Juan 11 - Ya Baru nga Tulag

To pannakatey nito Lasaru

¹ Ket enna ili nga Be̍tanya itun, uwed isa nga lalaki nga agsakit, nga agnagan ka Lasaru. Ket nagedyan pe̍ ka Be̍tanya de̍ Marya nge̍ Marta nga agkabsat, nga kakabsat nito Lasaru nga agsakit.

² Ket idi nga Marya nga kabsat ne̍ Lasaru, itu to nangibucbuc itun ka bangbanglu kadiya saka niya Apu se̍ na nipunas ya ebbuc na.

³ Ket ito agsakit nge̍ Lasaru, nangibon dito babey nga agkabsat ka nawe̍ nangipadamag e̍ Je̍sus. Ket kinunen ngarud dito naibon e̍ Je̍sus, “Apu, agsakit ya patpatgem nga gayyem,” kunen da.

⁴ Ket ito nagicna ne̍ Je̍sus yan, kinunen na, “Madi ipatey ne̍ Lasaru yan nga sakit na. Pakaidayawan ne̍ Apu Diyus yan nga sakit na, ta gapu idi nga mapaspasamac, uwed nad met pakaidayawan niya Anac ne̍ Apu Diyus,” kunen na.

⁵ Patpatgen ngarud ne̍ Je̍sus dito agkakabsat nga Marta, Marya se̍ Lasaru.

⁶ Ngem orey ito nadamag ne̍ Je̍sus nga agsakit to Lasaru, nagedyan pekkem mas iyan ka unus duwa nga algew.

⁷ Ket kalpasan duwa nga algew, kinunen ne̍ Je̍sus kadito adalan na, “Tidan. Sumoli tida ka Hudya ngin,” kunen na.

⁸ Ngem kinunen da igina, “Bay-an tida ya sumoli antuni, Mistru. Bekken met pekkem nga nabayag to tage̍ da mangdampag ikew dito pada tida nga Hudyu antuni,” kunen da.

⁹ Ket e̍ Je̍sus, kinunen na met, “Uwed met sangapulu ket duwa nga uras iya aggidam. Ket ya toley nga manalan iya algew, madi miduclap, ta mawadaan met ya dalanen na gapu iya mangwada idi nga lubung.

¹⁰ Ngem ya manalan iya gabi, maiduclap met, ta awan mangwada igina,” kunen na.

¹¹ Ket kinunen manin ne̍ Je̍sus igida, “Nakatudug nge̍ gayyem tida nga Lasaru win, ngem mawe̍ yac lukagen,” kunen na.

¹² Ngem dito adalan na, kinunen da, “Nabaru a, no nakatudugin Apu, tasun bumileg ya beggi na se̍ umunayin,” kunen da.

¹³ Agten iyan ngarud ya kinunen da, ta nipagarup da nga tutu nga tudug ngas ya kinunen ne̍ Je̍sus. Ngem ya kayat na nga kagiyen, ket natey yin to Lasaru.

¹⁴ Ket iya agten iyan, nilawlawag ne̍ Je̍sus igida nga kinunen na, “Natey nge̍ Lasaru win.

¹⁵ Ngem gapu dakayu, nabarbaru kunec no awan nac iya edyan na ito pannakatey na, tasun ita, bumileg ya panamati nu. Ala, mawe̍ tida enna edyan nan,” kunen na.

¹⁶ Ket to Tumas nga maawagan pe̍ ka Singin, kinunen na kadito kabulun na nga adalan, “Tidan! Mibulun tida ngarud iginan, tasun mairaman tida e̍ Mistru nga matey!” kunen na.

E̍ Je̍sus ya mangpaungar se̍ mange̍cde̍ ka biyag

¹⁷ Ito nakadateng de̍ Je̍sus enna sakup niya Be̍tanya ngin, nadamag da nga naitamen nin to Lasaru, ket eppat nga algew nan.

¹⁸ Ket gapu ta tumellu nga kilume̍tru was ya kadeyyu niya ili nga Be̍tanya ka He̍rusale̍m,

¹⁹ adu pe̍ dito Hudyu nga taga-antuni nga nawe̍ nakipagladingit kade̍ Marta nge̍ Marya gapu ito pannakatey nito kabsat da nga lalaki.

²⁰ Ket ito nadamag ne̍ Marta nga sumungsungad nge̍ Je̍susin, rinumwar nga nawe̍ simabet igina. Ngem e̍ Marya, nabati iya uneg nito baley da.

²¹ Ket kinunen ne̍ Marta e̍ Je̍sus, “Apu, no uwed ka kuma idi itun, madi kuma natey ya kabsat ku!

²² Ngem orey ita, emmuc met nga orey nagan na nga adngem e̍ Apu Diyus, e̍cde̍ na met ikew,” kunen na.

²³ Ket kinunen ne̍ Je̍sus igina, “Agungar met ya kabsat mu,” kunen na.

²⁴ Ket kinunen ne̍ Marta, “Bo, emmuc a, nga agungar nad iya panagungar diya natey iya kaodiyan nga algew,” kunen na.

²⁵ Ket kinunen ne̍ Je̍sus igina, “Iyaken mettas ya mangpaungar se̍ mange̍cde̍ ka biyag. Dikad pe̍ ya mamati iyaken, orey no matey, agbiyag nad mettas.

²⁶ Ket diya sibibiyag pekkem nga mamati iyaken, pulus nad nga madi matey ka agnanayunin. Patiyem kad yan nga kunec?” kunen na.

²⁷ Ket kinunen ngarud ne̍ Marta igina, “Bo, Apu. Patiyec ngarud nga ikew nga tutu ya Kristu nga Anac ne̍ Apu Diyus, nga naipadtu nga umbe̍t idi nga lubung,” kunen na.

To panagluwa ne̍ Je̍sus

²⁸ Ket ito nakunen ne̍ Marta yanin, simoli ito baley da nga inayab na ya kabsat na nga Marya. Ket kinunen na nga niyasasim, “Uwed nge̍ Mistru win, ket palbe̍ten naka,” kunen na.

²⁹ Ket ito nagicna ne̍ Marya yan, rinumwar nga dagus nga nawe̍ ito edyan de̍ Je̍sus,

³⁰ ta madi da pekkem imuneg iya ili, no di lugud nagsardeng da pekkem ito nangsabtanan ne̍ Marta igida.

³¹ Ket dito Hudyu nga kabulun ne̍ Marya nga nakipagladingit igina enna baley da, nasingen da nga dagus nga rinumwar nge̍ Marya. Ket nipuyut da ngarud igina, ta pagarup da no mawe̍ agsangit enna tamen nito Lasaru.

³² Ket ito nakadateng nge̍ Marya ito edyan ne̍ Je̍sus, nagparintumeng iya sangu na, nga kinunen na e̍ Je̍sus, “No uwed ka kuma idi itun Apu, madi kuma natey ya kabsat ku!” kunen na.

³³ Ket ito nasingen ne̍ Je̍sus nga agsangsangit nge̍ Marya ngin se̍ orey pe̍ dito Hudyu nga nibulun igina, nakipagleddaang ngarud igida, ket nasakit nga unay ya ricna na.

³⁴ Ket kinunen ne̍ Je̍sus, “Awac ya nangitamnan nu igina?” kunen na. Ket kinunen da, “Umbe̍t mu singen a, Apu,” kunen da.

³⁵ Ket nagluwa met pe̍ nge̍ Je̍susin.

³⁶ Itu nga kinunen dito Hudyu, “Singen nu! Napalaus met pe̍ ya panangipateg na igina!” kunen da.

³⁷ Ngem uwed dito duduma igida nga nagkunen, “Di lugud igina kanu to nangpalaing ito kulap itun? Ape̍ nga di na met nabalinan nga nilisi yan nga toley ka patey?” kunen da.

To panagungar nito Lasaru

³⁸ Ket napalaus manin ya leddaang ne̍ Je̍sus ito umadenni da ito tamen. Ket to tamen, liyang nga nagistan ka isa nga dackel nga batu.

³⁹ Ket kinunen ne̍ Je̍sus, “Ipac nu kay ya batu nga giset na,” kunen na. Ngem e̍ Marta nga kabsat nito natey, kinunen na, “Ngem nalabin, Apu, ta eppat nga algew na nga naitamen nin!” kunen na.

⁴⁰ Ngem kinunen ne̍ Je̍sus igina, “Di yac kad nibaga ikew nga no mamati ka, masingem ya pakaidayawan ne̍ Apu Diyus?” kunen na.

⁴¹ Dikad pe̍ nipac da ngarudin to batu. Ket e̍ Je̍sus, limangad nga kinunen na, “Ama, agyaman nac, ta ipangag nac.

⁴² Ket emmuc ngarud nga sigud nga ipangag nac nga kankanayun, ngem kinagic yan gapu ngas kadiya toley nga uwed idi nga aggigicna, tasun patiyen da kuma nga tutu nga ikew ya nangibon iyaken,” kunen na.

⁴³ Ket ito nakagi na yanin, nagpekkaw nga kinunen na, “Lasaru, rumwar kan!” kunen na.

⁴⁴ Ket rinumwar ngarud to natey nga sipupute̍put pekkem to luput nga nangirapet kadiya ima na iya beggi na, se̍ naipute̍put kadiya saka na. Ket ya rupa na, sikakalomot ka pangyu. Ket binilin ne̍ Je̍sus dito toley nga kinunen na, “Ukasan nu ngarudin, tasun mawayawayaanin,” kunen na.

To panangisikat da nga mangtekkem e̍ Je̍sus

⁴⁵ Ket iya agten iyan, dito Hudyu nga nangbulun e̍ Marya se̍ nakasingen ito winangel ne̍ Je̍sus, adu igida diya namati e̍ Je̍susin.

⁴⁶ Ngem uwed duduma nga nawe̍ nangipadamag kadito Parisiyu ito winangel ne̍ Je̍sus.

⁴⁷ Ket iya agten iyan, dito Parisiyu se̍ dito pangpangulu dito agsirsirbi iya Te̍mplu, miniting da ya Kunse̍hus. Ket nagtetebbar da, nga kinunen da, “Nagan ngarud ya wanglen tidan? Ta adu met nga tutu diya nakaskasdaaw nga ar-arimanen niyan nga toley yin!

⁴⁸ Ket no ipamoya tida, kaynun no mamati nad diya amin nga toltoley iginan. Ket no agten iyanin, umbe̍t ngarudin diya agtuturay nga iRuma nga mangpirdi iya Te̍mplu tida se̍ iya pagiliyan tida pe̍,” kunen da.

⁴⁹ Ngem nagkagi to isa igida nga agnagan ka Kaipas, nga igina to agdama nga kangatuwan nga agsirsirbi iya Te̍mplu itun nga dagun, ket kinunen na, “Ape̍? Arig met nga awan nga pulus emmu nun!

⁵⁰ Madi kayu aya maawatan nga nabarbaru lugud dactida no matey kuma ya is-isa ngas nga toley nga agpaay kadiya amin nga toltoley, ngem ya mapirdi nad met ya amin niya pagiliyan tida?” kunen na.

⁵¹ Ngem yan nga kinagi nito Kaipas, bekken nga timaud iya kabucbukudan na ngas nga nakem. Ta gapu ta igina ya naisaad nga kangatuwan nga agsirsirbi iyan nga dagun, padtu ngarud to kinagi na, nga nipaikagi ne̍ Apu Diyus igina. Ket to padtu, maipanggep met iya pannakatey ne̍ Je̍sus nga maipaay iya pannakaisalakan diya toltoley iya pagiliyan da.

⁵² Ket bekken nas nga maipaay igida, no di pe̍ kadiya maibilang nga an-anac ne̍ Apu Diyus nga naiwaraswaras kadiya nadumaduma nga pagiliyan. Agten iyan ngarud tasun diya anac ne̍ Apu Diyus, maitipun da nga amin iya is-isa nga bungguy ne̍ Apu Diyus.

⁵³ Ket iya agten iyan, nanipud ito miting da, nagiinnumanan dito pangpangulu diya Hudyu no kumaan kuma niya panangpatey da e̍ Je̍sus.

⁵⁴ Ket itu ya gapu na nga madi nagpasingen nge̍ Je̍sus kadiya Hudyu enna Hudya ngin. Pimanaw was antuni nga nawe̍ iya lugar nga denni iya away, iya isa nga ili nga managan ka E̍praim. Ket nagedyan antuni nin nge̍ Je̍sus se̍ dito adalan na.

⁵⁵ Ket itun, dandani to timpu padaya diya Hudyu nga maawagan ka Padaya Nitatalib. Dikad pe̍ adu diya nanang-at nga nawe̍ ka He̍rusale̍m nga naggayat kadiya nadumaduma nga barbaryu. Nawe̍ da ngarudin, tasun tungpalen da nga mona ya alagaden da nga mangpadalus iya beggi da, sacbay niya panangrugi nito padaya.

⁵⁶ Ket dito toltoley nga adu ka He̍rusale̍m, sinapsapul da nge̍ Je̍sus. Ket ito naguurnung da enna Te̍mplu, nagsisinnaludsud da nga kinunen da, “No ikew, nagan ya kunem? Umbe̍t ngata makipadaya?” kunen da.

⁵⁷ Agten kadiyan ngarud diya sinapsaput da, ta dito pangpangulu dito agsirsirbi iya Te̍mplu se̍ dito Parisiyu, nibilin da kadiya toltoley nga no uwed makaemmu iya edyan ne̍ Je̍sus, ipakaemmu na kanu igida, tasun tacmen da.