Kulusas 2 - Ya Baru nga Tulag

¹ Ket dakayu nga mamati iyan Kulusas, gabay ku nga maemmuwan nu kuma ya panangipakat ku iya panangikarkararag ku dakayu, se̍ para kadiya iLawdisiya pe̍, se̍ orey para kadiya duduma pe̍ nga di pekkem nakasingen iyaken.

² Agten iyan ngarud ya panangipakat ku dakayu, tasun bumileg kuma ya panpanunut nu nga amin, nga agbalin kuma nga is-isa diya panpanunut nu gapu iya panagiinnayat nu, ket se̍ tasun pakaragsakan nu kuma pe̍ ya pannakaawat nu nga awan pagkurangan na maipanggep iya pudnu. Ket iya agten iyan, maemmuwan nu ngarudin ya panggep ne̍ Apu Diyus maipanggep e̍ Kristu, nga madi pekkem naipakaemmu itun.

³ Igina ngas met ya makaipakaawat dakayu iya amin mettas nga kinasirib se̍ pannakaawat ne̍ Apu Diyus.

⁴ Kunec ngarud dakayu yan, ta madic gabay no uwed makaallilaw dakayu ka napaw-is nga kagi nga mangos-osog dakayu.

⁵ Ta orey deyyu wac dakayu, silalagip pac latta nga kanayun dakayu. Ket naragsakac ngarud met, gapu ta naemmuwac nga is-isa kayu ka panpanunut, se̍ nabaked pe̍ ya panamati nu e̍ Kristu.

Awan pagkurkurangan diya umapu e̍ Kristu

⁶ Ket gapu ta makiapu kayu e̍ Kristu Je̍susin, makitipun kayu kuma ngarud pe̍ igina iya panagbiyag nun.

⁷ Masapul ngarud nga agbalin nga arig nga nauneg nga gamut niya kayu ya namnama nu, nga bumilbileg kuma ya panpanunut nu e̍ Kristu, se̍ bumacbaked kuma ya panamati nu kadito naisuru dakayu itun, ket se̍ siiiyaman kayu kuma nga pe̍yeng.

⁸ Agannad kayu ngarud, ta kaynun no macna kayu iya panagpilusupu diya mangallilaw kuma dakayu kadiya busid nga sursuru nga awan sirsirbi na. Bekken nga gayat e̍ Kristu ya sursuru da, no di lugud patauden da ngas kadiya ug-ugali toley, sigun mettas kadiya sursuru nga tumaud das idi nga lubung.

⁹ Ngem ya kinapudnu na, ket ito panagbiyag ne̍ Kristu nga nagpaitoley, uwed mettas igina amin nga kinaDiyus ne̍ Apu Diyus.

¹⁰ Ket dakayu, gapu iya pannakaitipun nu e̍ Kristu win, naan-anay kayu ngarud itan. Ket e̍ Kristu met ya nangatngatu ngem kadiya amin nga turay se̍ diya amin nga pannakabalin diya madi masingen.

¹¹ Ket gapu mettas iya pannakaitipun nu e̍ Kristu win, nagbalin kayu met nga arig nga pudnu nga nakugit nga Hudyu win. Ta orey bekken kayu nga Hudyu, uwed met arig nga pannakakugit nun. Ket bekken nga inariman niya toley yani, ta itu ya pannakaipac diya tarigagay niya sibabasul nga kinatoley nu. Ta gapu iya pannakaitipun nu e̍ Kristu win, madi kayu nga paiturayanin iya panpanunut nga tumaud ngas iya kinatoley nun.

¹² Ket itu ngarud ya kaipapennan niya panagbautisar nu, ta naibilang kayu nga kabulun ne̍ Kristu ito pannakaitamen na. Ket pakaiyarigan na pe̍ ya pannakaibulun nu ito pannakapaungar na, gapu mettas iya panamati nu ito inariman ne̍ Apu Diyus, ta igina met ya nangpaungar e̍ Kristu.

¹³ Ket dakayu itun, naibilang kayu nga arig ngas nga isa nga natey iya imatang ne̍ Apu Diyus. Ta naisina kayu igina gapu ito panagbasbasul nu, se̍ gapu met pe̍ ta bekken nakayu nga toley nga nakugit itun. Ngem itan, orey dakayu mettas, pinagbiyag nakayun, nga ibilang nakayu itan nga kabulun ne̍ Kristu nga napaungar itun, ta pinakawan ne̍ Apu Diyus amin diya basbasul tidan.

¹⁴ Arig met nga inudas nan to nailista nga utang tida igina, nga itu dito masapul nga tungpalen tida nga al-alagaden nito Linteg, ket madi tida da ngarud nga kabaellan. Ket nipac ngarud ne̍ Apu Diyus to listaan utang tidan, nga arig met nga nisangailansa e̍ Kristu ito krus na itun.

¹⁵ Ket itu pe̍ to panangipac ne̍ Apu Diyus iya turay se̍ pannakabalin diya di mas-asingen. Ket e̍ Apu Diyus nga sibaballaigi, nipasingen na met pe̍ itun nga silalatac ya panangabac ne̍ Kristu igida.

¹⁶ Dikad pe̍ ita, madi kayu ngarud paiturayan kadiya toley nga mangpilit dakayu ka bilbilin maipanggep kadiya mabalin winno maiparit kanu nga kanen se̍ inumen nu. Uwed da pe̍ ipapilit da nga bilbilin maipanggep kadiya ipangilin da dakayu, nga agten kadito dinagun nga padaya da, se̍ to ngilin da iya binulan nga panaglenned niya bulan, se̍ to Algew Ngilin da nga kada Sabadu.

¹⁷ Ket amin diya agten iyan nga tungtungpalen da, arig da ngas nga niniwing, ta bekken nga diyan ya tutu, no di yas kaasping niya sumarunu. Ket amin diyan, pangngarig da ngas maipanggep e̍ Kristu, nga igina mettas ya nakatungpalan da.

¹⁸ Itu nga madi kayu lugud paiturayan kadiya mangallilaw dakayu, orey nagan na nga toley nga mangipapilit kuma dakayu iya ugali da. Ipapilit da ya ugali da nga mangiparit iya beggi kadiya kalinteggan toley. Se̍ ipapilit pe̍ diya agten iyan nga toley ya ugali da nga agdaydayaw kadiya anghe̍le̍s. Ta diya mangisursuru iya agten kadiyan, mayat da nga mangipaspasindayaw kadiya ipakaemmu kanu diya nailangitan igida. Ngem awan met banag nga tutu niya panangipaspasindayaw da, ta timaud das met kadiya nailubungan nga panpanunut da.

¹⁹ Diya agten iyan nga toley, madi da met ipatpateg nge̍ Kristu win, orey igina mettas ya pannakaulu tida nga mamati, nga arig nga ulu niya beggi, ta tumaud met igina ya bileg tida nga amin. Ket iya agten iyan, agis-isa tida. Arig tida nga beggi nga masilpu diya parte̍ na gapu kadiya um-um-um se̍ ug-ugat na nga mamagkamang. Ket pabilgen met ne̍ Apu Diyus ya panamati tida, dactida nga bungguy na, nga arig mettas nga beggi nga mapadackel.

Ya pannakairaman tida ito pannakatey ne̍ Kristu

²⁰ Ket gapu ta naibilang kayu nga kabulun ne̍ Kristu ito pannakatey na, nawayawayaan kayun kadiya sursuru nga agtaud das idi nga lubung. No agten iyan, ape̍ ngarud nga tultuladen nu pekkem diya ug-ugali nga nagtaud das idi nga lubung? Ape̍ agtungtungpal kayu pekkem kadiya bilbilin diya agten kadiyan nga ug-ugali maipanggep kadiya maiparit kanu dakayu?

²¹ Ta uwed met bilbilin da maipanggep kadiya maiparit kanu nga maicman, se̍ diya maiparit nga makan, se̍ diya maiparit kanu nga mase̍cde̍ng.

²² Awan met mamaay didi nga kankanyew, ta maipanggep ngas kadiya banbanag nga aggibus ngas ya sirbi da, no maamin dan. Ngem ape̍ ngarud nga tungtungpalen nu pekkem diyan? Ta nagtaud da ngas kadiya bilbilin se̍ panursuru toley.

²³ Pakasikapan tida ngarud diyan nga tungtungpalen, ta arig da nga tutu nga tumaud ka nabaru nga kinasirib. Ta diyan nga tungtungpalen, maipanggep iya sigagaed nga panagdayaw kadiya nailangitan, se̍ maipanggep iya pananglikud kadiya kalinteggan tida, se̍ maipanggep pe̍ iya panangipaidam kadiya kasapulan niya beggi. Ngem diya agten kadiyan, awan met pateg da, ta awan itulung da nga mangtimbeng kadiya dake̍c nga ricna niya beggi.