He̍briyu 8 - Ya Baru nga Tulag

¹ Ket agten idi ya kaipapennan niya ibagbagac: Uwed mettin Kangatuwan nga Agsirsirbi nga mangibegbeggi dactidan e̍ Apu Diyus, nga agten mettas ito nilawlawag ku. Ket igina, agtugtugew win iya kadayawan nga edyan, nga itu ya madiwanan niya trunu nga pagtugawan niya Nadayag nga Diyus ka langit.

² Igina mettin ya agsirsirbi iya edyan nga nasantuwan enna pudnu nga pagdaydayawan e̍ Apu Diyus, nga bekken nga inariman toley, no di lugud ya Apu mettas ya nangbangun.

³ Ket diya amin nga kangatuwan nga agsirsirbi iya pagdaydayawan, rebbeng da nga amin ya mangidatun ka sagsagut se̍ naidaga nga datun e̍ Apu Diyus. Dikad pe̍ idi nga Kangatuwan nga Agsirsirbi nga mangibegbeggi dactida e̍ Apu Diyus itan, masapul met pe̍ nga uwed idatun na.

⁴ Ket no idi nga lubung kuma pekkem ya edyan na, madi met maibilang nga kustu nga agsirsirbi. Ta no idi nga lubung, uwed mettin diya sigud nga agsirsirbi nga mangidatdatun kadiya sagsagut nga maikanatad mettas kadiya al-alagaden ito Linteg ne̍ Muyse̍s.

⁵ Ngem ya kaipapennan niya panagsirsirbi diya agsirsirbi idi nga lubung, kaiyarigan ngas met niya kustu nga uwed enna langit, ta arig nga kaasping winno niniwing ngas niya pudnu. Ta agten met ito timpu nito Muyse̍s, ito nisuru ne̍ Apu Diyus igina ya panangbangun na ito pagdaydayawan nga tulda itun. Ta nibilin ngarud ne̍ Apu Diyus ito Muyse̍s itun, nga kinunen na, “Kadiya amin nga arimanem, annadam ngarud ya panangtulad mu, tasun maikanatad nga tutu ito nisuruc ikew enna Tageytey Sinay,” kunen na.

⁶ Ngem ya kinapudnu na, nangatngatu nga unay ya panagsirsirbi nga naisaad e̍ Je̍sus ngem iya panagsirsirbi diya uwed idi nga lubung. Ta igina mettin ya mangibabaet dactidan e̍ Apu Diyus maikanatad mettas iya namaymayat nga tulag. Ket idi nga namaymayat nga tulag tida, namaymayat ngarud ngem ito non-ona nga tulag. Ta namaymayat ngamin ya nakaibangunan na, nga itu dito nikari ne̍ Apu Diyus.

Maipanggep iya baru nga tulag

⁷ Namaymayat ngarud ya nodi nga tulag, ta no awan pagkurangan nito nona, bekken kuma nga kasapulan ya maikadduwa ngin.

⁸ Ngem gapu ta emmu ne̍ Apu Diyus nga uwed pagkurangan dito toley nga nasakupan nito nona nga tulag, ket agten idi ya kinunen na igida itun: “‘Ngarud,’ kunen niya Apu, ‘Madatngan nad ya timpu nga uwed baru nga tulag nga bangunec kadiya toley ku nga kapututan dito Israe̍l se̍ Huda.

⁹ Ngem ya baru nga tulag nga bangunec, bekken nin nga agten ito tulag nga binangun ku itun kadito am-ama da, ito timpu nga arig nga gine̍pe̍d ku da, nga nipanaw ku da enna E̍hiptu. Ta igida itun, nauma da met nga agtungpal ito tulag nga nibagac igida, itu nga binaybay-ac dan,’ kunen niya Apu.

¹⁰ Ket kunen na manin, ‘Agten idi ya baru nga tulag nga bangunec kadiya kapututan nito Israe̍l no madatngan nad ya timpu na: Ipay ku nad diya bilbilin ku iya panpanunut diya toltoley, ket ya lemlemmet da, itu nad ya arig nga pagisuratac kadidi nin. Ket iyaken nad ya Diyus da, ket igida nad met pe̍ diya toley ku.

¹¹ Ket madi nad masapul nga agsisinnuru diya agkakailiyan winno diya agkakabsatin maipanggep iya pannakaemmu da iyaken. Madi da nad ngarud masapul nga ibaga nga, “Makiyem-emmu ka kuma ngarud iya Apu.” Ata amin da, em-emmu dac nad mettin, orey diya toley nga e̍teng ngas ya dayaw da, se̍ pati diya kadayawan nga toley.

¹² Ta pakawanec nad ngarud diya dake̍c nga winangwangel da, ket madic nad pe̍ laglagipen nin diya basbasul da,’” kunen na.

¹³ Dikad pe̍ ito panangunen ne̍ Apu Diyus nga uwed baru nga tulagin, itu met ya panangipakaemmu na dactida nga to nona nga tulag, ibilang na nga dadaanin. Ket emmu tida nga no ya isa nga nadaan nga banag nga awan sirbi nan, ket malabes ngasin iya di mabayag.