Juan 9 - Ya Baru nga Tulag

To panangpalaing ne̍ Je̍sus ito toley nga naiyanac nga kulap

¹ Ito agdaldalan nge̍ Je̍sus, uwed nasingen na nga isa nga lalaki nga sigud nga kulap nanipud iya pannakaiyanac na.

² Ket dito adalan ne̍ Je̍sus, nagsaludsud da nga kinunen da e̍ Je̍sus, “Mistru, nagan niya akin-basul iya kinakulap nidi nga toley? Igina, winno diya makin-anac igina?” kunen da.

³ Kinunen ne̍ Je̍sus igida, “Ya kinakulap nidi nga toley, bekken nga gapu iya basul na, winno iya basul diya naganac igina. Ngem kulap yani tasun gapu igina, maipasingen kuma ya pannakabalin ne̍ Apu Diyus.

⁴ Ya ita nga timpu, maiyarig iya algew. Itu nga masapul nga wanglen tida diya ipawangel niya nangibon iyaken. Ta nad no timpu nga arig nga gumabi yin, awan makawangel lin.

⁵ Kayat ku nga kagiyen nga bayat niya kauwed ku iya lubung ngi, iyaken ya mangwada kadiya toltoley iya lubung,” kunen na.

⁶ Ito nakagi ne̍ Je̍sus yanin, naglutab iya ginet, ket nigamey na ya lutab na iya ginet, se̍ na nime̍lme̍l kadiya mata nito kulap.

⁷ Kalpasan na, kinunen na ito kulap, “Mawe̍ ka agemwas enna pagdigusan nga maawagan ka Siluwe̍.” (Ket ya kagi Siluwe̍, kayat na nga kagiyen, “Ebbon.”) Dikad pe̍ nawe̍ ngarud nagemwas to kulap. Ket pimanawin nga makasingen gayamin.

⁸ Ket ito nasingen dito karruba na se̍ dito toltoley nga makaemmu nga igina ya nakilimlimus itun, nagtetebbar da nga kinunen da, “Itu gayam yani to toley nga pe̍yeng nga agtugtugew nga makilimlimus!” kunen da.

⁹ Ket uwed da nga nagkunen, “Igina ngarud!” Ngem diya duduma, kinunen da met, “Siyac! Bekken nga igina! Kaing-ingas na ngas met!” kunen da. Ket iya agten iyan, to nalaingan nga kulap mettas to nagkagi nga kinunen na, “Bo it, iyaken met to kulap,” kunen na.

¹⁰ Ket kinunen da igina, “Se̍pe̍ makasingen ka mettin? Kumaan kadi niya pannakapalaing mu?” kunen da.

¹¹ Ket kinunen na, “Nigamey niya isa nga toley nga agnagan ka Je̍sus ya lutab na ka ginet, se̍ na nime̍lme̍l kadiya matac. Kalpasan na, nibon nac nga nawe̍ nagemwas ito pagdigusan nga Siluwe̍. Ket nawe̍c ngarud, ket apaman nga nakaemwas sac, makasingen nac mettin!” kunen na.

¹² Ket kinunen da manin igina, “Awac ngarud ya edyan nito nangpalaing ikew win?” kunen da. Ket kinunen nito nalaingan nga kulap, “Madic emmu, a,” kunen na.

To panangpalutput dito Parisiyu ito pannakapalaing nito kulap

¹³ Ket dito toley, nipen dan to nalaingan nga kulap iya edyan dito Parisiyu.

¹⁴ Ket Algew Ngilin met ito pananggamey ne̍ Je̍sus ka ginet nga nangpalaing na kadiya mata nito kulap.

¹⁵ Dikad pe̍ sinaludsud met dito Parisiyu ito kulap no kumaan nito pannakapalaing niya kulap na. Ket kinunen na, “Mine̍lme̍lan na diya matac ka loyeg, se̍ yac nagemwas. Ket ita, makasingen nac kun,” kunen na.

¹⁶ Ket dito duduma kadito Parisiyu, kinunen dan, “Bekken nga gayat e̍ Apu Diyus ya toley nga nangariman iyan, ta madi na met tungpalen ya paglinteggan maipanggep iya Algew Ngilin,” kunen da. Ngem kinunen met diya duduma, “Ay, bekken. Ta no managbasul, madi met makaariman kadiya agten kadiyan nga nakaskasdaaw nga pagilasinan,” kunen da. Itu nga madi da ngarud nagkikinnaawatanin.

¹⁷ Ket iya agten iyanin, pinalutput manin dito Parisiyu to lalaki nga nalaingan nga kulap, nga kinunen da, “Ikew, nagan ya makunem maipanggep igina? Ta ikew met ya akin-mata kadiya pinalaing na,” kunen da. Ket kinunen nito nalaingan nga kulap, “No iyaken, isa nga mammadtu tuni ya panagkunec,” kunen na.

¹⁸ Ngem orey no agten iyan ya kinunen na, madi pinati dito pangpangulu diya Hudyu nga kulap nga tutu itun yan nga toley nga makasingen nin. Itu nga pinalbe̍t da diya naganac igina.

¹⁹ Ket nagsaludsud da kadito naganac igina nga kinunen da, “Tutu kad nga anac nu yani? Tutu kad nga igina yan ya kunen nu nga naiyanac nga kulap? Se̍pe̍ makasingen nin?” kunen da.

²⁰ Ket agten idi to nisungbat dito makin-anac: “Bo, anac mi met. Ket emmu mi met pe̍ nga naiyanac nga kulap.

²¹ Ngem madi kami emmu no ape̍ nga makasingen nin. Madi kami met pe̍ emmu no nagan ya nangpalaing igina. Igina kuma ya pagsaludsudan nun, ta nanakem mettin. Emmu na met ya sumungbatin,” kunen da.

²² Agten iyan ya kinagi diya naganac igina, ta mansing da kadito pangpangulu diya Hudyu. Ta naemmuwan da ngamin nga nagtutulagan dito pangpangulu diya Hudyu itun, nga no uwed mamati nga e̍ Je̍sus ya Kristu, ket ilaskig da da kanu iya pannakigimung da iya gigimungan nga pagdaydayawan da.

²³ Iyan ya gapu na nga kinunen dito makin-anac nga, “Nanakem mettin. Igina kuma ya pagsaludsudan nun.”

²⁴ Ket iya agten iyan, pinalbe̍t manin dito pangpangulu to toley nga naiyanac nga kulap. Ket kinunen da igina, “Agsapata ka man ngarud iya imatang ne̍ Apu Diyus nga pudnu ya ibagam! Ta emmu min nga managbasul nga tutu yan nga toley nga nangpalaing ikew!” kunen da.

²⁵ Ket kinunen nito lalaki, “Di yac emmu no uwed basul na winno awan. Basta idi yas ya emmuc: Kulap pac itun, ngem ita, makasingen nac kun!” kunen na.

²⁶ Dikad pe̍ nagsaludsud dito pangpangulu nga kinunen da manin igina, “Nagan ya winangel na ikew? Kumaan ngarud ya panangpalaing na kadiya matam?” kunen da.

²⁷ Ket to nalaingan nga lalaki, kinunen na igida, “Nibagac met dakayun, ngem madi dac met patpatiyen. Ape̍ gabay nu nga gicnaen manin? Me̍lug kayu kad met pe̍ nga agbalin nga adalan na?” kunen na.

²⁸ Ket dito pangpangulu, inuyaw da ngarudin to nalaingan nga lalaki, nga kinunen da igina, “Ikew a, ya adalan na! Ta no dakami, adalan nakami nga gennung to Muyse̍s.

²⁹ Emmu mi met nga binilin ne̍ Apu Diyus to Muyse̍s. Ngem no maipanggep iyan nga toley, madi kami emmu orey no awac ya naggayatan na!” kunen da.

³⁰ To nalaingan nga lalaki, kinunen na manin igida, “Ay, nakaskasdaaw nga unay yani! Kunen nu nga madi kayu emmu ya naggayatan na, ngem igina met ya nakapalaing iyaken!

³¹ Emmu tida met nga madi ikasu ne̍ Apu Diyus diya adngen diya managbasul. Ngem ikasu na met ya orey nagan na nga managdayaw igina se̍ agtungpal iya tarigagay na.

³² Orey manipud ito pannakaparsuwa niya lubung, awan pekkem nadamag tida nga namagbalin nga makasingen diya mata niya toley nga naiyanac nga kulap.

³³ Itu nga no bekken nga gayat e̍ Apu Diyus tun nga nangpalaing iyaken, awan kuma mabalinan na nga agten idi,” kunen na.

³⁴ Ket kinunen dito pangpangulu, “Ke̍he̍! Naiyanac ka met nga sibabasul! Dakami lugud aya ya isuru mun?” kunen da, se̍ da nilaskig ngarudin iya pannakigimung na iya gigimungan dan.

Diya ibilang ne̍ Je̍sus nga nakulap

³⁵ Ket nadamag ne̍ Je̍sus nga nailaskigin to nalaingan nga kulap ito gigimungan. Itu nga nawe̍ na sinapul. Ket ito nasmac na, kinunen ne̍ Je̍sus igina, “Mamati ka kadi iya Anac nga Naipatoley?” kunen na.

³⁶ Ket kinunen nito lalaki, “Ibagam kuma iyaken no nagan na, apu, tasun mamati yac ngarud igina,” kunen na.

³⁷ Ket kinunen ne̍ Je̍sus igina, “Nasingem ngarudin, ta igina met ya katkatbar mu itan,” kunen na.

³⁸ Ket kinunen ngarud nito lalaki, “Ay, mamati yac ngarudin, Apu!” kunen na, ket nagparintumeng nga nagdaydayaw e̍ Je̍susin.

³⁹ Ket kinunen ne̍ Je̍sus, “Inumbe̍t tac idi nga lubung, nga manglinteg kadiya toltoley, tasun makasingen kuma diya maiyarig ka kulap, se̍ tasun diya agkunen nga makasingen da, igida nga gennung ya agbalin nga arig nga kulapin,” kunen na.

⁴⁰ Ket uwed da pe̍ antuni diya duduma nga Parisiyu iya denni e̍ Je̍sus, ket nagicna da to kinagi na. Ket sinaludsud da igina, “Kayat mu kad nga kagiyen nga kulap kami pe̍?” kunen da.

⁴¹ Ket kinunen ne̍ Je̍sus igida, “No kulap kayu kuma nga tutu, mabalin nga awan pakabasulan nu. Ngem gapu ta kunen nu met nga makasingen kayu, naibilang ngarud nga uwed pekkem dakayu ya kargu nu,” kunen na.