Juan 8 - Ya Baru nga Tulag

¹ Ngem e̍ Je̍sus nga gennung, nawe̍ enna Tageytey Ulibu.

To babey nga natiliwan nga makikamkamalala

² Ket ito kadamlag na, nasapa nga simoli nge̍ Je̍sus iya Te̍mplu manin. Ket diya toltoley, nawe̍ da ito edyan na ket inarikoyopan da. Ket e̍ Je̍sus, nagtugew nga nangisuru igida.

³ Ket itun, ne̍lbe̍t dito manursuru iya Linteg se̍ dito Parisiyu ya isa nga babey nga natiliwan nga makitipun iya bekken na nga asawa. Nipasangu da kadito toltoley,

⁴ ket kinunen da e̍ Je̍sus, “Mistru, natiliwan ya babey nga idi nga makitipun ka bekken na nga asawa.

⁵ Ket sigun iya naisurat iya Linteg, nibilin nito Muyse̍s nga masapul nga mapatey kanu ya agten iyan nga babey ka damdampag. Ket no ikew, nagan ya makunem iyan?” kunen da.

⁶ Ngem yan nga kinunen da e̍ Je̍sus, pangsigir da met igina, tasun uwed kuma panggapuwan da nga mangidarum igina. Ngem e̍ Je̍sus, nagdokot ngas nga nagsurat na ya kurimeng na iya ginet tin.

⁷ Ket ito nipapilit da to saludsud da igina, ginumnukat nge̍ Je̍sus, ket kinunen na igida, “No uwed dakayu ya awan basul na, igina kuma ya mona nga mangdampag idi nga babey yin,” kunen na.

⁸ Ket nagdokot manin nge̍ Je̍sus nga nagsursurat iya ginet.

⁹ Ket ito nagicna dito nagsaludsud to kinagi na, pimanaw da nga sagge̍sa ngin. Nona dito lallakay, patingga nga diya nabati ngasin, ket e̍ Je̍sus se̍ to babey nga agsisikad pekkem iya sangu na.

¹⁰ Ket ginumnukat nge̍ Je̍sus, se̍ na kinunen ito babey, “Kabsat, awac edyan dan? Awan kad nangukum ikew win?” kunen na.

¹¹ Ket kinunen nito babey, “Awan met, Apu,” kunen na. Ket kinunen ne̍ Je̍sus igina, “Orey iyaken, madi naka pe̍ ukumen. Agawir ka ngarudin, ket ipac mu ya panagbasbasul mun,” kunen na.]

E̍ Je̍sus ya mangwada ka toley

¹² Ket itun, nagkagi manin nge̍ Je̍sus kadiya toltoley nga kinunen na, “Iyaken ya mangwada ka toley iya lubung ngi. Ya sumurut iyaken, madi manmanalan iya gicbet tin, no di lugud mawadaan ka wada nga mange̍cde̍ ka biyag,” kunen na.

¹³ Ket kinunen dito Parisiyu igina, “Ikew mettas ya mangpanecnec iya beggi mun. Dikad pe̍ bekken nga nakapapati ya pammanecnec mun,” kunen da.

¹⁴ Ket e̍ Je̍sus, kinunen na igida, “Orey no iyaken mettas ya mangpanecnec iya beggic, pudnu met ya ipacpakaemmuc, ta emmuc met ya naggayatac se̍ ya kapennac. Ngem dakayu, madi kayu emmu ya naggayatac winno ya kapennac.

¹⁵ Ta no dakayu, gapu was iya pagarupen nu ya panangukum nu. Ngem no iyaken, bekken ku nga gagara ya mangukum ka orey nagan na nga toley.

¹⁶ Ngem orey no uwed kuma panangukum ku, napudnu ngas met. Ta no uwed kuma panangukum ku, bekken nga iiyaken ya mangukum, no di lugud kabulun ku ya Amac nga nangibon iyaken.

¹⁷ Ket orey to naisurat iya Linteg nu, kunen na nga no agkatunus ya pammanecnec diya duwa nga mangsacsi, nakapapati ya ibaga da.

¹⁸ Ket duwa kami met nga mangpanecnec kin, ta iyaken mettas ya isa nga mangipakaemmu iya pudnu maipanggep iya beggic, ket se̍ ya Ama nga nangibon iyaken, igina pe̍ ya isa,” kunen na.

¹⁹ Ket dito Parisiyu, kinunen da e̍ Je̍sus, “Awac kad ya edyan niya amam?” kunen da. Ket kinunen ne̍ Je̍sus igida, “No dakayu, madi dac met em-emmu, se̍ madi kayu met pe̍ em-emmu ya Amac. Ta no em-emmu dac kuma, em-emmu nu met pe̍ yin ya Amac,” kunen na.

²⁰ Ket kinagi ne̍ Je̍sus diyan ito panangisursuru na enna Te̍mplu, ito edyan dito pipisukan ka datun nga kuwarta. Ngem orey uwed nge̍ Je̍sus antuni nga silalatac, awan met nangtekkem igina, ta madi pekkem nadatngan itun ya kustu nga timpu nga nikeddeng ne̍ Apu Diyus.

Taga-langit nge̍ Je̍sus

²¹ Ket iya agten iyan, kinunen manin ne̍ Je̍sus igida, “Pumanaw wac nad mettin, ket sapulen dac, ngem matey kayu was nad nga maukum gapu kadiya basbasul nu. Madi dac ngarud masmac, ta madi kayu met makapen iya kapennac,” kunen na.

²² Itu nga kinunen dito Hudyu nga pangpangulu, “Ape̍ kid nga kunen na nga madi tida makapen iya pennan na? Agpessel nad kidin?” kunen da.

²³ Ket kinunen manin ne̍ Je̍sus igida, “Dakayu, ket taga-segged kayu was met. Ngem iyaken, taga-ngudu wac. Ilubung kayu. Ngem iyaken, bekken.

²⁴ Itu ya gapu na nga kinunec dakayu nga matey kayu was nad nga maukum gapu kadiya basbasul nu. Ta no madi kayu mamati nga iyaken ya uwed nga sigud, maukum kayu nad ngarud gapu kadiya basbasul nu,” kunen na.

²⁵ Ket kinunen da e̍ Je̍sus, “Nagan mu kad, nga agkagkagi ka agten iyan?” Ket kinunen ngarud ne̍ Je̍sus, “Iyaken mettas to nibagac dakayu manipud ito damu.

²⁶ Ket no maipanggep dakayu, adu ngarud ya makagic se̍ maipabasul ku. Ngem ya ipakaemmuc dakayu nga toley idi nga lubung, yan nas ipakagi niya nangibon iyaken. Ket napudnu ngarud met ya nangibon iyaken,” kunen na.

²⁷ Ngem dito naggigicna, madi da met naawatan nga maipanggep e̍ Diyus Ama to kinagi ne̍ Je̍sus itun.

²⁸ Dikad pe̍ kinunen manin ne̍ Je̍sus igida, “No maibayug nu nad ya Anac nga Naipatoley, maemmuwan nu nad mettasin nga iyaken ya uwed nga sigud. Ket maemmuwan nu pe̍ yin nga awan wanglec nga kabucbukudac, no di lugud kagkagiyec ngas ya nisuru niya Ama iyaken.

²⁹ Ket pe̍yeng met nga uwed iyaken ya nangibon iyaken. Madi nac ngarud pinanawan, gapu ta diya banbanag nga makaay-ayu igina, itu ya kanayun ku nga wangwanglen,” kunen na.

³⁰ Ket adu da nga namati igina ito kagkagiyen na yan.

Pakawayawayaan tida ya kinapudnu

³¹ Dikad pe̍ kinunen ngarud ne̍ Je̍sus kadito Hudyu nga namati igina, “Dakayu, no diya kagic ya pe̍yeng nu nga laglagipen, ket tutu kayu ngarud nga pasurut ku.

³² Ket iya agten iyan, maemmuwan nu ya kinapudnu win. Ket ya kinapudnu ngarud ya pakawayawayaan nu,” kunen na.

³³ Ket kinunen dito toltoley, “Hudyu kami met nga kapututan nito Abraham, ket awan pekkem orey nagan na nga nangtagabu dakami. Ape̍ kunem nga uwed pakawayawayaan mi?” kunen da.

³⁴ Ket kinunen ne̍ Je̍sus, “Pudnu met yani nga ibagac dakayu: Amin diya agwangwangel ka basul, naibilang da nga tagabu niya panagbasul da.

³⁵ Ket no ya tagabu, makipagedyan iya baley niya amu na, ngem bekken nga agnanayun ya saad na. Ngem no ya anac niya amu nga gennung, nairaman iya pamilya na nga pe̍yeng ka agnanayun.

³⁶ Itu nga no ya Anac ne̍ Apu Diyus ya mangwayawaya dakayu, siwayawaya kayu nga tutu win.

³⁷ “Emmuc nga kapututan nakayu to Abraham. Ngem orey agten iyan, gabay dac met nga patayen, gapu ta madi kayu gabay nga patiyen ya kagic nga isursuruc dakayu.

³⁸ Ket no iyaken, isuruc ngas maipanggep kadiya nasingec iya edyan niya Amac. Ket dakayu, wanglen nu pe̍ diya nipakaemmu mettas niya ama nu dakayu,” kunen na.

³⁹ Ket kinunen da, “To Abraham ya ama mi,” kunen da. Ket e̍ Je̍sus, kinunen na igida, “No pudnu nga an-anac nakayu to Abraham, tuladen nu kuma ngarud dito winangel na.

⁴⁰ Ngem sapsapulen nu mettin ya gundaway nu nga mangpatey iyaken, orey ibagbagac ngas ya pudnu nga nipakaemmu ne̍ Apu Diyus iyaken. Bekken ngarud nga agten iyan ya winangel nito Abraham.

⁴¹ Ngem no dakayu, ket tultuladen nu ngarud ya gangey mettas niya ama nu,” kunen na. Ket kinunen da e̍ Je̍sus, “Ay! Kayat mu nga kagiyen aya nga bastardu kami? Is-isa met ya Ama mi, ket itu mettas nge̍ Apu Diyus,” kunen da.

⁴² Ngem kinunen ne̍ Je̍sus igida, “No tutu mettas nga e̍ Apu Diyus ya ama nu, ayaten dac met pe̍ kuma. Ta e̍ Apu Diyus met ya naggayatac. Ket iya agten iyan, nagparang ngac idi nin. Madic inumbe̍t gapu was iya bukud ku nga panpanunut, no di lugud nibon nac nge̍ Apu Diyus.

⁴³ Ngem madi kayu maawatan didi nga ibagbagac, gapu ta madi kayu gabay nga gicnaen diya kagic.

⁴⁴ Ta an-anac nakayu ngarud nge̍ ama nu, nga itu met ya diyablu. Ket ya tarigagay na, itu ya gabay nu nga tungpalen. Pumatpatey met nga sigud, manipud ito damu. Ket pulus nga di na kanunungan ya pudnu, ta awan pulus kinapudnu igina. Ket kadawyan na ya agbusbusid, ta sigud nga managbusid. Ket bekken nas nga iyan, ta igina met pe̍ ya pagtaudan diya amin nga kinabusid.

⁴⁵ Ket itu ya gapu na nga di dac patiyen nin. Ta diya kagiyec dakayu, ket pudnu.

⁴⁶ Awan dakayu ya makabalin nga mangpabasul iyaken. Ket orey pudnu ya ibagbagac, di dac met patiyen.

⁴⁷ No ya isa nga kameng ne̍ Apu Diyus, ipangag na ngarud diya kagi ne̍ Apu Diyus. Ngem dakayu, bekken kayu nga kamkameng ne̍ Apu Diyus, ket itu ya gapu na nga madi kayu ipangpangag diya kagi na,” kunen ne̍ Je̍sus.

E̍ Je̍sus, sigud nga uwed

⁴⁸ Ket dito Hudyu, ito nagicna da to kinagi ne̍ Je̍sus, kinunen da igina, “Tutu ngarud met to kunen mi nga isa ka ngas nga iSamarya se̍ nasairuwan ka met pe̍!” kunen da.

⁴⁹ Ket e̍ Je̍sus, kinunen na, “Awan met kinasairu iyaken. Ngem ya kinapudnu na, ya Amac met ya padayawac. Ket dakayu, madi dac met dayawen.

⁵⁰ Ngem awan anyaman na iyaken ya agten iyan, ta madi yac sapsapulen ya pakaidayawac dakayu. Uwed met sabali nga mangbiyang iya pannakaipadayaw ku, ket igina pe̍ ya mangikeddeng maipanggep kadidi nga banag.

⁵¹ Pudnu met yani nga ibagac dakayu: Ya orey nagan na nga mangtungpal kadiya kagic, madi aglak-am ka pannakatey,” kunen na.

⁵² Ket dito Hudyu, kinunen da iginan, “Iyan! Masiguradu min nga nasairuwan kan! Natey met to Abraham se̍ dito mammadtu, ngem kunem met nga madi nad matey diya mangtungpal iya kagim.

⁵³ Nangatngatu ka kad ngem ito Abraham nga ama mi? Natey met to Abraham, ket natey met pe̍ dito mammadtu! Nagan ngarud ya pangipagpagarupam iya beggim?” kunen da.

⁵⁴ Ket kinunen ne̍ Je̍sus, “No ya mismu nga beggic ya idaydayaw ku, ket awan met nga tutu sirsirbi niya pannakaidayaw ku. Ngem ya kinapudnu na, ya Amac ya mangipadayaw iyaken. Ket igina mettas ya kunen nu nga Diyus nu.

⁵⁵ Ket dakayu, madi kayu em-emmu ya Amac. Ngem iyaken, em-emmuc met. Ket no kunec nga madic em-emmu, agbusid dac met nga agten dakayu. Ngem em-emmuc met. Ket ya kagi na, itu ngarud ya tungtungpalec.

⁵⁶ Ket to Abraham nga ama nu, siraragsac itun nga ninamnama na ya inumbe̍t ku idi. Ket naragsakan ngarud to Abrahamin, ta nasingen nan ya panagparang ku,” kunen na.

⁵⁷ Ket dito Hudyu, kinunen da manin igina, “Ahah! Kumaan ngarud ya pannakasingem ito Abraham? Awan met pekkem orey lima nga pulu nga dagun mu!” kunen da.

⁵⁸ Ket kinunen manin ne̍ Je̍sus igida, “Ibagac met ya pudnu dakayu: Orey ito madi pekkem nga naiyanac to Abraham, uwed dac nga sigudin,” kunen na.

⁵⁹ Ket iya agten iyan, pimidit dito Hudyu ka batu tasun dampagen da kuma. Ngem sililinged nge̍ Je̍sus nga pimanaw iya Te̍mplu win.