He̍briyu 5 - Ya Baru nga Tulag

¹ Tutu met yan, ket laglagipen tida kuma pe̍ yani: Diya amin nga kangatuwan nga agsirsirbi iya pagdaydayawan idi nga lubung, toley da ngas nga nadutukan. Ket igida diya naisaad nga mangibegbeggi kadiya toley e̍ Apu Diyus. Igida pe̍ diya mangidatun kadiya sagsagut se̍ naidaga nga datun e̍ Apu Diyus, gapu kadiya basbasul diya toley.

² Ket ya agten iyan nga kangatuwan nga agsirsirbi, emmu na met ya aganus kadiya toley nga mairradu se̍ diya nalaka nga maiyaw-awan ka dake̍c. Ta ya kangatuwan nga agsirsirbi, ket toley met pe̍ nga uwed pagkurangan na, nga agten mettas kadiya pada na nga toley.

³ Dikad pe̍ masapul met pe̍ ya panagdatun na gapu mettas kadiya mismu nga basul na, agten met pe̍ iya panagdatun na gapu kadiya basbasul diya duduma nga toltoley.

⁴ Ket ya toley nga naisaad nga kangatuwan nga agsirsirbi, bekken nga igina ya nangisaad iya beggi na iyan nga nadayaw nga pagsaadan na, no di lugud pinili ne̍ Apu Diyus, nga agten mettas ito panangpili ne̍ Apu Diyus ito Arun itun.

⁵ Agten met pe̍ iyan nge̍ Kristu, ta bekken met nga igina ya nangtudu iya beggi na nga Kangatuwan nga Agsirsirbi, no di lugud e̍ Apu Diyus ya nangpili igina. Ket e̍ Apu Diyus, kinunen na met e̍ Kristu itun, “Ikew ya Anac ku. Ket ita nga algew, nagbalin nac nga Ama mun.”

⁶ Ket uwed manin to kinunen na nga, “Isa ka nga agnanayun nga agsirsirbi nga mangibegbeggi, nga agten mettas ito panagsirsirbi nito Me̍lkise̍de̍c,” kunen na.

⁷ Ket ito kauwed ne̍ Je̍sus idi nga lubung, nagkarkararag nga nagad-adeng e̍ Apu Diyus, nga igina ngarud ya uwed pannakabalin na nga mangilisi e̍ Je̍sus ka patey. Nagberrit se̍ imawag nge̍ Je̍sus ka nabileg ito panagkararag na. Ket dinngeg ngarud ne̍ Apu Diyus, gapu ta sipapakumbaba nga nagtungpal nge̍ Je̍sus igina.

⁸ Ngarud, orey Anac mettas ne̍ Apu Diyus nge̍ Je̍sus, nasursuru na pe̍ ya panagtungpal, gapu kadito panaglak-am na ka rigat.

⁹ Ket ito nakasagana nge̍ Je̍susin para iya awan pagkurangan na nga saad na, igina ya nagbalin nga pakaisalakanan ka agnanayun diya amin nga agtungpal igina.

¹⁰ Ket e̍ Apu Diyus mettas ya nangisaad igina ka Kangatuwan nga Agsirsirbi nga mangibegbeggi, nga agten mettas ito panagsirsirbi nito Me̍lkise̍de̍c.

To panangliway dito He̍briyu iya panamati da

¹¹ Adu kuma pekkem ya gabay ku nga ilawlawag dakayu maipanggep idi nga banag, ngem narigat nga mailawlawag dakayu, ata narigat kayu met nga makaawat.

¹² Ta ya kinapudnu na, rumbeng ngarud met nga nagbalin kayu kuma ngin nga agisursuru iya kagi ne̍ Apu Diyus. Ngem bekken pekkem nga agten iyan, no di lugud masapul nu met latta ya mangisuru dakayu manin kadito nona nga panursuru nga gayat iya kagi ne̍ Apu Diyus. Arig kayu ngas met nga ke̍bit nga aggatgatas pekkem, ta ya ke̍bit, gatas ngas ya kabaellan na pekkem, bekken nga ya nasgat nga makan diya manacman.

¹³ Tutu met nga agten kayu iyan, ta ya aggatgatas pekkem, kaiyarigan na met ya ineebbing pekkem ya panamati na, nga madi na pekkem maawatan nga nalaing ya kaipapennan niya panursuru maipanggep iya kinalinteg.

¹⁴ Ngem ya adal nga maiyarig iya nasgat nga makan diya manacman, itu ya gabay diya manakem iya panamati dan, nga itu diya naruwam iya panagilasin iya nabaru se̍ iya dake̍c kin.