Juan 21 - Ya Baru nga Tulag

To panagpasingen ne̍ Je̍sus enna baybay

¹ Iya name̍nsan, kalpasan nito panagpasingen ne̍ Je̍sus kade̍ Tumas, nagpasingen manin igida nga adalan na enna baybay ka Galilya nga maawagan pe̍ ka Baybay nga Tibe̍riyas. Ket agten idi to panagpasingen na igida:

² Agbubulun itun de̍ Simon Pe̍dru, Tumas nga managan pe̍ ka Singin, e̍ Natanye̍l nga iKana nga isa nga ili ka Galilya, se̍ diya duwa nga anac nito Se̍be̍dyu, se̍ uwed duwa pekkem kadito adalan ne̍ Je̍sus.

³ Ket itun, nalagip nito Simon Pe̍dru ya mawe̍ aglames, itu nga kinunen na kadito kabulun na nga, “Mawe̍ yac lugud aglames,” kunen na. Ket kinunen dito duduma, “Umbe̍t kami met pe̍,” kunen da. Ket nawe̍ da ngarud, nga nagbangka da nga nagkalap. Ngem pulus nga awan met naalac da nga nagwakas.

⁴ Ket ito sumingising ya sinagin, uwed met nge̍ Je̍sus nga agsisikad iya pingit nito baybay, ngem madi nalasin dito adalan.

⁵ Ket kinunen ngarud ne̍ Je̍sus igida, “Kabulun, uwed naalac nu?” kunen na. Ket kinunen da, “Awan met pulus.”

⁶ Ket kinunen ne̍ Je̍sus igidan, “Iwayat nu lugud ya sigay nu iya madiwanan niya bangka, ket uwed ngarud maalac nu,” kunen na. Itu nga niwayat da nga tutu to sigay da iya madiwanan niya bangka ngin. Ket gapu ta adu nga unay diya naalac da nga lames, madi da met maisagpatin.

⁷ Ket to adalan nga dinungdungngu ne̍ Je̍sus, kinunen na ngarud e̍ Pe̍dru win, “E̍ Apu met tuni!” kunen na. Ket to Simon Pe̍dru, ito nagicna na nga ya Apu to agsisikad antuni, dagus nga nagluputin, ta siuuba met itun, se̍ limatuc iya danum nga agpagacdangin.

⁸ Ngem dito duduma nga adalan, nabati da pekkem iya bangka nga sumarunu igina, nga ginoygoyod da to sigay nga nakam-amac ya lames na. Bekken da nga deyyu nga unay iya gacdang itunin, ta pasar ngas sangagasut nga mitrus.

⁹ Ket ito nakagacdang dan, nasingen da nga uwed nabara nga bekkag, se̍ uwed pe̍ matuntunu nga lames antuni, ket uwed pe̍ tinapay.

¹⁰ Ket kinunen ne̍ Je̍sus igida, “Mange̍lbe̍t kayu pe̍ kadito lames nga kaal-alac nu,” kunen na.

¹¹ Ket nawe̍ ngarud to Simon Pe̍dru ito bangka, ket nigacdang na to sigay da nga namekkemekket ka dadackel nga lames. Sangagasut ket lima nga pulu ket tellu met nga amin to lames. Ngem orey adu da nga unay, madi met naan-anu to sigay.

¹² Ket itun, kinunen ne̍ Je̍sus igida, “Ala, mangan kayun,” kunen na. Ket dito adalan, awan nakaitured igida nga nagsaludsud igina no tutu nga igina ya Apu. Ta ya kinapudnu na, emmu da nga sigud iya lemlemmet da nga igina met.

¹³ Ket itun, nimet ne̍ Je̍sus to tinapay se̍ dito lames, se̍ na niwatwat igidan.

¹⁴ Itu yan ya maikatlu nga panagpasingen ne̍ Je̍sus kadito adalan na kalpasan nito pannakapagungar na.

To panangsintir ne̍ Je̍sus e̍ Pe̍dru

¹⁵ Ket ito nakabaaw dan, nagsaludsud nge̍ Je̍sus e̍ Simon Pe̍dru nga kinunen na, “Ikew, Simon nga anac ne̍ Juan, ad-adu kad ya panagayat mu iyaken ngem iya panagayat didi iyaken?” kunen na. Ket kinunen ne̍ Pe̍dru, “Bo, Apu. Emmum nga patpatgen naka,” kunen na. Ket kinunen ne̍ Je̍sus igina, “No agten iyan, istimarem ngarud diya arig nga urbun karne̍ruc, a,” kunen na.

¹⁶ Ket pine̍dwa ne̍ Je̍sus nga sinaludsud e̍ Pe̍dru nga kinunen na manin, “Simon nga anac ne̍ Juan, ay-ayaten nac kadi?” kunen na. Ket kinunen manin ne̍ Pe̍dru, “Bo, Apu. Emmum met nga patpatgen naka,” kunen na. Ket kinunen ne̍ Je̍sus igina, “No agten iyan, aywanam ngarud diya arig nga karne̍ruc,” kunen na manin.

¹⁷ Ket ya kapame̍tlu na, kinunen ne̍ Je̍sus e̍ Pe̍dru, “Simon nga anac ne̍ Juan, patpatgen nac kadi?” kunen na. Ket linumdaang ngarudin nge̍ Pe̍dru gapu ta sinaludsud ne̍ Je̍sus igina iya kapame̍tlu no patpatgen na. Dikad pe̍ kinunen ne̍ Pe̍dru, “Ay, emmum ngarud diya amin, Apu, ket emmum met nga patpatgen naka!” kunen na. Ket kinunen ne̍ Je̍sus igina manin, “Dikad pe̍ istimarem ngarud diya arig nga karne̍ruc, a.

¹⁸ Ibagac ikew ya pudnu: Ito kabanbanwag mu, ikew nga mismu ya mangkawwes iya beggim, ket siwayawaya ka nga mawe̍ iya orey awac nga gabay mu nga pennan. Ngem tutu met nga no malakay kan, igaw-at mu nad ya imam, ket sabali ya mangkawwes ikew win. Ket mangge̍pe̍d nad pe̍ ikew win, nga ipen naka ka madi ka gabay nga pennan,” kunen na.

¹⁹ Ket kinagi ne̍ Je̍sus yan tasun ipakaemmu na no kumaan niya pannakatey ne̍ Pe̍dru. Ket pakaidayawan met pe̍ ne̍ Apu Diyus ya pannakatey ne̍ Pe̍dru. Ket to nodi nga kinunen ne̍ Je̍sus e̍ Pe̍dru itun, ket, “Suruten nac ngarudin,” kunen na.

Maipanggep ito adalan nga dinungdungngu ne̍ Je̍sus

²⁰ Ket itun, limaw-ing nge̍ Pe̍dru, ket nadlaw na to adalan nga dinungdungngu ne̍ Je̍sus nga mip-ipuyut igidan. Igina yan to adalan nga nagse̍rig e̍ Je̍sus ito pananggidam da itun, ito sinaludsud na iya Apu no nagan ya mangiyawat igina.

²¹ Ket ito nasingen ne̍ Pe̍dru yan nga adalan, kinunen na e̍ Je̍sus, “Ket igina, Apu, kumaan nad niya kasasaad na met?” kunen na.

²² Ket kinunen ne̍ Je̍sus, “Bekken mu met nga biyang ya agten iyan. Iyaken nas met ya makaemmu no tarigagayac kuma nga sibibiyag pekkem yan nga toley iya isosolic nad manin idi. Ngem no ikew, basta suruten nac, a!” kunen na.

²³ Ket gapu iyan nga kinunen na, nagdinamag met kadiya pasurut ne̍ Je̍sus nga madi nad kanu matey to dinungdungngu na nga adalan. Ngem bekken met nga agten iyan to kinunen ne̍ Je̍sus, no di lugud kinunen na, “Bekken mu met nga biyang no tarigagayac kuma nga sibibiyag pekkem yan nga toley iya isosolic nad manin idi,” kunen na met.

²⁴ Ket tun nga adalan, ket igina mettas ya mangipakaemmu win iya kinapudnu maipanggep kadiyan nga banbanag, se̍ ya nangisurat pe̍ kadiyan. Ket dakami, emmu mi nga pudnu met yani nga panangipakaemmuc.

Panggibusan nidi nga libru

²⁵ Ket adu pekkem diya duduma nga winangwangel ne̍ Je̍sus itun, nga madi naisurat idi. No maisurat da kuma nga amin, madi kid malaun niya lubung diya liblibru nga pakaisuratan da.