Kulusas 3 - Ya Baru nga Tulag

¹ Ket dakayu, naibilang kayun nga kabulun ne̍ Kristu ito pannakapagungar na. Itu nga diya ipatpateg nu kuma ngin, ket diyan nas banbanag nga agtaud ka langit. Itu mettas ya edyan ne̍ Kristu nga naipatugew win iya kadayawan nga saad, nga itu ya madiwanan ne̍ Apu Diyus.

² Ket diya banbanag nga agtaud ka langit, itu kuma ya pe̍yeng nu nga laglagipen nin, nga bekken kuma nga diya agtaud das iya lubung ngi.

³ Ta naibilang kayu nga natey yin maipanggep kadiya banbanag idi nga lubung. Ket ya kabarbaru nga biyag nu, arig nga naitalipen mettin e̍ Apu Diyus, gapu iya pannakaibulun nu e̍ Kristu.

⁴ Ket nad no agparang manin nge̍ Kristu nga pagtaudan mettas nidi nga biyag nu, ket maiparangarang kayu nad pe̍ iginan, nga itu nad ya pannakairaman nu iya pakaidayawan nan.

Ya kabarbaru nga ugali diya mamati

⁵ Dikad pe̍ isardeng nu ngarudin diya dake̍c nga tarigagay nga agtaud das iya lubung. Itu ya arig nga patayen nu diya amin nga nailubungan nga ganggangey nun, nga agten iya pannakikamalala, se̍ diya naalas nga panpanunut, se̍ diya nakal-alyew nga tarigagay se̍ ricricna niya beggi, se̍ ya panagagum pe̍. Ta ya aguman toley, ket agbalin nga arig nga diyus da nga daydayawen da.

⁶ Pakaungtan ngarud ne̍ Apu Diyus diya agten kadiyan nga dake̍c.

⁷ Ket no dakayu, agten met kadiyan ya winangwangel nu pe̍ itun, ito paiturayan kayu pekkem kadiya agten kadiyan nga tarigagay nu.

⁸ Ngem itan, ipac nu kuma ngarud diya amin nga dake̍c, nga agten kadiya gura, se̍ unget, se̍ ya panangpasakit ka nakem niya pada nu nga toley, se̍ ya panangibaga ka dake̍c maipanggep iya kapada nu, se̍ ya panangibalikas ka naalas.

⁹ Ket madi kayu pe̍ agbibinnusid, ta lagipen nu kuma nga binaybay-an nun to sigud nga gangey niya kinatoley nu, agraman diya dake̍c nga pagbanagan na.

¹⁰ Ket nisaad nu met itan ya kabarbaru nga gangey nun. Ket idi nga kabarbaru nga gangey nu, pe̍yeng nga mapabpabaru, gapu iya naadal nu maipanggep iya gangey ne̍ Apu Diyus, nga igina met ya pagtaudan na.

¹¹ Ket diya toley nga uwed igida yani nga kabarbaru nga gangey, awan pulus maibilang nga pagdudumaan niya kinatoley dan, orey bekken nga Hudyu man winno Hudyu, orey nakugit man winno diya madi agtungpal iyan nga ugali, agten pe̍ kadiya di pekkem makaemmu iya ugali Griye̍gu, se̍ diya taga-Sitya nga awan adal da. Ngarud, awan met pagdudumaan diya toley yin, orey tagabu man winno siwayawaya nga toley, ta e̍ Kristu met ya ibilang tida nga kangrunaanin, se̍ igina met ya katurayan ka amin.

¹² Ket dakayu diya pinili ne̍ Apu Diyus, ket ibilang nakayu nga awan basbasul nun, se̍ patpatgen nakayu pe̍. Itu nga isaad nu kuma ngarudin iya beggi nu ya gangey nga naasi, naalumamay, napakumbaba, nasingpet se̍ naanus.

¹³ Agpipinnase̍nsiya se̍ agpipinnakawan kayu kuma, no uwed mangumsi dakayu. Ket pakawanen nu ngarud diya kapada nu, agten mettas ito panangpakawan niya Apu dakayu.

¹⁴ Ket ya kangrunaan ka amin didi nga saad nu, itu ya panagiinnayat nu. Ta itu yani ya mangpatunus kadiya amin, tasun awan pulus pagkurangan niya panagbubulun nu.

¹⁵ Ket ya talna nga tumaud e̍ Kristu, itu kuma ngarud ya ipateg nu nga pamaayen nu. Ta sangkabungguy kayu nga pinili ne̍ Apu Diyus nga pakaipaayan niyan nga talna. Ket siiiyaman kayu kuma ngarud nga pe̍yeng.

¹⁶ Ket diya sursuru nga nagtaud e̍ Kristu, itu kuma ya pe̍yeng nu nga laglagipen iya panagsisinnuru se̍ panagbibinnalakad nu maikanatad iya sirib nga e̍cde̍ ne̍ Apu Diyus. Ket iya agten iyan pe̍, agkankanta kayu kuma, nga agiiyaman kayu kuma nga siaayat e̍ Apu Diyus. Ta agkankanta kayu ngarud kadiya dandaniw nga uwed ayug da, se̍ kadiya kankanta nga pagdayaw e̍ Apu Diyus, se̍ iyayug nu kuma pe̍ diya duduma nga panagdayaw nu.

¹⁷ Ngarud, sipapati kayu kuma ngas e̍ Apu Je̍sus iya orey nagan na nga ar-arimanen nu, orey kadiya kagkagiyen winno wangwanglen nu. Ket sigun iya kinaturay ne̍ Apu Je̍sus, agyaman kayu kuma ngarud e̍ Apu Diyus nga Ama.

Ya pagrebngan diya agkokobung nga mamati

¹⁸ Dakayu nga babey nga uwed asawa na, paiturayan kayu kadiya asawa nu, ta tumutup yan iya pammati nu iya Apu.

¹⁹ Ket dakayu nga lalaki nga uwed asawa na, ipatpateg nu diya asawa nu, ket madi nu da damsakan.

²⁰ Ket dakayu nga an-anac, managtungpal kayu kadiya naganac dakayu iya orey nagan na, ta itu ya makaay-ayu e̍ Apu Diyus.

²¹ Ket dakayu nga am-ama, madi kayu pasakitan ya nakem diya anac nu gapu iya pe̍yeng nu nga panangdellaw igida, ta kaynun no makumsa da.

²² Ket dakayu nga tagabu, managtungpal kayu kadiya amu nu idi nga lubung iya orey nagan na nga ipawangel da dakayu. Ket ya panagtungpal nu, bekken nas nga no sisingen dakayu, tasun maay-ayu nu da, no di lugud sipupudnu kayu kuma ngas, gapu iya panangipateg nu iya Apu.

²³ Ket orey nagan na ya wanglen nu, ipasnec nu kuma nga arig nga maipaay mettas iya Apu, bekken nas nga maipaay ka toley.

²⁴ Ta ya Apu, igina met ya manggun-guna nad dakayu ka maipatawid dakayu. Ngarud, e̍ Apu Kristu met ya pudpudnu nga pagsirsirbiyan nu.

²⁵ Ket no dake̍c nga gennung ya wanglen niya orey nagan na, ket masupapakan ngarud met, ta awan met idumduma ne̍ Apu Diyus iya pananglinteg na.