Juan 3 - Ya Baru nga Tulag

To pannakitbar nito Nikude̍mu e̍ Je̍sus

¹ Ket uwed itun isa nga Parisiyu nga agnagan ka Nikude̍mu, nga isa nga kunse̍hal diya Hudyu.

² Iya name̍nsan, ginabi nito Nikude̍mu ya nawe̍ iya edyan ne̍ Je̍sus. Ket kinunen na igina, “Mistru, emmu mi nga isa ka nga manursuru nga nibon ne̍ Apu Diyus. Ta awan makaariman kadiya nakaskasdaaw nga pagilasinan nga ar-arimanem, no awan igina nge̍ Apu Diyus,” kunen na.

³ Ket kinunen ne̍ Je̍sus igina, “Pudnu met yani nga ibagac ikew: Madi aglak-am ya orey nagan na nga toley iya panangituray ne̍ Apu Diyus no madi maiyanac manin nga mona ka kabarbaru nga biyag,” kunen na.

⁴ Ket to Nikude̍mu, kinunen na manin, “Kumaan ngarud niya pannakaiyanac manin niya toley nga manacmanin? Mabalin na kad ya umuneg iya bessug niya ina na tasun maiyanac manin?” kunen na.

⁵ Ket kinunen manin ne̍ Je̍sus igina, “Pudnu met yani nga ibagac ikew: Madi mabalin nga aglak-am ya orey nagan na nga toley iya panangituray ne̍ Apu Diyus no madi maiyanac gapu iya danum se̍ gapu pe̍ iya Ispiritu ne̍ Apu Diyus.

⁶ Ta ya maiyanac ka kinatoley, ket kinatoley ngarud ya gangey na. Ket ya maiyanac gapu iya Ispiritu ne̍ Apu Diyus, uwed igina ya gangey niya Ispiritu.

⁷ Madi ka kuma masikuran iya kunec ikew nga ‘Masapul kayu nga maiyanac manin.’

⁸ Ta ya Ispiritu ne̍ Apu Diyus, arig nga belluut, nga agbelluut iya orey awac nga gabay na. Ket emmum ya kinauwed na, ta magicnam ya ungug na, ngem madi ka emmu ya paggayatan winno kapennan na. Ket agten met iyan ya gangey niya Ispiritu ne̍ Apu Diyus nga uwed kadiya amin nga toley nga naiyanac manin gapu igina,” kunen na.

⁹ Ket to Nikude̍mu, sinaludsud na e̍ Je̍sus nga kinunen na, “Kumaan ngarud niya pannakapasamac niyan?” kunen na.

¹⁰ Ket kinunen ne̍ Je̍sus igina, “Isa ka met nga manursuru kadiya Israe̍lita. Ape̍ ngarud nga madi ka maawatan yan nga kunec?

¹¹ Pudnu met yani nga ibagac ikew: Ya emmu mi, itu was ya kagkagiyen mi. Ket ya nasingen mi, itu was ya ibagbaga mi. Ngem dakayu, madi kayu met patpatiyen ya ipakaemmu mi.

¹² Ket no madi kayu patiyen dito nibagac dakayu maipanggep kadiya banbanag nga uwed idi nga lubung, kumaan ngarud nga mamati kayu iyaken no ya banbanag nga nailangitan ya kagiyec?

¹³ Ket awan pekkem imune̍c ka langit malacsid iya imulug nga gayat ka langit, ket itu mettas ya Anac nga Naipatoley.

¹⁴ “Ket ya Anac nga Naipatoley, maibayug nad met nga arig mettas nga ito panangibayug nito Muyse̍s ito sinan-malaga enna away itun.

¹⁵ Maibayug ngarud, tasun amin nga mamati igina, ket uwed igida ya agnanayun nga biyag,” kunen na.

¹⁶ Tutu met yan, ta gapu iya napalaus nga panagayat ne̍ Apu Diyus kadiya toltoley idi nga lubung, niyawat na ya kackaisu nga Anac na, tasun amin nga mamati igina, madi mapukaw, no di lugud mae̍cdan ka agnanayun nga biyag.

¹⁷ Ta nibon ne̍ Apu Diyus ya Anac na idi nga lubung tasun maisalakan kuma diya toley gapu igina, nga bekken nga tasun ukumen na da.

¹⁸ Ngarud, madi maukum diya mamati iya Anac. Ngem diya madi mamati igina, naukum da mettin, gapu ta madi da ngarud mamati iya turay niya kackaisu nga Anac ne̍ Apu Diyus.

¹⁹ Agten idi ya pakaukuman toley: Inumbe̍t idi nga lubung ngin ya Mangwada ka toley. Ngem gapu ta dake̍c diya wangwanglen diya toltoley, ginabgabay da ya gicbet ngem iya wada.

²⁰ Ta diya amin nga agwangwangel ka dake̍c, kagura da met ya wada. Ket madi da umadenni iya wada, ta madi da gabay nga maipasingen diya dake̍c nga wangwanglen da.

²¹ Ngem ya toley nga agtungpal iya kinapudnu, umadenni ngarud iya wada, tasun maipasingen nga naigapu e̍ Apu Diyus diya winangwangel na.

To kinunen nito Juan nga Mammautisar maipanggep e̍ Je̍sus

²² Kalpasan diyan, nawe̍ nge̍ Je̍sus se̍ dito adalan na enna prubinsiya nga Hudya. Nagedyan da antuni nga namacbautisar kadiya toltoley.

²³ Ket to Juan, namacbautisar met pe̍ itun enna lugar nga E̍nun, iya denni ka ili nga Salim, ta adu ya danum antuni. Ket diya toltoley, pe̍yeng nga uwed nawe̍ iya edyan nito Juan, ket binautisaran na da.

²⁴ Ta itun, madi pekkem naibalud to Juan.

²⁵ Ket ya napasamac itun, nakidisdiskutir dito adalan nito Juan iya isa nga pada da nga Hudyu maipanggep iya panagdalus nga alagaden niya pammati da nga Hudyu.

²⁶ Dikad pe̍ dito adalan ne̍ Juan, nawe̍ da ngarud nagsaludsud igina nga kinunen da, “Mistru, malagip mu to toley nga nipakaemmum dakami itun nga nakibulun ikew enna demmang niya wangag Hordan itun? Ket mamacbautisar kanu met pe̍ yin ita, ket maw-awe̍ kanu igina diya amin nga toltoley!” kunen da.

²⁷ Ket kinunen nito Juan igida, “E̍ Apu Diyus ngas met ya makae̍cde̍ iya pannakabalin niya toley.

²⁸ Dakayu mettas ya makapanecnec nga tutu nga kinunec itun nga, ‘Bekken nga iyaken ya Kristu, no di lugud naibon nac ngas nga agonona sacbay niya panagparang na,’ kunec met itun.

²⁹ “Kaspagarigan ya nubyu, ket igina met ya mangasawa iya nubya. Ket ya gayyem niya nubyu, igina met ya agsiput se̍ agdengdengngeg nga siraragsac iya maariman iya pakalun, ket agang-anggem nga unay no magicna na ya kagi niya nubyu. Ket iyaken, agten nac pe̍ iyan, ta agang-anggem mac nga unayin.

³⁰ Ket to toley nga nipakaemmuc dakayu, kalinteggan na ya dumacdackel ya panagdayaw diya toley igina. Ket no iyaken nin, masapul nga maipasegged dac kun,” kunen nito Juan kadito adalan na.

Nangatngatu ya Anac ngem diya amin

³¹ Ngarud, ya aggayat ka langit, nangatngatu met ya kinadayaw na ngem diya amin nga uwed idi nga lubung. Ket ya agtaud ngas idi nga lubung, ket nailubungan nas met, ket diyan nas banbanag idi nga lubung ya emmu na nga kagkagiyen. Ngem ya gayat ka langit, nangatngatu ngem diya amin.

³² Ket igina, ipakaemmu na ya nasingen na se̍ nagicna na. Ngem awan met umawat iya ipakaemmu na.

³³ Ngem diya toley nga umawat iya ipakaemmu na, itu diya toley nga mangipakaemmu nga napudnu ya kagi ne̍ Apu Diyus.

³⁴ Tutu met yan, ta ya nibon ne̍ Apu Diyus, kagiyen na diya kagi ne̍ Apu Diyus. Ta madi nipaidam ne̍ Apu Diyus to panange̍cde̍ na iya Ispiritu na igina.

³⁵ Ket ya Ama, ayaten na met ya Anac, ket nitalec na igina diya amin.

³⁶ Dikad pe̍ diya mamati iya Anac, uwed igidan ya biyag nga agnanayun. Ngem diya madi agtungpal iya Anac, madi da aglak-am iyan nga biyag, no di lugud uwed igida ya panangukum ne̍ Apu Diyus.