He̍briyu 7 - Ya Baru nga Tulag

To Me̍lkise̍de̍c, nga mangibegbeggi

¹ Kaiyarigan ngarud ne̍ Je̍sus to Me̍lkise̍de̍c, ta to Me̍lkise̍de̍c, ket ari itun ka ili nga Sale̍m, se̍ mangibegbeggi pe̍ itun kadiya toltoley e̍ Apu Diyus nga Kangatuwan. Ket ito naggayat to Abraham nga nakigubat kadito duduma nga ar-ari nga inabac na, nawe̍ sinabet nito Me̍lkise̍de̍c. Ket nikararagan na ka pangpadayaw na ito Abraham iya imatang ne̍ Apu Diyus.

² Ket to Abraham, ne̍cde̍ na met ito Me̍lkise̍de̍c ya apagkapullu nito amin nga inalac na kadito nakigubgubatan na itun. Ket ya nagan nga Me̍lkise̍de̍c, kagi He̍briyu, nga kayat na nga kagiyen, “Ari nga Mangpalinteg.” Ket to Me̍lkise̍de̍c, mabalin pe̍ nga maawagan ka “Ari nga Mangpatalna”, ta ya ili nga Sale̍m met to pagariyan na, ket “talna” ya kaipapennan niya kagi nga Sale̍m.

³ Ket madi tida met emmu no nagan ya ama se̍ ya ina nito Me̍lkise̍de̍c, se̍ awan pe̍ makaemmu no nagan ya nagtactaudan na nga kapututan. Awan pe̍ makaemmu no nungey to pannakaiyanac na se̍ to pannakatey na. Ket agten mettas iya Anac ne̍ Apu Diyus, ta awan met panagpatingga niya panangibegbeggi na ka toley.

⁴ Ngarud, nangatu nga unay ya kinadayaw nito Me̍lkise̍de̍c. Ta orey to ama tida nga Abraham, nange̍cde̍ met nga sidadayaw ito Me̍lkise̍de̍c ka apagkapullu nito inalac na ito panangab-abac na ka gubat itun.

⁵ Ket laglagipen tida kuma met pe̍ to naibilin sigun ito Linteg ne̍ Muyse̍s, nga dito kapututan nito Le̍bi, nga itu diya nadutukan nga agsirsirbi iya pagdaydayawan, alac da kanu ya apagkapullu diya masapulan diya toltoley. Ket dito nagalac, kapada da met pe̍ dito nabilin nga mange̍cde̍ ka apagkapullu diya masapulan da, ta agpapada da met nga kapututan nito Abraham.

⁶ Ngem to Me̍lkise̍de̍c nga gennung, bekken met nga kapututan nito Le̍bi. Ngem orey bekken, ket ne̍cdan latta nito Abraham iya apagkapullu nito naalac na. Ket to Abraham, igina met ya nangikariyan ne̍ Apu Diyus kadiya nagpaay para dactida nga amin. Ngem orey agten iyan, uwed met ito Me̍lkise̍de̍c itun ya turay nga mangpadayaw ito Abraham iya imatang ne̍ Apu Diyus.

⁷ Ket emmu tida met nga ya uwed turay na nga mangpadayaw, nangatngatu ngarud ya saad na ngem iya saad niya mapadayawan.

⁸ Ket to Me̍lkise̍de̍c, bekken nga agten kadito kapututan nito Le̍bi nga agsirsirbi iya pagdaydayawan. Ta no igida, nabilin da ngarud nga mangalac ka apagkapullu diya masapulan diya toltoley, ngem toley da ngas met nga uwed pannakatey da. Ngem to Me̍lkise̍de̍c nga isa pe̍ nga nangalac ka apagkapullu, ket awan emmu tida nga panagpatingga niya biyag na, sigun iya naipakaemmu iya Bibliya.

⁹ Ket bekken nas met nga iyan, ta to Le̍bi pe̍ nga akin-kapututan mettas kadito nadutukan nga mangalac kadiya apagkapullu diya masapulan diya toltoley, arig nga igina met pe̍ ya isa nga nange̍cde̍ ka apagkapullu ito Me̍lkise̍de̍c. Ta ito panange̍cde̍ nito Abraham ito apagkapullu nito naalac na ito Me̍lkise̍de̍c, arig nga nairaman pe̍ to Le̍bi iya panange̍cde̍ na.

¹⁰ Ta orey madi pekkem naiyanac to Le̍bi ito panangsabet nito Me̍lkise̍de̍c ito Abraham itun, ket arig met nga uwed din nga nakibulubulun ito Abraham nga nagtaudan na. Ta to Le̍bi, ket isa met kadito kapututan nito Abraham.

Uwed nagkurangan nito panagsirsirbi de̍ Le̍bi

¹¹ Ket ito panagsirsirbi dito mangibegbeggi nga kapututan nito Le̍bi, itu to pannakaibilin nito Linteg ne̍ Muyse̍s kadiya toltoley itun. Ngem to panagsirsirbi dito kapututan nito Le̍bi, madi makakumplitu iya pannakaibilang diya toley nga awan pagkurangan da iya imatang ne̍ Apu Diyus. Itu nga uwed pekkem kasapulan tida nga sabali nga mangibegbeggi nga agsirsirbi. Ket ya masapul tida, isa mettas nga maikanatad ito panagsirsirbi nito Me̍lkise̍de̍c, nga bekken nga agten ito panagsirsirbi de̍ Arun itun nga kapututan de̍ Le̍bi.

¹² Ket gapu ta nasukatanin to panagsirsirbi dito mangibegbeggi, masapul ngarud met nga masukatan pe̍ ya Linteg gin.

¹³ Kayat na nga kagiyen nga ya simublat kadito nona nga mangibegbeggi, ket bekken met nga isa nga kapututan nito Le̍bi, no di lugud sabali ya akin-kapututan igina. Ket ya akin-kapututan igina, awan met pekkem timaud igina itun nga agsirsirbi iya pagdaydayawan.

¹⁴ Ta emmu tida nga ya Apu tida, nagtaud met iya kapututan nito Huda. Ket tutu met nga awan naibaga nito Muyse̍s maipanggep ka panagsirsirbi diya kapututan nito Huda iya pagdaydayawan.

Uwed kabarbaru nga mangibegbeggi dactidan e̍ Apu Diyus

¹⁵ Ket nabatbatad pekkem yan nga banag no laglagipen tida ya sabali nga mangibegbeggi nga nagpasingen nin, nga itu ya uwed panagsirbi na nga agten mettas ito panagsirsirbi nito Me̍lkise̍de̍c.

¹⁶ Ket idi nga nagpasingen nin, nagbalin ngarud nga mangibegbeggi dactida e̍ Apu Diyus. Ngem ya panangibegbeggi na, bekken nga sigun iya bilin niya isa nga linteg maipanggep kadiya nagputputut nga nagtaudan diya agsirsirbi e̍ Apu Diyus, no di lugud naisaadin gapu iya pannakabalin nga tumaud iya agnanayun nga biyag nga madi mabalin nga pagpatinggaen.

¹⁷ Ket itu yan to kunen na iya Bibliya nga kunen na, “Isa ka nga agnanayun nga agsirsirbi nga mangibegbeggi, nga agten mettas ito panagsirsirbi nito Me̍lkise̍de̍c,” kunen na.

¹⁸ Dikad pe̍ to nona nga naibilin, nagpatingga ngarud ya sirbi nan, ta bekken nga umdas se̍ madi makatulung dactida.

¹⁹ Ta awan met naibilang nga awan pagkurangan na iya imatang ne̍ Apu Diyus gapu ito Linteg. Ket ita, uwed met namaymayat nga pagnamnamaan nga naipakaemmu dactidan, ket itu ya pakaiyadenniyan tidan e̍ Apu Diyus.

Namaymayat ya panangibegbeggi ne̍ Je̍sus

²⁰ Ket idi nga mangibegbeggi nga pagnamnamaan tida itan, namaymayat ngarud. Ta uwed met to kari nga nisapata ne̍ Apu Diyus igina ito nagbalin nga mangibegbeggi dactida e̍ Apu Diyusin. Ngem dito kapututan nito Le̍bi nga gennung, ito nagbalin da nga agsirsirbi iya pagdaydayawan, awan met nisapata ne̍ Apu Diyus igida nga kari na.

²¹ Ngem to naisukat igida nga mangibegbeggi, igina ngas met to nagkariyan ne̍ Apu Diyus, ito nipaisurat na to nisapata na nga kunen na, “Iyaken nga Apu, nagsapata ngac kun, ket pulus nga madic babawiyen to nikaric ito kinunec nga, ‘Isa ka nga agnanayun nga agsirsirbi nga mangibegbeggi kadiya toltoley iyaken.’”

²² Dikad pe̍ gapu idi nga nisapata ne̍ Apu Diyus, ket e̍ Je̍sus ngarudin ya mangpatalged nga uwed mettin namaymayat nga tulag nga inariman ne̍ Apu Diyus dactidan.

²³ Ket dito agsirsirbi iya pagdaydayawan itun, adu da met, ata nagsasarunu nga naisaad, gapu ta matmatey da. Ket iya agten iyan, nagpatingga met ya panagsirsirbi niya tunggal isa igida no natey yin.

²⁴ Ngem no e̍ Je̍sus nga gennung, awan met pagpatinggaan niya saad na nga agsirsirbi, ta agnanayun met nga madi matey yin.

²⁵ Itu nga awan pulus pagkurangan na ka agnanayun ya panangisalakan na kadiya umadenni e̍ Apu Diyus gapu igina. Ta igina, sibibiyag met nga mangibegbeggi ka agnanayun dactida e̍ Apu Diyus.

E̍ Je̍susin ya Kangatuwan nga Mangibegbeggi

²⁶ Dikad pe̍ igina, maitutup met nga Kangatuwan nga Mangibegbeggi dactida e̍ Apu Diyus, ta awan basul na winno kinadake̍c na, se̍ awan pe̍ mansa igina. Ket idi nga mangibegbeggi, naiduma met kadiya sibabasul nga toltoley, ket naisaad met pe̍ ka nangatngatu ngem kadiya nailangitan.

²⁷ Igina, bekken pe̍ nga agten kadito nona nga naisaad nga kangatuwan nga agsirsirbi ito pagdaydayawan, ta no igida, nasapul da nga inalgew nga agdatdatun gapu kadiya basul da mettas se̍ gapu kadiya basbasul diya duduma nga toley. Ngem igina nga gennung, bekken nga masapul nga agten iyan. Ta nam-ame̍nsan ngas met nga nidatun na ya mismu nga beggi na nga naipaay kadiya basbasul diya toltoley, ket kustu win para iya amin nga timpu.

²⁸ Ket to pannakaisaad nidi nga nagbalin nga mangibegbeggi dactida e̍ Apu Diyus, bekken met nga agten ito pannakaisaad dito nadutukan nga kangatuwan nga agsirsirbi itun sigun ito Linteg nito Muyse̍s. Ta igida, nadutukan da orey uwed met pagkurangan da. Ngem to pannakaisaad niya Anac ne̍ Apu Diyus nga gennung, bekken met nga sigun ito Linteg nito Muyse̍s, no di lugud sigun ito kari mettas ne̍ Apu Diyus nga nisapata na nga nod-odi ngem ito pannakabangun nito Linteg. Ket napanecnekkanin nga awan ngarud pagkurangan niya Anac ne̍ Apu Diyus ka agnanayun.