He̍briyu 9 - Ya Baru nga Tulag

Maipanggep ito panagdaydayaw diya Israe̍lita itun

¹ Ket ito nona nga tulag ne̍ Apu Diyus kadiya toley na, uwed dito bilbilin maipanggep iya panagdaydayaw da igina. Se̍ uwed pe̍ to nasantuwan nga pagdaydayawan nga inariman toley idi nga lubung.

² Ta uwed to pagdaydayawan nga naariman ka tulda. Ket to pagdaydayawan, uwed duwa nga parte̍ na. Ya makin-ruwar nga parte̍, ket naawagan ka Nasantuwan nga Edyan. Itu to edyan nito dilag, se̍ to lamisaan nga papayan da ito tinapay nga maidatun e̍ Apu Diyus.

³ Ket kurtina met ya giset nito pagdaydayawan, se̍ uwed met pe̍ kurtina nga nanglinged ito akin-uneg nga parte̍ na. Ito linged nito maikadduwa nga kurtina, naawagan ka Kasantuwan nga Edyan.

⁴ Ket itu ya edyan nito pagdatunan nga naariman ka balituc, nga pagpocpooran da ka nabangug. Ket to Kasantuwan nga Edyan, itu met pe̍ ya edyan nito lakasa nga nakalopkopan ka balituc. Ket to lakasa, itu to pakalaglagipan ito tulag nga nikari ne̍ Apu Diyus. Ket itu to nakaipayan nito balituc nga gusi nga nakaitalipnan nito makan nga maawagan ka mana. Naipay pe̍ ito lakasa to sacgukud nito Arun nga nagsaringit itun, se̍ dito dumdumpe̍lang nga batu nga nakaisuratan dito sangapulu nga bilin ne̍ Apu Diyus.

⁵ Ket iya sap-ew nito lakasa, uwed duwa nga naariman nga balituc nga uwed payac da. Pakalaglagipan didi iya nadayaw nga kauwed ne̍ Apu Diyus antuni. Nagsinnangu da iya sap-ew nito lakasa, ket nagdennet dito payac da nga nanglidum ito tekkeb nito lakasa. Ket ya tekkeb nito lakasa, itu to naawagan ka Pakaudasan nga Pakapakawanan diya Basbasul. Ngem bekken kuma nga ya surat ku wi ya pangilawlawagac kadiyan nga banbanag.

⁶ Ket agten iyan ngarud to pannakaurnus nito pagdaydayawan itun. Ket pe̍yeng nga imuneg dito agsirsirbi ito makin-ruwar nga parte̍ na, tasun tungpalen da ya rebbeng da e̍ Apu Diyus.

⁷ Ngem to kangatuwan nga agsirsirbi ngas met ya nakauneg ito akin-uneg nga parte̍ nga naawagan ka Kasantuwan nga Edyan. Ket orey igina, mame̍nsan ngas met iya unus makadagun nga mabalin na ya umuneg iyan. Se̍ no umuneg, masapul nga agitarey ka daga nga idatun na e̍ Apu Diyus, gapu mettas kadiya mismu nga basul na, se̍ gapu pe̍ kadiya amin nga dake̍c nga naariman diya duduma nga toltoley itun nga madi da nadlaw nga basul da.

⁸ Ket nalawag ngarudin ya isuru niya Ispiritu Santu dactida maipanggep kadiyan nga banbanag, nga agten idi: Bayat niya kauwed pekkem nito makin-ruwar nga parte̍ nito pagdaydayawan idi nga lubung, madi pekkem naipakaemmu kadiya toltoley no kumaan niya makauneg da kuma iya pudnu nga Kasantuwan nga Edyan.

⁹ Ket to panagdaydayaw da itun, itu ya mangipakaemmu dactida itan nga madi ngarud umdas ya nakem diya agdaydayaw, gapu kadiya sagsagut se̍ an-animal nga idatun da e̍ Apu Diyus.

¹⁰ Ta dito datdatun da itun, al-alagaden ngas met nga agpaay ngas kadiya masingen nga banbanag, nga agten kadiya pannangan, panaginum, se̍ nadumaduma nga al-alagaden maipanggep iya pannakadalus. Ket napateg diyan agingga ngas iya timpu niya panangbangun ne̍ Apu Diyus iya kabarbaru nga panggep na.

Maipanggep iya daga ne̍ Je̍su Kristu

¹¹ Ket ita, inumbe̍t mettin nge̍ Kristu nga Kangatuwan nga Agsirsirbi nga mangibegbeggi dactida e̍ Apu Diyus. Igina ya agsirsirbi nga mangipaay kadiya nabaru nga banbanag nga nabangunin. Ket ya panagsirsirbi ne̍ Kristu, nabarbaru. Ta bekken nga ya uneg niya isa nga pagdaydayawan nga inariman toley ya pagdaydayawan na. Kayat na nga kagiyen, bekken nga idi nga nakaparsuwaan nga lubung ya pagdaydayawan na, no di lugud nangatngatu. Ket se̍ awan pagkurangan niyan nga imuneggan na nga pagdaydayawan na.

¹² Ket ito imuneg nge̍ Kristu iya Kasantuwan nga Edyan iyan nga pagdaydayawan, nam-ame̍nsan ngas nga masapul nga imuneg iyan, ket kustu win para iya amin nga timpu. Se̍ bekken nga ya daga kalding winno ya daga niya urbun baka to nitarey na nga nidatun na, no di lugud ya daga mettas niya mismu nga beggi na. Ket iya agten iyanin, pinatalgeddan ne̍ Kristu ya pannakasubbut tida nga agnanayunin.

¹³ Ket sigun ito daan nga wagas nga panagdaydayaw itun, diya toley nga nairaman kadiya naibilang nga bekken nga nadalus, ket naibilang da nga narugitin iya imatang ne̍ Apu Diyus. Ngem no nawarsiyan diya agten iyan nga toley ka daga niya naidatun nga kalding winno turu nga baka, se̍ iya kebbu niya napooran nga bumalasang nga baka, ket naibilang da nga awan rugit dan, tasun maibilang nga nadalus manin ya beggi da iya imatang ne̍ Apu Diyus.

¹⁴ Ket no agten iyan to pakadalusan da itun nga timpu, di ngarud nabilbileg pekkem ya pannakabalin niya daga ne̍ Kristu? Ta gapu iya panangiturung niya agnanayun nga Ispiritu, niyawat ne̍ Kristu e̍ Apu Diyus ya beggi na nga datun nga awan pagkurangan na. Ket gapu iya daga na, nadalusan diya lemlemmet tidan iya pakarigatan tida gapu ito panagtungpal tida kadito tungtungpalen nga awan mamaay da. Ket ita, siwayawaya tidan nga agsirbi iya sibibiyag nga Diyus.

¹⁵ Dikad pe̍ e̍ Kristu ngarud met ya mangibabaet nga nangirugi iya baru nga tulag. Itu nga diya pinili ne̍ Apu Diyus nga katulag na, matawid da ngarudin to nikari na nga agnanayun nga tawid. Ta gapu ito pannakatey ne̍ Kristu, nawayawayaan dan iya pannakaukum da gapu kadito basbasul da, nga naariman da ito uwed da pekkem iya masakupan nito nona nga tulag.

¹⁶ Kaspagarigan, uwed isa nga toley nga nagisurat ka katulagan, tasun no natey yin, emmu ngarud diya toley no nagan diya agtawid kadiya sanicwa na nga nabati. Ngem emmu tida nga awan pekkem matawid no madi pekkem maipanecnec ya pannakatey nito nangisurat.

¹⁷ Ta bayat niya kauwed na nga biyag pekkem ya agpatawid, madi pekkem matungpal ya katulagan. Ngem no natey yin, matungpalin amin diya naisurat nga nipatulag na.

¹⁸ Ket agten iyan met pe̍ to nona nga nipatulag ne̍ Apu Diyus kadiya toley na, ata to panangidaga da kadiya datun da, itu ya nangpatalged itun ito panangikari na.

¹⁹ Ta to Muyse̍s itun, nipakaemmu na nga nona kadito toltoley dito amin nga bilbilin ito Linteg. Kalpasan na, namet ka daga diya urbun baka se̍ diya kalding, nga uwed lauc na nga danum. Ket se̍ na winarsiyan to nakaisuratan nito Linteg, se̍ dito amin nga toltoley. To pangwarsi na, dutdut karne̍ru nga nakulur ka nadgang, se̍ isa nga ruut nga maawagan ka hisupu.

²⁰ Se̍ uwed pe̍ kinagi nito Muyse̍s kadito toltoley itun nga kinunen na, “Idi nga daga, itu ya mangpalagda iya tulag nga nibilin ne̍ Apu Diyus dakayu,” kunen na.

²¹ Ket agten iyan met pe̍ to panangwarsi na ito pagdaydayawan da nga tulda, se̍ dito amin nga alikamen nga mausar ito panagdaydayaw da.

²² Ngarud, sigun iya Linteg, nistay amin dito naibilang nga narugit itun gapu ka basul, mabalin nga maibilang nga nadalusan manin gapu ka daga. Ket se̍ no awan naidaga nga pagdatun, awan met pannakapakawan niya basul.

Ya namaymayat nga panagdaydayaw se̍ datun

²³ Ket iya agten iyan, inannamungan ne̍ Apu Diyus to panagdaydayaw diya Israe̍lita itun ito pagdaydayawan da nga tulda, gapu ta uwed to panangidaga da ka animal maikanatad ito nibilin na. Ngem to panagdaydayaw da, kaiyarigan ngas met niya kustu nga panagdaydayaw ka langit. Ta enna langit nga gennung, masapul ngarud nga namaymayat diya datun antuni ngem kadiyan nga datdatun da.

²⁴ Diya namaymayat ngarud ya masapulin, ta e̍ Kristu, bekken nga ya nasantuwan nga pagdaydayawan nga inariman toley to imuneggan na. Ta to nona nga pagdaydayawan, ket ladawan ngas niya kustu nga pagdaydayawan nga uwed ka langit. Ngem e̍ Kristu, imuneg ngarud iya pagdaydayawan ka langit iya imatang mettas ne̍ Apu Diyus. Ket ita, uwed met antuni nin nga mangibegbeggi nga maipaay dactida.

²⁵ Ket to kangatuwan nga agsirsirbi nga mangibegbeggi ito pagdaydayawan nga tulda, masapul nga dinagun nga umuneg nga agdatun ito pagdaydayawan da nga nasantuwan. Ket ya nidatun na itun, bekken met nga ya daga na, no di lugud daga animal. Ngem e̍ Kristu nga gennung, to nidatun na, ket itu ya mismu nga beggi na mettas. Ket bekken met nga name̍n-adu nga imun-uneg nge̍ Kristu nga nangidatdatun iya beggi na.

²⁶ Ta no masapul nga pe̍yeng nga mabaliwan ya pannakaidatun na kuma, masapul ngarud met nga pe̍yeng nga mapatey nge̍ Je̍sus, manipud ito pannakaparsuwa niya lubung. Ngem ya kinapudnu na, nagparang nga nam-ame̍nsan, ket kustu win para iya amin nga timpu yan nga panagparang na. Nagparang ngarud ito nadatngan ya pannakatungpal niyan nga timpu win, tasun ipac na diya basbasul gapu iya panangidatun na iya beggi na.

²⁷ Ket no dactida nga toley, sigud nga naikeddeng nga matey tida ka mame̍nsan, ket kalpasan na, uwed pe̍ yin ya panangukum ne̍ Apu Diyus.

²⁸ Ket agten pe̍ iyan nge̍ Kristu, ta nam-ame̍nsan ngas nga naidatun, ket kustu para iya amin nga timpu to pannakaidatun na. Naidatun ngarud tasun inagtu na nga nipac diya basbasul diya adu nga toltoley. Ket agparang nad manin nge̍ Kristu ka maikadduwa, ngem bekken nin nga maigapu ka basul ya maikadduwa nga umbe̍tan na, no di lugud tasun mailayunin ya panangisalakan na dactida nga sinanama nga agpadpadaan igina.