Juan 20 - Ya Baru nga Tulag

To panagungar ne̍ Je̍sus

¹ Ito gibegibet pekkem mas iya agsapa niya Duminggu, nawe̍ to Marya nga iMagdala ito nakaitamennan ne̍ Je̍sus. Ket nasingen na nga naipac gayamin to dackel nga batu nga naigiset ito tamen nan.

² Dikad pe̍ to Marya, nanagtag nga nawe̍ iya edyan ne̍ Simon Pe̍dru se̍ to adalan nga dinungdungngu ne̍ Je̍sus, ket kinunen na igida, “Nimet da met gayam ya Apu iya nakaitamennan na, ket madi kami emmu ya nangipennan da iginan,” kunen na.

³ Dikad pe̍ nawe̍ ngarud nge̍ Pe̍dru se̍ to isa nga adalan ito edyan niya tamen.

⁴ Nanagtag da nga duwa, ngem napaspaspas ya pananagtag nito isa nga adalan, itu nga kinonaan na nge̍ Pe̍dru nga dimateng ito edyan niya tamen.

⁵ Nagdokot nga sime̍re̍p iya uneg, ket nasingen na to nangkubit da nga luput nga line̍n nga nakawale̍t iyan. Ngem madi met imuneg.

⁶ Ket to Simon Pe̍dru, simarunu nga dimateng. Ket igina, nagtarus met nga imuneg iya tamen nin. Nasingen na to nangkubit da nga luput nga line̍n nga nakawale̍t ngas iya uneg.

⁷ Se̍ nasingen na pe̍ nga uwed pe̍ iya uneg to pangyu nga naikalomot itun ito ulu ne̍ Je̍sus. Ngem nalukut met nga bekken nga naitipun kadito duduma nga naikubit nga luput nga line̍n.

⁸ Ket to adalan nga non-ona nga nakadateng ito tamen, imuneg met pe̍ yin. Ket ito nasingen na pe̍, namati ngarud met.

⁹ Ngem madi da pekkem naawatan itun ya banag dito naisurat iya Bibliya maipanggep e̍ Je̍sus nga masapul nga agungar.

¹⁰ Ket dito duwa nga adalan, ito nasingen da ya uneg nito tamen nin, simoli dan kadiya pagedyanan da.

To panagpasingen ne̍ Je̍sus e̍ Marya nga iMagdala

¹¹ Ket itun, e̍ Marya, uwed pekkem iya ruwar nito tamen nga agberberrit. Ket nagdokot nga agberberrit, nga sime̍re̍p iya uneg nito tamen.

¹² Ket uwed gayam nasingen na nga duwa nga anghe̍le̍s nga nakaluput ka puraw, ket agtugtugew da iya nakaipayan nito bangkay ne̍ Je̍sus itun. Ya isa, uwed iya nagtocluwanan nito bangkay itun, ket ya isa, uwed iya nagsakaanan na.

¹³ Ket kinunen met dito anghe̍le̍s e̍ Marya, “Ape̍ agberberrit ka, kabsat?” Ket kinunen ne̍ Marya igida, “Nimet da ngamin ya Apuc, ket madic met emmu ya nangipennan da iginan,” kunen na.

¹⁴ Ito nakagi na yanin, limaw-ing, ket uwed nasingen na nga agsisikad iyan. Ket e̍ Je̍sus met. Ngem madi pekkem nalasin ne̍ Marya.

¹⁵ Ket kinunen ne̍ Je̍sus igina, “Ape̍ agberberrit ka, kabsat? Nagan ya sapsapulem?” kunen na. Ket e̍ Marya, gapu ta pagarup na no igina ya agay-aywan ito minuyungan, kinunen na igina, “Ay, pangngaasim apu, no ikew ya nangiyalis ito bangkay na, ibagam kay ya nangipayam, ta mawe̍ yac alaken,” kunen na.

¹⁶ Ket kinunen ne̍ Je̍sus igina, “Marya!” kunen na. Simangu ngarud nge̍ Marya iginan nga kinunen na, “Ay, Rabbuni!” kunen na, ket kagi He̍briyu yan, nga kayat na nga kagiyen, “Apu Mistru.”

¹⁷ Ket kinunen ne̍ Je̍sus igina, “Madi nac icman nga igapus a, ta madic pekkem simoli iya Ama. Mawe̍ ka ngas ipadamag kadiya kakabsat ku, nga sumoli yac kun iya Amac, nga itu pe̍ ya Ama nu, se̍ ya Diyus ku nga Diyus nu met pe̍,” kunen na.

¹⁸ Ket nawe̍ ngarud nipadamag ne̍ Marya nga iMagdala kadito adalan nga nasingen na met ya Apu, ket nibaga na pe̍ to kinagi niya Apu igina.

To panagpasingen ne̍ Je̍sus kadito adalan na

¹⁹ Ito gumabi yin iyan mettas nga algew Duminggu, uwed dito adalan nga siuurnung iya isa nga edyan. Ket nalacweddan diya gagayangan niyan nga baley, gapu ta mansing da kadito pangpangulu diya Hudyu. Ket pagamwan da, inumbe̍t met nge̍ Je̍sus, nga gasisikadin ito nagtetengngaan da. Ket kinunen na ngarud igida, “Talna kuma ya uwed dakayu,” kunen na,

²⁰ se̍ na nipasingen igida diya ima na se̍ ya le̍pyong na nga natalingu. Ket naragsakan nga unay dito adalan na ito pannakasingen da iya Apu win.

²¹ Ket inulit ne̍ Je̍sus nga kinunen na igida, “Talna kuma ya uwed dakayu.” Ket kinunen na pe̍, “No kumaan nito panangibon niya Ama iyaken, ket agten met pe̍ iyan ya panangibon ku dakayun,” kunen na.

²² Ket ito nakagi na yanin, imanges nga inasngawan na da, ket kinunen na, “Awaten nu ya Ispiritu Santu.

²³ No pakawanen nu diya basul niya orey nagan na nga toley, mapakawan da met. Ket no madi kayu pakawanen da, madi da met mapakawan,” kunen na.

To madi panamati ne̍ Tumas

²⁴ Ngem ito nagpasingen nge̍ Je̍sus kadito adalan na, awan met antuni itun to isa kadito sangapulu ket duwa nga adalan na, nga itu nge̍ Tumas nga maawagan pe̍ ka Singin.

²⁵ Dikad pe̍ dito pada na nga adalan ya nangipadamag igina nga nasingen da ya Apu win. Ngem e̍ Tumas, kinunen na igida, “Ahah! Madic ngarud mamati iyan no madic masingen se̍ makarasew ya gayatan lansa kadiya ima na, se̍ ipalbut ku ya imac iya le̍pyong na nga nadoyoc,” kunen na.

²⁶ Ket ito kalpasan makaduminggu, naguurnung manin dito adalan iya uneg niyan nga baley, ket kabulun da nge̍ Tumasin. Nalacweddan diya gagayangan, ngem inumbe̍t latta nge̍ Je̍sus, ket nagsikad manin iya nagtetengngaan da. Ket kinunen na, “Talna kuma ya uwed dakayu,” kunen na.

²⁷ Ket se̍ na kinunen ngarud e̍ Tumas, “Singem ngarud diya imac, ket karasawem mun. Ket se̍ ipalbut mu ya ima mun iya le̍pyong ku. Ipac mu ngarud ya panagduwaduwa mun, ket mamati kan!” kunen na.

²⁸ Ket e̍ Tumas, kinunen na mettin, “Ikew ngarud ya Apuc se̍ Diyus ku!” kunen na.

²⁹ Ket kinunen ne̍ Je̍sus igina, “Mamati ka itan gapu ta nasingen nac kun, ey? Madaydayaw met diya toley nga mamati nga orey no di dac masingen!” kunen na.

Ya panggep nidi nga libru

³⁰ Adu pekkem diya duduma nga nakaskasdaaw nga pagilasinan nga inariman ne̍ Je̍sus nga nasingen dito adalan na, ngem madi naisurat idi nga libru.

³¹ Ket diya naisurat idi nga libru, naisurat da tasun patiyen nu kuma nga e̍ Je̍sus, igina ya Kristu nga Anac ne̍ Apu Diyus. Ket no mamati kayu, maipaayan kayu ngarud ka biyag nga agnanayun, gapu iya kinaturay na.