Kulusas 1 - Ya Baru nga Tulag

¹ Iyaken nge̍ Pablu nga pinagbalin ne̍ Apu Diyus nga isa nga apustul nga agpaay e̍ Kristu Je̍sus. Ket iyaken ya akin-surat idi nga surat, se̍ gayat pe̍ e̍ Timutyu nga kabsat tida.

² Isurat mi yani dakayu nga toley ne̍ Apu Diyus iyan Kulusas nga sipapati nga kakabsat mi e̍ Kristu. Sapay kuma ta uwed dakayu ya siaayat nga asi se̍ talna nga gayat e̍ Apu Diyus nga Ama tida.

To panagyaman de̍ Pablu gapu kadito iKulusas

³ No mangikararag kami para dakayu, siiiyaman kami nga pe̍yeng e̍ Apu Diyus nga Ama niya Apu tida nga Je̍su Kristu.

⁴ Siiiyaman kami ngarud, gapu ta nadamag mi ya panamati nu e̍ Kristu Je̍sus, se̍ ya ayat nu pe̍ kadiya amin nga toley ne̍ Apu Diyus.

⁵ Ket idi nga panamati nu se̍ panagayat nu, maitutup met iya namnamaen nu, nga itu ya namnama nga naisagana para dakayu ka langit. Nadamag nu ya maipanggep iyan nga namnama ito naipakaemmu dakayu ya kinapudnu itun, nga itu mettas ya Makaparagsac nga Damag.

⁶ Ket idi mettas nga Makaparagsac nga Damag nga naipakaemmu win dakayu, pe̍yeng nga agbanag ka nabaru kadiya amin nga edyan iya lubung. Ket umad-adu met pekkem pe̍ ya paglaingan na kadiya mamati, agten pe̍ dakayu, nanipud ito damu nga nagicna nu se̍ naawatan nu ya kinapudnu maipanggep iya siaayat nga asi ne̍ Apu Diyus.

⁷ Ket agten iyan ngarud, ta nasursuru nu yan e̍ E̍papras nga patpatgen mi nga kabulun iya panagsirsirbi mi, se̍ nalagon nga agsirsirbi e̍ Kristu. Ket e̍ E̍papras, igina met ya pannakabeggi mi nga agsirsirbi dakayu.

⁸ Ket igina ya nangipadamag dakami maipanggep iya ayat nu nga patauden niya Ispiritu ne̍ Apu Diyus.

⁹ Itu nga manipud ito nadamag mi ya maipanggep dakayu, ket ikarkararagan dakayu nga pe̍yeng. Ket ikarkararag mi e̍ Apu Diyus nga awan kuma pagkurangan nu iya pannakaemmu nu iya tarigagay ne̍ Apu Diyus maipanggep dakayu. Ta ikarkararag mi nga mangpasirib kuma ya Ispiritu ne̍ Apu Diyus dakayu, tasun kustu kuma ya pannakaemmu se̍ pannakaawat nu kadiya amin nga banbanag.

¹⁰ Ket agten iyan ngarud ya ikarkararag mi, ta gabay mi no agbiyag kayu kuma nga tumutup iya Apu. Ta diyan nas makaay-ayu igina ya pe̍yeng nu nga wangwanglen kuma, ta agbanag kuma ka nabaru diya amin nga nadumaduma nga wangwanglen nu, se̍ umad-adu kuma pe̍ ya pannakaemmu nu maipanggep iya gangey ne̍ Apu Diyus.

¹¹ Ket ikarkararag mi pe̍ nga gapu iya nakaskasdaaw nga pannakabalin na, pabpabilgen kuma ne̍ Apu Diyus ya panamati nu igina, gapu iya amin nga bileg nga ipaay na dakayu. Agten iyan kuma tasun makaanus se̍ makaibtur kayu was iya orey nagan na nga mapasamac dakayu.

¹² Ta ikarkararag mi nga siaanggem kayu kuma nga agyaman iya Ama, nga igina met ya namagbalin dactida nga maikari nga mairaman iya pannakagun-ud diya toley na nga uwed iya wada.

¹³ Ta nisalakan nactida nge̍ Apu Diyus iya nagicbet nga turay niya dake̍c, ket niyalis nactidan nga niraman kadiya iturayan niya patpatgen na nga Anac.

¹⁴ Ket igina met ya pakawayawayaan tida, ta pinakawan na mettin diya basbasul tida.

Maipanggep iya kinaturay ne̍ Je̍su Kristu

¹⁵ Ket ya Anac ne̍ Apu Diyus, igina met ya pakasingnan iya gangey niya madi masingen nga Diyus. Igina pe̍ ya Anac na nga kaonaan se̍ katurayan kadiya amin nga naparsuwa.

¹⁶ Tutu met yan, ta gapu mettas igina, naparsuwa diya amin nga uwed ka langit se̍ diya uwed idi nga lubung. Itu diya masingen, se̍ diya madi masingen pe̍, nga agten kadiya uwed pannakabalin da, se̍ diya uwed kinadayaw da, se̍ diya uwed kinaturay da, se̍ diya maaw-awagan ka apu. Ngarud, amin diya naparsuwa, ket naparsuwa da mettas gapu igina, se̍ maipaay da pe̍ igina.

¹⁷ Ket sacbay diya orey nagan na nga naparsuwa, uwed din ya Anac. Ket gapu igina, agpaut nga siuurnus diya amin nga uwed.

¹⁸ Ket igina met ya arig nga ulu niya beggi, nga kayat na nga kagiyen, igina ya pangulu niya bungguy mamati. Igina met pe̍ ya pagtaudan niya amin, se̍ igina ya katurayan se̍ kaonaan nga napagungar kadiya natnatey. Agten iyan ngarud tasun igina kuma ya kangrunaan ka amin.

¹⁹ Ta ginabay ne̍ Apu Diyus nga uwed pe̍ iya Anac ya amin nga kinaDiyus na.

²⁰ Ket ginabay pe̍ ne̍ Apu Diyus ya mangpaitunus igina mettas kadiya amin nga uwed idi nga lubung se̍ ka langit, gapu iya Anac na mettas. Ta uwed met nakaitunusan diya amin nga banbanag e̍ Apu Diyus gapu ito pannakaidaga niya beggi niya Anac na ito pannakatey na ito krus.

²¹ Ket dakayu, naisina kayu ngarud itun e̍ Apu Diyus, ket naikuntra pe̍ diya panpanunut nu igina itun, gapu ito dake̍c nga ugali nu.

²² Ngem itan, pinagbalin nakayu nge̍ Apu Diyus nga naitunus iginan, gapu ito ipapatey niya naipatoley nga Anac na para dactida, tasun maisangu kayu iya imatang na, nga nadalus kayu nga awan mansa winno pakababalawan nu.

²³ Ngem basta masapul nga sipapati kayu nga kanayun iya Anac. Ta nabaked se̍ napaut kuma ya panamati nu, tasun madi kayu lugud maiyaw-awan nga maisina iya namnama nga e̍cde̍ niya Makaparagsac nga Damag nga naikasaba dakayu itun. Ta itu mettas yan ya Makaparagsac nga Damag nga naipakaemmu ka amin nga toley iya lubungin. Ket iyaken nga Pablu, nagbalin nac met nga isa nga natalec nga mangikaskasaba iyan nga damag.

To panagsirbi ne̍ Pablu kadiya mamati

²⁴ Ket no maipanggep iyaken, aganggem mac ngasin, orey maparparigat tac. Ta diya rigrigat ku wi, ket agbanag da met iya panagsirbic nga maipaay dakayu nga mamati. Ta diya rigrigat ku, bagic da ngas nga anusan, nga agten met kadito rigrigat nga nitured ne̍ Kristu itun. Ket masapul nga itured ku met pe̍ agingga ka matungpalin ya tarigagay na maipanggep iya beggi na, nga itu ya bungguy mamati.

²⁵ Ket iyaken, pinagbalin nac nge̍ Apu Diyus nga agsirsirbi iya bungguy mamati, ta itu yan ya nitalec na nga wangel ku, tasun matulungan nakayu iya paglaingan nu. Ta ya wangel ku, itu ya panangipakaemmuc iya amin nga gabay ne̍ Apu Diyus nga ipakaemmu maipanggep iya kagi na.

²⁶ Itu ya damag nga bekken pekkem nga naipakaemmu kadiya toltoley itun nga timpu. Ngem ita, naipakaemmu mettin kadiya toley na.

²⁷ Ket dactida nga toley ne̍ Apu Diyus, dactida mettin ya pinili na nga pangipakaemmuwan nan iya kinakaskasdaaw niyan nga napateg se̍ nadayaw nga panggep na maipanggep kadiya bekken nga Hudyu. Ket ya banag nito panggep na, ket agten idi: Uwed met dakayu nge̍ Kristu win, nga itu ya namnamaen nu nga mairaman kayu kadiya nadayaw nga iturayan na.

²⁸ Ket e̍ Kristu met ya ikaskasaba mi. Ibagbaga mi ngarud nga sipapasnec kadiya amin nga toley nga sumurut da kuma, ket se̍ suruwan mi met pe̍ diya amin nga toley sigun iya amin nga kinasirib mi nga mangipalawag. Ta gabay mi no awan kuma pagkurangan diya orey nagan na nga toley iya pannakitipun da e̍ Kristu.

²⁹ Dikad pe̍ gapu iyan nga panggep ku, agbannug gac ngarud, ta ipakat ku ya amin nga bileg nga uwed iyaken gapu iya pannakabalin na nga mangpabileg iyaken.