Hudas 1 - Ya Baru nga Tulag

¹ Iyaken nge̍ Hudas nga agsirsirbi e̍ Je̍su Kristu, se̍ kabsat ne̍ Santiyagu. Isurat ku yani nga surat dakayu nga napateg iya imatang ne̍ Apu Diyus nga Ama, dakayu nga pinili na nga toley na, se̍ maaywanan gapu e̍ Je̍su Kristu.

² Sapay kuma ta nawadwad ya tulung, talna, se̍ ayat, nga gayat e̍ Apu Diyus nga naipaay dakayu.

Maipanggep kadito mangisursuru ka busid

³ Dakayu nga patpatgec, napalaus ya panggep ku itun nga agsurat dakayu maipanggep iya is-isa nga lak-amen tida nga pannakaisalakan. Ngem ita, emmuc nga masapul nga sabali lugud ya isurat ku dakayun. Ta maricnac nga masapul nga agsurat tac dakayu, tasun ibagbagac nga sipapasnec dakayu nga ikalinteggan nu kuma ya panursuru niya pammati tida, nga itu ya nitalec ne̍ Apu Diyus dactida nga toley na. Nitalec na yani nga panursuru dactida nga nam-ame̍nsan nas itun, ket awan met panagbaliw na.

⁴ Ket agten iyan ya ibagac dakayu, ta uwed da met toley nga madi mangipateg e̍ Apu Diyus, ket makibulubulun da nga sililimed din dakayu. Igida met dito naisurat itun pekkem, nga ya pannakaukum da ngas ya pagtungpalan da. Ta pasabaliyen da met ya kinapudnu maipanggep iya siaayat nga panangaasi niya Diyus tida. Isursuru da met nga maipalubus kanu diya naalas nga banbanag. Ilibac da met pe̍ ya kackaisu nga pagsirbiyan se̍ Apu tida, nga itu nge̍ Je̍su Kristu.

⁵ Ket itan, uwed ipalagip ku dakayu, orey naisuru nga nalaing yani dakayu itun. Malagip nu ngarud to panangisalakan niya Apu kadito Israe̍lita ito pinaalis na da manipud ka E̍hiptu itun. Ngem laglagipen nu kuma pe̍ to napasamac kalpasan niyan, ta dito madi mamati itun, pinukaw na da met.

⁶ Ket laglagipen nu kuma pe̍ dito anghe̍le̍s nga naglablabes ito turay nga naitalec igida, ta pimanaw da met ito naibilin nga pagedyanan da itun. Ket ya Apu, nibalud na da iya nauneg nga lugar nga nagicbet, ket nakawaran da met pe̍ ennan ka kawar nga agnanayun ya baked na, agingga nga madatngan nad ya pannakaukum iya nakaskasdaaw nga Timpu.

⁷ Ket malagip nu ngarud pe̍ to nagbanagan dito toltoley ka Suduma se̍ Gumura itun, se̍ diya toltoley kadiya kabangibang da nga il-ili. Dake̍c met to winangwangel da, nga paris mettas nito winangel dito anghe̍le̍s. Ta makikamkamalala met dito toltoley, se̍ tinungtungpal da met pe̍ diya sabsabali nga ricna niya beggi da. Ket pakabagbagaan tida ngarud da, ta nakadusaan da met ya apuy nga madi pulus nga makusep.

⁸ Ket agten met pe̍ iyan dito toley iya edyan nu ita nga madi mangipateg e̍ Apu Diyus. Diya arapaap da ngas met ya mamettan da kadiya tungtungpalen da. Ket iraman da met diya begbeggi da mettas kadiya bekken nga nadalus, se̍ ibilang da nga awan pateg na ya naisaad nga turay, se̍ laisen da pe̍ diya nadayaw nga nailangitan.

⁹ Ngem bekken nga agten iyan to winangel nito Anghe̍l Mige̍l nga pangulu mettas diya anghe̍le̍s ne̍ Apu Diyus. Ta ito nagdinniskutir da nge̍ Satanas, no nagan igida ya mamet ito bangkay ne̍ Muyse̍s, madi met naitured nito Mige̍l nga pinabasul nge̍ Satanas maipanggep iya kinadake̍c na. Madi ngarud naitured nito Mige̍l ya agten iyan, orey igina mettas ya pangulu diya anghe̍le̍s ne̍ Apu Diyus. Ket agten idi ngas to kinunen na: “E̍ Apu Diyus kuma ngas ya makaemmu nga mangilbec ikew win!” kunen na.

¹⁰ Ngem no dito toley nga kunec iya edyan nu, uy-uyawen da lugud met diya orey nagan na nga di da maaw-awatan. Ket yan nas met gabay niya beggi da ya maawatan se̍ tungtungpalen da, nga arig mettas nga gangey diya an-animal, nga kurang ya panagpanunut da. Ket didi nga tungtungpalen dito agten iyan nga toley, pakapirdiyan da ngas met.

¹¹ Kackaasi nad ngas diyan nga toley, ta iparparis da met diya ugali da ito dake̍c nga ugali nito Kain itun. Se̍ kuwarta met ya ipatpateg da, nga agten mettas ito pannakairradu nito Balaam. Ket pakaukuman da ngarud met ya panagsukir da, nga agten mettas ito Kure̍ itun.

¹² Ket dito agten iyan nga toley iya edyan nu, arig da nga mansa dakayu, ta igida ya mangsipar iya panagiinnayat nu kadiya panagsasangu nu nga mangan. Ta pulus nga awan alyew da nga makisangu dakayu iya panangipalagip nu iya Apu, ket yan nas beggi da ya asikasuwen da. Maiyarig da met ka ulep nga maib-ibluut nga di makae̍cde̍ ka udan. Ket arig da met pe̍ nga kayu nga madi mamisic, orey timpu nga panagbibisic. Ngarud, awan pulus nabaru nga ipaay da, nga arig nga kayu nga natey se̍ nabagut pe̍ yin.

¹³ Ket nalaka nga malasin ya kinadake̍c niya ugali da, ta nakal-alyew diya wanglen da. Itu met ya arig nga nalaka nga pakasingnan ka rokac nga tumaud ka dackel nga palung iya baybay. Ket maiyarig da met pe̍ ka bituwen nga or-orey ya pananalan na. Ngarud, naisagana ngin para kaditun nga toley ya pakadusaan da, nga itu ya agnanayun nga gicbet ito nauneg nga lugar.

¹⁴ Ket orey to E̍nuc itun, nga maikapitu ito kapututan nito Adan, uwed nipadtu na itun pekkem maipanggep iya agten kadiyan nga toley. Ta kinunen na ito padtu na, “Denggen nu! Umbe̍t nad met ya Apu agraman diya rinibribu nga anghe̍le̍s na,

¹⁵ tasun arimanen na ya panangukum na no disidiren na nad diya amin nga toley maipanggep iya pagbanagan da. Ipakaemmu na nad ngarud diya amin nga dake̍c nga winangwangel diya amin nga madi agdayaw e̍ Apu Diyus. Ta ipanecnec na nad met nga maikuntra e̍ Apu Diyus dito winangwangel da gapu iya dake̍c nga ugali da. Ket ipakaemmu na nad pe̍ dito amin nga dake̍c nga nikagkagi diya managbasul nga madi agdayaw e̍ Apu Diyus,” kunen na.

¹⁶ Ket itu diyan diya toley nga managsulag se̍ managumsi. Ket diyan nas dake̍c nga tarigagay da ya tungtungpalen da, ket nalaing da nga mangipasindayaw iya beggi da. Nalaing da pe̍ nga mangawis ka toley gapu kadiya napaw-is nga kagkagi da, tasun maawis da diya toley.

Pamagbaga kadiya mamati

¹⁷ Ngem dakayu nga gennung, kakabsat, laglagipen nu kuma dito nibagbaga dito apustule̍s niya Apu tida nga Je̍su Kristu.

¹⁸ Ta kinunen da dakayu nga, “No madatngan ya kaodiyan nga timpu win, uwed nad diya toley nga manguy-uyaw iya pammati nu. Ket agtungtungpal da kadiya dake̍c nga tartarigagay da kem pe̍ yasin,” kunen da.

¹⁹ Itu didi diya toley nga mangpataud ka panagsusupyat nga mangpasina kadiya toley. Diya banbanag ngas idi nga lubung ya ipatpateg da, ket awan igida ya Ispiritu ne̍ Apu Diyus.

²⁰ Ngem dakayu nga patpatgec, pabilgen nu kuma ya panpanunut nu gapu iya nadiyusan mettas nga pammati nu, se̍ paiturayan kayu kuma iya Ispiritu Santu iya panagkararag nu.

²¹ Laglagipen nu kuma nga pe̍yeng ya panagayat ne̍ Apu Diyus dakayu. Se̍ namnamaen nu kuma nga pe̍yeng ya agnanayun nga biyag nga ipaay niya Apu tida nga Je̍su Kristu nad dactida gapu iya panangaasi na.

²² Ket uwed duduma dakayu nga agduwaduwa iya panamati da. Nabaru no kaasiyan nu da.

²³ Ket diya duduma, isalakan nu da kuma iya dake̍c nga pagtungpalan da, nga arig nga rabsuten nu da ka apuy nga pakatayan da. Ket uwed da met duduma nga kaasiyan nu kuma pe̍, ngem agannad kayu ngarud, tasun madi kayu maigamer iya kinadake̍c da. Ta guraen nu ya orey nagan na nga ugali da nga namansaan gapu iya kinatoley da nga dake̍c. Ket maiyarig yani nga adeyyuwan nu ya badu da nga narugitin gapu iya narugit nga beggi da.

²⁴ Ket itan, laglagipen tida kuma nga pe̍yeng nge̍ Apu Diyus. Igina met ya uwed kabaellan na nga mangaywan dakayu tasun madi kayu maiturung ka pakabasulan. Se̍ igina pe̍ ya uwed kabaellan na nga mangidateng dakayu nad nga sidadalusin se̍ siraragsac kin iya sangu na, nga itu ya edyan nga pakasingnan iya kinadayaw na.

²⁵ Ngarud, laglagipen nu kuma nga pe̍yeng nge̍ Apu Diyus, nga ig-igina ngas met ya Diyus nga Mangisalakan dactida, gapu e̍ Je̍su Kristu nga Apu tida. Sapay kuma ta igina ya madaydayaw, nga kangatuwan ya dayag na, kinaari na, pannakabalin na, se̍ turay na. Uwed met didi igina ito awan pekkem naparsuwa. Ket uwed da pe̍ orey ita, ket uwed da mettas pe̍ ka agnanayun nga awan patingga na! Agten iyan kuma ngin.