Juan 4 - Ya Baru nga Tulag

To pannakitbar ne̍ Je̍sus ito babey nga iSamarya

¹ Ket itun, naemmuwan niya Apu nga nadamag dito Parisiyu nga ad-adu ya mapaspasurut se̍ mabacbautisaran na ngem ito Juan nga Mammautisar.

² Ngem ya kinapudnu na, bekken nga e̍ Je̍sus nga mismu ya namacbautisar, no di lugud dito adalan na.

³ Ket ito naemmuwan niya Apu nga nadamag dito Parisiyu yanin, igina se̍ dito adalan na, pimanaw da ngarud iya prubinsiya nga Hudya, nga simoli da iya prubinsiya nga Galilya ngin.

⁴ Ket masapul nga lumasat da iya prubinsiya nga Samarya iya pananalan da.

⁵ Ket itun, dimateng da iya isa nga ili nga nanaganan ka Sikar. Uwed ka Samarya, iya denni ito ginet nga ne̍cde̍ nito Hakub itun ito Huse̍ nga anac na.

⁶ Ket uwed antuni ya bitu nga maawagan ka bitu nito Hakub. Ket e̍ Je̍sus, nagtugew iya abay nito bitu, gapu ta napesya nga nanalan. Ket dandani agmatuun itunin.

^7-8 Ket dito adalan na, nawe̍ da ngumina ka kanen da iya ili. Ket iya di mabayag, uwed inumbe̍t nga isa nga babey nga iSamarya nga umbe̍t sumacdu. Ket kinunen ne̍ Je̍sus igina, “Makiinum mac kay,” kunen na.

⁹ Ket to babey nga iSamarya, kinunen na, “Nih! Hudyu ka met, ket iyaken, iSamarya ngac. Ape̍ agadeng ka iyaken ka danum?” kunen na. Agten iyan ngarud ya kinunen na, ta bekken nga gangey diya Hudyu ya makibulbulun kadiya iSamarya.

¹⁰ Ket kinunen ne̍ Je̍sus igina, “No emmum kuma ngas ya sagut nga ipaay ne̍ Apu Diyus, se̍ no nagan ku nga agad-adeng ikew ka inumec nga danum, ikew kuma ngin ya umadeng iyaken, ket e̍cdan naka ka makabiyag nga danum,” kunen na.

¹¹ Ket kinunen nito babey igina, “Ay, nauneg met ya bitu nga idi, apu, ket awan met ngarud pagsacdum. Awac ngarud ya pamettam ka makabiyag nga danum?

¹² To Hakub nga ama tida ya nangipatawid idi nga bitu dakami. Nagin-inuman na yani nga bitu itun, se̍ dito an-anac na se̍ an-animal na. Kayat mu kad nga kagiyen nga nangatngatu ka pekkem ngem ito Hakub?” kunen na.

¹³ Ket kinunen ne̍ Je̍sus igina, “Amin diya uminum iya danum idi nga bitu, mewwew da ngas nad manin.

¹⁴ Ngem diya amin nga uminum iya danum nga e̍cde̍c igida, madi da nad mewwew win. Ta ya danum nga e̍cde̍c, agbalin nga arig nga ubbug nga kumkumbuwar manipud iya uneg niya toley, ket mange̍cde̍ igina ka makabiyag nga danum, nga itu ya biyag nga agnanayun,” kunen na.

¹⁵ Ket to babey, kinunen na, “Ay, e̍cde̍m kay ngarud iyaken yan nga danum nga kunem, apu, tasun madic nad mewwew win, se̍ tasun madic masapul nga umbe̍t nga pe̍yeng sumacdu idi nin,” kunen na.

¹⁶ Ket kinunen manin ne̍ Je̍sus igina, “Mawe̍ ka alac ya asawam, ta e̍lbe̍t mu idi,” kunen na.

¹⁷ Ket to babey, kinunen na, “Awan met asawac.” Ket kinunen ne̍ Je̍sus igina, “Tutu met ya kunem nga awan asawam.

¹⁸ Ta ya kinapudnu na, name̍nlima ka nga nakiasawa ngin. Ket ya kabbalay mu nga lalaki ita, bekken mu met nga tutu nga asawa. Itu nga pudnu ngarud ya nibagam iyaken,” kunen na.

¹⁹ Ket kinunen nito babey, “Ay, madlaw ku met apu, nga isa ka nga mammadtu.

²⁰ Dikad pe̍ uwed saludsud ku ikew. Dito am-ama mi, idi met nga tageytey ya pagdaydayawan da e̍ Apu Diyus. Ngem dakayu nga Hudyu, kunen nu nga enna He̍rusale̍m nga gennung ya kustu nga pagdaydayawan igina. Nagan ngata ya kustu?” kunen na.

²¹ Ket kinunen ne̍ Je̍sus ito babey, “Manang, patiyem kuma ya kunec, nga madatngan nad ya timpu nga bekken nga idi nga tageytey winno enna He̍rusale̍m ya pagdaydayawan diya toley iya Ama.

²² Dakayu nga iSamarya, madi kayu em-emmu ya daydayawen nu. Ngem dakami nga Hudyu, em-emmu mi ya daydayawen mi. Ta ya panangisalakan ne̍ Apu Diyus kadiya toley, tumaud met dakami.

²³ Ngem nad mettas, winno orey ita, madatngan ya timpu nga ya kustu nga panagdayaw iya Ama, itu ya maariman iya lemlemmet toley nga maikanatad iya napudnu nga gangey ne̍ Apu Diyus. Ta agten iyan ya gabay niya Ama nga panagdayaw igina.

²⁴ Ta e̍ Apu Diyus, ket madi masingen. Itu nga diya agdaydayaw igina, masapul nga agdayaw da iya lemlemmet da nga maikanatad iya pudnu nga panagdayaw e̍ Apu Diyus,” kunen na.

²⁵ Ket to babey, kinunen na e̍ Je̍sus, “Emmuc met nga umbe̍t nad ya Me̍siyas nga maawagan ka Kristu. Ket nad no umbe̍t, ipakaemmu na dactida diya amin nga banbanag,” kunen na.

²⁶ Ket e̍ Je̍sus, kinunen na, “Iyaken nga katkatbar mun, iyaken met ya kinunem,” kunen na.

²⁷ Ket iyan nga kanitu, inumbe̍t dito adalan ne̍ Je̍sus. Ket nasdaaw da, ta nadateng da nga makitkitbar nge̍ Je̍sus ka babey. Ngem awan kadito adalan ya nagdamdamag ito babey no nagan ya masapul na, se̍ madi da met pe̍ nagsaludsud e̍ Je̍sus no ape̍ nga makitkitbar igina.

²⁸ Ket to babey, pinanawan na met ya amusu na, ket simoli iya ili yin. Ket kinunen na kadiya toltoley ito ili,

²⁹ “Umbe̍t nu singen, ta uwed lalaki nga nangipakaemmu iyaken kadiya amin nga winangwangel ku. Di igina kid ya Kristu?” kunen na.

³⁰ Dikad pe̍ dito toltoley, limawan da ngarud iya ili nga mawe̍ da ito edyan ne̍ Je̍sus.

³¹ Ket kabayatan nito kauwed pekkem nito babey ito ili, inapes met dito adalan nge̍ Je̍sus, nga kinunen da, “Mistru, manganin!” kunen da.

³² Ngem kinunen ne̍ Je̍sus igida, “Uwed met pagbiyag ku nga madi nu emmu,” kunen na.

³³ Itu nga nagsisinnaludsud dito adalan, nga kinunen da, “Uwed kid inumbe̍t nga nange̍cde̍ ka kanen na?” kunen da.

³⁴ Dikad pe̍ e̍ Je̍sus, kinunen na igida, “Ya pagbiyag ku nga kunec, itu ya panangtungpal ku iya tarigagay niya nangibon iyaken, se̍ ya panangilpas ku iya ipawangel na iyaken.

³⁵ Ket agten ito pagkakagi nu nga, ‘Eppat nga bulan pekkem, ket panaggagani yin,’ kunen nu. Ngem ya kunec, ket agten idi: Singen nu nga nalaing diya maiyarig nga laplapug, ta nagangu met diya dawa ngin, ket mabalin nga ganiyen nin!

³⁶ Ket ya mawe̍ aggani, matangdanan ngarud orey itan. Ta ya maapit na, itu diya mairaman iya biyag nga agnanayun. Ket iya agten iyan, agpadpada nga agragsac ya agmula se̍ ya aggani.

³⁷ Ta tutu met to pagkakagi nga, ‘Isa ya agmula, sabali ya aggani.’

³⁸ Ket dakayu, nibon nakayu nga arig nga diya mawe̍ agapit iya nagbannugan diya sabali nga toley nga nangipakaemmu iya kagi ne̍ Apu Diyus. Ket dakayu, maiyarig kayu nga makipaglak-am iya nagbannugan da,” kunen ne̍ Je̍sus.

³⁹ Ket enna ili, adu dito iSamarya nga namati e̍ Je̍sus gapu ito kinunen nito babey igida nga, “Nipakaemmu na iyaken diya amin nga winangwangel ku,” kunen na itun.

⁴⁰ Itu nga ito nawe̍ dito iSamarya ito edyan ne̍ Je̍sus, inawis da nga makipagedyan igida. Ket nagedyan ngarud enna ili da ka unus duwa nga algew.

⁴¹ Adu pe̍ diya namati e̍ Je̍sus gapu iya nisursuru na mettas igida.

⁴² Ket dito toltoley, kinunen da ito babey, “Mamati kami ngarudin, ngem bekken nas nga gapu ito kagi mun, no di lugud gapu ta dakami nga mismu ya nakagicna iginan. Ket itu ya pakaemmuwan mi nga tutu nga igina ya naibon nga Mangisalakan kadiya toltoley iya lubung ngi,” kunen da.

To panangpalaing ne̍ Je̍sus ito anac nito upisyal

⁴³ Kalpasan duwa nga algew nga panagedyan de̍ Je̍sus ka Sikar enna Samarya, pimanaw da nga nawe̍ ka prubinsiya nga Galilya.

⁴⁴ Nawe̍ da ngarud antuni, ta e̍ Je̍sus mettas to nagkunen itun nga madi mapadayawan ya mangasaba iya mismu nga ili na.

⁴⁵ Ket itun, ito nakadateng nge̍ Je̍sus iya prubinsiya nga Galilya, siaanggem met dito toltoley iyan nga umawat igina. Ta ito nawe̍ da nakipadaya enna He̍rusale̍m itun, nasingen da dito amin nga winangel ne̍ Je̍sus antuni.

⁴⁶ Ket nawe̍ nge̍ Je̍sus pimasyar ka Kana enna prubinsiya nga Galilya, nga itu to ili nga pinagbalin na itun nga basi ya danum. Ket uwed antuni ya isa nga upisyal niya gubiye̍rnu nga agsakit ya anac na nga lalaki. Ket nabati to anac na enna ili nga Kape̍rnaum.

⁴⁷ Ta ito nadamag nito upisyal nga uwed din nge̍ Je̍sus ka Galilya nga naggayat ka Hudya, nawe̍ na nipacpakaasi e̍ Je̍sus nga managus kuma ka Kape̍rnaum. Ta we̍ na kuma kanu palaingen ya anac na nga dandani matey yin.

⁴⁸ Dikad pe̍ kinunen ne̍ Je̍sus ito upisyal, “Ape̍ aya nga madi kayu met mamati iyaken no awan masingen nu nga mona nga pagilasinan se̍ nakaskasdaaw?” kunen na.

⁴⁹ Ket nagpacpakaasi latta to upisyal e̍ Je̍sus nga kinunen na, “Pangngaasim kay Apu, ta managus ta kuma nga mawe̍ yin, tasun madi kuma matey ya anac ku,” kunen na.

⁵⁰ Ket kinunen ne̍ Je̍sus igina, “Agawir ka ngas ngarudin, ta nalaingan ngarud ya anac mun,” kunen na. Ket namati to upisyal ito kinagi ne̍ Je̍sus, dikad pe̍ nagawir ngarudin.

⁵¹ Ket ito madama pekkem nga managus to upisyal iya dalan, nisabet diya tagabu na ya damag nga nalaingan kanu to anac nan.

⁵² Ket dinamag ngarud nito upisyal igida no nungey nga naunayan to ebbing. Ket kinunen da, “Ito ala-una iya gidam ito kagabi ya panagbaaw nito pudut na,” kunen da.

⁵³ Ket nalagip nito upisyalin nga iyan mettas to uras nga panangibaga ne̍ Je̍sus igina nga, “Nalaingan ya anac mun.” Itu nga namati ngarud to upisyal se̍ diya kakobung na e̍ Je̍sus.

⁵⁴ Ket itu ya maikadduwa nga nakaskasdaaw nga inariman ne̍ Je̍sus enna Galilya, ket inariman na yan ito gayat na ka Hudya.