket uwed kuma dakayu ya siaayat nga asi ne̍ Apu Diyus.