Juan 12 - Ya Baru nga Tulag

To panangibucbuc ne̍ Marya ka bangbanglu e̍ Je̍sus

¹ Ito ennem nga algew sacbay nito Padaya Nitatalib, nawe̍ nge̍ Je̍sus ka Be̍tanya. Itu ya ili ne̍ Lasaru, nga igina to lalaki nga pinagungar ne̍ Je̍sus itun.

² Ket enna Be̍tanya, nisaganaan da nge̍ Je̍sus ka panggidam nga panangpangili da igina. E̍ Marta to isa kadito nagistimar igida, ket e̍ Lasaru ya isa nga nakisangu e̍ Je̍sus iya pannangan da.

³ Ket to Marya, namet itun ka isa nga butilya nga bangbanglu nga para labu. Isa nga litru nga bangbanglu nga naggayat ka mula nga nardu ya mayan na, ket nangina nga unay, ta tutu nga awan lauc na. Ket nibucbuc na met to bangbanglu kadiya saka ne̍ Je̍sus, se̍ na nipunas met ya ebbuc na kadiya saka na. Binumngaay ngarud ya ellab nito bangbanglu ito baley.

⁴ Ngem uwed isa kadito adalan ne̍ Je̍sus nga nagkagi yin, nga itu nge̍ Hudas Iskariyute̍ nga mangpanggep nga mangiyawat nad igina. Ket kinunen ne̍ Hudas,

⁵ “Di nabarbaru aya no nailaku kuma ya bangbanglu nga iyan? Ta nailaku kuma ka rinibu nga pisus, nga maikaasi kuma kadiya napanglaw,” kunen na.

⁶ Ngem ya kinagi na nga yan, bekken nga gapu ta isakit na nga tutu diya napanglaw, no di lugud gapu ta isa nga agtatakew. Ket igina met ya agik-ikem iya kuwarta da itun, ket nagkuskusit met itun iya uwed ito laclakassa nga pupunduwan da.

⁷ Ngem kinunen ne̍ Je̍sus, “Bay-am mas a, ta idi nga winangel na, maipaay met iya panangisagana na iya pannakaitamen ku.

⁸ Mayat met ya winangel na, ta no diya napanglaw, pe̍yeng nga uwed da nga makibulubulun dakayu. Ngem iyaken nga gennung, bekken nga agnanayun ya pannakibulubulun ku dakayu idi,” kunen na.

To panangisikat da nga mamatey e̍ Lasaru

⁹ Ket itun, adu dito Hudyu nga nawe̍ antuni, ta nadamag da nga uwed kanu nge̍ Je̍sus ka Be̍tanya. Iya agten iyan, nawe̍ da ngarud iya edyan na, ngem bekken nas nga gapu e̍ Je̍sus, no di lugud tasun mawe̍ da pe̍ singen nge̍ Lasaru nga pinagungar na.

¹⁰ Itu nga dito pangpangulu dito agsirsirbi iya Te̍mplu, nagtutulag da nga patayen da kanu pe̍ nge̍ Lasaru.

¹¹ Ta gapu igina, adu diya Hudyu nga simina kadito pangpangulu, ta namati da e̍ Je̍susin.

To nadayaw nga isusungad ne̍ Je̍sus ka He̍rusale̍m

¹² Ito kadamlag na, dito adu nga toltoley nga nawe̍ nakipadaya ka He̍rusale̍m, nadamag da nga sumungsungad nge̍ Je̍sus ka He̍rusale̍min.

¹³ Dikad pe̍ nagalac da ka bacbain se̍ da nawe̍ nisabet nga sidadayaw igina, nga nip-ipkaw da, “Madaydayaw ya Mangisalakan! Madaydayaw ya agparang gapu iya kinaturay niya Apu! Madaydayaw ngarud ya Ari tida nga iIsrae̍l!” kunen da.

¹⁴ Ket e̍ Je̍sus, namet ka isa nga urbun asnu, ket itu ya nagsakayan na. Ket iya agten iyan, natungpalin to padtu nga naisurat iya Bibliya nga kunen na,

¹⁵ “Dakayu nga iSiyun, madi kayu kuma mansingin. Singen nu, ket umbe̍tin ya Ari nu, nga sisasakey ka urbun asnu.”

¹⁶ Ngem dito adalan ne̍ Je̍sus, madi da pekkem naawatan itun ya kaipapennan diyan nga napasamac. Ngem ito simoli nge̍ Je̍sus ka langit nga pakaidayawan nan, nalagip dan nga uwed met naisurat nga agten iyan iya Bibliya maipanggep igina, ket naawatan dan nga natungpal met nga tutu win.

¹⁷ Ket dito toltoley nga nakasingen ito panangpaungar ne̍ Je̍sus ito Lasaru ito pinkawan ne̍ Je̍sus ito tamen na, nipadpadamag da yan nga napasamac kadiya duduma.

¹⁸ Itu ya gapu na nga adu nga toltoley ya nawe̍ simabet e̍ Je̍susin, ta nadamag da ngamin nga inariman na yan nga nakaskasdaaw nga pagilasinan.

¹⁹ Itu nga dito Parisiyu, nagtetebbar da nga kinunen da, “Singen nu kad! Awan mabalin tidan! Ay-ay! Sumursurut met igina diya amin nga toltoley iya lubungin!” kunen da.

Maipanggep kadito bekken nga Hudyu nga nangsapul e̍ Je̍sus

²⁰ Ket itun, uwed pe̍ diya bekken nga Hudyu nga nawe̍ pe̍ nakipadaya ka He̍rusale̍m.

²¹ Ket didi nga bekken nga Hudyu, nawe̍ da imadenni e̍ Pe̍lipe̍ nga igina ya iBe̍tsayda, nga isa nga ili ka prubinsiya nga Galilya. Ket kinunen da e̍ Pe̍lipe̍, “Apu, no mabalin, gabay mi kuma ya makiam-amlang e̍ Je̍sus,” kunen da.

²² Itu nga e̍ Pe̍lipe̍, nawe̍ na nibaga e̍ Andre̍s, ket igida nga duwa, nawe̍ da nipakaemmu e̍ Je̍sus.

²³ Ket agten idi to kinunen ne̍ Je̍sus igida: “Nadatngan ngarudin ya timpu nga pakaidayawan niya Anac nga Naipatoley.

²⁴ Pudnu yani nga pangngarig nga ibagac dakayu: No ya isa nga bukel trigu, agingga nga maiterkag iya ginet, is-isa pekkem mas. Ngem no miterkag nga arig nga natey nga maitamen iya ginet, tumubu ngarud nga agbisic nad ka adu.

²⁵ Ket agten met pe̍ iyan ya toley yin, ta no ya biyag na idi nga lubung ya ipatpateg na, mapukaw nad mettas igina ya kaipapennan niya biyag na. Ngem no madi na ibilang nga napateg ya biyag na idi nga lubung, madi nga gennung nga mapukaw igina ya kaipapennan niya biyag na, ta agbiyag met ka agnanayun.

²⁶ Ket iya agten iyan, ya mayat nga agsirbi iyaken, masapul nga iyaken ya suruten na, tasun orey no awac ya kapennac, itu met pe̍ yin ya edyan niyan nga agsirsirbi iyaken. Ket diya amin nga agsirsirbi iyaken, idaydayaw nad ngarud niya Ama,” kunen na.

To panangipakaemmu ne̍ Je̍sus iya ipapatey na

²⁷ Nituluy ne̍ Je̍sus nga kinunen na, “Ita, nadagsen met ya ricnac kun. Ngem nagan na ngarud? Mabalin aya no kagiyec e̍ Apu Diyus nga, ‘Ama, ilisi nac kuma idi nga panagrigat ku,’ kunec kuma? Bekken met, ata itu met yani ya numbe̍tac, tasun mapasamac didi iyaken,” kunen na.

²⁸ Ket se̍ nikararag na, “Ama, ipasingem kay ya kinadayaw mun,” kunen na. Ket kalpasan niyan nga kararag na, uwed met nagicna antuni nin nga isa nga timec nga gayat ka langit nga kinunen na, “Nipaspasingec ngarudin ya kinadayaw kun, ket ipasingec mettas nad manin,” kunen na.

²⁹ Ket dito toltoley enna edyan ne̍ Je̍sus, nagicna da ngarud to timec. Diya duduma igida, nipagarup da no nageddug. Ket diya duduma, kinunen da nga isa nga anghe̍l ya nagkagi e̍ Je̍sus.

³⁰ Ngem e̍ Je̍sus, kinunen na igida, “To timec nga nagicna tida, bekken met nga para iyaken, no di lugud agpaay dakayu.

³¹ Ta ita mettin ya panangrugi niya panangukum ne̍ Apu Diyus kadiya toley idi nga lubung. Ita met pe̍ yin ya timpu niya panangpatalew ne̍ Apu Diyus iya agituray idi nga lubung.

³² Ket no iyaken, awisec nad amin nga toley nga mamati iyaken, nad no naibayug gac kun,” kunen na.

³³ Ket kinunen ne̍ Je̍sus yan tasun maemmuwan da no kumaan nad niya ipapatey na.

³⁴ Ket dito toltoley, kinunen da, “Ngem kunen na met iya Linteg tida nga agbiyag kanu ka agnanayun ya Kristu. No tutu yan, ape̍ kunem mun nga masapul nga maibayug ya Anac nga Naipatoley? No tutu nga agnanayun ya Kristu, nagan ngarud nidi nga Anac nga Naipatoley nga kunem?” kunen da.

³⁵ Ket simungbat nge̍ Je̍sus nga kinunen na igida, “Iya di mabayag, awanin ya mangwada dakayu. Itu nga gawaan nu kuma ngarudin ya sumurut, ta uwed pekkem ita ya mangwada dakayu. Ngarud, gawaan nu, tasun madi nakayu makamakam ya gicbet. Ta ya manalan iya nagicbet, di na met mailasin ya pennan na.

³⁶ Dikad pe̍ mamati kayu kuma ngarud iya mangwada ngin, ta uwed pekkem dakayu. Mamati kayu kuma ngarud, tasun agbalin kayu nga toley niya wada,” kunen na. Ket ito nakagi ne̍ Je̍sus diyan kadito toltoley yin, pinanawan na dan, ket madi nagpaspasingen nin.

Madi namati dito Hudyu

³⁷ Ket orey adu dito inariman ne̍ Je̍sus nga nakaskasdaaw nga pagilasinan iya imatang dito toltoley, madi da met namati igina.

³⁸ Ket itu ya nakatungpalan nito kinunen nito mammadtu nga Isayas itun nga, “Awan namati kadiya nikasaba mi, Apu. Ket awan pe̍ malasin da nga pannakabalin mu, Apu,” kunen na.

³⁹ Ket iya agten iyan, madi da nabalinan ya namati, ta agten pe̍ ito kinunen nito Isayas manin nga,

⁴⁰ “Pinagkulap ne̍ Apu Diyus diya mata da, se̍ pinasgat na diya panpanunut da, tasun orey no sumingen da, di da makasingen. Se̍ orey no makapanunut da, di da makackaawat. Ta kaynun no sumoli da nad iyaken, tasun agasac da,” kunen na.

⁴¹ Kinunen nito Isayas yan, ta naipasingen pe̍ igina itun ya kinadayaw ne̍ Je̍sus, ket e̍ Je̍sus met ya nikasaba nito Isayas itun pekkem.

⁴² Ngem orey madi namati diya duduma, adu orey kadito kunse̍hale̍s diya Hudyu diya namati e̍ Je̍sus itun. Ngem madi da nipadpadlaw, gapu ta kansing da to bungguy dito Parisiyu, ta kaynun no ilaskig da da iya pannakigimung da iya gigimungan da.

⁴³ Madi da ngarud nipadpadlaw ya panamati da, gapu ta gabgabay da ya pammadayaw diya toltoley ngem iya panangannamung ne̍ Apu Diyus.

Diya kagi ne̍ Je̍sus ya pakaukuman diya toley

⁴⁴ Ket itun, kinunen ne̍ Je̍sus ka nabileg, “Ya mamati iyaken, bekken nas nga iiyaken ya patiyen na, no di lugud pe̍ ya nangibon iyaken.

⁴⁵ Ket ya makasingen iyaken, masingen na met pe̍ ya nangibon iyaken.

⁴⁶ Inumbe̍t tac iya lubung ngi, nga arig gac nga mangwada ka toley, tasun diya amin nga mamati iyaken, madi da agedyan iya gicbet tin.

⁴⁷ “Ket no maipanggep kadiya madi agtungpal kadiya kagkagic nga nagicna da, bekken nga iyaken ya mangukum igida. Ta madi yac ngarud inumbe̍t tasun ukumec diya toltoley iya lubung, no di lugud tasun isalakan ku da.

⁴⁸ Ngem uwed ngarud met isa nga pangukum kadiya toley nga agmadi iyaken se̍ madi mamati iya kagic. Ya pangukum kadiya madi mamati, ket itu mettas diya kagi nga nibalikas ku. Ta diya kagic nga nipalawag ku, itu met ya pakaukuman da nad iya kaodiyan nga algew.

⁴⁹ Ta no agkagi yac, bekken nga tumaud iya kabucbukudac nga turay, no di lugud gayat iya Ama nga nangibon iyaken. Ta igina ya nangbilin iyaken no nagan ya kagiyec se̍ ibagac.

⁵⁰ Ket emmuc nga makae̍cde̍ ka biyag nga agnanayun ya bilin niya Ama. Itu nga orey no nagan ya kagiyec, kagiyec ngas nga sigun iya nibilin niya Ama iyaken,” kunen na.