He̍briyu 6 - Ya Baru nga Tulag

¹ Dikad pe̍ isardeng tida kuma lugudin ya panangdagdagollit tida kadito nona nga naadal tida nga panursuru win maipanggep e̍ Kristu. Ituluy tida kuma ngarud ya panagadal ka pangpabaked iya panamati tida, nga tarigagayan tidan ya panamati nga nabaked nga awan pagkurangan na. Itu nga awan sirbi na dactidan no pasoliyan tida manin nga adalen dito nona nga panursuru maipanggep iya panagbabawi tida kadito tungtungpalen nga awan mamaay da, se̍ maipanggep no kumaan kuma niya panamati tida e̍ Apu Diyus.

² Se̍ madi tida pe̍ masapul nga adalen manin ya maipanggep kadiya nadumaduma nga al-alagaden maipanggep iya pannakadalus, winno ya panangipatey ka ima iya ulu niya maikararagan, se̍ ya panursuru maipanggep iya panagungar nad diya natey, se̍ ya panursuru maipanggep iya pannakaukum nga agnanayun ya dusa na.

³ Ngarud, tarigagayan tida kuma diya panursuru nga masapul tida pekkem nga emmuwen. Ket itu ngarud ya wanglen tidan, no ipalubus ne̍ Apu Diyus.

⁴ Agten tida kuma ngarud iyan, ta emmu tida nga diya toley nga sumina iya panamati da, awan lugud pagbabawiyan dan no tutu nga nakaawat dan. Ngarud, no naglak-am dan iya panangaasi ne̍ Apu Diyus se̍ iya kauwed niya Ispiritu Santu,

⁵ se̍ no naemmuwan da pe̍ yin ya kinapaw-is niya kagi ne̍ Apu Diyus se̍ ya pannakabalin nga masingen nad iya maadpangan nga timpu,

⁶ se̍ da latta sumina iya panamati da, ket awan ngarud makapababawi igidan iya panamati da. Ta diya agten iyan nga toley, arig nga gabay da nga ilansa manin ya Anac ne̍ Apu Diyus iya krus na, nga iyal-alyew da iya imatang diya toltoley.

⁷ Kaspagarigan ya ginet nga pe̍yeng nga maud-udanan se̍ pagtubuwan diya nabaru nga mula, ket makatulung ngarud iya makin-ginet, ket aglak-am ngarudin iya tulung ne̍ Apu Diyus.

⁸ Ngem no pagtubuwan nas diya dake̍c nga rucruut nga uwed rasi da, awan met sirsirbi na. Ket kaynun no kaunget tin ya makin-ginet, ket agbanag ngas met yan nga ginet nga mapooranin.

⁹ Ngem orey agten iyan ya pangngarig ku, patpatgec, emmuc ngarud nga bekken nga agten iyan ya pagbalinan niya pannakaisalakan nu, no di lugud namaymayat.

¹⁰ Ta emmu tida nga gapu ta kustu ya pananglinteg ne̍ Apu Diyus, silalagip ngarud kadiya nabaru nga winangel nu. Ket se̍ silalagip pe̍ iya panagayat nu igina, nga ipasingen nu gapu iya panangtulung nu kadiya pada tida nga mamati, nga itu ya winangwangel nu itun, se̍ orey ita pe̍.

¹¹ Ket ya gabay mi, ket agpasnec kuma ya tunggal isa dakayu iya panangpabileg nu iya panamati nu, nga agten mettas iya panagipasnec nu iya panangtulung nu kadiya kapada nu. Agten iyan kuma ya wanglen nu, tasun agingga iya panungpalan, awan pagkurangan niya kinatalged nu gapu iya namnama nu e̍ Apu Diyus.

¹² Ta madi kayu kuma agsadsadut, no di lugud tuladen nu diya nagtawidin kadiya nikari ne̍ Apu Diyus. Nagtawid da ngarud gapu iya panamati se̍ panaganus da.

Maipanggep iya kari ne̍ Apu Diyus

¹³ To Abraham ya isa nga agten kadiyan. Ta ito nagkari nge̍ Apu Diyus ito Abraham itun, ket ya mismu nga nagan mettas ne̍ Apu Diyus ya nangpanecnec na ito kari na, ta awan ngarud met nangatngatu ngem e̍ Apu Diyus.

¹⁴ Itu nga kinunen na, “Ikaric nga tulungan naka nga tutu, se̍ paaduwec diya kapututam,” kunen na.

¹⁵ Ket iya agten iyan, nagun-ud ngarud nito Abraham itun to nikari ne̍ Apu Diyus igina, gapu ta sinanama nga nagan-anus.

¹⁶ Ket dactida met pe̍ ya pagpaayan niyan nga kari, ta agten idi met: No toley ya agkari, masapul nga uwed nangatngatu ngem igina nga pangpanecnec na iya kari na, tasun mapatalgeddan ya kari na. Ket iya agten iyan, mapatalna ngarud diya makisupyat, gapu ta napatalgeddanin.

¹⁷ Ket agten pe̍ iyan to winangel ne̍ Apu Diyus itun, ta gabay na nga ipanecnec nga nalaing kadiya pinatawidan na nga napudnu met ya panggep na nga madi na ibabawi yin. Ket nipanecnec na met to kari na ka sapata nga mangpatalged.

¹⁸ Dikad pe̍ uwed diyan nga duwa nga inariman ne̍ Apu Diyusin nga kari na se̍ sapata na, nga awan pulus pannakabaliw dan, ket emmu tida nga pulus nga madi mabalin nga agbusid nge̍ Apu Diyus maipanggep kadiyan. Itu nga dactida nga agtalec iginan, mangnamnama tida ngarudin ito naikari dactida.

¹⁹ Ket idi nga namnama tida, arig nga baud nga uwed nabaked nga kawit na nga madi makiwa ngin. Ket pakaikaptan na met ya edyan mettas ne̍ Apu Diyus iya likud niya akin-uneg nga kurtina ito pagdaydayawan.

²⁰ Ket itu pe̍ ya napennan ne̍ Je̍sus nga non-ona ngem dactida. Igina met ya nagbalin nga Kangatuwan nga Agsirsirbi nga mangibegbeggi dactida e̍ Apu Diyus ka agnanayun, nga agten mettas ito panagsirsirbi nito Me̍lkise̍de̍c itun.